விடுதலைப் புலிகளுக்கு ஒத்துழைப்புகளை வழங்கியமை தொடர்பான தகவல்கள் தம்வசம் இருப்பதாக அச்சுறுத்தி தமிழ் நபர்களிடம் கப்பம் பெற்ற சம்பவங்கள் தொடர்பில் கைது செய்யப்பட்ட இரு பெண்கள் தொடர்ந்தும் விளக்கமறியலில் வைக்கப்பட்டுள்ளனர்.

தடுத்து வைக்கப்பட்டிருந்த இரண்டு பெண்களும் கடுவலை நீதிமன்றத்தில் நேற்று ஆஜர்ப்படுத்தப்பட்டு எதிர்வரும் 12 ஆம் திகதி வரை மீண்டும் விளக்கமறியலில் வைக்கப்பட்டுள்ளனர்.

ஏ.ஏ. திலினி சமன்மலி மற்றும் சுனேத்ரா பிரபானி ஜயதிலக்க ஆகிய இரண்டு பெண்களை தொடர்ந்தும் விளக்கமறியலில் வைக்குமாறு நீதவான் வசந்த ஜினதாச உத்தரவிட்டார்.

சந்தேக நபர்களான இந்த பெண்களுக்கு எதிராக மாத்தறை நீதவான் நீதிமன்றத்திலும் வழக்கொன்று நடைபெற்று வருவது நேற்று நீதிமன்றத்தில் தெரியவந்தது.

தொலைபேசி எண்கள் அடங்கிய விபரக்கொத்தில் உள்ள தொலைபேசி எண்களுடன் தொடர்பு கொண்டு தமிழர்களை அச்சுறுத்தி இந்த பெண்கள் பல காலமாக கப்பம் பெற்று வந்துள்ளதாக விசாரணைகளில் தெரியவந்துள்ளது.

மிரிஹான பொலிஸ் நிலையத்தின் விசேட குற்றத்தடுப்பு பிரிவின் அதிகாரிகளினால் இந்த பெண்கள் கடந்த மாதம் 26 ஆம் திகதி கைது செய்யப்பட்டனர்.

யாழ். உடுவில் பிரதேசத்தில் வீடொன்றினுள் புகுந்த கொள்ளையர்கள் வீட்டில் இருந்தவர்களை கோடரியினால் தாக்கியுள்ளனர்.

நேற்று முன்தினம் நள்ளிரவு கற்பகபிள்ளையார் கோவிலடி உடுவில் கிழக்கை சேர்ந்த செல்லத்துரை சண்முகநாதன் என்பவரது வீட்டிலேயே இந்த சம்பவம் இடம்பெற்றுள்ளது.

இத் தாக்குதலில் செல்லத்துரை சண்முகநாதன்(50) அவரது மனைவியான நாகேஸ்வரி (45) இவர்களது மகனான ஜதுசன்(20) என்பவர்களே காயமடைந்த நிலையில் யாழ் போதனா வைத்தியசாலையில் அனுமதிக்கப்பட்டுள்ளனர்.

இந்த சம்பவம் தொடர்பாக வீட்டு உரிமையாளர் சண்முகநாதன் தெரிவிக்கையில்..

நேற்று நள்ளிரவு 12 மணியளவில் நாய் குரைக்கும் சத்தம் கேட்டது. அப்போது நான் வீட்டு கதவை திறந்து வெளியில் வந்து பார்த்த போது என் தலையில் கோடரியினால் கொத்தினார்கள்.

என் அவல குரல் கேட்டு ஓடிவந்த மகன் மீதும் தலையில் கொத்தினர். அதனை தடுக்க முயன்ற எனது மனைவியையும் தாக்கினார். அதன் பின்னர் வீட்டுக்குள் புகுந்தவர்கள் வீட்டின் அனைத்து பொருட்களையும் கீழே தள்ளிவிழுத்தி தேடுதல் நடத்தினார்கள்.

அதற்கிடையில் சத்தம் கேட்டு அயலவர்கள் மின் விளக்குகளை ஒளிர விட்டதும் கொள்ளையர்கள் எம் வீட்டில் இருந்து தப்பி சென்றனர். அந்த கொள்ளை குழுவில் ஐவர் வந்திருந்தனர். அவர்கள் அனைவரும் முகத்திற்கு துணி கட்டி இருந்தனர். சிங்களத்திலும் கொச்சை தமிழில் உரையாடினார்கள் என தெரிவித்தார்.

இலங்கை எதிராக அமெரிக்க உட்பட மேற்குலக நாடுகள் செயற்பட்டு வரும் நிலையில், விடுதலைப் புலிகளுக்கு ஆயுதங்களை வழங்கிய 8 நாடுகள் தொடர்பான தகவல்களை சாட்சியங்களுடன் வெளியிட அரசாங்கம் தீர்மானித்துள்ளது.

விடுதலைப் புலிகளிடம் இருந்து கைப்பற்றிய ஆயுதங்கள், இலத்திரனியல் உதிரிபாகங்கள் உள்ளிட்ட பொருட்களின் தயாரிப்பு இலக்கம் மற்றும் நாடுகளின் அடையாளம் இருந்துள்ளன.

அமெரிக்க அரசு வைத்துள்ள எம்.16 தாக்குதல் துப்பாக்கி, கடற்புலிகளின் படகுகளில் பயன்படுத்தப்பட்ட ரேதியோன் ரேடார் கட்டமைப்பு, பிரித்தானிய தயாரிப்பான கடல் ஸ்கூட்டர் உட்பட பல பொருட்களை புலிகளிடம் இருந்த நிலையில் படையினர் கைப்பற்றியுள்ளனர்.

முள்ளிவாய்க்கால் பிரதேசத்தில் இருந்து கைப்பற்றப்பட்ட எம்.16 ரக தாக்குதல் துப்பாக்கி அமெரிக்காவில் தயாரிக்கப்பட்டுள்ளதாக குறிப்பிட்டுள்ளது என பாதுகாப்பு தரப்பின் உயர்மட்ட தகவல்கள் தெரிவித்தன.

இதனை தவிர புலிகளின் இரணைமடு விமான ஓடுத்தளத்திற்கு தேவையான மின் கலன்கள், மின் விளக்குகள் என்பன பிரித்தானியா மற்றும் ஜெர்மனி ஆகிய நாடுகளை சேர்ந்த நிறுவனங்கள் தயாரித்தவை.

அத்துடன் 3 ஸ்லின் ரக விமானங்கள் பங்களாதேஷ் நாட்டின் விவசாய இரசாயன நிறுவனத்தின் ஊடாக கொள்வனவு செய்யப்பட்டதாக செக் குடியரசு இலங்கைக்கு அறிவித்துள்ளது.

இந்த உண்மைகளை வெளியிட்டு மேற்குலக நாடுகளின் முகமூடியை கழற்ற போவதாக சிரேஷ்ட பாதுகாப்பு அதிகாரி ஒருவர் கூறியுள்ளார்.

விடுதலைப் புலிகளிடம் இருந்த ஆயுதங்களின் பெறுமதி சுமார் 1400 மில்லியன் ரூபா என தெரியவந்துள்ளது.

இறுதி யுத்த காலத்தில் அதிகம் பாதித்த மாவட்டங்களில் ஒன்றான கிளிநொச்சியில், மக்களின் சுகாதார நிலையானது மிகமோசமாகப் பாதிப்படைந்துள்ளதையிட்டு, பலரின் கோரிக்கைகளுக்கு அமைவாக மூன்று சேவை மையங்கள் வடமாகாண சுகாதார அமைச்சர் ப.சத்தியலிங்கத்தினால் திறந்து வைக்கப்பட்டுள்ளது.

இந்நிகழ்வானது கடந்த 3ம் திகதி இடம்பெற்றது.

இதன்பிரகாரம் கிளிநொச்சி பழைய வைத்தியசாலைக் கட்டிடத்தில் அமைக்கப்பட்ட மாற்றுவலு அவைய தயாரிப்பு நிலையம், பரந்தன் ஆயுர்வேத வைத்தியசாலைக் கட்டிடம்,

பளையில் 71 மில்லியன் ரூபா செலவில் புதிதாகப் புனரமைக்கப்பட்ட விடுதி வசதிகளைக் கொண்ட பிரதேச வைத்தியசாலை என்பனவே திறந்து வைக்கப்பட்டனவாகும்.

வட மாகாணசபை முதல்வர் விக்னேஸ்வரனும், ஜனநாயக மக்கள் முன்னணி தலைவர் மனோ கணேசனும் கொழும்பில் நேற்று மாலை சந்தித்து கலந்துரையாடியுள்ளனர்.

இச்சந்திப்பு கொழும்பிலுள்ள விக்னேஸ்வரனின் இல்லத்தில் இடம்பெற்றது. இக்கலந்துரையாடல் இடம்பெற்றதன் பின்னர், ஜனநாயக மக்கள் முன்னணியின் மக்கள் பிரதிநிதிகள், மரியாதை நிமித்தம் முதல்வர் விக்னேஸ்வரனை சந்தித்தனர்.

இந்த மரியாதை நிமித்த சந்திப்பில் ஜனநாயக மக்கள் முன்னணியின் மேல்மாகாணசபை உறுப்பினர்கள் நல்லையா குமரகுருபரன், எஸ்.ராஜேந்திரன், மத்திய மாகாணசபை உறுப்பினர் வேலு குமார், கொழும்பு மாநகரசபை உறுப்பினர்கள் வேலணை வேணியன், சண்.குகவரதன், பிரியாணி குணரத்ன, கே.ரி.குருசாமி, எஸ்.பாஸ்கரா, லோரன்ஸ் பெர்னாண்டோ ஆகியோர் இடம்பெற்றனர்.

இச்சந்திப்பு குறித்து மனோ கணேசன் ஊடகங்களுக்கு தெரிவித்ததாவது..

பரஸ்பர வேலைப்பளு காரணமாக தள்ளி போடப்பட்டிருந்த இந்த சந்திப்பு இன்று (நேற்று) இடம்பெற்றது. இதன்போது வடக்கில் மக்கள் ஆணையுடன் தெரிவு செய்யப்பட்டு ஆட்சி பொறுப்பில் இருக்கும் கூட்டமைப்பு நிர்வாகத்தை, முடக்கும் அரசின் செயல்பாடுகள் பற்றிய நிலைமைகளை முதல்வர் விளக்கி கூறினார்.

அரசாங்கம் உலகத்திற்கு ஒன்றை சொல்லுவதும், உள்நாட்டில் இன்னொன்றை செய்வதும் என்ற இரட்டை நிலைபாட்டில் செயல்படுவதாக முதல்வர் குற்றம் சாட்டினார். அதேவேளை சிங்கள இடதுசாரிகள் மற்றும் ஜனநாயக சக்திகள் மத்தியில் ஒரு சிறு புரிந்துணர்வு தென்படுவதாகவும், குறிப்பாக அமைச்சர்கள் திஸ்ஸ விதாரண, வாசுதேவ, டிவ் குணசேகர ஆகியோர் தம்முடன் புரிந்துணர்வை ஏற்படுத்தி வருவதாகவும் கூறினார்.

வடக்கின் உண்மை நிலைமைகள் பற்றி ஜனநாயக மக்கள் முன்னணி சிங்கள மக்களுக்கு எடுத்து கூறுவதை வரவேற்ற அவர், இந்த பணியை இன்னமும் வலுவாக முன்னெடுத்து, உண்மை தகவல்களை சாதாரண சிங்கள மக்களுக்கு எடுத்து கூறும்படி வேண்டுகோள் விடுத்தார்.

எதிர்வரும் மேல்மாகாணசபை தேர்தலில், மேல்மாகாணத்தின் கொழும்பு, கம்பாஹா, களுத்துறை ஆகிய மூன்று மாவட்டங்களிலும் நமது கட்சி போட்டியிடுவது பற்றியும், இது தொடர்பில் அடுத்த வாரம் கொழும்பில் கூடவுள்ள எங்கள் அரசியல்குழு கூட்டத்தில் இறுதி முடிவு எடுப்படவுள்ளது பற்றியும் நான் முதல்வருக்கு எடுத்து கூறினேன்.

தமிழினத்தின் நலன் கருதி தமிழ் தேசிய கூட்டமைப்பும், ஜனநாயக மக்கள் முன்னணியும் ஒன்றை ஒன்று ஆதரித்து புரிந்துணர்வுடன் செயல்படவேண்டும் என்ற நிலைப்பாட்டில் தான் மிக தெளிவாக இருப்பதாக விக்னேஸ்வரன் கூறினார். அத்துடன் தத்தமது பிராந்தியங்களில் இரண்டு கட்சிகளும் பலமாக இருப்பது காலத்தின் கட்டாயம் என்றும் கூறினார்.

தமிழ் அரசியல் கைதிகளின் பிரச்சினை தொடர்பில் நான் கடந்த மாதம் முதல்வருக்கும், ஜனாதிபதிக்கும் எழுதி அனுப்பியிருந்த கோரிக்கைகள் பற்றியும் கலந்துரையாடப்பட்டது.

கைதிகள், தடுத்து வைக்கப்படிருப்போர் தொடர்பான விபரங்களை சட்ட மாஅதிபர் திணைக்களத்திடம் எதிர்பார்த்துள்ளதாகவும் முதல்வர் தெரிவித்தார். இந்த அதிமுக்கிய மனிதநேய விவகாரம் தொடர்பில் இணைந்து செயல்படுவதற்கு முடிவு செய்யப்பட்டது.

இது தொடர்பில் விரைவில் ஒரு செயற்பாட்டு குழு அமைக்கப்பட்டு காரியங்கள் முன்னெடுக்கப்பட வேண்டும் என்று விக்னேஸ்வரன் கூறினார்.

வடக்கு மக்களின் ஜனநாயக போராட்டங்களுக்கு நமது கட்சி அளித்து வரும் ஆதரவை நாம் தொடர்ந்து வழங்கி வரும் அதேவேளையில், தமிழ் மக்களின் அபிலாஷைகள் தொடர்பிலும், வடக்கு மாகாணசபை முடக்கப்படுவது தொடர்பிலும் உண்மை நிலவரங்களை நாம் தொடர்ந்து சிங்கள மக்களுக்கு எடுத்து கூறுவோம் என நான், முதல்வர் விக்னேஸ்வரனுக்கு உறுதியளித்தேன் என்றார்.