மின்வெட்டு..

நாளை தினமும் (24) நாட்டில் மின்வெட்டினை மேற்கொள்ள இலங்கை மின்சார சபை முன்வைத்த கோரிக்கைக்கு தேசிய பொதுப் பயன்பாடுகள் திணைக்களம் அனுமதி வழங்கியுள்ளது.

அதற்கமைய, A முதல் L வரையிலான வலயங்களில் காலை 8 மணி முதல் மாலை 6 மணி வரையிலான காலப்பகுதியினுள் தலா 3 மணிநேரமும் 20 நிமிடங்களும், மாலை 06 மணி முதல் இரவு 11 மணி வரையான காலப்பகுதியினுள் தலா ஒரு மணி நேரமும் 40 நிமிடங்களும் மின்வெட்டு அமுல்படுத்தப்படவுள்ளது.

அத்துடன், நாளைய தினம் P முதல் W வரையான வலயங்களில் காலை 8.30 முதல் 5.30 வரையான காலப்பகுதியினுள் 4 மணிநேரமும் 30 நிமிடங்களும், மாலை 5.30 முதல் இரவு 11 மணிவரை ஒரு மணிநேரமும் 50 நிமிடங்களும் மின்வெட்டு அமுல்படுத்தப்படும் என தெரிவித்துள்ளது.

தென்னிலங்கையில்..

தென்னிலங்கையில் இளம் குடும்பஸ்தர் ஒருவர் கொடூரமாக கத்தியால் குத்திக் கொலை செய்யப்பட்டுள்ளதாக பொலிஸார் தெரிவித்துள்ளனர். கர்ப்பிணியான மனைவியின் ஆசையை நிறைவேற்றுவதற்காக பாலாக்காய்,

ஒன்றை பறிந்த இளைஞனே இவ்வாறு கொலை செய்யப்பட்டுள்ளார். தனது உறவினர் ஒருவரின் வளவிலுள்ள தோட்டத்தில் பலாக்காய் பறிந்தமையினால் இந்த கொடூர சம்பவம் இடம்பெற்றுள்ளது.

சம்பவத்தில் வடக்கு எல்பிட்டிய, எகொடகெதர பகுதியைச் சேர்ந்த 34 வயதான கே.எம்.ஷெஹான் லசந்த என்பவர் உயிரிழந்துள்ளதாக பொலிஸார் தெரிவித்துள்ளனர். சந்தேகநபரான உயிரிழந்தவரின் மாமா ஒருவர் பொலிஸாரினால் கைது செய்யப்பட்டுள்ளார்.

டொலரின் பெறுமதி..

டொலருக்கு நிகரான இலங்கை ரூபாவின் பெறுமதி 285 ரூபா முதல் 290 ரூபா வரை அதிகரித்துள்ளது. நாட்டிலுள்ள வர்த்தக வங்கிகளில் இன்றைய நாணய மாற்று விகிதத்தின் பிரகாரம் இந்த தகவல் வெளியிடப்பட்டுள்ளது.

இதேவேளை, வங்கிகள் அற்ற ஏனைய நாணய மாற்று நிலையங்களில் டொலருக்கு நிகரான ரூபாவின் பெறுமதி 309 ரூபா வரை அதிகரித்துள்ளமை குறிப்பிடத்தக்கது.

டொலருக்கு நிகரான இலங்கை ரூபாவின் பெறுமதி அதிகரித்து வருவதன் காரணமாக பொருட்களின் விலைகள் தொடர்ச்சியாக அதிகரித்து வருகின்றமை குறிப்பிடத்தக்கது.

களனி ஆற்றில்…

கொழும்பு – களனி ஆற்றில் 22 வயதுடைய யுவதியொருவரை கொலை செய்துவிட்டு களனி ஆற்றில் சடலத்தை வீசிய சந்தேகநபரொருவரை பொலிஸார் கைது செய்துள்ளனர்.

குறித்த சந்தேகநபர் உயிரிழந்த பெண்ணின் காதலன் எனவும், அவர் தனது காதலியை கம்பஹா, தொரணகொடவில் உள்ள தனது வீட்டிற்கு யாரும் இல்லாத சமயம் அழைத்துச் சென்று கழுத்தை நெரித்து கொலை செய்துள்ளதாகவும் ஆரம்பகட்ட விசாரணைகளில் தெரியவந்துள்ளது.

இதன்போது , வெல்லம்பிட்டிய சேதவத்தையில் பிரதேசத்தை 22 வயதுடைய யுவதியே இவ்வாறு கடந்த 16 ஆம் திகதி கொலை செய்யப்பட்டுள்ளார். குறித்த யுவதி காணாமல்போயுள்ளதாக யுவதியின் பெற்றோர் வெல்லம்பிட்டிய பொலிஸில் முறைப்பாடு செய்துள்ளதுடன்,

இதன்போது சந்தேகநபரும் தனது காதலியின் பெற்றோருடன் பொலிஸ் நிலையத்திற்கு முறைப்பாடு செய்ய சென்றுள்ளார். இதன்போது சம்பவம் தொடர்பில் பொலிஸார் மேற்கொண்ட விசாரணைகளின் அடிப்படையில், கொஹிலவத்தை பிரதேசத்தில் வைத்து யுவதி சடலம் பொலிஸாரால் கண்டுபிடிக்கப்பட்டுள்ளது.

மேலதிக விசாரணைகளுக்காக யுவதியின் சடலம் பொலிஸ் பிரேத அறையில் வைக்கப்பட்டுள்ளதுடன், சந்தேகநபர் கிராண்ட்பாஸ் பொலிஸாரால் கைது செய்யப்பட்டுள்ளார். சம்பவம் தொடர்பில் வெல்லம்பிட்டிய மற்றும் பெமுல்ல பொலிஸார் மேலதிக விசாரணைகளை மேற்கொண்டு வருகின்றனர்.

இந்தியாவில் தஞ்சமடையும் மக்கள்..

இலங்கையின் பொருளாதார நெருக்கடி காரணமாக இலங்கை மக்கள் இந்தியாவில் தஞ்சமடைந்து வருவதாக இந்திய ஊடகம் தெரிவித்துள்ளது.

இலங்கையில் ஏற்பட்டுள்ள பொருளாதார நெருக்கடி காரணமாக இந்தியாவிற்கு சென்ற 6 பேர் ராமேஸ்வரத்திற்கு அருகில் தஞ்சமடைந்துள்ளனர்.

பொருளாதார நெருக்கடி காரணமாக இலங்கை மக்கள் அத்தியவசிய பொருட்களை கூட கொள்வனவு செய்ய முடியாத நிலைமை ஏற்பட்டுள்ளது எனவும் அந்த ஊடகம் கூறியுள்ளது.

இந்த நிலையில் தனுஷ்கோடிக்கு அருகில் மூன்றாம் தடை பகுதியில் சந்தேகத்திற்கிடமாக காணப்பட்ட ஆறு பேர் இருப்பதாக கிடைத்த தகவலை அடுத்து இந்திய கடலோர காவற்படையினர் அவர்களிடம் விசாரணை நடத்தியுள்ளனர்.

அப்போது அவர்கள் இலங்கையின் தலைமன்னாரில் இருந்து வந்துள்ளனர் என்பது தெரியவந்துள்ளது. இதனையடுத்து அவர்களிடம் அதிகாரிகள் விசாரணை நடத்தி வருகின்றனர்.

இலங்கையில் இருந்து பலர் இந்தியாவுக்குள் வரலாம் என்ற தகவலை அடுத்து இந்திய கடலோர காவற்படையினர் தீவிர ரோந்த பணியில் ஈடுபட்டு வருகின்றனர்.

ஊடகங்களிடம் கருத்து வெளியிட்டுள்ள இலங்கையில் வந்த தியூரி என்ற பெண், “இலங்கையில் விலைவாசிகள் அதிகம். கணவன்மார் இருப்பவர்களே கஷ்டப்படுகின்றனர்.

எனக்கு கணவன் இல்லை, இரண்டு பிள்ளைகளுடன் கஷ்டப்படுகிறேன். வேலைகளுக்கு சென்று பிள்ளைகளை வளர்க்க நினைத்தாலும் முடியவில்லை. எனது பெற்றோர் அங்கு இல்லை” எனக் கூறியுள்ளார்.

-தமிழ்வின்-

அகதிகளாக..

இலங்கையிலிருந்து ஆறு பேர் அகதிகளாக இந்தியாவில் அடைக்கலம் கோரியுள்ளதாகத் தமிழக செய்திகள் தெரிவிக்கின்றன. இந்தியாவில் தமிழகத்தின் தனுஷ்கோடி அரிச்சல்முனை கடல் பகுதிக்கு,

அருகே உள்ள மணல் திட்டில் இலங்கையைச் சேர்ந்த 6 பேர் கண்டுபிடிக்கப்பட்டுள்ளனர். ஒரு ஆணும், 2 பெண்களும், 3 குழந்தைகளுமே இவ்வாறு கண்டுபிடிக்கப்பட்டுள்ளனர்.

அவர்களை இந்தியக் கடலோர காவல் படையினர் மீட்டு வர உள்ளதாக தெரிவிக்கப்பட்டுள்ளது என எமது பிராந்திய செய்தியாளர் குறிப்பிட்டார்.

வாடகை வீடுகளில் வசிப்போருக்கு..

இலங்கையில் குறைந்த வசதிகளுடன் வாழ்கின்ற வாடகைக் குடியிருப்பாளர்களுக்கு உறுதிப்பத்திர வாடகை வீட்டுத்திட்ட முறையொன்று நடைமுறைப்படுத்தப்படவுள்ளது.

காணி மற்றும் வீடுகள் இன்மையால் குறைந்த வசதிகளுடன் வாழ்கின்ற வாடகைக் குடியிருப்பாளர்களின் பிரச்சினைக்குத் தீர்வு காணும் நோக்கில் “உறுதிப்பத்திர வாடகை வீடு” எனும் பெயரில் முன்மொழிவுத் திட்டமொன்றை நடைமுறைப்படுத்துவதற்காக கிராமிய வீடமைப்பு, கட்டுமானங்கள் மற்றும் கட்டடப் பொருட்கள் தொழிற்றுறை ஊக்குவிப்பு இராஜாங்க அமைச்சு திட்டமிட்டுள்ளது.

குறித்த கருத்திட்டத்தின் கீழ் 4 மாடிகளுடன் கூடிய அடுக்குமாடிக் குடியிருப்புக்களை நிர்மாணிப்பதற்கும், முதலாம் கட்டத்தின் கீழ் மாகாண மட்டத்தில் 464 வீடுகளுடன் கூடிய 9 வீடமைப்புத் தொகுதியை நிர்மாணிப்பதற்கும் திட்டமிடப்பட்டுள்ளது.

தெரிவு செய்யப்படும் பயனாளிகளுக்கு ஆரம்பக் கொடுப்பனவை செலுத்துவதற்கான இயலுமை இன்மையால், மாதாந்தம் 15,000 ரூபா வாடகைப் பணமாக 31 வருடங்களுக்கு அறவிடுவதற்கும், இரண்டாவது அல்லது மூன்றாவது பரம்பரைக்கு வீட்டு உரிமையை ஒப்படைக்கக்கூடிய வகையிலும் எந்தவொரு காரணத்திற்காகவும் வீட்டை விற்பனை செய்வதற்கு இயலாத வகையிலும் பயனாளிகளுடன் ஒப்பந்தமொன்றை மேற்கொள்வதற்கும் திட்டமிடப்பட்டுள்ளது.

அதற்கமைய குறித்த கருத்திட்டத்தை நடைமுறைப்படுத்துவதற்காக நகர அபிவிருத்தி மற்றும் வீடமைப்பு அமைச்சரான பிரதமர் சமர்ப்பித்த யோசனைக்கு அங்கீகாரம் வழங்கியுள்ளது.

துவான் மில்ஷான் தாஜுடீன்..

நிட்டம்புவ, ஹொரகொல்ல பிரதேசத்தில் உள்ள எரிபொருள் நிரப்பு நிலையத்திற்கு எரிபொருள் நிரப்ப மோட்டார் சைக்கிளில் வந்த நபர் ஒருவர் கத்தியால் குத்தி கொலை செய்யப்பட்டார்.

நேற்று இரவு 8.00 மணியளவில் இடம்பெற்ற இச்சம்பவத்தில் கிராண்ட்பாஸ் பிரதேசத்தை சேர்ந்த துவான் மில்ஷான் தாஜுடீன் என்ற 29 வயதுடைய திருமணமாகாத இளைஞரே உயிரிழந்துள்ளார். கொலையை செய்துவிட்டு தப்பிச் செல்ல முயன்ற முச்சக்கர வண்டி சாரதியை நேற்று அதிகாலை நிட்டம்புவ பொலிஸார் கைது செய்துள்ளனர்.

நிட்டம்புவ, ஹொரகொல்ல எரிபொருள் நிரப்பு நிலையத்தில் எரிபொருளுக்காக வரிசையில் நின்ற மோட்டார் சைக்கிளில் ஓட்டுநரை முச்சக்கர வண்டி சாரதி முந்தி சென்றமையினால் ஏற்பட்ட வாய்த்தகராறே இந்த கொலைக்கு காரணம் என தெரியவந்துள்ளது.

பின்னர் எரிபொருள் நிரப்பு நிலையத்திற்கு வெளியே முச்சக்கர வண்டியில் காத்திருந்த சாரதி எரிபொருள் நிரப்பிய பின்னர் வெளியே வந்த மோட்டார் சைக்கிளின் ஓட்டுநரின் முதுகில் கத்தியால் குத்தியுள்ளார்.

சம்பவத்தில் படுகாயமடைந்த மோட்டார் சைக்கிள் ஓட்டுநர் வைத்தியசாலையில் அனுமதிக்கப்பட்டதன் பின்னர் உயிரிழந்துள்ளார். இந்த கொலையை செய்தவர் 48 வயதுடைய இரண்டு பிள்ளைகளின் தந்தை எனவும் அவர் தப்பி செல்ல முயற்சித்த சந்தர்ப்பத்தில் கைது செய்யப்பட்டுள்ளார்.

இதேவேளை எரிபொருளை பெற்றுக்கொள்வதற்காக நீண்ட வரிசையில் நின்ற இருவர் கீழே விழுந்து உயிரிழந்துள்ளனர். எரிபொருள் நிலையங்களில் ஏற்படும் வாய்த்தகராறு மோதல்களாக மாறியுள்ளது. அவ்வாறான மோதலின் முதல் படுகொலை இதுவாகும்.