மாவீரர் தினத்தை அனுஸ்டிக்கும் வகையில் வடக்கில் ஆர்ப்பாட்டம் அல்லது பேரணி மேற்கொள்வது சட்டவிரோத செயல் என பொலிஸார் தெரிவித்துள்ளனர்.

தமிழீழ விடுதலைப் புலிகள் தங்கள் உறுப்பினர்களின் இழப்பை நினைவுபடுத்தும் முகமாகவே மாவீரர் தினத்தை அனுஸ்டித்ததாக பொலிஸார் குறிப்பிட்டுள்ளனர்.

ஆனால் புலிகள் அமைப்பு தோற்கடிக்கப்பட்ட பின்னும் வடக்கு பகுதியில் கடந்த வருடங்களில் சில பிரிவினர் மாவீரர் தினத்தை அனுஸ்டித்ததாக பொலிஸார் தெரிவிக்கின்றனர்.

இவ்வருடமும் நவம்பர் 27ம் திகதி மாவீரர் தினத்தை அனுஸ்டிக்கும் வகையில் வடக்கில் ஆர்ப்பாட்டம், பேரணி நடத்த சில பிரிவினர் தீர்மானித்துள்ளதாக தகவல் கிடைத்துள்ளதென பொலிஸார் கூறுகின்றனர்.

வடக்கில் இருந்து வெளியாகும் தமிழ் ஊடகங்களிலும் இது குறித்து நேற்று செய்தி வெளியிடப்பட்டுள்ளதாக பொலிஸார் தெரிவிக்கின்றனர்.

எனினும் புலிகள் தோற்கடிக்கப்பட்டுள்ளதால் மாவீரர் தின அனுஸ்டிப்பு சட்டவிரோதமானதென பொலிஸ் ஊடகப் பேச்சாளர் அஜித் ரோஹண தெரிவித்தார். பாதுகாப்பு தரப்பினரின் கட்டளைகளை மீறி செயற்படுவோர் மீது சட்ட நடவடிக்கை எடுக்கப்படும் என அவர் குறிப்பிட்டார்.

5ம் ஆண்டு புலமை பரிசில் பரீட்சையில் மேற்கொள்ளப்பட வேண்டிய மாற்றங்கள் குறித்து கல்வியாளர்களிடம் பெறப்பட்ட கருத்துகள் அடங்கிய அறிக்கை எதிர்வரும் வாரங்களில் வெளியிடப்படும் என இலங்கை மனித உரிமைகள் ஆணைக்குழு தெரிவித்துள்ளது.

இம்முறை சிறுவர் தினத்தில் புலமை பரிசில் பரீட்சை பெறுபேறு வெளியிடப்பட்டதால் பாரிய பிரச்சினை ஏற்பட்டது. இது குறித்து இலங்கை மனித உரிமைகள் ஆணைக்குழுவிடம் முறைப்பாடுகள் செய்யப்பட்டுள்ளன.

முறைப்பாட்டின் அடிப்படையில் 30 கல்வியாளர்களிடம் கருத்தறிய இலங்கை மனித உரிமைகள் ஆணைக்குழு நடவடிக்கை எடுத்தது.
அதன் இறுதி அறிக்கை எதிர்வரும் வாரங்களில் வெளியிடப்படும் என மனித உரிமைகள் ஆணைக்குழுவின் தலைவர் கலாநிதி பிரதிபா மகாநாமஹேவா தெரிவித்தார்.

வரவு செலவுத் திட்டத்தின் எதிரொலியாக பல அத்தியாவசிய உணவுப் பொருட்களுக்கான விலைகள் உயர்வடைந்துள்ளன.

2014ம் ஆண்டுக்கான வரவு செலவுத் திட்ட யோசனை கடந்த 21ம் திகதி ஜனாதிபதி மஹிந்த ராஜபக்சவினால் சமர்ப்பிக்கப்பட்டது.

இந்த வரவு செலவுத் திட்டத்தின் யோசனைகளுக்கு அமைய பல அத்தியாவசிய உணவுப் பொருட்களின் விலைகள் உயர்த்தப்பட்டுள்ளன.

சீனி, கருவாடு, நெத்தலி, தோடம்பழம், மாசி பயறு உள்ளிட்ட பொருட்களுக்கான விலை உயர்த்தப்பட்டுள்ளது. இந்தப் பொருட்கள் இறக்குமதி செய்வதற்கான வரி உயர்த்தப்பட்டுள்ள காரணத்தினால் இவ்வாறு விலைகள் உயர்த்தப்பட்டுள்ளன.

சீனி ஒரு கிலோ 5 ருபாவினாலும், கருவாட்டு வகைகள் ஒரு கிலோ 27 ரூபாவினாலும், பயறு ஒரு கிலோ 2 ரூபாவினாலும், மாசி ஒரு கிலோ 27 ரூபாவினாலும், தோடம் பழம் 5 ரூபாவினாலும் அதிகரிக்கப்பட்டுள்ளது.

பால் மா வகைகளின் விலை உயர்வடையக் கூடிய சாத்தியம் காணப்படுவதாகத் தெரிவிக்கப்படுகிறது. பால் மா உற்பத்திகளின் விலையை உயர்த்துமாறு ஐந்து நிறுவனங்கள், நுகர்வோர் அதிகாரசபையிடம் கோரிக்கை விடுத்துள்ளன.

உலகச் சந்தையில் பால் மா உற்பத்திகளுக்கான விலை உயர்வடைந்துள்ளதாகவும் இதனால் இலங்கையிலும் விலையை உயர்த்த நடவடிக்கை எடுக்க வேண்டுமெனவும் குறித்த நிறுவனங்கள் கோரியுள்ளன.

கடந்த கால விலைகள் தொடர்பிலான தகவல்களை நுகர்வோர் அதிகாரசபை கோரியுள்ளதாகத் தெரிவிக்கப்படுகிறது. இந்த விடயங்களை கருத்திற் கொண்டு விலை ஏற்றம் குறித்து தீர்மானிக்கப்படும் என நுகர்வோர் அதிகாரசபை அறிவித்துள்ளது.

இலங்கை தொடர்பில் சீனாவின் நிலைப்பாட்டில் எந்தவித மாற்றமும் செய்யப்படவில்லை என இலங்கையில் உள்ள சீன தூதரகம் தெரிவித்துள்ளது.

மனிதஉரிமைகளைப் பாதுகாக்கவும், அதனை ஊக்குவிக்க இலங்கை நடவடிக்கை எடுக்க வேண்டும் என்று அண்மையில், சீன வெளிவகார அமைச்சின் செயலாளர், கூறியிருந்தார். இது இலங்கை தொடர்பான சீனாவின் கொள்கையில் ஏற்பட்டுள்ள அதிர்ச்சி தரும் மாற்றமாக ஊடகங்கள் வர்ணித்திருந்தன.

இதேவேளை சீன வெளிநாட்டமைச்சின் கூற்றை அநேகமான ஊடகங்கள் திரிபுபடுத்தி உள்ளதாகவும் இலங்கையிலுள்ள சீன தூதரகம் அறிவித்துள்ளது.

மனித உரிமைகளை முன்னேற்றுவதிலும் நாட்டை கட்டியெழுப்புவதிலும் முன்னேற்றத்தை காட்டுகின்ற இலங்கைக்கு எதிராக பல்வேறு குற்றச்சாட்டுக்களை முன்வைத்து நாட்டுக்குள் குழப்ப நிலைமையை ஏற்படுத்துவதற்கு காரணமாகின்ற நடவடிக்கைகளை பொருட்படுத்த வேண்டாம் என சீனா சர்வதேச சமூகத்திடம் வேண்டுகோள் விடுததுள்ளது.

நாட்டின் ஸ்திரத்தன்மை மற்றும் பொருளாதாரத்தை முன்னேற்றுவதற்கு உரிய சூழ்நிலையை கட்டியெழுப்புவதற்கு கைகொடுப்பதே சிறந்ததென சுட்டிக்காட்டுகின்ற சீனா மனித உரிமைகளை முன்னேற்றுவதிலும் நாட்டை கட்டியெழுப்புவதிலும் அதே போன்று சகல துறைகளிலும் முன்னேற்றத்தை காட்டுகின்ற இலங்கைக்கு மேலும் ஒத்துழைப்பு வழங்குவதாக சீனா மீண்டும் சுட்டிக்காட்டியுள்ளது.

மனித உரிமைகளை பேணவும் நாட்டை கட்டியெழுப்பவும் இலங்கை கடந்த காலங்களில் பல்வேறு நடவடிக்கைகளை மேற்கொண்டது. இது குறித்து தொடர்ந்து நடவடிக்கை எடுத்துவரும் இலங்கை அரசாங்கத்துக்கும் மக்களுக்கும் வலிமையும் ஆற்றலும் உள்ளன எனவும் சீனா நம்பிக்கை கொண்டுள்ளது.

இலங்கையில் மனித உரிமைகளை முன்னேற்றுவதற்கு நடவடிக்கை எடுக்கப்பட வேண்டும் என சீன வெளிநாட்டமைச்சு விடுத்ததாக கூறப்படும் உரை மற்றும் பொதுநலவாய மாநாட்டின் போது இலங்கை மனித உரிமைகள் விவகாரம் தொடர்பில் திகதி நிர்ணயித்து பிரிட்டிஷ் பிரதமர் டேவிட் கெமரூன் கூறிய கூற்று தொடர்பில் கருத்துத் தெரிவித்துள்ள சீனா, இவ்வாறு தெரிவித்துள்ளதாக இலங்கையிலுள்ள சீன தூதுவர் அலுவலகம் குறிப்பிட்டுள்ளது.

இலங்கையில் நடைபெற்றதாக கூறப்படும் யுத்த குற்றச்சாட்டுக்கள் தொடர்பில் 2014 ஆம் ஆண்டு மார்ச் மாதத்துக்கு முன் விசாரணை செய்வதற்கு நம்பிக்கையான பொறிமுறையொன்றை ஏற்படுத்த வேண்டும் என டேவிட் கமரூன் தெரிவித்தார். அவ்வாறு செய்யாவிடின் சர்வதேச விசாரணையொன்றை நடத்துமாறு சர்வதேசத்திடம் வேண்டுகோள் விடுப்பதாக அவர் கூறியிருந்தார்.

எவ்வாறாயினும் இலங்கை தொடர்பில் சீனாவின் நிலைப்பாட்டில் எந்தவித மாற்றமும் செய்யப்படவில்லை என இலங்கையில் உள்ள சீன தூதரகம் தெரிவித்துள்ளது. சீன வெளிநாட்டமைச்சின் கூற்றை அநேகமான ஊடகங்கள் திரிபுபடுத்தி உள்ளதாகவும் இலங்கையிலுள்ள சீன தூதரகம் அறிவித்துள்ளது.