பொதுநலவாய மாநாட்டில் போர் குற்றம் குறித்து கேள்வி எழுப்புவதை தவிர்க்க வேண்டும் – இலங்கை பிரித்தானியாவுக்கு அறிவிப்பு..!

commonபொதுநலவாய நாடுகளின் அரச தலைவர்களின் மாநாட்டின் நிகழ்ச்சி நிரலுக்கு புறம்பாக இலங்கைக்கு எதிராக போர் குற்றச்சாட்டுக்கள் சுமத்துவதை தவிர்க்குமாறு இலங்கை அரசாங்கம் பிரித்தானிய அதிகாரிகளுக்கு அறிவித்துள்ளது.

கொழும்பில் இன்று ஆரம்பமாகும் பொதுநலவாய நாடுகளின் மாநாட்டில் தான் போர் குற்றங்கள் தொடர்பில் இலங்கை அரசிடம் கேள்வி எழுப்புவதாக பிரித்தானிய பிரதமர் டேவிட் கமரூன் லண்டனில் புலம்பெயர் தமிழர்களிடம் உறுதியளித்திருந்தார்.

இலங்கை தற்பொழுதும் பிரித்தானியாவின் காலனித்துவ நாடல்ல என இலங்கை அரசாங்கம் பிரித்தானிய அதிகாரிகளிடம் தெரியப்படுத்தியுள்ளது.

அதேவேளை போர் குற்றங்கள் தொடர்பில் தனியாக பேச்சுவார்த்தைகளை நடத்த பிரித்தானிய பிரதமர் கமரூன் விடுத்த கோரிக்கை இலங்கை அரசாங்கம் நேற்று வியாழக்கிழமை நிராகரித்துள்ளது.

பிரித்தானிய அரசாங்கம் ஈராக்கில் போர் குற்றங்களை செய்துள்ளது. இந்த நிலைமையில் பிரித்தானியா இலங்கையிடம் கேள்வி எழுப்பும் உரிமையில்லை என அரசாங்கம் குறிப்பிட்டுள்ளது.

இலங்கைக்கு கடும் செய்தி ஒன்றை கூறப்போவது உறுதி – டேவிட் கமரூன்..!

davidஇலங்கைக்கு கடும் செய்தி ஒன்றை கூறப்போவதாக பிரித்தானிய பிரதமர் டேவிட் கமரூன் மீண்டும் உறுதியளித்துள்ளார்.

பிபிசிக்கு அளித்த செவ்வியில் அவர் இந்த உறுதியை வழங்கியுள்ளார்

பொதுநலவாய மாநாட்டை புறக்கணிக்கும் கோரிக்கையை நிராகரித்துள்ள அவர்ää2009 ஆம் ஆண்டு இறுதிப்போர் குற்றச்சாட்டுக்கள் தொடர்பில் உரிய விசாரணைகள் இடம்பெற்றுள்ளதா என்பதை ஆராயவுள்ளதாகவும் குறிப்பிட்டுள்ளார்.

2009 ஆம் ஆண்டின் இறுதிப்போரின் போது பொதுமக்கள் இலக்குவைக்கப்பட்டமைக்கான ஆதார குற்றச்சாட்டுக்கள் சுமத்தப்பட்டுள்ளன.

அது தொடர்பில் உரிய கேள்விகளுக்கு இலங்கை அரசாங்கம் பதில்சொல்லவேண்டும்.

இலங்கையில் இந்த பிரச்சினை தொடர்பில் சாதகமான பக்கமும் பாதகமான பக்கமும் உள்ளன.

வடக்கில் மாகாணசபை தேர்தலை நடத்தியமைää மற்றும் சொந்தமாக நல்லிணக்க ஆணைக்குழு என்பவற்றை அமைத்தமை இலங்கை அரசாங்கத்தின் சாதக நடவடிக்கைகளாகும்.

எனினும் இந்த நல்லிணக்க ஆணைக்குழுவின் செயற்பாடுகள் மற்றும் பாதக தன்மைகள் குறித்து இலங்கை அரசாங்கத்திடம் கேள்வி எழுப்பப்படும் என்று கெமரோன் குறிப்பிட்டுள்ளார்.

எனினும் பிரித்தானிய பிரதமருக்கு இந்த விடயம் குறித்து பேசமுடியாது என்று இலங்கை அரசாங்கம் கூறுகிறது.

தமிழர் பிரச்சினையை பேசுவதற்காக அவர் அழைக்கப்படவில்லை என்று இலங்கையின் அமைச்சர் கேஹலிய ரம்புக்வெல்ல சுட்டிக்காட்டியுள்ளார்.

இந்திய வெளியுறவுத்துறை செயலருடன் தமிழ்த் தேசியக் கூட்டமைப்பினர் சந்திப்பு..!

TNAவடக்கு மாகாணத் தேர்தலுக்கு பிறகு இலங்கைத் தமிழர்களுக்கு மறுக்கப்பட்டு வரும் அதிகாரங்கள் குறித்து இந்திய வெளியுறவுத்துறை செயலர் சுஜாதா சிங்கை, தமிழ்த் தேசியக் கூட்டமைப்பினர் நேற்று வியாழக்கிழமை சந்தித்து வருத்தம் தெரிவித்தனர்.

கொழும்பில் நடைபெற்ற இந்தச் சந்திப்பின்போது தமிழ்த் தேசியக் கூட்டமைப்பின் தலைவர் இரா. சம்பந்தன், எம்.பி. க்கள் சுமந்திரன், சுரேஷ் பிரேமச்சந்திரன் ஆகியோர் உடன் இருந்தனர்.

சந்திப்புக்குப் பிறகு செய்தியாளர்களிடம் இரா. சம்பந்தன் கூறியதாவது:

வடக்கு மாகாணத் தேர்தலில் தமிழர்கள் வெற்றி பெற்ற பின்பும் நில உரிமை வழங்கப்படவில்லை. அங்கு குவிக்கப்பட்டுள்ள இராணுவத்தினரால் பெண்கள் இக்கட்டான சூழ்நிலையில் உள்ளனர்.

ஏற்கனவே இராணுவத்தினர் அத்துமீறி நடந்து கொண்டதால் அப்பகுதி பெண்கள் பாதுகாப்பற்ற அச்ச உணர்வுடன் வாழ்ந்து வருகின்றனர்.

போர் முடிவடைந்து நான்கு ஆண்டுகள் ஆகியும், மனித உரிமை ஆணையத்துக்கு அளித்த வாக்குறுதிகள் ஒன்றைக் கூட இதுவரை இலங்கை அரசு நிறைவேற்றவில்லை.

வடக்கு மாகாணத்தின் நிலைமை கவலை அளிக்கும் வகையில் உள்ளது. போரின் போது காணாமல் போன ஏராளமானோர் நிலை என்ன ஆனது என்பது தெரியவில்லை.

இது போன்று தமிழர்கள் சந்தித்து வரும் பிரச்னைகளுக்கு அரசியல் ரீதியாக தீர்வு காண நடவடிக்கை எடுக்க வேண்டும் என்று வலியுறுத்தினோம்.

எங்களது கோரிக்கையை கவனத்துடன் கேட்டுக் கொண்ட இந்திய வெளியுறவுத்துறை செயலர், இலங்கைத் தமிழர்கள் கண்ணியத்துடன் வாழ்வதற்கு தேவையான அனைத்து நடவடிக்கைகளையும் இந்தியா எடுக்கும் என்று உறுதியளித்தார் என்றார் சம்பந்தன்.

அதேவேளை, இந்தச் சந்திப்பு பயனுள்ள வகையில் அமைந்ததாகவும், தமது கவலைக்குரிய விடயங்கள் குறித்து தமிழ்த் தேசியக் கூட்டமைப்பு தலைவர்கள் எடுத்துக் கூறியதாகவும், இந்திய வெளிவிவகாரச் செயலர் சுஜாதா சிங் தெரிவித்துள்ளார்.

அமைச்சர் வாசுதேவ நாணயக்காரவுக்கு பாராட்டு தெரிவித்து நவநீதம்பிள்ளை கடிதம்..!

naviஇலங்கையின் மொழி உரிமைகள் தொடர்பில் அமைச்சர் வாசுதேவ நாணயக்காரவின் மனப்பூர்வமான ஈடுபாட்டை பாராட்டி, ஐக்கிய நாடுகளின் மனித உரிமைகள் ஆணையாளர் நவநீதம்பிள்ளே கடிதம் ஒன்றை எழுதியுள்ளார்.

2013ம் ஆண்டு ஒக்டோபர் 31ம் திகதியிட்ட கடிதத்தில் தமிழ், சிங்களம், ஆங்கிலம் ஆகிய மும்மொழிகளிலும் தேசிய கீதத்தை பாடும் அமைச்சரின் முன்மொழிவுக்கான தனது ஆதரவை, நவநீதம்பிள்ளே தெரிவித்துள்ளார்.

மொழி தொடர்பாக கற்றுக்கொண்ட பாடங்கள் மற்றும் நல்லிணக்க ஆணைக்குழுவின் சில பரிந்துரைகளை செயற்படுத்துவதில் தங்கள் பிரத்தியேக முன்னெடுப்புகளையும் மனப்பூர்வமான செயற்பாடுகளையும் நான் பாராட்டுகிறேன்.

மும்மொழிகளிலும் தேசிய கீதத்தை பாடும் தங்கள் முன்மொழிவை நாடாளுமன்ற தெரிவுக்குழு ஆதரிக்குமென நான் நம்புகின்றேன். இது நல்லெண்ணத்தின் அடையாளமாக இருக்குமென நான் நம்புகின்றேன் என அவர் கூறியுள்ளார்.

காழ்ப்புணர்ச்சியை தூண்டுதல் தொடர்பில் சட்டங்கள் ஆக்கப்பட வேண்டுமெனும் அமைச்சரின் அறிவிப்பை ஐக்கிய நாடுகளின் மனித உரிமைகள் ஆணையாளர் வரவேற்றுள்ளார்.

சிறுபான்மையினர் விவகார ஐ.நாவின் சுயாதீன நிபுணர்கள் இலங்கைக்கு விஜயம் செய்வதற்கு ஆணையாளர் தனது ஆதரவை உறுதியளித்துள்ளார்.

இது ஒரு நீண்டகால வேண்டுகோள் என அவர் கூறியுள்ளார்

இலங்கையர்கள் அவுஸ்திரேலியாவில் அடைக்கலம் கோர வேண்டிய அவசியம் இல்லை!- ஜூலியா பிஷப்..!

julieஇலங்கையில் இருந்து படகு மூலமான ஆட்கடத்தல்களுக்கு காரணமாக இருந்த கடற்படை அலுவலரை கைது செய்தமை குறித்து அவுஸ்திரேலிய வெளியுறவு அமைச்சர் ஜூலியா பிஷப் இலங்கை அரசாங்கத்தை பாராட்டியுள்ளார்.

எனினும் அவர் மீதான விசாரணைகள் குறித்து கருத்துக்கூற அவர் மறுத்துவிட்டார்.

அவுஸ்திரேலியாவுக்கு ஆட்கடத்தல்கள் தொடர்பில் இலங்கையின் கடற்படை அலுவலரான லெப்டினன்ட் கொமாண்டர் சஞ்சீவ அன்னாத்துகொட என்பவரும் நான்கு கடற்படை வீரர்களும் கைதுசெய்யப்பட்டு தற்போது விளக்கமறியலில் வைக்கப்பட்டுள்ளனர்.

இந்த கடற்படை அலுவலர் திருகோணமலையில் உள்ள கடற்படை தளத்தின் ஒத்துழைப்புடன் அவுஸ்திரேலிய கடற்பயணத்துக்கான ஏற்பாடுகளை மேற்கொண்டதாக குற்றம் சுமத்தப்பட்டுள்ளது.

எனினும் குறித்த கடற்படை அலுவலர் தம்மீது சுமத்தப்பட்டுள்ள குற்றச்சாட்டை மறுத்துள்ளார்.

இதேவேளை இலங்கையின் நிலவரங்களை பார்க்கும் போது அங்கிருந்து அவுஸ்திரேலியாவில் அகதி அந்தஸ்து கோருவதற்கு காரணங்கள் இல்லை என்றும் பிஷப் சுட்டிக்காட்டியுள்ளார்.

எனினும் இலங்கை மீது சுமத்தப்பட்டுள்ள போர்க்குற்றச்சாட்டுக்கள் தொடர்பில் தாம் அரசாங்க அமைச்சர்களுடன் கலந்துரையாடியதாக பிஷப் குறிப்பிட்டுள்ளார்.

பொதுநலவாய உச்சிமாநாடு இன்று காலை 10.15ற்கு அங்குரார்ப்பணம்..!

commonபொதுநலவாய அரச தலைவர்கள் பங்குகொள்ளும் 23ஆவது உச்சிமாநாடு இன்று காலை 10.15 அளவில் கொழும்பு மாநகரில் கோலாகலமாக ஆரம்பமாகிறது.

கொழும்பு, மஹிந்த ராஜபக்ஷ தாமரைத் தடாகம் அரங்கில் அங்குரார்ப்பண நிகழ்வு நடைபெறுகிறது. இதனையிட்டு, கொழும்பு மாநகரம் விழாக்கோலம் பூண்டுள்ளது. வீதிகள் அலங்கரிக்கப்பட்டுள்ளதோடு பொதுநலவாய அமைப்பில் அங்கம் வகிக்கும் 53 நாடுகளின் தேசியக் கொடிகளும் பறக்கவிடப்பட்டுள்ளன.

அங்குரார்ப்பண நிகழ்வுகள் சுமார் ஒன்றரை மணி நேரமே நடைபெற உள்ளதோடு இதன் போது, பொது நலவாய அமைப்பின் செயலாளர் நாயகம் கமலேஷ் சர்மா, ஜனாதிபதி மஹிந்த ராஜபக்ஷ, பிரிட்டிஷ் இளவரசர் சார்ள்ஸ் பொதுநலவாய அமைப்பின் தற்போதைய தலைவரும் அவுஸ்திரேலிய பிரதமருமான டொனி அயோட் ஆகியோர் உரை நிகழ்த்துவர்.

உச்சிமாநாட்டு முதல்நாள் அமர்வின் போது பொதுநலவாய அமைப்பின் தலைமைத்துவப் பொறுப்பு அவுஸ்திரேலிய பிரதமரினால் ஜனாதிபதி மஹிந்த ராஜபக்ஷவிடம் கையளிக்கப்படவுள்ளது. இதன்படி இரு வருடங்களுக்கு பொதுநலவாய அமைப்பின் தலைவராக ஜனாதிபதி மஹிந்த ராஜபக்ஷ பதவி வகிப்பார்.

பொதுநலவாய மாநாட்டின் ஆரம்ப நிகழ்வில் பங்கேற்கும் பிரிட்டிஷ் இளவரசர் சார்ள்ஸ் மற்றும் வெளிநாட்டுப் பிரதிநிதிகளுக்கு செங்கம்பள வரவேற்பு அளிக்கப்பட ஏற்பாடு செய்யப்பட்டுள்ளது. இலங்கை கலாசார முறைப்படி அரச தலைவர்களுக்கு வரவேற்பு வழங்கப்பட உள்ளதோடு கலை கலாசார நிகழ்ச்சிகளும் இங்கு ஏற்பாடு செய்யப்பட்டுள்ளன.

ஆரம்ப நிகழ்வையொட்டி விசேட பாதுகாப்பு ஏற்பாடுகள் மேற்கொள்ளப்பட்டுள்ளதோடு சில வீதிகள் குறிப்பிட்ட சில மணி நேரங்கள் மூடப்படுமென அறிவிக்கப்பட்டுள்ளது. சமத்துவத்துடனான வளர்ச்சி, பரிபூரணமான அபிவிருத்தி என்ற தொனிப்பொருளில் இம்முறை உச்சி மாநாடு நடைபெற உள்ளதோடு உச்சி மாநாட்டின் அங்குரார்ப்பண நிகழ்வைத் தொடர்ந்து காலை 11.15 தொடக்கம் 11.30 வரை உத்தியோகபூர்வமாக புகைப்படம் எடுக்கும் நிகழ்வு இடம்பெறவுள்ளது.

நெலும் பொக்குன மஹிந்த ராஜபக்ஷ திரையரங்கின் பிரதான நுழைவாயிலில் பிரிட்டிஷ் இளவரசர் சார்ள்ஸ் உடன் பொதுநலவாய அமைப்பில் அங்கம் வகிக்கும் நாடுகளின் அரச தலைவர்கள் புகைப்படம் எடுக்கவுள்ளனர்.

அதனைத் தொடர்ந்து காலை 11.45 தொடக்கம் பிற்பகல் 2.15 வரை ஸ்ரீமாவோ பண்டாரநாயக்க ஞாபகார்த்த கண்காட்சி மண்டபத்தில் நிறைவேற்று அமர்வு இடம்பெறவுள்ளது.

அதனைத் தொடர்ந்து பொதுநலவாய அமைப்பின் செயலாளர் நாயகம் கமலேஷ் சர்மாவினால் பண்டாரநாயக்க ஞாபகார்த்த மாநாட்டு மண்டபத்தில் வரவேற்பு வழங்கப்படவுள்ளது. இதனைத் தொடர்ந்து பிற்பகல் 2.30 தொடக்கம் 3.15 வரை அரச தலைவர்களுக்கும் இளைஞர் தலைவர்களுக்கும் இடையில் கலந்துரையாடல் இடம்பெறவுள்ளது.

அதேவேளை, பிரிட்டிஷ் இளவரசர் சார்ள்ஸ் பொதுநலவாய அரச தலைவர்களுக்கான விஷேட இராப்போசன விருந்துபசாரம் வழங்கவுள்ளார். இந்த நிகழ்வு சினமன் லேக்சைட் ஹோட்டலில் இடம்பெறவுள்ளது.

இன்று ஆரம்பமாகும் மாநாடு எதிர்வரும் 17 ஆம் திகதி வரை இடம்பெற உள்ளது. இரண்டாம் நாளான நாளையும் பொதுநலவாய தலைவர்கள் மாநாடு தொடர உள்ளதோடு அரச தலைவர்களுக்கு ஜனாதிபதி மஹிந்த ராஜபக்ஷ பகல்போசன விருந்துபசாரம் வழங்க ஏற்பாடாகியுள்ளது.

இலங்கைக்கு விஜயம் செய்துள்ள அரச தலைவர்கள் வடக்கு அடங்கலான நாட்டின் சில பிரதேசங்களுக்கு செல்ல உள்ளனர். மாநாட்டின் இறுதி நாளான ஞாயிற்றுக்கிழமை பிற்பகல் 1.00 மஹிக்கு மாநாடு நிறைவடைகிறது.

அதனைத் தொடர்ந்து ஜனாதிபதி மஹிந்த ராஜபக்ஷ, தெரிவு செய்யப்பட்ட அரச தலைவர்கள் மற்றும் பொதுநலவாய அமைப்பின் செயலாளர் நாயகம் கமலேஷ் சர்மா ஆகியோர் பங்குபற்றும் இறுதி ஊடகவியலாளர் மாநாடு பண்டாரநாயக்க சர்வதேச மாநாட்டு மண்டபத்தில் இடம்பெறும்.

மூதாட்டியை கொலை செய்து குளிர் சாதனப் பெட்டியில் வைத்த கொடூரம்..!

hangமூதாட்டியை கொலை செய்து குளிர் சாதனப் பெட்டியில் வைத்த மளிகை கடைக்காரரை சாகும்வரை தூக்கிலிட வேண்டும் என நீதிபதி தீர்ப்பளித்துள்ளார்.

மதுரை மாவட்டம், விளாத்திகுளம் பகுதியை சேர்ந்தவர் வீரபத்திரன். இவரது மகன் முத்துசெல்வன் (24).

இவர் 2009ம் ஆண்டு குடும்பத்துடன் சென்னையில் குடியேறினார். மதுரவாயல் அடுத்த நெற்குன்றம் சக்தி நகரில், முத்துசெல்வன் மளிகை கடை நடத்தியதுடன் தண்ணீர் போத்தல்களும் விற்பனை செய்தார். தீபாவளி சீட்டும் பிடித்தார்.சீட்டு கட்டியவர்களின் பணத்தை ஆடம்பர செலவு செய்ததால் சீட்டு கட்டியவர்களுக்கு பணம் கொடுக்க முடியாமல் முத்துசெல்வன் திணறினார்.

இதற்காக மளிகை கடைக்கு வரும் பெண்களிடம் கடன் வாங்க தொடங்கினார். 2011 மார்ச் மாதம் தண்ணீர் போத்தல் பரிமாறி விட்டு கடைக்கு வந்து கொண்டிருந்தார். அப்போது, அதே பகுதியில் வசிக்கும் பவானி என்ற பெண்ணிடம் நகையை பறித்த அவரை பொதுமக்கள் பிடித்து மதுரவாயல் பொலிசில் ஒப்படைத்தனர்.

இதனைத் தொடர்ந்து வழக்குப்பதிவு செய்த பொலிசார் முத்துசெல்வனை சிறையில் அடைத்தனர்.

இந்நிலையில் மூடப்பட்டிருந்த முத்துசெல்வனின் மளிகை கடையில் இருந்து துர்நாற்றம் வீசியது. இதுபற்றி மதுரவாயல் பொலிசாருக்கு தகவல் கொடுத்தனர்.

பொலிசார் விரைந்து வந்து கடையை உடைத்து சோதனையிட்டதில் அங்கு குளிர் சாதனப் பெட்டியில் ஒரு மூதாட்டியின் சடலம் இருந்ததை கண்டு அதிர்ச்சி அடைந்தனர்.

விசாரணையில் அதே பகுதியில் உள்ள கோயில் பூசாரி கணபதி சங்கர் என்பவரின் தாய் ஜெயலட்சுமி (53) என தெரியவந்தது.

இதனைத் தொடர்ந்து சிறையில் இருந்த முத்துசெல்வனை பொலிஸ் காவலில் எடுத்து விசாரித்தனர். அவர் அளித்த வாக்குமூலத்தில், கணபதி சங்கர் வேலை செய்யும் கோயிலில் பக்தர்கள் போடும் சில்லரைகளை அவரது தாய் ஜெயலட்சுமி தினமும் மளிகை கடையில் கொடுத்து பணமாக பெற்று செல்வார்.

மேலும் ஜெயலட்சுமி வீட்டில் தண்ணீர் சப்ளையும் நான் செய்தேன்.நகை பறிப்பு சம்பவத்தில் நான் கைதான ஒரு வாரத்துக்கு முன் என் கடைக்கு ஜெயலட்சுமி வந்தார்.

இரவு நேரத்தில் வெளியில் சில்லரையை எண்ண வேண்டாம். உள்ளே வந்து எண்ணுங்கள் என கூறினேன். ஜெயலட்சுமி உள்ளே வந்ததும் காய்கறி நறுக்கும் கத்தியால் அவரது கழுத்தை அறுத்து கொன்றேன்.

பின்னர், அவர் அணிந்திருந்த 5 சவரன் நகையை எடுத்து கொண்டு, சடலத்தை குளிர் சாதனப் பெட்டியில் வைத்தேன்.பின்னர் அந்த நகையை விற்று சீட்டு கட்டியவர்களுக்கு தரவேண்டிய பணத்தை கொடுத்தேன்.

இதற்கிடையில் செயின் பறிப்பு சம்பவத்தில் சிக்கி சிறைக்கு சென்றதால் கடையில் சடலம் இருப்பது பொலிசாருக்கு தெரியவந்துள்ளது என்று கூறியுள்ளார்.

இதனைத் தொடர்ந்து முத்துசெல்வன் மீது கொலை வழக்குப்பதிவு செய்த பொலிசார் அவரை மீண்டும் சிறையில் அடைத்தனர். பின்னர் அவர் ஜாமீனில் வெளிவந்தார்.

இந்நிலையில் பூந்தமல்லி கூடுதல் மாவட்ட அமர்வு நீதிமன்றம் 3ல் நடைபெற்று வந்த இந்த வழக்கில் நேற்று தீர்ப்பு கூறப்பட்டது.

நீதிபதி ரவீந்திரபோஸ் அளித்த தீர்ப்பில், முத்துசெல்வன் திருடியது, கொலை செய்தது, கொலையை மறைத்தது என 3 குற்றங்கள் செய்துள்ளார். 23 சான்று ஆதாரங்களை பரிசீலித்ததில் அவர் மீதான குற்றம் சந்தேகத்திற்கிடமின்றி நிரூபிக்கப்பட்டுள்ளது.

எனவே அவரை சாகும் வரை தூக்கிலிட வேண்டும் என்று தீர்ப்பளித்து உத்தரவிட்டுள்ளார்.

கோச்சடையான் ஜனவரி 10–ல் வெளியாகும் என அதிகாரப்பூர்வ அறிவிப்பு..!

kochadayanரஜினியின் கோச்சடையான் படம் ஜனவரி 10–ந் திகதி பொங்கல் பண்டிகையையொட்டி ரிலீசாகும் என்று இன்று அதிகாரப்பூர்வமாக அறிவிக்கப்பட்டது.

இப்படம் மெகா பட்ஜெட்டில் தயாராகியுள்ளது. ரஜினி இரு வேடங்களில் நடித்துள்ளார். தீபிகா படுகோனே நாயகியாக நடித்துள்ளார். சரத்குமார், நாசர், ஆதி, ஷோபனா போன்றோரும் உள்ளனர். ஏ.ஆர்.ரகுமான் இசை அமைத்துள்ளார். ரஜினி மகள் சவுந்தர்யா இயக்கி உள்ளார்.

இப்படத்தின் பாடல்கள் ரஜினி பிறந்த நாளான டிசம்பர் 12–ந் திகதி வெளியிடப்படுகிறது. பொங்கலுக்கு விஜய்யின் ஜில்லா, அஜீத்தின் வீரம் படங்கள் ரிலீசாகும் என ஏற்கெனவே அறிவிக்கப்பட்டுள்ளது. தற்போது இப்படங்களுடன் கோச்சடையானும் மோதுகிறது.

பிரித்தானிய இளவரசர் சார்ள்ஸ் இலங்கை வந்தடைந்தார்..!

charlesஇலங்கையில் நாளை ஆரம்பமாகவுள்ள பொதுநலவாய நாடுகள் தலைவர்களின் மாநாட்டில் கலந்து கொள்ளவென பிரித்தானிய இளவரசர் சார்ள்ஸ் சற்றுமுன்னர் இலங்கை வந்தடைந்துள்ளார்.

பிரித்தானிய இளவரசருடன் அவரது இளவரசியும் இலங்கை வந்துள்ளார்.

பிரித்தானிய மகாராணிக்கு பதிலாக பொதுநலவாய மாநாட்டில் பங்கேற்கவென சார்ள்ஸ் இலங்கை வந்துள்ளார்.

இளவரசர் சார்ள்ஸின் 65ஆவது பிறந்த தினம் இன்றாகும்.

கர்ப்பிணி மூளைச்சாவு – வயிற்றில் இருந்த குழந்தையை காப்பாற்றிய மருத்துவர்கள்..!

babyகிழக்கு ஹங்கேரியில் வாழ்ந்து வந்த 31 வயதான கர்ப்பிணிப்பெண் ஒருவர் தனது 15ஆவது வார கர்ப்பகாலத்தில் மூளையில் ஏற்பட்ட ரத்தப்பெருக்கால் மூளைச்சாவு நிலையை அடைந்ததாக மருத்துவர்களால் அறிவிக்கப்பட்டார்.

ஆனால் அவரது வயிற்றில் இருந்த கருவானது ஆரோக்கியமாக இருந்தது. அந்தக் குழந்தை நலமுடன் பிறக்க அது இன்னும் மூன்று மாதங்கள் தாயின் கர்ப்பப்பையில் இருக்கவேண்டும் என்று மருத்துவர்கள் கணித்தனர். இதனால் தீவிர சிகிச்சைப் பிரிவில் சேர்க்கப்பட்ட அந்தத் தாயை மருத்துவர்கள் மிகுந்த கவனமுடன் காப்பாற்றி வந்தனர்.

வயிற்றிலிருந்த சிசுவிற்கு 27 வாரங்கள் ஆனதும் அந்தக் குழந்தையை அறுவை சிகிச்சை மூலம் மருத்துவர்கள் வெளியே எடுத்தனர். சென்ற கோடைக்காலத்தில் பிறந்த அந்த ஆண்குழந்தை 1.42 கிலோகிராம் எடையுடன் நல்ல ஆரோக்கியத்துடனும் இருந்தது என்றும் தற்போது தனது குடும்பத்தினரிடம் அந்தக் குழந்தை வளர்ந்து வருவதாகவும் தெரிகின்றது.

இந்தத் தகவல்களை டெப்ரீசன் பல்கலைக்கழகத்தின் மருத்துவ அறிவியல் மையத்தின் தலைவரான பெலா புரேடி சமீபத்தில் நடந்த பத்திரிகையாளர்கள் சந்திப்பில் தெரிவித்துள்ளார். 92 நாட்கள் உயிருடன் காப்பாற்றப்பட்ட அந்தப் பெண்ணின் இதயம், கணையம், கல்லீரல் மற்றும் இரண்டு சிறுநீரகங்கள் ஆகியவை நான்கு நோயாளிகளுக்குப் பொருத்தப்பட்டதாகவும் அவர் கூறினார். உறுப்பு நன்கொடை குறித்த விஷயங்கள் ஹங்கேரி சட்டத்தின்படி பாதுகாப்பாக வைக்கப்படும் என்பதால் அந்தக் குடும்பத்தினர் பற்றிய விபரங்களை புரேடி வெளியிடவில்லை.

முதல் 20/20 போட்டியில் தென்னாபிரிக்கா வெற்றி..!

saபாகிஸ்தான் தென்னாபிரிக்கா அணிகளுக்கிடையிலான முதலாவது இருபதுக்கு 20 போட்டியில் தென்னாபிரிக்கா அணி 9 விக்கட்டுகளால் அபார வெற்றி பெற்றுள்ளது.

நேற்றைய தினம் டுபாயில் இடம் பெற்ற இப்போட்டியில் நாணயச்சுழற்சியில் வெற்றி பெற்று முதலில் துடுப்பெடுத்தாடிய பாகிஸ்தான் அணி 20 ஓவர்களில் 9 விக்கட்டுகளை இழந்து 98 ஓட்டங்களை மாத்திரமே பெற்றது. பாக். அணி சார்பில் உமர் அக்மால் மாத்திரமே 49 ஓட்டங்களை அதிகபட்சமாக பெற்றுக் கொடுத்தார்.

99 ஓட்டங்கள் என்ற இலக்கை நோக்கி துடுப்பெடுத்தாடிய தென்னாபிரிக்கா அணி 14.3 ஓவர்களில் ஒரு விக்கட்டை மாத்திரம் இழந்து வெற்றி இலக்கை அடைந்நது. தெ.ஆ அணி சார்பில் கொக் 48 ஓட்டங்களை பெற்றுக் கொடுத்தார்.

ஆட்ட நாயகனாக டேல் ஸ்டைன் தெரிவு செய்யப்பட்டார். இந்த வெற்றியோடு 2 போட்டிகள் கொண்ட தொடரில் தென்னாபிரிக்கா அணி 1-0 என்ற கணக்கில் முன்னிலை வகிக்கிறது.

தெரு நாய்க்கு கிடைத்த அதிர்ஷ்டம்..!

dogதெருவில் அனாதரவாக சுற்றித் திரிந்து கொண்டிருந்த நாய் ஒன்றிற்கு திடீர் அதிர்ஷ்டமாக எவரெஸ்ட் சிகரத்தின் அடிவாரத்திற்கு எடுத்துச் செல்லப்பட்ட முதல் நாய் என்ற பெருமை கிடைத்துள்ளது.

காஷ்மீரில் லே எனும் இடத்தில் கைவிடப்பட்ட நிலையில் சுற்றித் திரிந்த நாயை முன்னாள் கோப்ல் வீராங்கனையான ஜோன் லெப்சன் என்பவர் கண்டு, இரக்கப் பட்டு தன்னுடன் எடுத்துச் சென்றுள்ளார்.

அந்த நாய்க்கு ரூபி எனப் பெயரிட்ட வீராங்கனை, அதனை தன்னுடன் எவரெஸ்ட் சிகரத்தின் அடிவாரத்திற்கு எடுத்துச் சென்றுள்ளார். ரூபியின் எவரெஸ்ட் பயணம் குறித்த புகைப்படங்களை தனது பேஸ்புக்கில் போட்டுள்ளார் லெஃப்சன்.

இந்த சாதனைப் பயணத்தின் மூலம், எவரெஸ்ட் சிகரத்தின் அடிவாரத்திற்கு எடுத்துச் செல்லப் பட்ட முதல் நாய் என்ற பெருமையைப் பெற்றுள்ளது 11 மாத ரூபி.

ரூபி குறித்து லெப்சன் கூறும்போது, ‘ரூபி குறித்து நான் மிகவும் பெருமைப் படுகிறேன். சில நாட்கள் மட்ட்மே உடன் வைத்திருக்கலாம் என நினைத்துத் தான் நான் ரூபியை உடன் அழைத்துச் சென்றேன், ஆனால், என்னை மேலும் பயணம் செய்ய தூண்டியதே ரூபி தான்.

ரூபியின் இச்சாதனை மூலம் தெரு நாய்கள் குறித்து பொதுமக்களுக்கு விழிப்புணர்வு ஏற்பட வேண்டும் என்றார்.

மேலும், ரூபிக்கு பனியின் சுவை மிகவும் பிடித்துள்ளதாகவும், பனியில் மிகவும் மகிழ்ச்சியாக விளையாடுவதாகவும் தெரிவித்துள்ளார் லெப்சன்.

லெப்சன் தன்னுடன் உலகம் சுற்றிய தனது முன்னாள் செல்லப்பிராணியான ஆஸ்கர் என்ற நாய்க்கு தன்னுடைய புத்தகம் ஒன்றை சமர்ப்பணம் செய்ய இருப்பது குறிப்பிடத்தக்கது.

சந்தானத்தின் வாய்ப்பை தட்டிப்பறித்த பரோட்டா சூரி..!

sooriஅழகுராஜா திரைப்படம் ரசிகர்களின் எதிர்பார்ப்பை பூர்த்திசெய்ய தவறிவிட்டதால், தனது அடுத்த திரைப்படத்தை உடனடியாக துவங்கும் முடிவில் இருக்கிறார் இயக்குனர் ராஜேஷ்.

ஒரு கல் ஒரு கண்ணாடி திரைப்படத்தின் மூலம் ராஜேஷுடன் நண்பனைப் போல் பழகிவிட்ட உதயநிதி ஸ்டாலின் இந்த திரைப்படத்தை தயாரிக்கிறார்.

‘பாஸ்… நீங்க எப்ப கூப்பிட்டாலும் நான் நடிக்க தயார்…’ என்ற வாக்குறுதியை ராஜேஷுக்கு பாஸ் என்கிற பாஸ்கரன் படத்தில் நடித்தபோதே கொடுத்துவிட்ட ஆர்யா தான் இத்திரைப்படத்தின் ஹீரோவாம்.

ராஜேஷின் திரையுலக வரலாற்றில் முதல்முறையாக, இந்த திரைப்படத்தில் சந்தானம் காமெடியனாக நடிக்கவில்லை எனத் தெரிகிறது. காமெடி கதாபாத்திரத்திற்காக ‘பரோட்டா’ சூரியிடம் பேசப்பட்டிருக்கிறதாம்.

வழக்கமாக தனது முந்தைய படத்தின் ஹீரோவை அடுத்த படத்தில் சிறப்புத்தோற்றத்தில் நடிக்கவைப்பது மாதிரி, இந்த படத்தில் சந்தானத்தை சிறப்புத்தோற்றத்தில் நடிக்க வைப்பாரோ? என்றால் அது நடக்கவே நடக்காது என்கிறது கோடம்பாக்கத்திலிருந்து வரும் தகவல்.

தமிழ்த்திரையுலகில் தற்போது முன்னணி காமெடி நடிகர்களாக இருக்கும் சந்தானத்துக்கும், சூரிக்கும் இடையே சமீபகாலமாக உரசல், மோதல் என அரசல் புரசலாக செய்திகள் வருகிறது.

இருவரும் மிக சீரியஸாக ஃபோனிலேயே திட்டிக்கொண்டதாகவும் பேசப்படுகிறது. எனவே அதிகாரப்பூர்வ அறிவிப்புகள் இத்திரைப்படம் குறித்த பல கேள்விகளுக்கு விடையளிக்கும் என்கின்றனர் திரையுலகினர். ஆனால் ரசிகர்களோ ‘யார் நடித்தாலும் எங்களுக்கு இயக்குனர் ராஜேஷ் மீது நம்பிக்கை இருக்கிறது. அவர் வரணும்… பழைய ராஜேஷா வரணும்…’ என்று நம்பிக்கையுடன் இருக்கின்றனர்.

கிரிக்கெட்டின் சகாப்தம் சச்சினுக்கு கோவில்..!

sachineகிரிக்கெட்டின் சகாப்தம் சச்சின் டெண்டுல்கருக்கு பீகாரில் போஜ்புரி நடிகரும், பாடகருமான மனோஜ் திவாரி கோவில் ஒன்றை கட்டியுள்ளார்.

பீகாரின் கைமூர் மாவட்டத்தில் உள்ள அட்டரவாலியா கிராமத்தில் சச்சினுக்கு அவர் கோவில் கட்டியுள்ளார்.

இதுகுறித்து அவர் கூறுகையில், 2011 உலக கிண்ண கிரிக்கெட் போட்டியில் இந்தியா வெற்றி பெற்ற போது நம் நாட்டுக்கு இந்த பெருமையை பெற்று தந்த கிரிக்கெட் வீரர்களுக்கு ஒரு கோயிலை கட்ட வேண்டும் என்று தீர்மானித்தேன். இதற்காக 6000 சதுரஅடி நிலத்தில் 2 ஆண்டுகளில் இந்த கோயிலை கட்டி முடித்து விட்டேன்.

கிரிக்கெட் மட்டை மற்றும் பந்துடன் கோபுரத்தின் உச்சி அமைக்கப்பட்டுள்ளது. உள்ளே கையில் கிரிக்கெட் மட்டையுடன் சச்சின், டோனி மற்றும் யுவராஜ் சிங் ஆகியோரின் முழு உயர பளிங்கு சிலைகள் வைக்கப்பட்டுள்ளன.

வரும் ஜனவரி மாதம் இந்த கோயிலை திறக்க திட்டமிட்டுள்ளேன் என்று தெரிவித்துள்ளார்.

ஒபாமாவின் வெள்ளை மாளிகை போல் வீட்டை மாற்றிய ஆசாமி..!

அமெரிக்காவில் ஒருவர் தனது வீட்டை ரூ.1.5 கோடி செலவு செய்து வெள்ளை மாளிகை போல் மாற்றியுள்ளார். அமெரிக்காவில் உள்ள டெக்சாஸ் மாகாணத்தில் லாங்வியூ என்ற இடத்தைச் சேர்ந்தவர் ரோன் வாடோ (63).

இவருக்கு லாரா (36) என்ற மனைவியும், வாலன்டினா (16), லாரா (10) என்ற இரண்டு பெண் குழந்தைகளும் உள்ளனர். இவர் கடந்த 4 வருடங்களுக்கும் மேலாக தனது வீட்டில் ரூ.1.5 கோடி செலவு செய்து ஒரு குட்டி வெள்ளை மாளிகை போல் மாற்றியுள்ளார்.

இதனை காண அமெரிக்கர்கள் ஏராளமானோர் ஆர்வத்துடன் வந்து பார்த்து செல்கின்றனர். இதுகுறித்து ரோன் வாடோ கூறுகையில், எனக்கு 13 வயதாக இருக்கும் போது சீனியர் புஷ் கலந்து கொண்ட ஒரு நிகழ்ச்சியில் கலந்து கொள்ள வாய்ப்பு ஏற்பட்டது.

அப்போது முதல் அரசியலில் ஆர்வம் ஏற்பட்டு, முன்னாள் அதிபர்களை பற்றியும், வெள்ளை மாளிகை பற்றியும் தெரிந்து கொண்டேன். கடந்த 40 ஆண்டுகளாக முன்னாள் அதிபர்களான இரண்டு புஷ்களும் எனக்கு நெருங்கிய நண்பர்களாக பழகி வருகின்றனர்.

நான் எனது வீட்டை ஒரு குட்டி வெள்ளை மாளிகைபோல் மாற்றிய புகைப்படத்தை புஷ்ஷிடம் காண்பித்த போது அச்சு அசலாக இருப்பதாக பாராட்டினார் என்று தெரிவித்தார்.

இவர் வீட்டையே ஒரு குட்டி அருங்காட்சியகமாக மாற்றிவிட்டார். எப்போதும் மியூசியத்தில் வசிப்பது போல் உள்ளது என அவரது மகள்கள் கேலி செய்கின்றனர். முன்னாள் அதிபர்கள் பயன்படுத்திய நாற்காலி, பேனா, போட்டோ என ஏராளமான பொருட்களை தனது சேகரிப்பில் வைத்திருக்கிறார்.

இவரது சேகரிப்பிலேயே முதன்மையானது முன்னாள் அதிபர் கென்னடி பயன்படுத்தி பின்னர் லிங்கன் வைத்திருந்த காரை தற்போது இவர் வைத்துள்ளார் என்பதுதான் குறிப்பிடத்தக்கது என்கிறார் தனது கணவர் குறித்து பெருமையுடன் அவரது மனைவி லாரா.
whitehouse

கலம் மெக்ரேவுக்கு எதிராக வவுனியாவில் ஆர்ப்பாட்டம்..!

இலங்கை அரசுக்கும் நாட்டுக்கும் அபகீர்த்தியை ஏற்படுத்தும் வகையில் திட்டமிட்டு பொய்ப்பிரசாரங்களை சனல் 4 தொலைக்காட்சி மேற்கொண்டு வருவதாகவும் கூறி, ஆகவே கலம் மெக்ரே உட்பட அந்த ஊடகத்தின் செய்தியாளர்களை உடனடியாக நாட்டைவிட்டு வெளியேற்ற வேண்டும் எனக் கோரி வவுனியாவில் வியாழனன்று ஆர்ப்பாட்டம் ஒன்று மேற்கொள்ளப்பட்டிருக்கின்றது.

ஏ9 வீதியில் நூற்றுக்கும் மேற்பட்டவர்கள் ஆண்களும் பெண்களுமாக இந்த ஆர்ப்பாட்டத்தில் கலந்து கொண்டு, சனல் 4 ஊடகத்திற்கு எதிராகக் கோஷங்களை எழுப்பினர் வவுனியா மன்னார் வீதிச் சந்திக்கருகில் யாழ் வீதியில் ஆரம்பித்த இந்த ஆர்ப்பாட்டம் வவுனியா அரச செலயக வாயில்வரை சென்றது.

ஆர்ப்பாட்டக்காரர்களை ஏ9 வீதியில் முன்னேறிச் செல்லவிடாமல் பொலிசார் தடுத்து நிறுத்தினர். எனினும் ஆர்ப்பாட்டக்காரர்களும் முண்டியடித்து முன்னேற முயற்சித்தனர். எனினும் அசம்பாவிதங்கள் எதுவும் ஏற்படவில்லை.

சுமார் ஒரு மணித்தியாலத்திற்கும் மேலாக நடைபெற்ற இந்த ஆர்ப்பாட்டத்தில் கலந்து கொள்வதற்காகப் பலர் வவுனியாவுக்கு வெளியில் இருந்து பஸ் வண்டிகளிலும், வேறு வாகனங்களிலும் கொண்டு வந்து இறக்கப்பட்டிருந்தனர்.

vavuniya

1...4,4604,4614,462...4,739Page 4,461 of 4,739