இங்கிலாந்து மருத்துவர்களின் அலட்சியப் போக்கினால் இந்தியப் பெண் ஒருவர் இறந்த குழந்தையை 2 நாட்களாக வயிற்றில் சுமந்துள்ளார்.

சென்னையைச் சேர்ந்த கார்த்திகேயன் குமரேசன் என்பவர் பொறியியல் நிபுணர் வேலை காரணமாக ஆறு ஆண்டுகளுக்கு முன்னர் தனது மனைவி நிரஞ்சனாவுடன் இங்கிலாந்திற்கு சென்றார்.

அவர்களுக்கு ஏற்கனவே 9 வயதில் ஒரு மகள் உண்டு. 33 வயதான நிரஞ்சனா இரண்டாவது முறையாக கர்ப்பம் தரித்தபோது அவருக்கு செப்டம்பர் 18ம் திகதி பிரசவத்துக்கான நாள் குறிக்கப்பட்டது. குறிப்பிட்ட திகதியை தாண்டி மூன்று நாட்கள் சென்றபின்னரும் அவருக்கு பிரசவத்திற்கான அறிகுறி எதுவும் தோன்றவில்லை.

மேலும் குழந்தையின் அசைவும் அவருக்குப் புலப்படவில்லை. இதனால் சந்தேகப்பட்ட அந்தத் தம்பதியர் உடனடியாக வடக்கு லண்டனில் உள்ள பார்னெட் அண்ட் சேஸ் மருத்துவமனைக்குச் சென்றுள்ளார்கள்.

அங்கிருந்த இடைநிலை மருத்துவப் பணியாளர் அவரைப் பரிசோதித்துவிட்டு முதல்நாள் நிரஞ்சனாவிற்கு ஏற்பட்டிருந்த காய்ச்சலால்தான் குழந்தையின் இதயத்துடிப்பு கேட்கவில்லை என்றும் பின்னர் மருத்துவமனையில் இருந்த இதயத்துடிப்பு அறியும் கருவி சரிவர வேலை செய்யவில்லை எனவும் ஏதேதோ காரணங்களை சொல்லி வீட்டிற்கு அனுப்பியுள்ளார்.

இந்நிலையில் வீட்டிற்கு அனுப்பப்பட்ட அவர் மீண்டும் குழந்தையின் நிலை குறித்த சந்தேகத்தைத் தெரிவித்தபோதும் மருத்துவமனை நிர்வாகம் அலட்சியமாக இருந்துள்ளது.

மேலும் இரண்டு நாட்களுக்கு மேல் இறந்த குழந்தையை வயிற்றில் சுமந்துகொண்டு மிக்க வலியுடனும், வேதனையுடனும் எந்தவிதமான மருத்துவ கவனிப்பும் இல்லாமல் பிரசவித்துள்ளார்.

அதைவிட வேதனை தரும் விடயமாக அந்தக் குழந்தையின் பிரேதப் பரிசோதனையை நடத்தக்கூடிய பொறுப்பாளரை உடனடியாக ஏற்பாடு செய்ய முடியவில்லை என்று கூறிய நிர்வாகம் நான்கு நாட்கள் கழித்துதான் அதனையும் செய்துள்ளது.

இதனைத் தொடர்ந்து சென்ற மாதம் 24ம் திகதி மருத்துவமனையின் அலட்சியப் போக்கு குறித்த புகார் ஒன்றினை இந்தத் தம்பதியினர் அந்நாட்டு தேசிய சுகாதார மையத்தில் அளித்துள்ளனர்.

மருத்துவமனை நிர்வாகம் இதுகுறித்து எந்த விளக்கமும் அளிக்காத நிலையில், தேசிய சுகாதார மையத்தின் விசாரணைகள் விரைவில் தொடங்கப்படவுள்ளதாக தகவல்கள் வெளியாகியுள்ளது.

சர்வதேச நீச்சல் போட்டியில் திருநெல்வேலியைச் சேர்ந்த 6 வயதுச் சிறுமி ஜெ. திவ்ய பிரபா சாதனை படைத்துள்ளார். சிறு வயதிலேயே கடலில் நீந்தி சாதனை புரிந்துள்ள இந்த மாணவிக்கு குற்றாலீஸ்வரன்போல சாதனை படைக்க வேண்டும் என்பது ஆசை.

திருநெல்வேலி, சீனிவாசநகரைச் சேர்ந்த ஜெகன் செல்வகுமார், ஸ்ரீரங்கநாச்சியார் தம்பதியின் மகளான திவ்ய பிரபா, பாளையங்கோட்டை மகாராஜநகர் ஸ்ரீ ஜயேந்திர சுவாமிகள் வெள்ளிவிழா மேல்நிலைப் பள்ளியில் 1ஆம் வகுப்பு படித்து வருகிறார்.

தனது மகளுக்கு நீச்சல் கற்றுத்தருவதற்காக நான்கரை வயதில் திவ்ய பிரபாவை நீச்சல்குளத்துக்கு அழைத்துச் சென்றார் ஜெகன் செல்வகுமார். பயமே இல்லாமல் அசாத்தியமாக திவ்ய பிரபா நீந்தியதைக் கண்டு பயிற்சியாளர்கள் அவரை ஊக்குவித்தனர்.
இதையடுத்து தினமும் காலையில் ஒரு மணி நேரம், இரவு 2 மணி நேரம் என நீச்சல் கற்று முதன்முதலாக 2012-ல் மாவட்ட அளவிலான நீச்சல் போட்டியில் பங்கேற்றார். இதில், 3 பிரிவுகளில் மூன்று வெண்கலப் பதக்கங்களை வென்றார்.
அக்டோபர் 2012-ல் மதுரையில் நடைபெற்ற மாநில அளவிலான நீச்சல் போட்டியில் பங்கேற்று ஒரு பிரிவில் தங்கமும், மற்றொரு பிரிவில் வெண்கலமும் வென்றார். தமிழ்நாடு விளையாட்டு மேம்பாட்டு ஆணையம் சார்பில் சென்னையில் நடந்த மாநில அளவிலான போட்டியில் 2-ஆவது இடம் பிடித்து வெள்ளிப் பதக்கம் வென்றார்.
சர்வதேச ஒலிம்பிக் போட்டியில் அங்கம் வகிக்கும் தமிழ்நாடு பென்டத்லான் அமைப்பும் கடந்த பிப்ரவரியில் நடத்திய போட்டியில் பங்கேற்று தேசிய அளவிலான போட்டிக்கு தேர்வு பெற்றார்.

கோவாவில் செப்டம்பர் மாதம் நடைபெற்ற தேசிய அளவிலான போட்டியில் 4-ஆவது இடம் பிடித்து சர்வதேச அளவிலான போட்டிக்குத் தேர்வு செய்யப்பட்டார்.

சைப்ரஸ் நாட்டில் லிமஷாயில் சர்வதேச பயத்லான் போட்டிகள் அக்டோபர் 5ஆம் தேதி முதல் 7ஆம் தேதிவரை நடைபெற்றன. இதில் பெற்றோருடன் பங்கேற்கச் சென்ற திவ்ய பிரபாவுக்கு அதிர்ச்சி காத்திருந்தது. இதுவரை நீச்சல் குளத்தில் நடைபெற்ற போட்டிகளில் மட்டுமே நீந்தியதால் தங்களது மகளால் கடலில் நடைபெறும் போட்டியில் பங்கேற்க முடியுமா என யோசித்தனர்.

ஆனால், திவ்ய பிரபா சந்தோஷமாக நீந்தத் தயாரானதால் அவருக்கு 2 நாள் மட்டும் கடலில் நீந்த பயிற்சி அளிக்கப்பட்டது. இதன் தொடர்ச்சியாக நடந்த சர்வதேச பயத்லான் போட்டியில் 19 நாடுகளைச் சேர்ந்த போட்டியாளர்களுடன் கலந்துகொண்டு 13-ஆவது இடம் பிடித்தார்.

இந்திய அளவில் 6 வயதில் உலக சாதனை புரிந்த மாணவி என்ற பெருமையையும் சேர்த்துள்ளார். இந்த மாணவிக்கு பள்ளி நிர்வாகத்தின் சார்பில் சனிக்கிழமை பாராட்டு விழா நடைபெற்றது. பள்ளியின் இயக்குநர் ஜெயேந்திரன் வி. மணி, முதல்வர் ஏ. ஜெயந்தி மற்றும் ஆசிரியர்கள் பாராட்டு தெரிவித்தனர்.

நீச்சல் மட்டுமல்லாமல் பாட்டு, பரதம் உள்ளிட்டவற்றையும் திவ்ய பிரபா ஆர்வத்துடன் கற்பதாக பெற்றோர் பெருமிதம் தெரிவித்தனர். கடலில் நீந்தி பல்வேறு சாதனைகள் நிகழ்த்திய குற்றாலீஸ்வரன் போல ஆக வேண்டும் என்பதே தனது ஆசை என்கிறார் திவ்ய பிரபா.

மத்தியப் பிரதேச மாநில தட்டியா மாவட்டத்தின் ரத்னாகர் பகுதியில் மந்துளா தேவி கோவில் உள்ளது. இங்கு நவராத்திரி பூஜை நிகழ்ச்சிகள் ஆண்டுதோறும் மிகச் சிறப்பாக நடைபெறும். இவ்விழாவிற்கு ஏராளமான பக்தர்கள் வருகை தருவது வழக்கம்.

இந்த வருட நவராத்திரி பூஜையின் ஒன்பதாவது நாளான இன்று நிகழ்ச்சிகள் கோவிலில் நடைபெற்றுக் கொண்டிருந்தன. அதிகாலையில் இருந்து வழக்கம்போல் பக்தர்கள் இன்று கோவிலுக்கு வந்து கொண்டிருந்தனர். கோவிலுக்கு வரும் வழியில் சிந்து நதியைக் கடப்பதற்கு குறுகலான பாலம் ஒன்று அமைக்கப்பட்டுள்ளது.

அந்த இடத்தில் வரும்போது கூட்ட நெரிசலை கட்டுப்படுத்த போலீசார் தடியடி நடத்தியதாக கூறப்படுகிறது. அப்போது பக்தர்கள் ஒருவரை ஒருவர் முந்திக்கொண்டு செல்ல முயன்றதில் காலில் மிதிபட்டும், ஆற்றில் தவறி விழுந்தும் 70 பேர் உயிரிழந்ததாக போலீசார் தரப்பு செய்திகள் தெரிவிக்கின்றன.

100-க்கும் மேற்பட்டோர் படுகாயமடைந்தனர். சம்பவம் நடந்த இடம் தலைநகர் தட்டியாவிலிருந்து50 கி.மீ தொலைவில் உள்ளது. சம்பவப்பகுதிக்கு விரைந்த மீட்புப்படையினர் பாதிக்கப்பட்டோர்களை உடனடியாக தட்டியா மருத்துவமனைக்கு அனுப்பிவைத்தனர்.

கடந்த 2006 ஆம் ஆண்டில் அருகிலுள்ள சிவபுரி மாவட்டத்தில் அமைந்துள்ள மணிகண்டா அணையிலிருந்து உபரி நீர் திறந்துவிடப்பட்டது. அப்போது ஏற்பட்ட வெள்ளப்பெருக்கில்35-க்கும் மேற்பட்ட யாத்ரிகர்கள் அடித்துச் செல்லப்பட்டனர் என்பது குறிப்பிடத்தக்கதாகும்.