அனுராதபுரத்தில் இருந்து தம்மை கொழும்புக்கு அனுப்பி வைத்தவர்களே தம்மை ஏற்றி வந்த வான் சாரதிக்கு பணத்தை வழங்க வேண்டும் என சனல் 4 தொலைக்காட்சியின் ஊடகவியலாளர்கள் பொலிஸாரிடம் தெரிவித்துள்ளனர்.

தமது விருப்பத்திற்கு எதிராக அவர்கள் சொந்த செலவில் தம்மை அங்கிருந்து பலவந்தமாக அனுப்பி வைத்ததாகவும், பொலிஸார் தம்மை பலவந்தமாக வாகனத்தில் தள்ளியதாகவும் சனல் 4 தொலைக்காட்சியின் குழுவினர் குற்றம் சுமத்தினர்.

அனுராதபுரத்தில் தாம் தங்கியிருந்த போது நடந்தது என்ன என்பதை கண்காணித்து பணம் கொடுக்க வேண்டியதாக இருந்தால் பணத்தை கொடுக்கலாம் என அவர்கள் குறிப்பிட்டுள்ளனர்.

அதேவேளை கொழும்பில் இன்று காலை மோட்டார் சைக்கிள் உள்ளிட்ட வாகனங்களுடன் இரண்டு அதிவேக தொடரணிகள் தம்மை பின் தொடர்ந்ததாக சனல் 4 ஊடகவியலாளர்கள் தெரிவித்துள்ளனர்.

மக்ரே மற்றும் அவரது குழுவினரின் இந்த குற்றச்சாட்டை இராணுவப் பேச்சாளர் பிரிகேடியர் ருவான் வணிகசூரிய மறுத்துள்ளார்.

அவர்களை பின்தொடர வேண்டியதற்கான எந்த காரணங்களும் இல்லை. அவர்கள் இலங்கையில் இருப்பது தொடர்பில் மகிழ்ச்சியடைவதுடன் முதலில் அவர்கள் நாட்டில் உள்ள தற்போதைய சூழ்நிலைகள் பற்றி அனுபவங்களை பெறவேண்டும்.

அவர்களின் குற்றச்சாட்டை நிராகரிக்கின்றோம். முட்டாள்தனமானது. காரணம் அவர்களின் இந்த குற்றச்சாட்டு கவனத்தை திசைத் திருப்ப மேற்கொள்ளப்படும் தந்திரமாக இருக்கலாம் என்றார்.

முன்னதாக அனுராதபுரத்தில் இருந்து கொழும்புக்கு அழைத்து வந்தமைக்கான வாகன வாடகை வழங்கப்படவில்லை எனக் கூறி செய்யப்பட்டிருந்த முறைப்பாடு குறித்து பொலிஸார் சனல் 4 குழுவினரிடம் விசாரணை நடத்தியிருந்தனர்.

கொம்பனித் தெரு பொலிஸ் நிலையத்தில் செய்யப்பட்டடிருந்த இந்த முறைப்பாடு தொடர்பில் சனல் 4 தொலைக்காட்சியின் ஊடகவியலாளர் கெலும் மக்ரே உட்பட குழுவினரை பொலிஸார் அழைத்து விசாரணை நடத்தியிருந்தனர். எனினும் தம்மால் பணத்தை செலுத்த முடியாது என சனல் 4 குழுவினர் குறிப்பிட்டுள்ளனர்.

அண்மையில் இடம் பெற்ற ஊடகவியலாளர் மாநாட்டில் புலம் பெயர்ந்த சமூகத்தினரின் கருத்துகளை செவிமடுக்க தான் தயாராக இருக்கின்றேன் என்று ஜனாதிபதி தெரிவித்துள்ளமையை புலம்பெயர்ந்த சமூகம் தமது கவனத்தில் எடுக்க வேண்டும் என ஜனநாயக மக்கள் காங்கிரஸ் தலைவரும் கொழும்பு மாவட்ட பாராளுமன்ற உறுப்பினருமான பிரபா கணேசன் ஊடகங்களுக்கு தெரிவித்துள்ளார்.

மேலும் அவர் தெரிவித்ததாவது,

இடம்பெற்ற ஊடகவியலாளர் மாநாட்டில் ஜனாதிபதி ஐந்து விடயங்களை முன்வைத்துள்ளார். முதலாவது புலம்பெயர்ந்த சமூகத்தின் கருத்துகளை தான் செவிமடுக்க தயாராக இருப்பதாக அறிவித்துள்ளார்.

இரண்டாவது தமது கருத்துக்களையும் புலம்பெயர்ந்த சமூகம் செவிமடுக்க வேண்டும் என்றார்.

மூன்றாவது புலம்பெயர் சமூகம் இலங்கைக்கு வந்து நிலைமையை தெரிந்து கொள்ள வேண்டும் என்று அழைப்பு விடுத்திருந்தார்.

நான்காவது நாட்டை ஒரு போதும் இரண்டாக பிரிப்பதற்கு இடங்கொடுக்க மாட்டேன் என்றார்.

ஐந்தாவது போர் குற்றங்கள் விசாரனைக்குட்படுத்தப்பட்டு யாராக இருந்தாலும் அவர்களுக்கு தண்டனை வழங்கப்பட வேண்டும் என்று தெரிவித்திருந்தார்.

இந்த ஐந்து விடயங்களையும் புலம் பெயர்ந்துள்ள சமூகம் கவனத்திற்கொள்ள வேண்டும். அவர்கள் மட்டுமின்றி தமிழ் தேசிய கூட்டமைப்பும் இதனைப் பற்றி சிந்திக்க வேண்டும்.

எவ்வாறாயினும் நாட்டை இரண்டாக பிரிப்பதற்கு நாட்டில் வாழும் தமிழர்களோ அல்லது தமிழ் தேசிய கூட்டமைப்பினரோ விரும்பவில்லை என்பது உறுதியாக தெரிவிக்கப்பட்டுள்ளது. ஐக்கிய இலங்கைக்குள் இனப்பிரச்சினைக்கான தீர்வினை காணவே புலம்பெயர்ந்த சமூகம் விரும்புகின்றது என நினைக்கின்றேன்.

அதே நேரம் போர் குற்றங்கள் புரிந்தவர்கள் யாராக இருந்தாலும் தண்டிக்கப்படுவார்கள் என்ற கூற்றை முழுவதுமாக நம்புவதற்கு இல்லை. நல்லிணக்க ஆணைக்குழுவின் பரிந்துரைகளையே இந்த அரசாங்கம் இன்னும் அமுல்படுத்தவில்லை. அப்படியிருக்கும் பொழுது போர்குற்றங்கள் பின்னணியில் தெரிவித்திருக்கும் கருத்து ஒரு போதும் நடைபெறப் போவதில்லை.

ஆனாலும் கூட புலம்பெயர்ந்த தமிழர்களை ஒரு தரப்பினராக ஜனாதிபதி ஏற்றுக் கொண்டிருப்பது இதுவே முதல் முறையாகும். இது புலம் பெயர்ந்த சமூகத்தின் சக்தியை எடுத்துக் காட்டுகிறது. இதனை பிரயோகித்து புலம் பெயர்ந்த சமூகம் ஒரு கட்டமைப்புக்குள் வந்து இலங்கை அரசுடனான தொடர்புகளை ஏற்படுத்திக் கொள்ள வேண்டும்.

தனது நிலைப்பாடுகளை அடிக்கடி இலங்கை அரசாங்கம் மாற்றிக் கொள்வதை நாங்கள் பார்த்திருக்கின்றோம். அதற்காக அனைத்து சந்தர்ப்பங்களையும் நாம் உதறிவிட்டு நின்றால் இன்னும் பல தலைமுறைக்கு பிரச்சினைகளுக்கு தீர்வு காண முடியாது.

வெறுமனே யுத்தத்தில் வென்ற அரசாங்கத்தை மாற்ற வேண்டும் என்ற குறிக்கோளில் மட்டும் நாம் செயற்படுவோமேயானால் ஒரு போதும் எமது மக்களுக்கான தீர்வினை பெற்றுக் கொள்ள முடியாது. என்று பெரும்பான்மை மக்களுக்கு இந்த அரசாங்கம் தேவையில்லை என்று தோன்றுகிறதோ அன்றுதான் அரசாங்க மாற்றம் ஏற்படப் போகின்றது.

அதுவரை நாம் எமது பிரச்சினைக்கு தீர்வு காணாமல் காத்திருப்போமானால் அது எமது எதிர்காலத்திற்கு உகந்ததல்ல. ஆகவே இன்றைய நிலையில் இனப்பிரச்சினைக்கான தீர்வினை முன்னெடுக்க வேண்டிய தமிழ் தேசிய கூட்டமைப்பினரும் புலம் பெயர்ந்தவர்களும் சாணக்கியமான முறையில் செயல்பட வேண்டும்.

ஐ.நா மனித உரிமை ஆணையாளர் நவநீதம்பிள்ளையை இலங்கைக்கு வரவழைத்து கன்னத்தில் அறைந்து கொண்டது போன்று சனல் 4 ஊடகவியலாளர் ஜொனத்தன் மில்லர் இலங்கை வருவதற்கு அனுமதி வழங்கியதன் மூலம் சர்வதேசத்திற்கு முன்னால் இலங்கை தரம் தாழ்த்தப்பட்டுள்ளதாக தேசிய சுதந்திர முன்னணி குறிப்பிட்டுள்ளது.

சனல் 4 தொலைக்காட்சியின் ஊடகவியலாளர்களை இலங்கைக்கு அழைத்ததன் மூலம் அரசாங்கம் மிகப் பெரிய தவறை செய்துள்ளது.

இலங்கைக்கு எதிராக பொய்யான குற்றச்சாட்டுக்களை முன்வைத்து திரைப்படத்தை தயாரித்த ஜொனத்தன் மில்லர் நேர்மையான நோக்கத்தில் இலங்கைக்கு வருகை தரவில்லை என தேசிய சுதந்திர முன்னணியின் பேச்சாளர் மொஹமட் முஸ்ஸாமில் தெரிவித்தார்.

நாடு சர்வதேசத்திற்கு முன்னால் பிரதான இடத்திற்கு செல்லும் சந்தர்ப்பத்தில் அதனை இருளை நோக்கி இட்டுச் செல்லும் நடவடிக்கைகளை அரசாங்கம் மேற்கொண்டுள்ளது எனவும் அவர் குறிப்பிட்டுள்ளார்.

கட்சியை விட்டுச் சென்ற அனைவருக்கும் ஐக்கிய தேசியக் கட்சியின் தலைவர் ரணில் விக்ரமசிங்க அழைப்பு விடுத்துள்ளார்.

கட்சிக்குள் குழு பேதங்கள் கிடையாது, எனவே அனைவரும் மீளத் திரும்ப வேண்டும்.

கட்சியை வெற்றிப் பாதைக்கு இட்டுச் செல்ல வேண்டியது அனைவரினதும் கடமையாகும் என அவர் குறிப்பிட்டுள்ளார்.

ஐக்கிய தேசியக் கட்சியின் தலைமைத்துவ பேரவை முதலாம் அமர்வுகளில் பங்கேற்ற போது அவர் இதனைக் குறிப்பிட்டுள்ளார்.