பெரும்போக நெற்செய்கை..

வவுனியா மாவட்டத்தில் 22 ஆயிரம் ஏக்கருக்கு மேல் பெரும் போகத்தில் நெற் பயிற்செய்கை மேற்கொள்ளப்படவுள்ளதாகவும், மழை காரணமாக புழுதி விதைப்பில் ஈடுபட்ட சில விவசாயிகள் பதிப்படைந்துள்ளதாகவும் மாவட்ட கமநல அபிவிருத்தி திணைக்கள உதவிப் பணிப்பாளர் என்.விஸ்ணுதாசன் தெரிவித்துள்ளார்.

வவுனியா மாவட்டத்தில் பெய்து வரும் மழை தொடர்பில் கருத்து தெரிவித்த போதே இவ்வாறு தெரிவித்தார். அவர் மேலும் தெரிவிக்கையில், குறுகிய காலத்தில் அதிகளவிலான மழை பெய்கின்றது. இதனால் குளங்கள் உடைப்பதற்கான சந்தர்ப்பங்கள் உள்ளது. எல்லோரும் எப்பொதும் குளங்கள் தொடர்பில் அவதானமாக இருக்கவும்.

ஏதாவது உதவி தேவை எனில் கமநல அபிவிருத்தி திணைக்களத்திற்கு அல்லது உங்கள் பிரதேசங்களில் உள்ள கமநல அபிவிருத்தி உத்தியோகத்தர்களுக்கு உடனடியாக அறவிக்கவும். 24 மணி நேரமும் உங்களுக்கான உதவிகள் கிடைக்கும்.

வவுனியா மாவட்டத்தில் பெரும் போகத்தில் 22 ஆயிரம் ஏக்கருக்கு மேற்பட்ட நெற் பயிற் செய்கையில் ஈடுபட்டுள்ளோம். தற்போது 60 வீதத்திற்கு அதிகமான வயல் நிலங்கள் பயிரிடப்பட்டுள்ளன.

ஏற்கனவே எதிர்வு கூறப்பட்டதற்கு அமைவாக 25 ஆம் திகதிக்கு பின் அதிக மழை வீழ்ச்சி வடக்கில் ஏற்பட்டுள்ளது. வவுனியா மாவட்டத்தில் புழுதி விதைப்பில் ஈடுபட்டுள்ள சிலர் இதனால் பாதிக்கப்பட்டுள்ளார்கள்.

ஏற்கனவே, குளங்கள் துப்புரவு செய்யப்பட்டு அதில் உள்ள பிரச்சனைகள் இனங்காணப்படாமல் இருந்தமையால் குளத்தில் என்ன பிரச்சனை உள்ளது என்பது தெரியாது. அப் பகுதி விவசாயிகளுக்கு கூட அது தெரியவில்லை. மழை பெய்து உடைக்கும் நிலையில் தான் அதனை பார்க்கக் கூடியதாகவுள்ளது.

இதனால் விவசாயிகள் தங்கள் குளங்களை துப்பரவு செய்து அதில் உள்ள பிரச்சனைகளை முன் கூட்டியே அடையாளம் கண்டு கொள்ளவும். இதன் மூலம் தான் வயல் நிலங்களையும், குடியிருப்புக்களையும் பாதுக்காக்க முடியும்.

நொச்சிகுளத்தில் 5 வருடமாக உமை இருந்துள்ளது. அதனை தடுக்காது இருந்துள்ளார்கள். அதனாலேயே குறித்த குளம் உடைப்பெடுக்கும் நிலைக்கு சென்றது. தற்போது தடுக்கப்பட்டுள்ளது. வவுனியாவில் சிறிய குளங்கள் அதிகம். எனவே மக்கள் கவனமாக இருக்கவும்.

செட்டிகுளம் துட்டுவாகை குளத்தில் உடைப்பெக்க கூடிய நிலை காணப்படுவதாக விவசாயிகள் தெரிவித்தனர். அதனை உடைப்பெடுக்காது தடுப்பதற்கான நடவடிக்கைகள் முன்னெடுக்கப்பட்டுள்ளது எனவும் தெரிவித்தார்.

மருந்தகங்கள்..

வவுனியா மாவட்டத்திலுள்ள மருந்தகங்கள் தொடர்பில் முறைப்பாடுகள் அதிகரித்த நிலையில் சுகாதார அதிகாரிகளுக்கும் மருந்தக உரிமையாளர்களுடான இடம்பெற்ற கலந்துரையாடலின் போதே வவுனியா பிராந்திய சுகாதார சேவைகள் பணிப்பாளர் எம்.மகேந்திரன் இவ்விடயத்தினை தெரிவித்திருந்தார்.

வவுனியா மாவட்டத்தில் கொவிட் -19 தொற்று காரணமாக சுகாதார பிரிவினருக்கு ஏற்பட்ட வேலைப்பழுவிற்கு மத்தியில் எம்மால் மருந்தங்கள் தொடர்பில் கவனம் செலுத்த முடியவில்லை. இந்த காலப்பகுதியில் ஒர் சில மருந்தகங்கள் தொடர்பில் எமக்கு பல முறைப்பாடுகள் கிடைக்கப்பெற்றிருந்தன.

அந்த அடிப்படையில் எதிர்வரும் காலங்களில் மருந்தகங்கள் மீது மிகக் கூடிய கவனம் செலுத்தப்படவுள்ளது என வவுனியா பிராந்திய சுகாதார சேவைகள் பணிப்பாளர் எம்.மகேந்திரன் தெரிவித்ததுடன்,

மருந்தக உரிமையாளர்களுக்கு சட்டதிட்டங்கள் தொடர்பில் தெளிவு வழங்கப்பட்டதுடன் அந்த சட்டதிட்டங்களுக்கு இனங்க செயற்பட வேண்டுமெனவும் , மருந்தகங்களில் மருந்தாளர் கட்டாயமாகும் , மருந்துகள் அங்கிகரிக்கப்பட்ட நிறுவனங்களில் மாத்திரம் கொள்வனவு மேற்கொள்ள வேண்டும்,

வைத்தியரின் சிபாரிசு இன்றி மருந்துகள் வழங்கப்பட கூடாது, மருந்தகங்களில் பணியாற்றும் மற்றைய ஊழியர்களும் மருந்துகள் தொடர்பில் அறிவுகளை பெற்றுக்கொண்டிருந்தல் அவசியம்,

மருந்தகங்களுக்கு குளிரூட்டி அவசியம் ஆகியவற்றினை மருந்தகங்கள் பின்பற்ற தவறினால் அந்த மருந்தகங்களுக்கு எதிராக சட்ட நடவடிக்கை மேற்கொள்ளப்படும் எனவும் பிராந்திய சுகாதார சேவைகள் பணிப்பாளர் தெரிவித்தார்.

இக் கலந்துரையாடலில் சுகாதாரப் பிரிவினர், மருந்தக உரிமையாளர்கள், உணவு, மருந்து பாதுகாப்பு அதிகாரி, வர்த்தக சங்கத்தினர் என பலரும் கலந்து கொண்டிருந்தனர்.

வவுனியா பிரதேச செயலக பிரிவுக்குட்பட்ட இறம்மைக்குளம் அபிவிருத்தி உத்தியோகத்தரை இடமாற்றுமாறு கோரி மூன்று கிராம அபிவிருத்தி சங்கத்தினர் கூட்டாக இணைந்து பிரதேச செயலாளர் மற்றும் பிரதி திட்டமிடல் பணிப்பாளர் , மாவட்ட அபிவிருத்தி குழு இணைப்பாளர் ஆகியோருக்கு மகஜர் ஒன்றினை கையளித்துள்ளனர். குறித்த மகஜரில் தெரிவிக்கப்பட்டுள்ளதாவது,

எமது கிராம சேவகர் பிரிவான இறம்பைக்குளம் பிரிவில் அபிவிருத்தி உத்தியோகத்தராக கடமைபுரியும் அபிவிருத்தி உத்தியோகத்தர் அரசினால் அறிமுகம் செய்யப்பட்ட 3 மில்லியன் ரூபாய் பாதீட்டு திட்டத்தில் எமது மக்கள் கூட்டத்தில் தீர்மானிக்கப்டாத தன்னிச்சையான பல கோரிக்கைகளை முன்வைத்துள்ளமை எமக்கு ஆதாரபூர்வமாக தெரியவந்துள்ளது.

மேற்படி நபரால் பரித்துரைக்கப்பட்ட பல விடயங்கள் மக்கள் பணத்தினை வீணாக்கும் செயற்பாடு மட்டும் அன்றி இதனை ஒரு முறைகேடாகவே நாம் பார்க்கின்றோம்.

ஆகவே குறித்த நபரால் முன்வைக்கப்பட்ட முன்மொழிவுகளை நிராகரித்து மேற்படி கூட்டத்தினை மீண்டும் ஒழுங்கு செய்து சரியான முடிவினை எடுப்பது மட்டுமன்றி மேற்படி உத்தியோகத்தர் தனது அலுவலகத்திற்கு வருவதோ மக்கள் சந்திப்புக்களை முறையாக மேற்கொள்வதோ தனது கடமையை செய்வதில் ஆர்வம் இல்லாமை போன்ற காரணங்களினால் மேற்படி தபரை எமது கிராம சேவகர் பிரியில் இருந்து மாற்றி தருமாறு தாழ்மையுடன் கேட்டுக்கொள்கின்றோம். என தெரிவிக்கப்பட்டுள்ளது.

குறித்த மகஜரில் சின்னப்புதுக்குளம் கிராம அபிவிருத்தி சங்கம் , இறம்பைக்குளம் கிராம அபிவிருத்தி சங்கம், சகாயமாதாபுரம் கிராம அபிவிருத்தி சங்கத்தினர் கையொப்பமிட்டு பிரதேச செயலாளர் மற்றும் பிரதி திட்டமிடல் பணிப்பாளர், மாவட்ட அபிவிருத்திக் குழு இணைப்பாளர் ஆகியோருக்கு கையளித்துள்ளனர்.

இவ்விடயம் தொடர்பில் குறித்த இறம்பைக்குளம் அபிவிருத்தி உத்தியோகத்தரை வினவிய போது,

சுற்றுநிருபத்தில் உள்வாங்க முடியாத விடயங்களை இவர்கள் கோரியமையினால் அவற்றை 3 மில்லியன் ரூபாய் பாதீட்டு திட்டத்தில் உள்வாங்க முடியவில்லை. இவ்விடயமே அவர்களுக்கு அதிர்ப்தியை ஏற்படுத்தியுள்ளது தவிர வேறு எவ்வித விடயங்களும் இல்லை என தெரிவித்தார்.

போராட்டத்திற்கு அழைப்பு..

வவுனியா வடக்கில் மேற்கொள்ளப்பட்டு வரும் சிங்கள குடியேற்றங்களுக்கு எதிராக எதிர்வரும் 10ஆம் திகதி வவுனியா வடக்கு பிரதேச செயலகம் முன்பாக மாபெரும் கவனயீர்ப்பு போராட்டம் இடம்பெறும் என முன்னாள் நாடாளுமன்ற உறுப்பினரும், தமிழ் மக்கள் தேசியக் கூட்டணியின் செயலாளருமான ந.சிவசக்தி ஆனந்தன் தெரிவித்துள்ளார்.

வவுனியா வடக்கு பகுதியில் திட்டமிட்ட ரீதியில் மேற்கொள்ளப்படும் குடியேற்றங்கள் தொடர்பில் வடக்கு – கிழக்கைப் பிரதிநிதித்துவப்படுத்தும் தமிழ் கட்சிகளின் கூட்டம் ஒன்று வவுனியா வடக்கு பிரதேச செயலக மாநாட்டு மண்டபத்தில் இன்று நடைபெற்றுள்ளது.

குறித்த கூட்டத்தில் முன்னாள் நாடாளுமன்ற உறுப்பினரும், தமிழ் மக்கள் தேசியக் கூட்டணியின் செயலாளருமான சிவசக்தி ஆனந்தன், முன்னாள் மாகாண சபை உறுப்பினர்களான ம.தியாகராசா (ஈபிஆர்எல்எப்), ஜி.ரி.லிங்கநாதன் (புளொட்), வவுனியா வடக்கு பிரதேசசபைத் தலைவர் தணிகாசலம் (தமிழரசுக் கட்சி),

புதிய மாக்சிச லெனினச கட்சியைச் சேர்ந்த நி.பிரதீபன், வவுனியா வடக்கு உள்ளூராட்சி மன்ற உறுப்பினர்கள், சிவில் அமைப்புக்களின் பிரதிநிதிகள், ஜனநாயக போராளிகள் கட்சி பிரதிநிதிகள், தமிழரசுக் கட்சியின் வவுனியா மாவட்ட தலைவர் ந.கருணாநிதி உள்ளிட்ட பலரும் கலந்து கொண்டுள்ளனர்.

இதன்போது, வவுனியா வடக்கில் இன விகதாசாரத்தை மாற்றியமைக்கும் வகையில் மேற்கொள்ளப்பட்டுவரும் திட்டமிட்ட சிங்கள குடியேற்றங்களைத் தடுத்து நிறுத்த தமிழ் கட்சிகளும், சிவில் அமைப்புக்களும் இணைந்து செயல்பட தீர்மானிக்கப்பட்டதுடன்,

எதிர்வரும் 10ஆம் திகதி வவுனியா வடக்கு பிரதேச செயலகம் முன்பாக காலை 10 மணிக்கு மாபெரும் கவனயீர்ப்பு போராட்டம் ஒன்றை மேற்கொள்ளவும் தீர்மானிக்கப்பட்டுள்ளதாக ஏற்பாட்டுக் குழு சார்பில் முன்னாள் நாடாளுமன்ற உறுப்பினர் சிவசக்தி ஆனந்தன் தெரிவித்துள்ளார்.

இதேவேளை, குறித்த போராட்டத்திற்குத் தமிழ் மக்களின் இருப்பிலும், தமிழ் மக்களின் அடையாளத்தைப் பாதுகாப்பதிலும் அக்கறை கொண்ட அனைத்து தரப்புக்களையும் கலந்து கொண்டு ஜனநாயக ரீதியாகக் குரல் கொடுக்குமாறும் அவர் அழைப்பு விடுத்துள்ளார்.

ஐக்கிய மக்கள் சக்தி..

ஐக்கிய மக்கள் சக்தியின் வவுனியா மாவட்ட அமைப்பாளர்கள் மற்றும் ஆதரவாளர்கள் கலந்து கொண்ட கூட்டம் கட்சியின் செயலாளரும், பாராளுமன்ற உறுப்பினருமான ரஞ்சித் மத்துவ பண்டார தலைமையில் நடைபெற்ற போது கட்சி உறுப்பினர்களிடையே கருத்து முரண்பாடுகள் ஏற்பட்டிருந்தது.

வவுனியா, இரண்டாம் குறுக்குத் தெருவில் உள்ள விருத்தினர் விடுதி ஒன்றில் ஐக்கிய மக்கள் சக்தியின் வவுனியா மாவட்ட அமைப்பாளர் ரசிக்கா பிரியதர்சினி தலைமையில் குறித்த கூட்டம் இன்று (02.11) நடைபெற்றது.

இதன்போது கட்சியின் செயற்பாடுகள் தொடர்பில் அமைப்பாளர்கள், ஆதரவாளர்களிடம் கருத்துக்கள் பெறப்பட்டது. இதன்போது அக் கட்சியின் வவுனியா மாவட்ட சிரேஸ்ட உறுப்பினர்கள் தாம் ஐக்கிய தேசியக் கட்சியில் இருந்து ஐக்கிய மக்கள் சக்திகாக செயற்படுகின்ற போதும் தாம் புறக்கணிக்கப்படுவதாகவும், திட்டமிட்டு தம்மை தற்போது கட்சியின் மாவட்ட பதவிகளில் உள்ளோர் ஓரம்கட்டுவதாகவும் குற்றம் சாட்டினர்.

கட்சியினால் தமக்கு எந்த விடயங்களும் அறிவிக்கப்படுவதில்லை எனவும், கட்சி தொடர்பில் மக்கள் மத்தியில் எந்தவித செயற்பாடுகளும் முன்னெடுக்கவில்லை எனவும் குற்றம் சாட்டினர்.

பிறிதொரு ஆதரவாளர், கட்சியின் பெயரால் மக்களிடம் பணம் பெற்றவர்களே கட்சியில் இருந்து ஓதுக்கி இருப்பதாகவும், திட்டமிட்டு எவரையும் கட்சி ஓரங்கட்டவில்லை எனவும் தெரிவித்ததுடன், கட்சியின் முன்னாள் உறுப்பினர் ஒருவருக்கு எதிராக குற்றச்சாட்டுக்கள் உள்ளதாகவும் தெரிவித்தார்.

இதன்போது பிறிதொரு உறுப்பினர், ஊடகங்கள் முன் எமது கட்சி பிரச்சனையை கதைத்து அதனை பெரிதாக்க வேண்டாம் எனக் கேட்டுக் கொண்டார்.

வேறு பல உறுப்பினர்களும் பல்வேறு கருத்துக்களை தெரிவித்ததையடுத்து கருத்தறியும் செயற்பாடு நிறுத்தப்பட்டு கட்சியின் செயலாளரும், பாராமளுன்ற உறுப்பினருமான ரஞ்சித் மத்துவ பண்டார உரையாற்றியிருந்தார். இதன் பின் கட்சி உறுப்பினர் சிலரை தனித்தனியாக சந்தித்து பேசியிருந்தார்.

குறித்த கலந்துரையாடலில் ஐக்கிய மக்கள் சக்தியின் நாடாளுமன்ற உறுப்பினர்களான ஏரான் விக்கிரமரட்ண, புத்திக பத்திரண மற்றும் கட்சியின் உயர்மட்ட உறுப்பினர் உமா சந்திர பிரகாஸ் உள்ளிட்ட பலரும் கலந்து கொண்டனர்.

பேராறு நீர்த்தேக்கம்

வவுனியா பேராறு நீர்த்தேக்கத்தின் வான் கதவுகள் திறக்கப்படவுள்ளமையால் அதன் கீழ் உள்ள பகுதிகளில் வசிக்கும் மக்கள் அ.வதானமாக இருக்குமாறு மாவட்ட அ.னர்த்த முகாமைத்துவ நிலைய உதவிப் பணிப்பாளர் திலீபன் தெரிவித்துள்ளார்.

தற்போது நிலவும் மழையுடன் கூடிய காலநிலை காரணமாக வவுனியா மாவட்டத்தில் தாழ் நிலப் பகுதிகளில் வெள்ள நீர் தேங்கியுள்ளதுடன், குளங்களின் நீர்மட்டமும் அதிகரித்து வருகின்றது.

அந்தவகையில் பேராறு நீர்த்தேக்கத்தின் நீர்மட்டம் சடுதியாக உயர்வடைந்துள்ளது. இதன் காரணமாக பேராறு நீர்த் தேக்கத்தின் வான் கதவுகள் திறக்கப்படவுள்ளதால் அதன் கீழ் உள்ள பகுதிகளில் வசிக்கும் மக்கள் அ.வதானமாக இருக்க வேண்டும்.

குறிப்பாக, பேராறு நீர்த்தேக்கத்தின் கீழ் உள்ள புதுக்குளம், சாஸ்திரிகூழாங்குளம், ஈச்சங்குளம், மருதமடு, பாலமோட்டை ஆகிய பகுதிகளில் வசிக்கும் மக்களை அவ.தானமாக இருக்குமாறும் மாவட்ட அ.னர்த்த முகாமைத்துவ நிலையம் தெரிவித்துள்ளது.