மின்தடை..

நாட்டில் நாளைய தினமும் சுழற்சி முறையிலான மின்துண்டிப்பு நடைமுறைப்படுத்தப்படவுள்ளது. இது தொடர்பான அறிவித்தலை பொது பயன்பாடுகள் ஆணைக்குழு சற்று முன்னர் வெளியிட்டுள்ளது.

நாளையதினம் A,B,C ஆகிய பிரிவுகளில் 4.40 மணிநேர மின்வெட்டும், ஏனைய பிரிவுகளுக்கு 5.15 மணிநேர மின்வெட்டும் நடைமுறைப்படுத்தப்படவுள்ளதாக பொது பயன்பாடுகள் ஆணைக்குழு அறிவித்தல் விடுத்துள்ளது.

இலங்கை முழுவதும் கடந்த சில நாட்களாக தொடர்ச்சியாக 4 மணிநேரத்திக்கும் அதிகமான மின்வெட்டு அமுல்படுத்தப்பட்டு வருகின்றநிலையில் மக்கள் பல்வேறு சிரமங்களுக்கு முகம்கொடுத்து வருகின்றனர்.

விபத்து..

யாழ்.கொக்குவில் புகையிரத நிலையத்திற்கு அருகில் புகையிரதத்துடன் மோதுண்டு இளம்பெண் ஒருவர் உயிரிழந்துள்ளார். யாழ். காங்கேசன்துறையிலிருந்து கொழும்பு சென்ற குளிரூட்டப்பட்ட புகையிரதம் மோதியே இந்த விபத்து இடம்பெற்றுள்ளது.

சம்பவத்தில் அதே பகுதியைச் சேர்ந்த ராஜ்குமார் ஜெயந்தி என்ற 22 வயதான இளம்பெண்ணே உயிரிழந்துள்ளார். கொக்குவில் தொழினுட்ப கல்லூரிக்கு அருகில் உள்ள பாதுகாப்பற்ற புகையிரத கடவையைக் கடக்க முற்பட்ட போதே குறித்த விபத்து இடம்பெற்றுள்ளதாகத் தெரிவிக்கப்படுகிறது.

சம்பவத்தில் உயிரிழந்த பெண்ணின் தந்தை ராஜ்குமார் காயமடைந்த நிலையில் வைத்தியசாலையில் அனுமதிக்கப்பட்டுள்ளார். இச்சம்பவம் தொடர்பிலான விசாரணைகளை பொலிஸார் முன்னெடுத்துள்ளனர்.

அத்துடன், வடமராட்சி நெல்லியடி மாலிசந்தி மத்திய மகளிர் பாடசாலை முன்பாக இடம்பெற்ற விபத்தில் கோயில் சந்தையை சேர்ந்த 18 வயதுடைய இளைஞன் ஒருவர் உயிரிழந்துள்ளார். இவ் விபத்து தொடர்பில் மேலும் தெரியவருவதாவது,

மாலிசந்தி வதிரி வீதியில் மாலிசந்தி நோக்கி வந்து கொண்டியிருந்த மோட்டார் சைக்கிளும், வதிரி சந்தி நோக்கி சென்றுகொண்டிருந்த பொறி ரக வாகனமும் மோதிய நிலையில் இவ் விபத்து இடம்பெற்றுள்ளது.

இதன்போது விபத்துக்குள்ளான இளைஞனை பருத்தித்துறை ஆதார வைத்தியசாலைக்கு கொண்டுசென்ற போது உயிரிழந்துள்ளார். சடலம் பருத்தித்துறை ஆதார வைத்தியசாலையில் வைக்கப்பட்டுள்ளது. இவ் விபத்து தொடர்பிலான மேலதிக விசாரணைகளை நெல்லியடி பொலிஸார் மேற்கொண்டு வருகின்றனர்.

எழுத்தூர் பகுதியில்..

மன்னார் பொலிஸ் பிரிவுக்குட்பட்ட எழுத்தூர் பகுதியில் உள்ள வீடு ஒன்றின் குளியல் அறையில் மறைத்து வைக்கப்பட்டிருந்த 5 கடலாமைகள் பொலிஸாரால் மீட்கப்பட்டுள்ளன. மன்னார் கடலில் சட்டவிரோதமாக பிடிக்கப்பட்ட ஆமைகளே இவ்வாறு நேற்று இரவு மீட்கப்பட்டுள்ளதாக தெரியவருகிறது.

பொலிஸாருக்கு கிடைக்கப் பெற்ற இரகசிய தகவலின் அடிப்படையில் மன்னார் எழுத்தூர் பகுதியில் உள்ள வீடு ஒன்றில் விசேட சோதனை நடவடிக்கை முன்னெடுக்கப்பட்டுள்ளது.

இதன்போது மீட்கப்பட்ட ஆமைகள் அரிய வகை பேராமை இனத்தை சேர்ந்தவை என்பதுடன், ஒவ்வொரு ஆமையும் சுமார் 100 கிலோகிராம் எடை கொண்டது என பொலிஸார் தெரிவித்தனர்.

மேலும், கடலாமைகள் பொலிஸாரின் மேலதிக விசாரணைகளின் பின்னர் மன்னார் நீதிமன்றத்தில் ஒப்படைக்கப்பட்டு கடலில் விடுவதற்கான ஏற்பாடுகள் மேற்கொள்ளப்பட்டுள்ளன.

இந்த நிலையில் குறித்த வீட்டில் சந்தேகநபர்கள் எவரும் இருக்கவில்லை என்பதுடன், பொலிஸார் மேலதிக விசாரணைகளை முன்னெடுத்து வருகின்றனர்.

விபத்து..

திருகோணமலை மாவட்டத்தின் சேருநுவர பொலிஸ் பிரிவுக்குட்பட்ட பகுதியில் பேருந்து ஒன்று குடைசாய்ந்து விபத்துக்குள்ளானதில் ஆறு பேர் காயங்களுடன் கந்தளாய் தள வைத்தியசாலையில் அனுமதிக்கப்பட்டுள்ளதாக சேருநுவர பொலிஸார் தெரிவிக்கின்றனர்.

இவ் விபத்துச் சம்பவம் இன்று (24.02.2022) காலை இடம்பெற்றுள்ளது. குருணாகலையிலிருந்து திருகோணமலைக்குச் சென்ற சுற்றுலா பயணிகள் பேருந்து ஒன்றே இவ்வாறு விபத்துக்குள்ளாகியுள்ளதாக பொலிஸார் தெரிவிக்கின்றனர்.

குருணாகல் மற்றும் நாரம்பல பகுதியைச் சேர்ந்த மூன்று பெண்களும், இரண்டு ஆண்களும், ஒரு சிறுவருமே காயங்களுக்குள்ளான நிலையில் வைத்தியசாலையில் அனுமதிக்கப்பட்டுள்ளனர்.

குருணாகலையிலிருந்து திருகோணமலை சேருவில விகாரையை பார்வையிட்டு குருணாகலுக்கு திரும்பும் போதே பேருந்து குடைசாய்ந்து விபத்துக்குள்ளாகியுள்ளது. விபத்துச் சம்பவம் தொடர்பான மேலதிக விசாரணைகளை சேருநுவர பொலிஸார் மேற்கொண்டு வருகின்றனர்.

சிறுவர் இல்லமொன்றை நடத்திவரும் டெபோரா எதிரிசிங்கவுக்கு, தன்னார்வத் தொண்டர்களுக்கான பொதுநலவாய விருதின் மூலம் இரண்டாம் எலிசபெத் மகாராணி அங்கீகரித்துள்ளார்.

மாற்றுத்திறனாளி குழந்தைகளுக்கு உதவுவதற்கும் பராமரிப்பதற்கும் எதிரிசிங்க, தன்னார்வ சேவைக்காக 211வது பொதுநலவாய விருது வழங்கப்படுவதாக பிரித்தானிய உயர்ஸ்தானிகராலயம் அறிக்கை ஒன்றில் தெரிவித்துள்ளது.

38 வயதான இவர், 110 தன்னார்வ தொண்டர்கள் குழுவின் ஆதரவுடன் 1,500 குழந்தைகளுக்கான சிறுவர் இல்லமொன்றை நடத்தி வருகின்றார். இந்நிலையில், குறித்த விருதினை பெறுவதில் நான் மகிழ்ச்சியும், பாக்கியமும் அடைகிறேன் என டெபோரா எதிரசிங்க தெரிவித்துள்ளார்.

“என்னைப் பரிசீலித்ததற்கும், அங்கீகரித்ததற்கும், பாதிக்கப்படக்கூடிய குழந்தைகள் மற்றும் பெண்களுடனான எனது பணி அதன் வளர்ச்சியையும், ஆதரவையும் வழங்கியமைக்கு நன்றி” என அவர் குறிப்பிட்டுள்ளார்.

இதனிடையே, குழந்தைகளுக்கு கல்வி, சுகாதாரம், வளர்ப்பு மற்றும் ஆதரவு சமூகங்களை உருவாக்குதல் ஆகியவற்றில் அவரது பணி பாராட்டத்தக்கது” என்று பிரித்தானிய உயர் ஆணையர் சாரா ஹல்டன் தெரிவித்துள்ளார்.

பாதிக்கப்படக்கூடிய குழந்தைகளின் ஒளிமயமான எதிர்காலத்திற்கு உதவும் இந்த சிறந்த பயணத்தைத் தொடர அவரை வாழ்த்துகிறேன்.” எனவும் பிரித்தானிய தூதுவர் கூறியுள்ளார்.

வே.மகேஸ்வரன்..

நுவரெலியா – ஹட்டன் பொலிஸ் பிரிவிற்குட்பட்ட பிரதான வீதியில் 200 வருடங்கள் பழமையான ஆல மரக்கிளையொன்று விழுந்து உயிரிழந்த ஆசிரியரின் உடல் பெரும்பாலானோரின் கண்ணீருக்கு மத்தியில் நேற்றையதினம் அடக்கம் செய்யப்பட்டது.

இதன்போது, அவரின் சவத்தினை தாங்கிய பேழையில் அவரது மகள் எழுதிய உருக்கமான கடிதம் ஒன்று வைக்கப்பட்டிருந்தது. “எனது அன்புள்ள அப்பா, நீங்கள் இல்லாமையை நான் உணர்கின்றேன். நான் புலமைப்பரிசில் பரீட்சையில் சிறந்த சித்தியைப் பெறுவேன் என உங்கள் மீது சத்தியம் செய்கின்றேன்” என அந்த கடிதத்தில் குறிப்பிடப்பட்டுள்ளது.

கடந்த 21 ஆம் திகதி இடம்பெற்ற இந்த விபத்தில் தலவாக்கலை தமிழ் மகா வித்தியாலயத்தில் கற்பிக்கும் வே.மகேஸ்வரன் என்ற 39 வயதான ஆசிரியர் உயிரிழந்திருந்தார்.

இந்த சம்பவத்திற்கு நீதி கோரி பிரதேச மக்கள் வீதி மறியல் போராட்டம் ஒன்றையும் சம்பவதினத்தன்று முன்னெடுத்திருந்தனர். எனினும் பொலிஸார் வழங்கிய உறுதிமொழிக்கமைய மேற்படி போராட்டம் தற்காலிகமாகக் கைவிடப்பட்டிருந்தது.

தலவாக்கலை பிள்ளையார் ஆலய பகுதியில் அமைந்துள்ள மரத்தை அகற்றும் சந்தர்ப்பத்தில், வீதி தடைகள் எதுவும் தகுந்த முறையில் இடவில்லை எனவும், இந்த மரத்தை வெட்டுவதற்கு யார் அனுமதி வழங்கியது எனவும் கோரி, பிரதேசவாசிகள் தொடர்ந்தும் முரண்பட்டு வருகின்றமையும் குறிப்பிடத்தக்கது.

இரத்தினக்கல்..

கஹாவத்தை பிரதேசத்தில் கண்டெடுக்கப்பட்ட மிகப் பெரிய இரத்தினக்கல், கின்னஸ் உலக சாதனை புத்தகத்தில் இடம்பிடித்தமைக்கான சான்றிதழ் வழங்கப்பட்டுள்ளது.

இரத்தினபுரி கஹாவத்தை பிரதேசத்தில் கண்டு பிடிக்கப்பட்ட குறித்த இரத்தினக்கல்லின் மொத்த எடை 510 கிலோ கிராம் என்புது குறிப்பிடத்தக்கது.

இரத்தினக்கல் ஆபரண அதிகாரசபை இது தொடர்பிலான அறிவிப்பினை வெளியிட்டுள்ளது. கின்னஸ் உலக சாதனை சான்றிதழ் ராஜாங்க அமைச்சர் லொஹான் ரத்வத்தேவிடம் வழங்கப்பட்டுள்ளது.

ஆர்நூல் ரக இந்த இரத்தினக்கல் தொகுதி கடந்த ஆண்டு இரத்தினபுரி கஹாவத்தையில் கண்டு பிடிக்கப்பட்டிருந்தமை குறிப்பிடத்தக்கது. உலகின் மிகப் பெரிய இரத்தினக்கல்லாக இந்த இரத்தினக்கல் கருதப்படுகின்றது.

சமையல் எரிவாயு..

இலங்கையில் மீண்டும் சமையல் எரிவாயுக்கு தட்டுப்பாடு ஏற்படும் அபாயம் உள்ளதாக லிட்ரோ நிறுவனம் எச்சரிக்கை விடுத்துள்ளது.

இறக்குமதி செய்யப்படும் 6,000 மெற்றிக் டன் எரிவாயுவை விடுவிப்பதற்கு தேவையான டொலர்கள் இன்று வழங்கப்படவில்லை என்றால் மீண்டும் எரிவாயு தட்டுப்பாடு ஏற்படும் என நிறுவனம் தெரிவித்துள்ளது.

எரிவாயுவை விடுவிப்பதற்காக சுமார் 1.2 மில்லியன் அமெரிக்க டொலர்கள் தேவைப்பட்ட போதிலும், நேற்று பிற்பகல் வரை இலங்கை மத்திய வங்கி எந்தவொரு டொலர்களையும் வழங்கவில்லை.

லிட்ரோ நிறுவனத்தினால் இறக்குமதி செய்யப்பட்ட இரண்டு எரிவாயுவுடனான கப்பல்கள் தற்போது இலங்கையின் கரையோரத்தில் நிறுத்தப்பட்டுள்ளன.

நேற்றைய நிலவரத்திற்கமைய நிறுவனத்திடம் 2000 மெற்றிக் டன் எரிவாயு மாத்திரமே உள்ளது. அவசியமான எரிவாயுவை இறக்குமதி செய்ய லிட்ரோ நிறுவனம் ஏற்கனவே கோரிக்கைகளை விடுத்திருந்ததாக குறிப்பிட்டுள்ளது.