மெட்ராஸ்கபே படத்துக்கு இங்கிலாந்தில் தடை விதிக்கப்பட்டு உள்ளது. இப்படத்தில் ஜோன் ஆபிரகாம் நாயகனாக நடித்துள்ளார். சுஜித் சிர்கார் இயக்கியுள்ளார். விடுதலைப்புலிகளை இழிவுபடுத்தி இப்படம் எடுக்கப்பட்டுள்ளதாக எதிர்ப்புகள் கிளம்பின. 1990ல் இலங்கையில் நடந்த போர் பின்னணியில் இதன் திரைக்கதை அமைக்கப்பட்டு இருக்கிறது.

விடுதலைப்புலி தலைவர் பிரபாகரன் யுத்த நடவடிக்கைகள். ராஜீவ் படுகொலை சதி திட்டம் போன்றவை காட்சிபடுத்தப்பட்டு உள்ளன. இந்த படத்தை தமிழகத்தில் திரையிடக்கூடாது என்றும் மீறி திரையிட்டால் தியேட்டர்களில் முற்றுகை போராட்டம் நடத்துவோம் என்றும் தமிழ் அமைப்புகள் எச்சரித்தன.

இதையடுத்து தமிழகத்தில் மெட்ராஸ் கபே படத்தை திரையிட தியேட்டர் அதிபர்கள் மறுத்து விட்டனர். வடமாநிலங்களில் ரிலீசானது. வெளிநாடுகளிலும் மெட்ராஸ் கபே படத்தை திரையிட ஏற்பாடுகள் நடந்தது. இங்கிலாந்தில் தமிழ் இளைஞர் அமைப்பினர் மெட்ராஸ் கபே படத்துக்கு எதிராக போராட்டம் நடத்தினார்கள்.

படம் திரையிடப்பட இருந்த தியேட்டர்களிலும் முற்றுகையிட்டனர். மெட்ராஸ் கபே படத்தை தடை செய்ய கோஷம் போட்டனர். படத்தின் போஸ்டர்களையும் தீயிட்டு எரித்தார்கள். இதையடுத்து படத்துக்கு அங்கு தடை விதிக்கப்பட்டது. தியேட்டர்களில் மெட்ராஸ் கபே படத்தை திரையிடுவதை நிறுத்தி விட்டார்கள்.

இந்தி நடிகை பிரீத்தி ஜிந்தா தனது படங்களுக்கு கதை எழுதிய கதாசிரியர் அப்பாஸ் டயர்வாலாவுக்கு 18.9 லட்சத்துக்கான காசோலை கொடுத்திருந்தார். அந்த காசோலையை அப்பாஸ் வங்கியில் செலுத்தியபோது அந்த கணக்கில் பணம் இல்லாமல் காசோலை திரும்பி வந்தது.

இதையடுத்து பிரீத்தி ஜிந்தா மீது அப்பாஸ் செக் மோசடி வழக்கு தொடர்ந்தார். இந்த வழக்கு மும்பை நீதிமன்றத்தில் நடைபெற்று வருகிறது. இவ்வழக்கு தொடர்பாக கோர்ட்டில் நேரில் ஆஜராகும்படி பிரீத்தி ஜிந்தாவுக்கு 4 முறை கோர்ட் சம்மன் அனுப்பியிருந்தது. ஆனால் அவர் ஆஜராகவில்லை. இதனால் அவருக்கு ஜாமினில் வெளியே வர முடியாத பிடிவாரண்ட் பிறப்பிக்கப்பட்டுள்ளது.

கடைசியாக அவரை ஆஜராக வரும்படி சம்மன் அனுப்பியபோது அவர் வராததால் 5000 ரூபாய் அபராதம் விதிக்கப்பட்டது. அத்துடன் இன்று ஆஜராகும்படி நீதிபதி உத்தரவிட்டார். இன்றும் ஆஜராகாத நிலையில் பிடிவாரண்ட் பிறப்பிக்கப்பட்டிருக்கிறது.

ஆனால் பிரீத்தி தற்போது வெளிநாட்டில் இருக்கிறார். பிரீத்தி வெளிநாட்டில் இருப்பதாக கோர்ட்டில் தெரிவித்தேன். ஆனால், அவருக்கு எதிராக கோர்ட் பிடிவாரண்ட் பிறப்பித்துள்ளது. இந்த பிடிவாரண்டை ரத்து செய்ய கோர்ட்டில் முறையிடுவோம் அல்லது மும்பை உயர் நீதிமன்றத்தில் ரிட் மனு தாக்கல் செய்வோம் என்று அவரது வழக்கறிஞர் தெரிவித்தார்.

மணி ரத்னத்தின் தில்சே படத்தின் மூலம் பொலிவுட்டில் அறிமுகமான நடிகை பிரீத்தி ஜிந்தா கடைசியாக பிரேம் ராஜ் இயக்கத்தில் உருவான இஷ்க் இன் பாரிஸ் படத்தில் நடித்துள்ளார். ஐபிஎல் அணியான கிங்ஸ் லெவன் பஞ்சாப் அணியின் உரிமையாளர்களில் பிரீத்தியும் ஒருவர் என்பது குறிப்பிடத்தக்கது.

1967ம் ஆண்டில் நான்கு வயதில் குழந்தை நட்சத்திரமாகத் தனது திரையுலக வாழ்வை ஆரம்பித்தவர் நடிகை ஸ்ரீதேவி. தமிழ்த்திரையுலகில் முடிசூடா ராணியாகக் கோலோச்சிய இவர் பின்னர் இந்தித் திரையுலகிலும் தனக்கெனத் தனி இடத்தைப் பிடித்தார்.

இந்தித் திரையுலகத் தயாரிப்பாளரான போனிகபூரை மணந்த ஸ்ரீதேவிக்கு ஜான்வி, குஷி என்று இரண்டு பெண்கள் உள்ளனர். ஸ்ரீதேவியின் மகள்கள் மட்டுமின்றி அவரும் தன் கணவரை அப்பா என்றே அழைக்கின்றார்.

கபூர் முன்னிலையில் ஸ்ரீதேவி சிறுபெண்ணாக மாறி தனது குழந்தைக் குரலில் அப்பா என்று கூப்பிட்டு சந்தோஷிப்பதை அவர்களின் குடும்பத்திற்கு நெருக்கமானவர்கள் அனைவரும் அறிவர்.

கபூரின் எந்த செயலையும் உடனே மன்னிக்கும் குணமுடைய ஸ்ரீதேவி அவரின் ஒரே ஒரு பழக்கத்தை மட்டும் விரும்புவதில்லையாம். ஏதாவது ஆழ்ந்த சிந்தனையில் இருக்கும்போது தன்னுடைய தலை முடியை இழுக்கும் பழக்கம் போனிகபூரிடம் உண்டு.

ஏற்கனவே தலை வழுக்கையாக இருப்பதால் அடிக்கடி இதுபோல் செய்வது வழுக்கையை அதிகரிக்கும் என்று ஸ்ரீதேவி அவரிடம் கண்டிப்பு காட்டுவாராம்.

இருவர் ஒன்றானால் என்ற பெயரில் புது படம் தயாராகிறது. ரமணா ஆர்ட்ஸ் சார்பில் ஏ.எம்.சம்பத்குமார் தயாரிக்கிறார். அன்பு.ஜி இயக்குகிறார். இப்படத்தின் பாடல் சி.டி. வெளியீட்டு விழா பழைய மகாபலிபுரம் சாலையில் உள்ள இந்துஸ்தான் கல்லூரியில் மாணவ– மாணவிகள் முன்னிலையில் நடந்தது.

நடிகர் சூர்யா விழாவில் பங்கேற்றார். அவருக்கு மாணவர்கள் உற்சாக வர வேற்பு அளித்தனர். பின்னர் பாடல் சி.டி.யை வெளியிட்டு சூர்யா பேசியதாவது..

மாணவ–மாணவிகள் முன்னால் விழா நடப்பது சந்தோஷமா இருக்கு. நான் காலேஜ் முடிச்சி பல காலம் ஆச்சு. உங்களை பார்க்கும்போது மறுபடியும் அந்த ஞாபகம். எனக்கு இன்று திருமண நாள். நிறைய பேர் இங்கு வாழ்த்து சொன்னீங்க. பேஸ் புக்கிலும் எக்கச்சக்கமா வாழ்த்து குவியுது.

இருவர் ஒன்றானால் படக்குழுவினர் முதல் படைப்பாக இதை உங்கள் முன் கொண்டு வர்றாங்க. நீங்க சப்போர்ட் பண்ணனும். இந்த படத்தின் நாயகன் பிரபு நடனம் பயின்று நிறைய நாட்கள் சினிமா கனவோடு இருந்து இப்ப நடிக்க வந்துள்ளார்.

நல்லா நடனம் பண்ணி இருக்கார். நாம் நினைப்பது கிடைக்கும். பிரபுவுக்கும் கிடைச்சிருக்கு. சினிமா சாதாரண விஷயம் இல்லை. வசனம் எப்படி இருக்கனும். பிரேம் எப்படி இருக்கனும். சீன் எப்படி அமையனும். லோக்கேஷன் எங்கு போகனும் என்றெல்லாம் ஒவ்வொரு காட்சிக்கும் நிறைய விவாதம் பண்ணி பிறகு சூட்டிங் போறாங்க.

இருவர் ஒன்றானால் படத்தையும் அப்படித்தான் செதுக்கி இருப்பாங்கனு நம்புறேன். போஸ்டர், பாடல், சீன்கள் எல்லாம் இதில் சிறப்பா அமைசிருக்கு. இந்த படத்தில் இருப்பவர்கள் நல்ல டீம். தயாரிப்பாளர் என்னோட நிறைய படங்களில் வேலை பார்த்து இருக்கார்.

கஜினி படத்தில் அவரது பங்களிப்பு முக்கியமானது. நேருக்கு நேர் படத்தில் அறிமுகமான போது நான் புதுசு. நடனம் ஆடவே தெரியல. என்னை ஆதரித்து இந்த அளவுக்கு உயர்த்தியது போல் இருவர் ஒன்றானால் படக்குழுவினருக்கும் ஆதரவு கொடுங்கனு கேட்டுக்குறேன்.

காதல் படமாக எடுத்து இருக்காங்க. காதல் 14 வயதில் துவங்கி 25 வயதில் முடியுறது இல்ல. ஒரு பெண்ணை விரும்பி திருமணம் செய்த பிறகும் அது குறையக்கூடாது. நான் ஜோதிகாவை மணந்து 7 வருடங்கள் ஆகிறது. காதலித்து 12 வருடங்கள் ஆகிறது.

அந்த காதல் அப்படியேதான் போய்ட்டு இருக்கு. ஒவ்வொரு நாளும் இன்னும் இன்னும் அழகா தெரியுது. காதல் அப்படித்தான் இருக்கனும் பசங்களுக்கு திருமணத்துக்கு பிறகு காதல் குறைஞ்சி போயிடுது என்று பெண்கள் நினைக்கிறார்கள். அப்படி குறைய விடாதீர்கள். இந்த படம் வெற்றி பெற வாழ்த்துக்கள் என்று சூர்யா பேசினார்.

விழாவில் டைரக்டர் சரவணன், இந்துஸ்தான் பல்கலைக்கழக இயக்குனர் அசோக்வர்கீஸ், வேந்தர் எலிசபெத் வர்கீஸ், தயாரிப் பாளர்கள் சம்பத்குமார், ரவிக்குமார், ஒளிப்பதி வாளர் குமார்ஸ்ரீதர், இசையமைப்பாளர் குரு கிருஷ்ணன் உள்ளிட்ட பலர் பங்கேற்றனர்.