விஷால் ஜோடியாக ‘பாண்டிய நாடு’ படத்தில் லட்சுமிமேனன் நடித்தார். அடுத்து ‘நான் சிவப்பு மனிதன்’ படத்திலும் இணைந்து நடிக்கிறார்கள். ‘பாண்டியநாடு’ படம் வெற்றிகரமாக ஓடுவது குறித்து விஷால் சென்னையில் பேட்டி அளித்தார்.

அப்போது மேடையில் விஷாலும் லட்சுமிமேனனும் திருமண கோலத்தில் இருப்பது போன்ற படத்தை சுட்டிக்காட்டி இருவரும் காதலித்தீர்களா? என்று நிருபர்கள் கேட்டனர்.

இதற்கு பதில் அளித்த விஷால், எனக்கும் லட்சுமி மேனனுக்கும் அப்படி எதுவும் இல்லை. படம் லட்சுமிகரமாக இருந்ததால் மேடையில் வைத்தோம். நான் திருமணத்துக்கு தயார் ஆகவில்லை. திருமணத்துக்கான முதிர்ச்சி இன்னும் வரவில்லை என்றார்.

மேலும் விஷால் கூறியதாவது:–

சினிமாவுக்குள் வரும் போது நடிப்பில் ஆர்வம் இல்லாமல் இருந்தேன். டைரக்டர் ஆகத்தான் நினைத்தேன். எதிர்பாராமல் ‘செல்லமே’ படத்தில் நடிக்க வாய்ப்பு கிடைத்தது. அந்த படம் வெற்றி பெற்றதால் நடிப்பது நிரந்தரமாகி போனது.

‘பாண்டிய நாடு’ நான் தயாரித்த முதல் படம். இது வெற்றிகரமாக ஓடுவது மகிழ்ச்சி அளிக்கிறது. 72 தியேட்டர்களில் தற்போது அதிகமாக ரிலீஸ் செய்துள்ளனர். பெரிய தியேட்டர்களுக்கும் மாற்றி இருக்கிறார்கள். டிசம்பர் 15–ந் தேதி வரை தியேட்டர்களில் இப்படம் ஓடும் என்று உறுதியளித்துள்ளனர்.

இந்த படம் என் சினிமா வாழ்க்கையில் முக்கிய படமாகி விட்டது. படத்தில் என் தந்தையாக பாரதிராஜா நடித்துள்ளார். அவரை பார்க்கும் போது என் அப்பா ஞாபகம் வரும் லட்சுமிமேனன் தொடர்ந்து 4 வெற்றி படங்களில் நடித்துள்ளார். விக்ராந்துக்கும் முக்கியமான கேரக்டராக அமைந்தது.

டைரக்டர் சுசீந்திரன் சொல்லி கொடுத்தபடியே நடித்தேன். இதை வெற்றி படமாக்கிய ரசிகர்களுக்கு நன்றி. ‘மதகஜராஜா’ படத்தை ரிலீஸ் செய்யும் முயற்சியில் கஷ்டப்பட்டேன். விஜயகாந்த் ஆறுதல் வார்த்தை கூறினார்.

ரசிகர்கள் என்னை புரட்சி தளபதி என அழைத்ததால் அந்த பட்டம் பெயரோடு இணைக்கப்பட்டது. அரசியலில் ஈடுபடும் நோக்கோடு அதை வைக்கவில்லை. பிறகு அந்த பட்டம் தேவை இல்லை என்று பட்டதால் நீக்கிவிட்டேன்.

இவ்வாறு விஷால் கூறினார்.

டைரக்டர் பாரதிராஜா பேசும்போது, 1964–ல் நடிகனாக வேண்டும் என்று தான் சென்னை வந்தேன். ஆனால் டைரக்டராகி விட்டேன். ‘கல்லுக்குள் ஈரம்’, ‘இரட்டை சுழி’ என சில படங்களில் விருப்பம் இல்லாமல் நடித்தேன். அதன் பிறகு நடிக்கவே கூடாது என்று ஒதுங்கினேன். சுசீந்திரன் வற்புறுத்தி ‘பாண்டிய நாடு’ படத்தில் நடிக்க வைத்தார், என் நடிப்பை பார்த்து நிறைய பேர் பாராட்டுகிறார்கள். சந்தோஷமாக இருக்கிறது என்றார்.

கே.கே. பிலிம் இண்டர் நேஷனல் பட நிறுவனம் சார்பில் கஞ்சாகருப்பு தயாரித்து கதாநாயகனாக நடிக்கும் படம் வேல்முருகன் போர்வெல்ஸ்.

இன்னொரு நாயகனாக அங்காடி தெரு மகேஷ் நடிக்கிறார். ஐ.டி.அரசன் மதுரை டாக்டர் சரவணன் போன்றோரும் முக்கிய கேரக்டரில் நடிக்கின்றனர். வடிவேலுவுடன் நடித்த அனைத்து காமெடி நடிகர்களும் இதில் நடிக்கின்றனர். இப்படத்துக்கு கதை, திரைக்கதை வசனம் எழுதி எம்.பி.கோபி இயக்குகிறார். இவர் மலையன் படத்தை இயக்கியவர். ஸ்ரீகாந்த் தேவா இசையமைக்கிறார்.

கிராமம் கிராமமாக போய் போர்வெல் போட்டு பிழைப்பு நடத்துபவர்களை பற்றிய கதை. போர்வெல் உரிமையாளராக வருகிறார் கஞ்சா கருப்பு. சமீபத்தில் இப்படத்தின் படப்பிடிப்பு போரூர் கார்டனில் நடந்தது. கஞ்சா கருப்பு-ரகசியா புது திருமண தம்பதி. கஞ்சா கருப்பு போர் போடும் தொழில் செய்பவர் என்பதால் தனது மனைவியை பிரிந்து நண்பர்களுடன் வெளியூருக்கு போர் போட சென்றுவிடுகிறார். இப்படி பல நாட்கள் கழித்து வீடு திரும்பும் அவரை, ரகசியா அரவணைத்து வரவேற்பது போன்று காட்சி ஒன்று படமாக்கப்பட்டது.

இந்த காட்சியில் கஞ்சா கருப்பு நடித்த போது திடீரென ரகசியாவின் உதட்டை கடித்து விட்டாராம். இதனால் கோபமடைந்த ரகசியா, கஞ்சா கருப்பை திட்டியதோடு படப்பிடிப்பிற்கு வர மறுத்துவிட்டாராம். அதன் பிறகு இயக்குனர் கோபியும் படப்பிடிப்பு குழுவினரும் சமாதானம் செய்து ரகசியாவை நடிக்க வைத்தனர்.

தெலுங்கில் 1979–ல் ரிலீசாகி வெற்றிகரமாக ஓடிய படம் ‘சங்கராபரணம்’. தமிழிலும் தெலுங்கிலேயே ரிலீஸ் செய்யப்பட்டு வசூல் குவித்தது. தமிழ்நாட்டில் தெலுங்கு படமொன்று வெற்றிகரமாக ஓடி வசூல் அள்ளியதை இந்திய திரையுலகமே வியந்து பார்த்தது.

பரத நாட்டியத்தையும் இசையையும் ஒருங்கிணைத்து காவிய படமாக இப்படத்தை எடுத்து இருந்தனர். சோமையாராஜீலு, மஞ்சுபார் கவி, ராஜ லட்சுமி துளசி, சந்திரமோகன், அல்லு ராமலிங்கய்யா ஆகியோர் நடித்து இருந்தனர். இப்படத்துக்கு பல தேசிய விருதுகளும் கிடைத்தன.

தமிழகம், ஆந்திரா மட்டுமான்றி மற்ற மாநிலங்களிலும் இந்த படம் வெற்றிகரமாக ஓடியது. கே.விஸ்வநாத் இயக்கி இருந்தார். கே.வி மகாதேவன் இசையமைத்து இருந்தார். ஓம்கார நாதனு சந்தானம் சங்கராநாத சரீராபரா துரகுன இதுவேந்தி போன்ற இனிமையான பாடல்கள் இதில் உள்ளன.

35 வருடத்துக்கு பிறகு இப்படத்தை சினிமாஸ்கோப் மற்றும் டிஜிட்டலில் புதுப்பித்து தமிழில் மொழிமாற்றம் செய்து வெளியிடுகின்றனர். இதற்கான ஏற்பாடுகள் நடக்கிறது. இதற்கு ஆர்.எஸ் ராமகிருஷ்ணன் வசனம் எழுதுகிறார். பாடல்களை தமிழமுதன், தாயப்பன் எழுதுகின்றனர்.

ஆர்யா, அனுஷ்கா நடிப்பில் மிகப்பிரம்மாண்டமாக உருவாகியுள்ள படம் ‘இரண்டாம் உலகம்’. இப்படத்தை செல்வராகவன் இயக்கியுள்ளார். பாடல்களுக்கு ஹாரிஸ் ஜெயராஜூம், பின்னணி இசையை அனிருத்தும் அமைத்திருக்கிறார்கள். இப்படம் வரும் 22-ந் தேதி உலகமெங்கும் வெளியாகவிருக்கிறது.

பெரும் எதிர்பார்ப்புடன் உருவாகியுள்ள இப்படத்தின் பாடல்கள் மற்றும் டிரைலர்கள் வெளிவந்து ரசிகர்கள் மத்தியில் பெரும் வரவேற்பை பெற்றுள்ளன.

இந்நிலையில், இப்படத்திற்கு தற்போது அனிருத் இரண்டு பாடல்களுக்கு இசையமைத்துள்ளார். இரண்டு பாடல்களில் ஒரு பாடலை இவர் மட்டும் பாடியுள்ளார். மற்றொரு பாடலை சின்மயி உடன் இணைந்து பாடியுள்ளார்.

தொடர்ந்து ஹிட் பாடல்களை கொடுத்து வரும் அனிருத் இப்படத்தில் பின்னணி இசையை மட்டும் கவனிப்பார் என்ற ரீதியிலேயே முதலில் ஒப்பந்தமானார். இந்நிலையில், அனிருத் இரண்டு பாடல்களுக்கு இசையமைத்திருப்பது இப்படத்திற்கு மேலும் வலு சேர்ப்பதாக அமைந்துள்ளதாக படக்குழுவினர் தெரிவிக்கின்றனர்.