அமெரிக்க டொலர்..

இலங்கையில் மீண்டும் அமெரிக்க டொலரின் பெறுமதி அதிகரித்துள்ளதாக தனியார் வங்கிகள் வெளியிட்டுள்ள நாணய மாற்று வீத அறிக்கையில் குறிப்பிடப்பட்டுள்ளது.

அதற்கமைய இன்றைய தினம் டொலர் ஒன்றின் விற்பனை விலை 280 ரூபாவாக பதிவாகியுள்ளது. டொலர் ஒன்றின் கொள்வனவு விலை 270 ரூபாவாக பதிவாகியுள்ளது.

ஸ்ரேலிங் பவுண்ட் ஒன்றின் விற்பனை விலை 370 ரூபாவாகும் கொள்வனவு விலை 355 ரூபாவாகவும் பதிவாகி உள்ளது. யூரோ ஒன்றின் விற்பனை விலை 311 ரூபாகவும் விற்பனை விலை 297 ரூபாவாகவும் பதிவாகி உள்ளது.

சுவிஸ் பிராங் ஒன்றின் விற்பனை விலை 302 ரூபாவாகவும் கொள்வனவு விலை 288 ரூபாவாகவும் பதிவாகி உள்ளது. கனேடிய டொலர் ஒன்றின் விற்பனை விலை 224 ரூபாவாகவும் கொள்வனவு விலை 213 ரூபாவாகவும் பதிவாகி உள்ளது.

இலங்கையில் டொலர் நெருக்கடி ஏற்பட்டுள்ள நிலையில், அந்நிய செலாவணியை பெற்றுக்கொள்ளும் நோக்கில் ரூபாவின் பெறுமதியை இலங்கை மத்திய வங்கி குறைத்து வருகின்றமை குறிப்பிடத்தக்கது.

தொலைபேசி கட்டணங்கள்..

நாட்டில் தற்போது ஏற்பட்டுள்ள பொருளாதார நெருக்கடி நிலை காரணமாக அத்தியாவசியப் பொருட்கள் உள்ளிட்ட சேவைக் கட்டணங்கள் நாளுக்கு நாள் அதிகரிக்கப்படுகின்றன.

இலங்கையில் தற்போது தினந்தோறும் விலை அதிகரிப்புக்கள் மேற்கொள்ளப்படுகின்றன. இதன்காரணமாக பொதுமக்கள் பல்வேறு சிரமங்களை எதிர்கொண்டு வரும் நிலையில், தொலைபேசி கட்டணங்களையும் அதிகரிப்பதற்கு தீர்மானிக்கப்பட்டுள்ளது.

அமெரிக்க டொலருக்கு நிகரான ரூபாவின் பெறுமதி வீழ்ச்சியால் இவ்வாறு தொலைபேசிகளின் சர்வதேச அழைப்புக்களுக்கான கட்டணத்தை உயர்த்த தீர்மானம் மேற்கொள்ளப்பட்டுள்ளது. அறிக்கை ஒன்றை வெளியிட்டு இலங்கை தொலைத்தொடர்பு ஒழுங்குபடுத்தல் ஆணைக்குழு இதனைத் தெரிவித்துள்ளது.

இலங்கையில் எரிபொருளை பெற்றுக்கொள்வதற்காக நீண்ட வரிசையில் காத்திருந்த ஒருவர் நேற்றைய தினம் உயிரிழந்திருந்தார்.

மாபொல பிரதேசத்தை சேர்ந்த முச்சக்கர வண்டி சாரதியான 70 வயதுடைய நபரே கடவத்தையிலுள்ள எரிபொருள் நிரப்பு நிலையத்தில் வரிசையில் காத்திருந்த போது இவ்வாறு உயிரிழந்திருந்தார்.

இதன்போது உயிரிழந்தவரின் மனைவியை பொலிஸார் சம்பவ இடத்திற்கு அழைத்து வந்த நிலையில், அவர் தனது கணவர் உயிரிழந்துள்ளமையை நம்பாது சர்க்கரை நோய்க்கு மருந்து சாப்பிட்டு வந்த தன் கணவர்,

தற்போது கோமா நிலையில் இருப்பதாகவும்,”அவருக்கு சர்க்கரை நோய், நெஞ்சுவலி. மருந்து சாப்பிடுகிறார்.ஒன்றுமில்லை என்றும் அங்கிருந்த அனைவரிடமும் கூறியுள்ளார்.

பின்னர் பொலிஸாரின் உதவியுடன் உயிரிழந்த கணவரை முச்சக்கரவண்டியில் ஏற்றி ராகம வைத்தியசாலைக்கு அழைத்துச் சென்றுள்ளார்.

உயிரிழந்த கணவனை முச்சக்கர வண்டியில் ஏற்றி அவ்வப்போது உடலை அசைத்து சுயநினைவு பெற முயலும் காட்சி கமராக்களில் பதிவு செய்யப்பட்டுள்ளதுடன் காண்போரின் கண்களையும் கலங்க வைத்துள்ளது.

இதேவேளை, நேற்று முன்தினமும் (19) கண்டி, யட்டிநுவர வீதியில் மண்ணெண்ணெய் வரிசையில் நின்றிருந்த 71 வயதுடைய நபரொருவர் தவறி விழுந்து உயிரிழந்திருந்தமையும் குறிப்பிடத்தக்கது.

கண்டி..

கண்டி எரிபொருள் நிரப்பு நிலையத்தில் மண்ணெண்யை பெறுவதற்காக காத்திருந்த நிலையில் உயிரிழந்த நபருக்கு எவ்வித உடல் நிலை பாதிப்புகளும் காணப்படவில்லை என உயிரிழந்தவரின் சகோதரன் தெரிவித்துள்ளார்.

“என் அண்ணனுக்கு எந்த நோயும் இல்லை. இந்த அரசாங்கத்தின் தவறினால் எனது சகோதரர் இறந்தார் என்று கூற நான் அஞ்சவில்லை. ஏனென்றால் எங்கள் ஊரில் மண்ணெண்ணெய், எரிவாயு பெற்றுக் கொள்வதற்கு இடமில்லை. இன்று எங்காவது மண்ணெண்ணெய் கிடைத்துவிடும் என கூறியே அண்ணன் காலையில் சென்றார்.

கடைசியில் எங்களுக்கு மண்ணெண்ணெய் இல்லை அண்ணனின் உடல்தான் கிடைத்தது. அவர் யாரையும் தொந்தரவு செய்யாமல் வாழ்ந்த நல்ல மனிதர்.

அவரது மனைவி சமைப்பதற்கு சிரமப்பட்டு வந்ததை பார்த்து தம்பி கடந்த நாட்களாக கவலையாகவே இருந்தார். இறுதியாக நாங்கள் எங்கள் சகோதரனை இழந்துவிட்டோம்” என அவர் குறிப்பிட்டுள்ளார்.

உயிரிழந்த மொஹமட் இல்லியாஸ் என்பவரின் சடலம் கண்டி தேசிய வைத்தியசாலையில் வைக்கப்பட்டிருந்தது. நேற்று மேற்கொள்ளப்பட்ட பிரேத பரிசோதனையின் போது, ​​பெருநாடியில் ஏற்பட்ட வெடிப்பு காரணமாக அவர் உயிரிழந்துள்ளதாக தெரியவந்துள்ளது.

கட்டுகஸ்தோட்டை உடத்தலவின்ன பகுதியைச் சேர்ந்த ஒருவர் கடந்த 19ஆம் திகதி பிற்பகல் எரிபொருள் நிரப்பு நிலையத்தில் சுமார் நான்கு மணித்தியாலங்கள் மழையில் நனைந்த நிலையில் வரிசையில் நின்றிருந்த போது, மயங்கிய நிலையில் கீழே விழுந்தார் என பொலிஸ் பரிசோதனைகளில் உறுதி செய்யப்பட்டுள்ளது.

உயிரிழந்த மொஹமட் இல்லியாஸ் என்பவர் சுமார் 30 வருடங்கள் அரச சேவையில் கடமையாற்றியவர் எனவும், இலங்கை பொலிஸ்துறையில் அரச உத்தியோகத்தராக இருந்தவர் எனவும் அவரது சகோதரர் மொஹமட் நிசாம் தெரிவித்துள்ளார்.

உடத்தலவின்ன பகுதியிலும் அதனைச் சூழவுள்ள பகுதிகளிலும் எரிவாயு மற்றும் மண்ணெண்ணெய் தட்டுப்பாடு ஏற்பட்டதன் காரணமாக அடுப்பு பற்றவைக்கக் கூட முடியாத நிலை ஏற்பட்டது.

இந்த நிலையில் கண்டியில் உள்ள எரிபொருள் நிரப்பு நிலையத்தில் மண்ணெண்ணெய் இருப்பதாக கிடைத்த தகவலுக்கமைய, காலை 11.30 மணியளவில் இளைய சகோதரர் வீட்டை விட்டு வெளியேறியதாக அவர் கூறியுள்ளார்.

மண்ணெண்ணெய்க்காக வரிசையில் நின்றிருந்த போது மயங்கி விழுந்த சகோதரரை வைத்தியசாலையில் அனுமதிக்க நீண்ட நேரமாகிவிட்டதாகவும் கண்டி தேசிய வைத்தியசாலைக்கு வருகை தந்த போது அவர் உயிரிழந்துள்ளதாகவும் நிசாம் தெரிவித்துள்ளார்.

-தமிழ்வின்-

புதுக்குடியிருப்பு..

புதுக்குடியிருப்பு கைவேலிப் பகுதியில் நேற்று முன்தினம் (19.03) மலசல கூடத்திற்காக வைக்கப்பட்ட தண்ணீர் கேனில் தவறி வீழ்ந்து குழந்தை ஒன்று உயிரிழந்துள்ளதாக பொலிஸார் தெரிவித்துள்ளனர்.

கைவேலிப்பகுதியனை சேர்ந்த சியோன்ஷன் என்ற 1 வயதுடைய சிறுவனே இவ்வாறு உயிரிழந்துள்ளதாக தெரியவந்துள்ளது. வீட்டில் விளையாடிக்கொண்டிருந்த குழந்தை மலசல கூடத்தினுள் வைக்கப்பட்டிருந்த வெட்டிய தண்ணீர் கேனில் விழுந்து உயிரிழந்துள்ளது.

குழந்தையின் உயிரிழப்பு தொடர்பில் புதுக்குடியிருப்பு பொலிஸார் விசாரணைகளை முன்னெடுத்துள்ளதுடன் முல்லைத்தீவு மாவட்ட நீதவான் நீதிபதி ரி.சரவணராஜா சம்பவ இடத்திற்கு வருகைதந்து பார்வையிட்டு விசாரணைகளை முன்னெடுத்துள்ளதுடன் குழந்தையின் உடல் மரணவிசாரணைகளின் பின்னர் பெற்றோரிடம் ஒப்படைக்கப்பட்டுள்ளதாக தெரிவித்துள்ளனர்.

பேருந்து விபத்து..

யாழிலிருந்து முல்லைத்தீவு நோக்கி பயணித்த தனியார் பேருந்தொன்று முல்லைத்தீவு – வட்டுவாகல் பகுதியில் வேக கட்டுப்பாட்டினை இழந்து விபத்திற்குள்ளாகியுள்ளது.

அரச பேருந்தொன்றினை தனியார் பேருந்தொன்று முந்தி செல்ல முற்பட்ட போது வேக கட்டுப்பாட்டினை இழந்து விபத்துக்குள்ளாகி தடம்புரண்டுள்ளது.

குறித்த பேருந்தில் 23 பேர் பயணித்துள்ளதாகவும், ஒருவர் உயிரிழந்துள்ளதுடன் நான்கு பேர் காயமடைந்த நிலையில் தீவிர சிகிச்சைப்பிரிவில் அனுமதிக்கப்பட்டுள்ளதுடன், 22 பேர் வரையில் காயமடைந்துள்ளதாகவும் முதற்கட்ட விசாரணையில் தெரியவந்துள்ளது.

இதன்போது காயமடைந்தவர்களை மக்கள் மீட்டு முல்லைத்தீவு மாவட்ட மருத்துவமனையில் அனுமதித்துள்ளதுடன், முல்லைத்தீவு பொலிஸார் விசாரணைகளை முன்னெடுத்து வருகின்றனர்.

பேஸ்புக் காதலால்..

முல்லைத்தீவு – புதுமாத்தளன் பகுதியில் காணாமல்போன இரண்டு சிறுமிகளும் புதுக்குடியிருப்பு நகர் பகுதியில் வைத்து பொலிஸாரால் மீட்கப்பட்டு முல்லைத்தீவு பொலிஸாரிடம் ஒப்படைக்கப்பட்டுள்ளனர்.

இதன்போது, சிறுமிகளிடம் மேற்கொள்ளப்பட்ட விசாரணையின் போது குறித்த சிறுமிகளில் ஒருவர் பேஸ்புக் ஊடாக மட்டக்களப்பு செங்கலடிப்பகுதி இளைஞர் ஒருவருடன் தொடர்பினை ஏற்படுத்தி நட்பாகியுள்ளார்.

இந்நிலையில், செங்கலடி இளைஞர் ஒருவர் சிறுமியினை அங்கு வருமாறு அழைத்துள்ளதை தொடர்ந்து சிறுமி தனது நண்பியுடன் வீட்டிற்கு தெரியாமல் பேருந்தில் ஏறி செங்கலடிக்கு சென்றுள்ளார்.

செங்கலடி இளைஞன் இருவரையும் காரில் ஏற்றிசென்று தான் பேசிய சிறுமியுடன் பாலியல் உறவில் ஈடுபட்டுள்ளதை தொடர்ந்து அவர்களை வீடுசெல்ல அழைத்துக்கொண்டு வந்து யாழ்ப்பாணத்திற்கு செல்லும் பேருந்தில் ஏற்றி சென்றுள்ளார்.

இதன்போது இரண்டு சிறுமிகளும் யாழ்ப்பாணம் சென்று யாழ். நகரப்பகுதியில் சுற்றி திரிந்த வேளையில் அழகு சாதன பொருட்கள் விற்பனை நிலையம் ஒன்றில் பொருட்களை வாங்கிய வேளை நள்ளிரவாகியுள்ளது.

இந்நிலையில் இரண்டு சிறுமிகளுக்கும் உதவி செய்வதாக கூறி இரண்டு இளைஞர்கள் சிறுமிகளை அழைத்துக் கொண்டு சென்று வீடு ஒன்றில் தங்கவைத்து மற்றைய சிறுமியுடன் பாலியல் துஸ்பிரயோகத்தில் ஈடுபட்டுள்ளார்.

யாழ்ப்பாணத்தில் இருந்து முல்லைத்தீவு பேருந்தில் இரண்டு சிறுமிகளும் ஏற்றி அனுப்பப்பட்டுள்ளதுடன் இரண்டு சிறுமிகளும் புதுக்குடியிருப்பு நகர் பகுதியில் வந்திறங்கியுள்ளார்.

நேற்று புதுக்குடியிருப்பில் இரண்டு சிறுமிகளின் நடத்தையில் சந்தேகம் ஏற்பட்டுள்ளதை தொடர்ந்து பொலிஸாருக்கு தகவல் வழங்கப்பட்டு இருவரும் கைது செய்யப்பட்டு முல்லைத்தீவு பொலிஸில் ஒப்படைக்கப்பட்ட நிலையில்,

இருவரிடத்திலும் மேற்கொள்ளப்பட்ட வாக்குமூலத்தினை தொடர்ந்து இரண்டு சிறுமிகளும் மருத்துவ பரிசோதனைக்காக முல்லைத்தீவு மாவட்ட மருத்துவமனைக்கு அனுப்பி வைக்கப்பட்டுள்ளனர்.

இச்சம்பவம் தொடர்பில் சிறுமிகள் இருவருடனும் பாலியல் துஸ்பிரயோகத்தினை மேற்கொண்டவர்கள் தொடர்பில் முல்லைத்தீவு பொலிஸார் விசாரணைகளை முன்னெடுத்து வருகின்றனர்.

சிறுமிகளுக்கு நேர்ந்த விபரீதம்..

இலங்கையில் தற்போது சிறுவர்களுக்கு எதிரான வன்முறைகளும் , பாலியல் துஷ்பிரயோகங்களும் பல இடம்பெற்று வருகின்றன. அத்துடன் சிறுவயது காதல் பிரச்சினையினாலும் பல்வேறு குற்றச் சம்பவங்கள் பதிவாகிவருகின்றன.

இந்நிலையில், கடந்த புதன்கிழமை காதல் விவகாரம் காரணமாக ஏற்பட்ட பிரச்சினையில் இரு மாணவர்கள் கத்திக்குத்துக்கு இலக்காகி வைத்தியசாலையில் அனுமதிக்கப்பட்டுள்ளனர்.

அத்துடன், பாடசாலை ஒன்றில் கல்வி கற்கும் 13 வயது சிறுவனுக்கு ஆசிரியர் ஒருவர் ஓரின பாலியல் தொடர்பான துன்புறுத்தல்களை புரிந்து வந்த நிலையில் உடல், உள ரீதியாக பாதிக்கப்பட்ட குறித்த சிறுவன் சாவகச்சோி வைத்தியசாலையில் அனுமதிக்கப்பட்டு,

பின்னர் யாழ்.போதனா வைத்தியசாலைக்கு மாற்றப்பட்டார். அத்துடன், பல்வேறு குடும்ப வன்முறை சம்பவங்களும், திருட்டு சம்பவங்களும் தொடர்ச்சியாக பதிவாகி வருகின்றது.

இளைஞன் பலி..

கட்டுநாயக்க விமானப் படை முகாமுக்கு அருகில் உள்ள பாதுகாப்பற்ற ரயில் கடவையில் கவனமின்றி சென்ற மோட்டார் சைக்கிள் மீது ரயில் மோதியதில் அதில் பயணம் செய்த இளைஞன் படுகாயமடைந்தது சம்பவ இடத்திலேயே உயிரிழந்தார் என சீதுவை பொலிஸார் தெரிவித்துள்ளனர்.

இந்த ரயில் கடவையில் பாதுகாப்பு நுழைவு வாயில் அமைக்கப்படவில்லை என்பதுடன் ரயில் வருவதை காட்டும் மின்சார சமிக்ஞை கட்டமைப்பு பொருத்தப்பட்டுள்ளது.

எனினும் அது செயற்படுவதில்லை. அதனை திருத்தம் இதுவரை நடவடிக்கை எடுக்கப்படவில்லை என நீர்கொழும்பு ரயில்வே சமிக்ஞை பரிசோதனை அலுவலகத்தின் அதிகாரி ஒருவர் தெரிவித்துள்ளார்.

இந்த நிலையில், விமானப் படை முகாம் வீதி குரன கட்டுநாயக்க என்ற பகுதியில் வசித்து வந்த 27 வயதான திலான் ரெவோன் விஜேந்திர பெர்னாண்டோ என்ற இளைஞனே இன்று நடந்த சம்பவத்தில் உயிரிழந்துள்ளார்.

கட்டுநாயக்க சுதந்திர வர்த்தக வலயத்தில் உள்ள தொழிற்சாலையில் இருந்து மோட்டார் சைக்கிளில் வீடு திரும்பிக்கொண்டிருந்த போது, தலுபொத்த ரயில் கடமையில், புத்தளத்தில் இருந்து கொழும்பு நோக்கி வந்த கடுகதி ரயில் மோதியுள்ளதாக பொலிஸார் கூறியுள்ளனர்.

விபத்து..

நுவரெலியா – டயகம பொலிஸ் நிலையத்திற்கு சொந்தமான பொலிஸ் ஜீப் வாகனம் நேற்று மாலை விபத்துக்கு இலக்காகியுள்ளது. விபத்தில் வாகனம் முற்றாக சேதமடைந்துள்ளதோடு, பொலிஸ் சாரதி வைத்தியசாலையில் அனுமதிக்கப்பட்டுள்ளார்.

டயகம பொலிஸ் நிலையத்துக்கு சொந்தமான பொலிஸ் ஜீப் வாகனம் வீதியிலிருந்து 15 அடி‌ உயரத்திலிருந்து கீழே பாய்ந்து குடைசாய்ந்து இந்த விபத்து நேர்ந்துள்ளது.

டயகம நகரத்திலிருந்து பொலிஸ் நிலையத்திற்கு சென்று கொண்டிருந்தபோதே விபத்து ஏற்பட்டுள்ளது. இதன்போது குறித்த பொலிஸ் வாகனத்தில் சாரதியும் பொலிஸ் நிலைய அதிகாரியும் சென்றுள்ளனர்.

எனினும் இதுவரை விபத்துக்கான காரணம் கண்டறியப்படவில்லை. இது தொடர்பான விசாரணைகளை டயகம போக்குவரத்து பொலிஸார் மேற்கொண்டு வருகின்றனர்.

பால் மா..

இறக்குமதி செய்யப்படும் ஒரு கிலோ பால் மாவின் விலை 1345 ரூபாவிலிருந்து 1945 ரூபாவாகவும் 400 கிராம் பொதியின் விலை 540 ரூபாவிலிருந்து 800 ரூபாவாகவும் அதிகரிக்கப்பட உள்ளது.

நுகர்வோர் விவகார இராஜாங்க அமைச்சர் லசந்த அழகியவண்ணவிற்கு கடந்த 7ம் திகதி வழங்கிய அறிவித்தலின் பிரகாரம் ஒரு கிலோ பால் மாவின் விலை 600 ரூபாவினாலும் 400 கிராம் பொதியின் விலை 260 ரூபாவினாலும் அதிகரிக்கப்படவுள்ளது.

உலக சந்தையில் ஒரு கிலோ பால் மாவின் விலை 2.80 அமெரிக்க டொலர்களில் இருந்து 5.30 அமெரிக்க டொலர்களாக உயர்ந்துள்ளது. அமெரிக்க டொலர் ஒன்றின் பெறுமதி 202 ரூபாவில் இருந்து 280 ரூபாவாக அதிகரித்தமையே விலையை அதிகரிக்க வேண்டிய நிலைக்குத் தள்ளப்பட்டுள்ளதாக தெரிவிக்கப்பட்டுள்ளது.

மீசாலை..

யாழ்ப்பாணத்தில் ஏற்பட்ட விபத்து காரணமாக பெண் ஒருவர் உயிரிழந்துள்ளதாக வைத்தியசாலைத் தகவல்கள் தெரிவிக்கின்றன.
மீசாலை வடக்கை சேர்ந்த 52 வயதான சிறீதரன் செல்வராணி என்பவரே உயிரிழந்துள்ளார்.

கடந்த 14ஆம் திகதி பிற்பகல் 2 மணியளவில் மீசாலை ஐயா கடையடிப் பகுதியில் மோட்டார் சைக்கிளில் சென்று கொண்டிருந்த பெண் மீது முச்சக்கரவண்டி மோதிவிட்டு தப்பிச் சென்றுள்ளது.

படுகாயம் அடைந்த பெண் சாவகச்சேரி ஆதார வைத்தியசாலையில் அனுமதிக்கப்பட்ட நிலையில், மேலதிக சிகிச்சைக்காக யாழ்.போதனா வைத்தியசாலைக்கு மாற்றப்பட்டிருந்தார். எனினும் சிகிச்சையின் பலனின்றி நேற்று அவர் உயிரிழந்துள்ளதாக வைத்தியசாலை தகவல்கள் தெரிவிக்கின்றன.

பாடசாலையிலுள்ள பிள்ளைகளை வீட்டுக்கு அழைத்து வருவதற்கான சென்று மூன்று பிள்ளைகளின் தாயே உயிரிழந்துள்ளார். விபத்தை ஏற்படுத்தி விட்டு தப்பிச் சென்று முச்சக்கர வண்டி சாரதியை கைது செய்ய பொலிஸார் விசாரணைகளை மேற்கொண்டு வருகின்றனர்.

குறித்த முச்சக்கரவண்டி தொடர்பான தகவல் தெரித்தால் தமக்கு வழங்குமாறு சாவகச்சேரி பொலிஸார் பொதுமக்களிடம் கோரிக்கை விடுத்துள்ளனர்.

விபத்து..

நமுனுகுல – பசறை பிரதான வீதியின் பத்தாம் கட்டைப் பகுதியில் இரு பேருந்துகள் மோதி விபத்திற்கு இலக்காகியுள்ளன. விபத்தில் பேருந்து சாரதி உட்பட அறுவர் காயங்களுடன் பசறை பொது வைத்திய சாலையில் அனுமதிக்கப்பட்டுள்ளனர்.

குறித்த விபத்து சம்பவம் இன்று பிற்பகல் 2.30 மணியளவில் ஏற்பட்டுள்ளது. பண்டாரவளையிலிருந்து பசறை நோக்கி சென்ற தனியார் பயணிகள் பேருந்தும்,

பாடசாலை மாணவர்களை ஏற்றிவந்த பாடசாலை சேவை பேருந்தும் மோதியே இந்த விபத்து நேர்ந்துள்ளது. விபத்து தொடர்பாக பசறை பொலிஸார் விசாரணைகளை மேற்கொண்டு வருகின்றனர்.