தனுஷ் – பார்வதி நடிப்பில் வெளியாகி ஓடிக் கொண்டிருக்கும் படம் மரியான். பரத்பாலா இந்தப் படத்தை இயக்கி உள்ளார். ஒஸ்கர் ரவிச்சந்திரன் தயாரித்து உள்ளார்.

சூடான் நாட்டில் வேலை செய்த ஒரு இந்தியத் தொழிலாளிக்கு ஏற்பட்ட சம்பவத்தை மையமாக வைத்து இந்தப் படம் எடுக்கப்பட்டுள்ளது.
ஒரே மூச்சில் 50 அடி ஆழ்கடலில் சென்று மீன் பிடிப்பவராக தனுஷ் நடித்துள்ளார். அவருக்கு நீச்சலும் தெரியாது, நீருக்குள் மூச்சு பிடித்து மூழ்குவதும் முடியாது.

எனவே, வெளிநாட்டில் இருந்து இதற்காக சிறப்பு பயிற்சி கொடுப்பவர்களை வரவழைத்து, அவர்களிடம் கற்றுக் கொண்டு தனுஷ் இப்படத்தில் நடித்தார். 50 அடி ஆழ்கடலில் ஒட்சிசன் இல்லாமல் உப்புத் தண்ணீரில் கண்ணாடிகூட போடாமல் மிகவும் தத்ரூபமாக நடித்துள்ளார் தனுஷ்.

படத்திற்கு ஒளிப்பதிவு செய்திருக்கும் மாக் கோனிக்ஸ் பெல்ஜியம் நாட்டைச் சேர்ந்தவர். இசை அமைத்திருக்கும் ஏ.ஆர்.ரஹ்மான் உலக அளவில் புகழ்பெற்றவர். எனவே மரியான் படத்தின் இந்தி உரிமையை புகழ்பெற்ற நிறுவனம் ஒன்று 5 கோடி ரூபாய்க்கு விலைபேசி உள்ளது. ஒஸ்கர் ரவிச்சந்திரனும் இதற்கு ஒப்புக் கொண்டார்.

இதை அறிந்த தனுஷ் தனக்கு அதில் இரண்டு கோடி ரூபாய் வேண்டும் என்றாராம். ஏ.ஆர்.ரஹ்மானும் தனக்கு இரண்டு கோடி ரூபாய் வேண்டும் என்று கேட்டிருக்கிறார்.

தனக்கு ஒரு கோடி ரூபாய் மட்டுமே வரும் என்று தெரிந்ததும், “ஆணியே புடுங்க வேணாம்” என ரீமேக் உரிமையை விற்க மறுத்துவிட்டாராம் ஒஸ்கர் ரவிச்சந்திரன்.

ஏ.ஆர். முருகதாஸ் விஜயகாந்த்தை வைத்து எடுத்த மிகப்பெரிய வெற்றிப் படமான ரமணாவை இந்தியில் ரீமேக் செய்கிறார்கள். தமிழில் வானம் படத்தை இயக்கிய கிரீஷ் இயக்கும் இப்படத்தை, சஞ்சய் லீலா பன்சாலி தயாரிக்கிறார்.

தமிழில் விஜயகாந்த் நடித்த கதாபாத்திரத்தில் இந்தியில் அக்ஷகுமார் நடிக்கிறார். இவருக்கு ஜோடியாக தமன்னா நடிக்கவிருப்பதாக முதலில் பேசப்பட்டது.

ஆனால் தமன்னாவை விட தற்போது மார்க்கெட்டில் இருக்கும் நடிகையை தெரிவு செய்ய திட்டமிட்டுள்ளார்களாம் படக்குழு.

இதனையடுத்து ரமணா இந்தி ரீமேக்கில் நடிக்க ஸ்ருதிஹாசனிடம் பேச்சுவார்த்தை நடத்தி வருகிறார்களாம்.

இதன் மூலம் தமன்னாவுக்கு வந்த வாய்ப்பு ஸ்ருதிஹாசன் பக்கம் திரும்பியுள்ளது.

அண்மையில் இந்தியில் இவர் நடிப்பில் வெளியான டி-டே மற்றும் ராமையா வாத்சாவய்யா ஆகிய படங்கள் பரவலான வரவேற்பை பெற்றிருப்பது குறிப்பிடத்தக்கது.

சின்னத்திரையில் நிகழ்ச்சித் தொகுப்பாளராக இருந்த சிவகார்த்திகேயன் தற்போது தமிழ் சினிமாவை கலக்கி வருகின்றார்.
சின்னத்திரையில் பார்த்த சிவகார்த்திகேயனை நடிகராக ஏற்றுக்கொண்ட மக்கள் இப்போது பாடகராகவும் அவரை ஏற்றுக்கொண்டுள்ளனர்.

வருத்தப்படாத வாலிபர் சங்கம் படத்தில் சிவகார்த்திகேயன் பாடிய பாடலை யு-டியூப்பில் வெளியிட்டுள்ளதால் இப்பாடலானது சூப்பர் ஹிட்டாகியுள்ளது.

இந்த ஹிட்டைப் பார்த்து சிவகார்த்திகேயனே ஆச்சர்யப்பட்டுப் போனாராம். இதனைத் தொடர்ந்து சிவகார்த்திகேயனுக்கு பல பாடங்களில் பாடுவதற்கு வாய்ப்புகள் குவிந்த வண்ணம் உள்ளன.

இப்போதுள்ள நடிகர்களில் சிம்பு தான் எல்லா கதாநாயகர்களுக்கும் பாடுகின்றார். விஜய், தனுஷ் இருவரும் தாங்கள் நடிக்கும் படங்களில் மட்டுமே பாடுகின்றார்கள்.

எனவே, சிம்புவுக்குப் போட்டியாக தானும் களத்தில் குதிக்கலாம் என்ற முடிவுக்கு வந்திருக்கிறாராம் சிவகார்த்திகேயன்.

ஏ.ஆர்.முருகதாஸ் இயக்கத்தில், விஜயகாந்த் நடிப்பில் ஹிட்டான படம் ரமணா. இந்தப் படத்தைத் தற்போது இந்தியில் ரீமேக் செய்ய இருக்கிறார்கள்.

வானம் படத்தின் இயக்குநர் க்ரிஷ், இந்தியில் இயக்கப் போகிறார். விஜயகாந்த் வேடத்தில் அக்‌ஷய் குமார் நடிக்கிறார். சஞ்சய் லீலா பன்சாலி இந்தப் படத்தைத் தயாரிக்கிறார்.

அக்‌ஷய் குமாருக்கு ஜோடியாக தமன்னா நடிக்கிறார் என்று கூறப்பட்டது. ஆனால் ஸ்ருதி தான் நடிக்கப் போகிறார் என தற்போது செய்தி பரவுகிறது.

ஏற்கெனவே அக்‌ஷய் குமாருடன் தமன்னா நடித்துவிட்டதால் ஸ்ருதியை ஒப்பந்தம் செய்தார்கள் என்கிறது படக்குழு.

ஆனால், உண்மை அதுவல்ல. பொலிவுட்டில் எப்படியாவது காலூன்றிவிட வேண்டும் என தவித்து வரும் ஸ்ருதி என்ன மந்திரமோ செய்து தமன்னாவின் வாய்ப்பைப் பறித்து விட்டாராம்.

அக்‌ஷய் குமாருடன் நடிப்பதன் மூலம் தனக்கும் பொலிவுட்டில் நல்ல இடம் கிடைக்கும் என நம்புகிறாராம் ஸ்ருதி.

தென்னிந்தியத் திரைப்பட விருது விழாக்களில் ஒன்றான 60-வது ஃபிலிம்பேர் விருது விழா ஐதராபாத்தில் நடைபெற்றது.

இந்த விழாவில் நடிகர் தனுஷ் இரண்டு விருதுகளை தட்டிச் சென்றார். “3” படத்தில் நடித்ததற்காக சிறந்த நடிகர் விருது வழங்கப்பட்டது. அதுபோல “3” படத்தில் தனுஷ் பாடிய வை திஸ் கொலவெறி பாடலுக்காக சிறந்த பாடகர் விருது தனுஷுக்கு வழங்கப்பட்டது.

நீதானே என் பொன்வசந்தம் படத்தில் நடித்த சமந்தாவுக்கு சிறந்த நடிகைக்கான விருது வழங்கப்பட்டது. சிறந்த படமாக வழக்கு எண் 18/9, சிறந்த இயக்குநராக பாலாஜி சக்திவேல் (வழக்கு எண் 18/9) தேர்ந்தெடுக்கப்பட்டனர்.

ஒரு கல் ஒரு கண்ணாடி படத்தில் நடித்த உதயநிதி ஸ்டாலினுக்கு சிறந்த புதுமுக நடிகர் விருதும், சுந்தரபாண்டியன்´ படத்தில் நடித்த லட்சுமி மேனனுக்கு சிறந்த புதுமுக நடிகைக்கான விருதும் வழங்கப்பட்டது.

சிறந்த துணை நடிகருக்கான விருது தம்பி ராமையாவுக்கும் (கும்கி), சிறந்த துணை நடிகைக்கான விருது சரண்யா பொன்வண்ணனுக்கும் (நீர்ப்பறவை) வழங்கப்பட்டது.

சிறந்த இசை அமைப்பாளர் விருது டி.இமானுக்கும் (கும்கி), சிறந்த பாடலாசிரியர் விருது யுகபாரதிக்கும் (சொல்லிட்டாலே அவ காதல கும்கி) வழங்கப்பட்டது.

சிறந்த பாடகிக்கான விருது என்.எஸ்.கே.ரம்யாவுக்கு நீதானே என் பொன்வசந்தம் கிடைத்தது.