8 வயது பாடசாலை சிறுமியை பலாத்காரமாக பாலியல் வல்லுறவுக்கு உட்படுத்திய சந்தேகநபரை கைது செய்ய நடவடிக்கை எடுத்து வருவதாக சாலியவெவ பொலிஸார் தெரிவித்தனர்.

சாலியவெவ – துனுமடலேவ கிராமத்தைச் சேர்ந்த சிறுமியே இவ்வாறு வல்லுறவுக்கு உட்படுத்தப்பட்டுள்ளார்.

கடந்த ஜூலை மாதம் 15ம் திகதி இச்சம்பவம் இடம்பெற்றுள்ளது.

சம்பவ தினத்தன்று சிறுமி மாத்திரமே வீட்டில் இருந்துள்ளார்.

அங்கு வந்த சந்தேகநபர் சிறுமியை வல்லுறவுக்கு உட்படுத்திவிட்டு அவரிடம் 20 ரூபா பணத்தை கொடுத்து நடந்த சம்பவத்தை யாருக்கும் சொல்லக்கூடாது என மிரட்டிவிட்டுச் சென்றதாக பொலிஸாரின் ஆரம்பக்கட்ட விசாரணையில் தெரியவந்துள்ளது.

சிறுமி தனக்கு நடந்தவற்றை தனது பாடசாலை நண்பியிடம் கூறியதும் குறித்த நண்பி தனது தாயிடம் அதனை குறிப்பிட்டுள்ளார்.

அதன்பின் நண்பியின் தாய், பாதிக்கப்பட்ட சிறுமியின் தாயிடம் சம்பவத்தை தெரிவித்து பொலிஸ் நிலையத்தில் முறைப்பாடு செய்யப்பட்டுள்ளது.

இது குறித்து சாலியவெவ பொலிஸார் மேலதிக விசாரணைகளை மேற்கொண்டு வருகின்றனர்.

போலி விசா பெற்றுக் கொடுத்து 17 இலட்சம் ரூபா மோசடி செய்தமை தொடர்பில் ஒருவர் கைதுசெய்யப்பட்டுள்ளார்.

2010ம் ஆண்டு நவம்பர் மாதம் வென்னப்புவ பொலிஸ் பிரிவில் இவர் இவ்வாறு மோசடியில் ஈடுபட்டதாக தெரியவந்துள்ளது.

நேற்று முன்தினம் வென்னப்புவ பிரதேசத்தில் வைத்து குற்றப்புலனாய்வுத் திணைக்களத்தினர் இவரைக் கைதுசெய்துள்ளனர்.

அத்துடன் சந்தேகநபர் லுணுவில பகுதியைச் சேர்ந்த 52 வயதான ஒருவர் என பொலிஸார் தெரிவித்துள்ளனர்.

சந்தேகநபர் மாரவில நீதவான் நீதிமன்றத்தில் ஆஜர்படுத்தப்பட்டதன் பின்னர், எதிர்வரும் 21ம் திகதி வரை விளக்கமறியலில் வைக்கப்பட்டுள்ளார்.

யாழ்ப்பாணம் விபுலானந்த சந்தியில் இடம்பெற்ற வாகன விபத்தில் ஒருவர் உயிரிழந்துள்ளார்.

நேற்றையதினம் மாலை யாழ். நகரை நோக்கி பயணித்த மோட்டார் சைக்கிள் ஒன்று அதே திசையில் பயணித்த மற்றுமொரு மோட்டார் சைக்கிளுடன் மோதி விபத்துக்குள்ளாகியுள்ளதாக பொலிஸார் தெரிவித்துள்ளனர்.

விபத்தில் காயமடைந்த 59 வயதான நபரொருவர் யாழ். வைத்தியசாலையில் அனுமதிக்கப்பட்டதன் பின்னர் உயிரிழந்துள்ளார்.

விபுலானந்த வீதியைச் சேர்ந்த ஜே.பத்மநாதன் என்பவரே விபத்தில் பலியாகியுள்ளதாக தெரியவந்துள்ளது.

விபத்தில் காயமடைந்த மற்றையநபர் யாழ்ப்பாணம் வைத்தியசாலையில் சிகிச்சை பெற்று வருகின்றார்.

இந்தியாவில் இலங்கை பிரஜை ஒருவரை, சி.பி.ஐ., பொலிஸார் எனக் கூறி, கடத்திச் சென்ற ஒன்பது பேரை பொலிஸார் கைது செய்துள்ளனர்.

இலங்கையை சேர்ந்த 45 வயதுடைய முகமது இம்தியாஸ் ஆடை தொழிலில் புரிந்து வருகிறார். இவரது குடும்பத்தினர், தமிழ்நாடு – ஏழுகிணறில் வசிக்கின்றனர்.

கடந்த சில தினங்களுக்கு முன், இம்தியாசை மர்ம கும்பல் ஒன்று கடத்திச் சென்று, மறுநாள் காலை, செங்குன்றம் அருகே விட்டுச் சென்றது.

இதுகுறித்து, இம்தியாஸ், ஏழுகிணறு பொலிஸ் நிலையத்தில் முறைப்பாடு செய்தார்.

விசாரணையில், சி.பி.ஐ., பொலிஸார் என்றும், சட்ட விரோதமாக தங்கியுள்ளது குறித்து விசாரிக்க வேண்டும் எனக்கூறியும் மர்மகும்பல், இம்தியாசை கடத்திச் சென்றது தெரிய வந்தது.

இதுகுறித்த விசாரணையில், இலங்கையை சேர்ந்த முகமது ரிஞ்ஜான், தண்டையார்பேட்டையை சேர்ந்த குமார், ஜெய்கமல், திருவொற்றியூரை சேர்ந்த பிரேம்குமார், மணலியை சேர்ந்த மகாராஜா, மண்ணடியை சேர்ந்த இஸ்மாயில், ஏழுகிணறை சேர்ந்த ரைஸ்அகமது, வண்ணாரப்பேட்டையை சேர்ந்த துவாரகன், ராயபுரத்தை சேர்ந்த துளசி ஆகியோர் முகமது இஸ்மாயிலிடமிருந்து பணம் பறிக்கும் எண்ணத்துடன் கடத்திச் சென்றதாக தெரியவந்த நிலையில் அவர்களை பொலிஸார் கைது செய்துள்ளனர்.

தமிழர்களின் உரிமைப் போராட்ட வரலாற்றில் ஆயுதப் போராட்டம் தவிர்க்க முடியாததொன்று, அதனை எவரும் கொச்சைப்படுத்த முடியாது என விடுதலைப் புலிகளின் முன்னாள் ஊடகப் பேச்சாளர் தயா மாஸ்டர் தெரிவித்துள்ளார்.

யாழ்ப்பாணம் ரில்கோ விடுதியில் நேற்று சனிக்கிழமை காலை தமிழ்த் தேசியக் கூட்டமைப்பின் அங்கத்துவக் கட்சிகளான ஈ.பி.ஆர்.எல்.எப், ரெலோ மற்றும் புளொட் ஆகியவற்றின் உறுப்பினர்கள் கலந்துகொண்ட ஊடகவியலாளர் மாநாடு நடைபெற்றது.

இந்த ஊடகவியலாளர் மாநாட்டின் கலந்து கொண்ட தமிழ்த் தேசியக் கூட்டமைப்பின் அங்கத்துவக் கட்சியினர், ஆயுதக்குழுக்களை தமிழரசுக்கட்சி கொச்சைப்படுத்தி வருகின்றது என்று தெரிவித்தனர்.

இதன்போது குறுக்கிட்ட விடுதலைப் புலிகளின் முன்னாள் ஊடகப் பேச்சாளர் தயா மாஸ்டர், தமிழர்களின் உரிமைப் போராட்ட வரலாற்றில் ஆயுதப் போராட்டம் என்பது தவிர்க்க முடியாத ஒன்று. அதனை யாரும் கொச்சைப்படுத்த முடியாது என்று அங்கத்துவக் கட்சி உறுப்பினர்களிடம் தெரிவித்தார்.