கண்டியில் ஒரே குடும்பத்தை சேர்ந்த இருவர் கொலை : ஒருவர் தற்கொலை : பொலிஸார் வெளியிட்ட தகவல்!!

கண்டியில்..

கண்டி, கட்டுகஸ்தோட்டயில் நேற்று காலை 3 பேர் தீவிபத்தில் சிக்கி உயிரிழந்தமைக்கான காரணத்தை பொலிஸார் வெளியிட்டுள்ளனர்.
12 வருட காதலை கைவிட்டமையினால் கோபமடைந்த இளைஞன் காதலியின் வீட்டிற்கு தீ வைத்து காதலியையும் அவரது தந்தையும் கொலை செய்த நிலையில் குறித்த இளைஞனும் தீயில் சிக்கி உயிரிழந்துள்ளார்.

இச்சம்பவம் நேற்று காலை 6.40 மணியளவில் இடம்பெற்றுள்ளது. இந்த சம்பவத்தில் காதலியின் தாய் ராணிவேலுராஜு பலத்த தீக்காயங்களுக்குள்ளான நிலையில் கண்டி வைத்தியசாலையில் சிகிச்சை பெற்று வருகின்றார்.

கட்டுகஸ்தோட்டை, மெனிக்கும்புர, ரணவன வீதியைச் சேர்ந்த முத்துத்தம்பி ஈஸ்வரதேவன் என்ற 70 வயதுடைய நபரும், அவரது மகள் ஈஸ்வரதேவன் சந்தரவாதினி என்ற 30 பெண் மற்றும் அவரது காதலனே இந்த சம்பவத்தில் உயிரிழந்தவர்கள் என அடையாளம் காணப்பட்டுள்ளதாக பொலிஸார் தெரிவித்துள்ளனர்.

கொலை செய்யப்பட்ட சந்தரவாதினி 12 வருடங்களாக காதலித்த இளைஞனை திருமணம் செய்தக் கொள்வதாக வாக்குறுதியளித்துள்ளார். ஆனால் சில காலத்திற்கு முன்பு சந்திரவாதினி காதலனை விட்டு பிரிந்து சென்றதால் அவர்களுக்குள் அடிக்கடி வாய்தகராறுகள் ஏற்பட்டுள்ளது.

காதலி உறவில் இருந்து விலகியதால் கோபமடைந்த காதலன், காதலியின் வீட்டிற்கு அடிக்கடி சென்று வாய்தகராறில் ஈடுபட்டு வந்துள்ளார். சம்பவத்தன்று காலை காதலன் பெட்ரோலுடன் வீட்டிற்கு வந்துள்ளார். காதலியுடன் நிச்சயதார்த்தம் செய்ய அனுமதிக்காவிட்டால் அனைவரையும் கொன்று விடுவதாக மிரட்டியுள்ளார்.

சந்திரவாதினியின் தந்தை மற்றும் தாயாரும் வாய்த்தகராறில் ஈடுபட்டதால், காதலன் வீட்டின் முன்பக்க கதவை அடைத்து பெட்ரோல் ஊற்றி தீ வைத்துள்ளார். அப்போது வீட்டில் எரிவாயு கசிவு ஏற்பட்டு தீ வேகமாக பரவியுள்ளது. உடனடியாக அயலவர்கள் தீயை அணைக்க முயன்றும் பலனில்லை.

தீப்பற்றி எரிந்த வீட்டில் இருந்த சந்திரவதினியின் தாயாரை அயலவர்கள் காப்பாற்றியுள்ளனர். பலத்த தீக்காயங்களுக்கு உள்ளாகியிருந்த அவர் உடனடியாக கண்டி வைத்தியசாலையில் அனுமதிக்கப்பட்டுள்ளார்.

இக்குடும்பத்தின் உயிரிழந்த தந்தை வெற்றிலை, பாக்கு வியாபாரம் செய்துள்ளார்.. சம்பவம் தொடர்பில் கட்டுகஸ்தோட்டை பொலிஸ் பரிசோதகர் மற்றும் குற்றத்தடுப்பு பிரிவின் பொறுப்பதிகாரி பன்னரதன ஆகியோர் விசாரணைகளை மேற்கொண்டு வருகின்றனர்.

“காலையில் சண்டை சத்தம் கேட்டது. எனினும் நாங்கள் அதை பெரிதாக நினைக்கவில்லை. ஏனென்றால் அவர்கள் வீட்டில் சண்டைகள் பொதுவாக நடக்கும். வீடுகள் அருகருகே இருப்பதால் சத்தம் கேட்கும். எனினும் இன்று எங்களை காப்பாற்றுங்கள் என சத்தம் கேட்டது. எனினும் அங்கு செல்வதற்குள் வீடு முழுமையாக தீப்பற்றி எரிந்து விட்டது” என அயலவர் ஒருவர் தெரிவித்துள்ளார்.

வவுனியாவில் வீடு ஒன்றின் மீது வாள்களுடன் சென்ற இளைஞர் குழு தாக்குதல்!!

வேப்பங்குளம் பகுதியில்..

வவுனியா, வேப்பங்குளம் பகுதியில் அமைந்துள்ள வீடு ஒன்றின் மீது வாள்களுடன் சென்ற இளைஞர் குழு ஒன்று தாக்குதலை மேற்கொண்டுள்ளதாக நெளுக்குளம் பொலிசார் தெரிவித்தனர்.

இன்று (25.03) பகல் இடம்பெற்ற இச் சம்பவம் தொடர்பில் மேலும் தெரியவருவதாவது, வவுனியா, வேப்பங்குளம், 7 ஆம் ஒழுங்கையில் உள்ள வீடு ஒன்றில் கணவன் வேலைக்கும், பிள்ளைகள் பாடசாலைக்கும் சென்ற நிலையில் பெண் மட்டும் வீட்டில் சமைத்துக் கொண்டு நின்றுள்ளார்.

இதன்போது கார் ஒன்றில் வாள்களுடன் சென்ற இளைஞர் குழுவொன்று குறித்த வீட்டின் யன்னல், கதவு, கதிரைகள் மீது தாக்குதல் நடத்தியதுடன் பெண்ணையும் தாக்க முயற்சித்துள்ளனர்.

இதனையடுத்து அங்கிருநற்து தப்பியோடிய பெண் அருகில் இருந்த கடைக்குள் புகுந்துள்ளார் . பின்தொடர்ந்து சென்ற இளைஞர் குழு, கணவன் எங்கே எனநக் கேட்டு அச்சுறுத்தல் விடுத்துவிட்டு அங்கிருந்து தப்பிச் சென்றுள்ளதாக பொலிசில் முறைப்பாடு செய்யப்பட்டுள்ளது.

சம்பவ இடத்திற்கு செனற வவுனியா, நெளுக்குளம் பொலிசார் தாக்குதல் நடைபெற்ற இடத்தை பார்வையிட்டதுடன் தாக்குதல் தொடர்பான மேலதிக விசாரணைகளையும் முன்னெடுத்துள்ளனர்.

வவுனியா வைரவப்புளியங்குளம் பகுதியில் வர்த்தக நிலையத்தினுள் இளைஞர் குழு அட்டகாசம் : ஒருவர் வைத்தியசாலையில்!!

வைரவப்புளியங்குளம்..

வவுனியா வைரவப்புளியங்குளம் யங்ஸ்டார் விளையாட்டு மைதானத்திற்கு முன்பாகவுள்ள வர்த்தக நிலையத்தினுள் புகுந்து இளைஞர் குழுவினர் மேற்கொண்ட அட்டகாசத்தில் ஒருவர் காயமடைந்த நிலையில் வைத்தியசாலையில் அனுமதிக்கப்பட்டுள்ளார்.

குறித்த வர்த்தக நிலையத்தில் இன்று பிற்பகல் இளைஞர்கள் சிலர் ஒன்றாக அமர்ந்திருந்த சமயத்தில் அவ்விடத்திற்கு வருகை மேற்கொண்ட மற்றொரு இளைஞர் குழுவினர் அவ் இளைஞர் மீது தாக்குதல் மேற்கொண்டதுடன் வர்த்தக நிலையத்தின் தளபாடங்களையும் சேதப்படுத்தி விட்டு அவ்விடத்திலிருந்து தப்பித்து சென்றுள்ளனர். தாக்குதலில் காயமடைந்த இளைஞர் ஒருவர் சிகிச்சைகளுக்காக வைத்தியசாலையில் அனுமதிக்கப்பட்டுள்ளார்.

சம்பவ இடத்திற்கு விரைந்த வவுனியா போக்குவரத்து பொலிஸார் வர்த்தக நிலையத்தின் உரிமையாளரை பொலிஸ் நிலையத்தில் முறைப்பாட்டினை மேற்கொள்ளுமாறு தெரிவித்து சென்றனர்.

வவுனியா வைரவப்புளியங்குளம் யங்ஸ்டார் விளையாட்டு மைதானத்திற்கு அருகே கடந்த மூன்று வாரங்களுக்குள் 6க்கு மேற்பட்ட குழு மோதல்கள் இடம்பெற்றிருந்தமையும் குறிப்பிடத்தக்கது.

வவுனியா ஏ9 வீதியில் இலங்கை மின்சார சபை வாகனம் விபத்து : இருவர் காயம்!!

விபத்து..

வவுனியா ஏ9 வீதியில் இன்று (25.03.2022) பிற்பகல் இலங்கை மின்சாரசபைக்கு சொந்தமான வாகனம் குடைசாய்ந்து விபத்துக்குள்ளானதில் இருவர் காயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

நகரிலிருந்து ஏ9 வீதி யூடாக பயணித்துக்கொண்டிருந்த வாகனம் அரசாங்க விதை உற்பத்தி பண்ணைக்கு அருகே சாரதியின் கட்டுப்பாட்டையிழந்து குடைசாய்ந்து விபத்துக்குள்ளானதில் வாகனத்தின் சாரதி உட்பட இருவர் காயமடைந்த நிலையில் வவுனியா மாவட்ட பொது வைத்தியசாலையில் அனுமதிக்கப்பட்டுள்ளனர்.

சம்பவ இடத்திற்கு விரைந்த வவுனியா போக்குவரத்து பொலிஸார் விபத்து தொடர்பிலான மேலதிக விசாரணைகளை மேற்கொண்டுள்ளனர்.

வவுனியா நகரில் மண்ணெண்ணெய் மற்றும் எரிவாயு பெறுவதற்காக வரிசையில் காத்திருக்கும் மக்கள்!!

மண்ணெண்ணெய் மற்றும் எரிவாயு..

நாட்டின் பல மாவட்டங்களில் எரிபொருள் மற்றும் எரிவாயு ஆகியவற்றிற்கான தட்டுப்பாடு தொடர்ந்த வண்ணமே உள்ளது. அந்த வகையில் வவுனியா மாவட்டத்திலும் இவற்றிக்காக இன்றும் மக்கள் நீண்ட மணிநேரமாக வரிசையில் காத்திருந்தனர்.

வவுனியா மாவட்டத்தின் பல எரிபொருள் நிலையங்களில் மண்ணெண்ணெய் நிறைவடைந்துள்ள போதிலும் மாவட்டத்தின் இரு எரிபொருள் மீள் நிரப்பு நிலையங்களில் ஒரு நபருக்கு 1000 ரூபாவிற்கு என்ற அடிப்படையில் மண்ணெண்ணெய் விற்பனை செய்யப்படுகின்றன. இதனையடுத்து மக்கள் நீண்ட வரிசையில் காத்திருக்கின்றனர்

மேலும் எரிவாயு லிட்ரோ சிலிண்டரை மட்டுப்படுத்தப்பட்ட அளவிலே வழங்கப்படுவதுடன் வவுனியா பழைய பேரூந்து நிலையத்திற்கு முன்பாகவுள்ள எரிவாயு முகவரினால் இன்று 40 டோக்கன்கள் வழங்கப்பட்டு அதிகாலை 4.30மணி தொடக்கம் மக்கள் காத்திருந்து காலை 10.30 மணியளவில் எரிவாயுவினை பெற்றிருந்தனர்.

அடுத்த வாரம் முதல் 10 மணிநேர மின்வெட்டு : தொடர்ந்து இருளில் மூழ்கப் போகும் இலங்கை !!

மின்வெட்டு..

அடுத்த வாரம் முதல் தினமும் 10 மணிநேர மின்வெட்டு நடைமுறைப்படுத்தப்படும் என தகவல் வெளியாகியுள்ளது. போதிய எரிபொருள் மற்றும் நீர்மின்சாரத்தை உற்பத்தி செய்யும் நீர்த்தேக்கங்களின் நீர் மட்டம் கடுமையாக வீழ்ச்சியடைந்துள்ளதால்,

தற்போது ஆறரை மணிநேரமாக நடைமுறையில் இருக்கும் மின்வெட்டு அடுத்த வாரத்திற்குள் 10 மணிநேரமாக அதிகரிக்கப்படும் என இலங்கை மின்சார சபை வட்டாரங்கள் தெரிவிக்கின்றன.

நாட்டில் உள்ள நீர்மின் நிலையங்களுடன் தொடர்புடைய அனைத்து நீர்த்தேக்கங்களிலும் நீர்மட்டம் பாரியளவில் வீழ்ச்சியடைந்துள்ளதாக இலங்கை மின்சார சபையின் பேச்சாளர் ஒருவர் தெரிவித்தார்.

சில நீர்த்தேக்கங்களின் நீர்மட்டத்தைப் பொருத்து இன்னும் சில நாட்களுக்கு மட்டுமே மின்சாரம் உற்பத்தி செய்ய முடியும் எனவும் அவர் மேலும் தெரிவித்தார்.

வவுனியாவில் பாடசாலைக்குள் புகுந்த மூவர் ஆசிரியர் மீது தாக்குதல்!!

தாக்குதல்..

வவுனியா செட்டிக்குளம் வீரபுரம் மணிவாசகர் மகா வித்தியாலயத்தில் ஆசிரியர் மீது மூன்று நபர்கள் இணைந்து தாக்குதல் மேற்கொண்டத்தில் படுகாயமடைந்த ஆசிரியர் வைத்தியசாலையில் அனுமதிக்கப்பட்டுள்ளார்.

இன்று (25.03.2022) பாடசாலை ஆரம்பமாகி நடைபெற்றுக்கொண்டிருந்த சமயத்தில் காலை 8.40 மணியளவில் பாடசாலைக்குள் சென்ற மூன்று நபர்கள் இணைந்து பாடசாலை வளாகத்தில் நின்ற,

ஆங்கில பாட ஆசிரியரான சாந்தகுமார் (வயது- 45) என்பவர் மீது கட்டையினால் தாக்குதல் மேற்கொண்டுள்ளனர். மற்றைய ஆசிரியர் இதனை கண்னுற்றதும் அவர்கள் அங்கிருந்து தப்பித்துச்சென்றுள்ளனர்.

தலையில் பலத்த காயங்களுக்குள்ளாகிய நிலையில் காணப்பட்ட ஆசிரியர் சக ஆசிரியர்களின் உதவியுடன் செட்டிக்குளம் ஆதார வைத்தியசாலையில் அனுமதித்தனர்.

சம்பவ இடத்திற்கு விரைந்த செட்டிக்குளம் பொலிஸார் மேலதிக விசாரணைகளை முன்னெடுத்து வருவதுடன் பாடசாலையில் பழைய மாணவர்கள், ஆசிரியர்கள் ஒன்று கூடியுள்ளமையினால் பதற்ற நிலமை நிலவி வந்ததுடன் பொலிஸார் கட்டுப்பாட்டுக்குள் கொண்டு வந்துள்ளனர்.

நாளைய தினமும் நீண்டநேரம் மின்வெட்டு : நேரங்கள் தொடர்பான அறிவிப்பு வெளியானது!!

மின்வெட்டு..

இலங்கை மின்சார சபை முன்வைத்த கோரிக்கைக்கு அமைய நாளைய தினம் (25) மின்வெட்டினை அமுல்படுத்த பொதுப் பயன்பாடுகள் ஆணைக்குழு அனுமதி வழங்கியுள்ளது.

அதன்படி, A முதல் L வரையிலான வலயங்களில் காலை 8 மணி முதல் மாலை 6 மணி வரையிலான காலப்பகுதியினுள் தலா 3 மணிநேரமும் 20 நிமிடங்களும், மாலை 6 மணி முதல் இரவு 11 மணி வரையான காலப்பகுதியினுள் தலா ஒரு மணி நேரமும் 40 நிமிடங்களும் மின்வெட்டு அமுல்படுத்தப்படவுள்ளது.

அத்துடன், நாளைய தினம் P முதல் W வரையான வலயங்களில் காலை 8.30 முதல் 5.30 வரையான காலப்பகுதியினுள் 4 மணிநேரமும் 30 நிமிடங்களும், மாலை 5.30 முதல் இரவு 11 மணிவரை ஒரு மணிநேரமும் 50 நிமிடங்களும் மின்வெட்டு அமுல்படுத்தப்படும் என பொதுப்பயன்பாடுகள் ஆணைக்குழு தெரிவித்துள்ளது.

இலங்கையில் 50 வருடங்களின் பின்னர் பாவனைக்கு வந்துள்ள பொருட்கள்!!

இலங்கையில் 50 வருடங்களின் பின்னர் விளக்குகள் மற்றும் கரி இஸ்திரி பெட்டி பாவனைக்கு வந்துள்ளன.

நாடளாவிய ரீதியில் ஏற்பட்ட மின்வெட்டு காரணமாக சிம்னி விளக்குகள் மற்றும் கரி இஸ்திரி பெட்டிகள் மீண்டும் சந்தை ஊடாக பயன்பாட்டிற்கு வந்துள்ளது.

சுமார் 50 ஆண்டுகளுக்குப் பிறகு சிம்னி விளக்குகள் மற்றும் கரி இஸ்திரி பெட்டிகளுக்கு நுகர்வோரிடம் அதிக கோரிக்கை ஏற்பட்டுள்ளதாக சந்தைத் தகவல்கள் தெரிவிக்கின்றன.

அதற்கமைய குறித்த இரண்டு பொருட்களும் விற்பனைக்காக சந்தைக்கு கொண்டு வரப்பட்டுள்ளதாகவும் வர்த்தகர்கள் தெரிவிக்கின்றனர்.

சிம்னி விளக்குகள் 1500 ரூபாய்க்கு விற்பனை செய்யப்படுவதாகவும், விளக்குகளின் போத்தல்களுக்கு தட்டுப்பாடு ஏற்பட்டுள்ளதாகவும் தெரிவிக்கப்படுகிறது.

கரி சூடாக்கி ஆடைகளை தேய்க்கும் இஸ்திரி பெட்டிகள் 2000 ரூபாய்க்கும் விற்பனை செய்யப்படுவதாக வர்த்தக்கர்கள் தெரிவித்துள்ளனர்.

இதேவேளை சமகால அரசாங்கத்தின் செயற்பாடு காரணமாக இலங்கை 50 வருடங்கள் பின்நகர்த்துள்ளதாக மத்திய வங்கியின் முன்னாள் ஆளுநர் ஒருவர் கடுமையாக சாடியிருந்தமை குறிப்பிடத்தக்கது.

இலங்கையில் டொலரின் பெறுமதி 400 ரூபாய் வரை அதிகரிக்கும்!!

டொலரின் பெறுமதி..

அந்நிய செலாவணி வீதங்கள் கட்டுப்பாடு இன்றி நீடித்தால், மே, ஜூன் மாதளவில் அமெரிக்க டொலர் ஒன்றில் விலை 400 ரூபாயை தாண்டும் என ஸ்ரீலங்கா பொதுஜன பெரமுனவின் நாடாளுமன்ற உறுப்பினர் குணபால ரத்னசேகர இன்று நாடாளுமன்றத்தில் தெரிவித்துள்ளார்.

டொலர் கட்டுப்பாட்டை கைவிட்டதன் பின்னர் அதன் பெறுமதி 300 ரூபாய் என்ற மட்டத்திற்கு வந்துள்ளது. இந்த நிலைமை காரணமாக எதிர்வரும் காலங்களில் மக்களால் தாங்க முடியாத அளவுக்கு வாழ்க்கை செலவு கட்டாயம் அதிகரிக்கும்.

மே, ஜூன் மாதங்களில் டொலரின் பெறுமதியானது 400 ரூபாய் என்ற மட்டத்திற்கு வந்து விடும் என்பது தனது மதிப்பீடு எனவும் ரத்னசேகர மேலும் தெரிவித்துள்ளார்.

இலங்கையில் தற்போது அமெரிக்க டொலர் ஒன்றின் விலை 289.99 ரூபாயாக அதிகரித்துள்ளது. டொலரின் பெறுமதி அதிகரித்து, ரூபாயின் பெறுமதி குறைந்துள்ள நிலையில், அத்தியவசிய மற்றும் அத்தியவசியமற்ற பொருட்களின் விலைகள் சடுதியாக அதிகரித்துள்ளன.

-தமிழ்வின்-

கனடாவில் மாயமான 16 வயது சிறுமி : பொதுமக்களின் உதவியை நாடும் பொலிஸார்!!

16 வயது சிறுமி..

கனடாவில் காணாமல்போன 16 வயதான பாடசாலை மாணவி குறித்து பொதுமக்களின் உதவியை பொலிஸார் நாடியுள்ளனர். கனடாவில் – சமந்தா வால்டிஸ் ஆல்வரிஸ் என்ற 16 வயது சிறுமியொருவர் காணாமல்போயுள்ளார்.

குறித்த சிறுமியின் கடைசியாக பள்ளி சீருடையுடன் கடந்த 15ஆம் திகதி காலை 8.30 மணியளவில் காணப்பட்டுள்ளார். இவர் 110 முதல் 155 பவுண்டுகள் வரை உடல் எடை கொண்டவராகவும், மெல்லிய உடலமைப்பு கொண்டவர் அவர் என்றும் தெரிவிக்கப்பட்டுள்ளது.

மேலும் பழுப்பு நிற கண்கள் மற்றும் நீண்ட, கறுப்பு முடியுடன், ஐந்து அடி ஏழு அங்குலம் உயரம் கொண்டவர் சமந்தா என பொலிஸார் கூறியுள்ளனர். சிறுமி குறித்து யாருக்கேனும் எந்தவொரு தகவல் தெரிந்தாலும் தங்களிடம் கூறலாம் எனவும் பொலிஸார் தெரிவித்துள்ளனர்.

எரிபொருள் விலையேற்றத்தினால் பண்டைய கால திருமண முறைக்கு மாறிய மக்கள்!!(வீடியோ)

எரிபொருள் விலையேற்றத்தினால்..

தமிழர்களின் பண்டைய முறையிலான திருமணமொன்று இன்று மட்டக்களப்பு மாவட்டத்தில் நடைபெற்றுள்ளது. போரதீவுப்பற்று பிரதேச செயலாளர் பிரிவுக்குட்பட்ட திக்கோடை பகுதியிலேயே இந்த திருமணம் நடைபெற்றுள்ளது.

நெற்கற்றைகளினால் வடிவமைக்கப்பட்ட மாட்டு வண்டியில் மணமகனும்,மணமகளும் ஆலயத்திற்கு அழைத்துச்செல்லப்பட்டு திருமணம் செய்து வைக்கப்பட்டுள்ளது.

அத்துடன் வீடும் நெற்கற்றைகளினால் சோடனை செய்யப்பட்டிருந்ததுடன், நிகழ்வுகள் பாரம்பரியங்களை பேணியதாக நடைபெற்றுள்ளது.

தற்போதைய காலத்தில் தமிழர்களின் பண்டைய பாரம்பரியங்கள் மறக்கப்பட்டுவரும் நிலையில் மீண்டும் அவற்றினை எதிர்கால சந்ததிக்கு கொண்டுசெல்லும் வகையில் இந்த திருமணத்தை நடாத்தியதாக உறவினர்கள் தெரிவித்தனர்.

இலங்கை அகதி முகாமில் பெண் தீக்குளித்து தற்கொலை!!

பெருமாள்புரம்..

கொட்டாரம் அருகே உள்ள பெருமாள்புரம் இலங்கை அகதிகள் முகாமில் வசித்து வந்த பெண் ஒருவர் தீக்குளித்து தற்கொலை செய்துகொண்டுள்ளதாக தமிழக ஊடகங்கள் செய்தி வெளியிட்டுள்ளன.

38 வயதான பெண் ஒருவரே இவ்வாறு உயிரிழந்துள்ளதாக தெரிவிக்கப்பட்டுள்ளது. இந்த சம்பவம் தொடர்பில் மேலும் தெரியவருவதாவது, “குறித்த அகதிகள் முகாமில் வசித்து வந்த பெண்ணுக்கு 11 ஆண்டுகளுக்கு முன் திருமணம் இடம்பெற்றுள்ளது.

இந்த தம்பதிகளுக்கு குழந்தைகள் இல்லாத நிலையில் அடிக்கடி குடும்ப தகராறு ஏற்பட்டு வந்துள்ளது. இந்நிலையில், சம்பவ தினமும் குடும்ப தகராறு ஏற்பட்டுள்ளதாக தெரிவிக்கப்படுகின்றது. இதனால் மனமுடைந்த குறித்த பெண் கணவர் வெளியே சென்ற நிலையில் தீக்குளித்து தற்கொலை செய்துகொண்டுள்ளார்.

அருகில் இருந்தவர்கள் அவரை மீட்டு வைத்தியசாலையில் அனுமதித்த போதிலும் அவர் சிகிச்சை பலனின்றி உயிரிழந்துள்ளதாக தெரிவிக்கப்படுகின்றது. சம்பவம் குறுித்து கன்னியாகுமரி பொலிஸார் விசாரணைகளை முன்னெத்துள்ளனர்.

தங்கத்தின் விலையில் மீண்டும் ஏற்பட்டுள்ள திடீர் மாற்றம்!!

தங்கத்தின் விலை..

உக்ரைன் – ரஷ்யா இடையேயான பதற்றமான நிலையானது, தொடர்ந்து தங்கம் விலையில் ஏற்றத்தினை காண வழிவகுக்கலாம் என நிபுணர்கள் கணித்துள்ளனர்.

ரஷ்யா – உக்ரைன் இடையே அதிகரித்து வரும் பதற்றத்தின் மத்தியில், முதலீட்டு ரீதியாக தங்கத்தின் தேவையானது அதிகரித்து வருகின்றது. இதன் காரணமாக நடுத்தர காலத்தில் தங்கம் விலையானது நீண்டகால நோக்கில் அதிகரிக்கலாம் என எதிர்பார்க்கப்படுகிறது.

இருப்பினும், சர்வதேச சந்தையில் வெள்ளி விலை சற்று குறைந்து காணப்படுகின்றது. தற்போது அவுன்ஸூக்கு சற்று குறைந்து, 24.902 டாலராக காணப்படுகின்றது.

தொடர்ந்து ரஷ்யா – உக்ரைன் இடையே அதிகரித்து வரும் பதற்றத்தின் மத்தியில், மீண்டும் கச்சா எண்ணெய் விலையானது உச்சம் தொட ஆரம்பித்துள்ளது.

இதன் காரணமாக பணவீக்கமானது மீண்டும் உச்சம் தொடலாம். இது பணவீக்கத்திற்கு எதிரான சிறந்த ஹெட்ஜிங் ஆக பார்க்கப்படும் தங்கம் விலையினை ஊக்குவிக்கலாம்.

பணவீக்கத்தினை கட்டுக்குள் கொண்டு வர வட்டி விகிதம் அதிகரித்தாலும், அது பெரியளவிலான விலை ஏற்றத்தினை தடுத்துள்ளது. இருப்பினும் நீண்டகால நோக்கில் தங்கம் விலையானது அதிகரிக்கலாம் என்றே எதிர்பார்க்கப்படுகிறது.

லிட்ரோ நிறுவனம் வெளியிட்டுள்ள முக்கிய அறிவிப்பு!!

லிட்ரோ..

லிட்ரோ நிறுவனம் எரிவாயு தட்டுப்பாடு தொடர்பில் முக்கிய அறிவிப்பொன்றினை வெளியிட்டுள்ளது. அதற்கமைய, தற்போது கெரவலப்பிட்டிய முனையத்தில் போதியளவு சமையல் எரிவாயு கையிருப்பு உள்ளதாக லிட்ரோ எரிவாயு நிறுவனத்தின் தலைவர் தெரிவித்துள்ளார்.

இந்நிலையில், அடுத்த 10 நாட்களுக்குள் நாடளாவிய ரீதியில் 01 மில்லியன் எரிவாயு சிலிண்டர்கள் விநியோகிக்கப்படும் எனவும் அவர் மேலும் தெரிவித்துள்ளார்.

இதன்படி, சந்தையில் தற்போது நிலவும் எரிவாயு தட்டுப்பாடு குறுகிய காலத்தில் களையப்படும் எனவும் குறித்த நிறுவனம் நுகர்வோருக்கு அறிவித்துள்ளது.

இலங்கை வரலாற்றில் 7000 ரூபாய் வரை உச்சம் தொட்ட மர முந்திரி விலை!!

மர முந்திரி..

இலங்கை வரலாற்றில் இல்லாதளவு ஒரே நாளில் ஒரு கிலோ மர முந்திரி விலை ரூ.7,000 ஆக அதிகரித்துள்ளது. உள்நாட்டு மர முந்திரிக்கு (கஜூ) சிறந்த சந்தை வாப்பை ஏற்படுத்தும் நோக்கில், முந்திரி (கஜூ) இறக்குமதியை அரசாங்கம் நிறுத்தியுள்ளது.

இந்நிலையில், அண்மையில் ஒரு கிலோ கிராம் மர முந்திரி (கஜூ) 250 ரூபா முதல் 350 ரூபா வரை விற்பனை செய்யப்பட்ட நிலையில் இன்று ஒரு கிலோ முந்திரியின் (கஜூ) விலை 800 ரூபாவாக உயர்ந்துள்ளதாகவும் மர முந்திரி (கஜூ) கூட்டுத்தாபனத்தின் தலைவர் சாரங்கா ரத்நாயக்க தெரிவித்துள்ளார்.

மர முந்திரி கூட்டுத்தாபனத்தின் விற்பனை நிலையங்கள் ஊடாக ஒரு கிலோ கிராம் முந்திரிப் பருப்பு ரூ.3500 முதல் 5000 வரையிலான விலையில் பொது மக்களுக்கு விற்பனை செய்ய ஏற்பாடுகள் செய்யப்பட்டுள்ளதாகவும் அவர் தெரிவித்துள்ளார்.

மேலும், மார்ச் மாத இறுதியில் இருந்து முந்திரி (கஜூ) அறுவடை செய்யப்படும் என்றும், இந்த ஆண்டு சுமார் 12,000 மெட்ரிக் டொன் அறுவடை கிடைக்கும் என்று எதிர்பார்ப்பதாகவும் அவர் கூறியுள்ளார்.

1...1,0591,0601,061...4,743Page 1,060 of 4,743