பயணக்கட்டுப்பாடு..

அத்தியாவசிய சேவைக்காக செல்வோர் இன்று முதல் கடுமையாக பரிசோதிக்கப்படுவார்கள் என இலங்கை பொலிஸார் தெரிவிக்கின்றனர். உண்மையிலும் அத்தியாவசிய சேவைக்காகவா பயணிக்கின்றனர் என்பது குறித்து விசாரணை மேற்கொள்ளப்படும் என பொலிஸ் ஊடகப் பேச்சாளர், பிரதி பொலிஸ் மா அதிபர் அஜித் ரோஹன குறிப்பிட்டார்.

தொழிலுக்கான அடையாள அட்டையுடன், நிறுவன தலைமை அதிகாரியின் கடிதமும் கட்டாயம் வைத்திருக்க வேண்டும் என அவர் கூறினார். போலியான கடிதங்களை வைத்திருப்போருக்கும் அவ்வாறான கடிதங்களை விநியோகிப்போருக்கும் எதிராக போலி ஆவணத் தயாரிப்பு மற்றும் தனிமைப்படுத்தல் சட்டங்களுக்கு அமைய நடவடிக்கை எடுக்கப்படும் என பொலிஸ் ஊடகப் பேச்சாளர் தெரிவித்தார்.

இதனிடையே, பொது போக்குவரத்து சேவை முன்னெடுக்கப்படமாட்டாது என அவர் கூறியுள்ளார். எனினும் வைத்தியசாலைகளுக்கும், மருந்தகங்களுக்கு செல்லவும் அனுமதி வழங்கப்பட்டுள்ளது.

தனிமைப்படுத்தல் சட்டங்களை பின்பற்றுகின்றமை குறித்து கண்காணிப்பதற்கு 23,000ற்கும் மேற்பட்ட பொலிஸ் உத்தியோகத்தர்கள் சேவையில் அமர்த்தப்பட்டுள்ளனர்.

இதனிடையே , அத்தியாவசிய சேவைகளுக்காக குறைந்தபட்ச பணியாளர் குழுவை மாத்திரம் சேவையில் அமர்த்துமாறு அனைத்து அரச நிறுவனங்களினதும் தலைவர்களிடம் பொதுச் சேவை, உள்ளூராட்சிமன்றங்கள் மற்றும் மாகாண சபைகள் அமைச்சு கோரிக்கை விடுத்துள்ளது.

அத்தியாவசிய சேவைகளுக்காக மாத்திரம் அலுவலகங்களை திறக்குமாறும் அரச நிறுவனங்களின் தலைவர்களுக்கு அறிவித்துள்ளதாக அமைச்சின் செயலாளர் ஜே.ஜே. ரத்னசிறி குறிப்பிட்டார்.

பயணக் கட்டுப்பாடு விதிக்கப்பட்டுள்ள காலப்பகுதியில் வீடுகளில் இருந்து வௌியேறுவதை குறைக்கும் நோக்கில் இந்த தீர்மானம் எடுக்கப்பட்டுள்ளதாக அவர் தெரிவித்தார்.

கோவிட் தொற்றை கட்டுப்படுத்தும் நோக்கில் நடமாடும் சேவைகளை முன்னெடுப்பதற்கு அரசாங்கம் தீர்மானித்ததாகவும் ஜே.ஜே.ரத்னசிறி கூறினார்.

எனினும், அதிகமான வாகனங்கள் நகர்ப் பகுதிகளுக்கு செல்வதை அவதானித்துள்ளதாகவும் இதனால் அத்தியாவசிய சேவைக்கான ஊழியர்களை மட்டுப்படுத்துமாறும் அவர் கோரிக்கை விடுத்துள்ளார்.

5 ஆண்டுகள் சிறை…

போலி ஆவணங்களை சமர்ப்பித்து கொழும்பிற்குள் பிரவேசித்தால் ஐந்து ஆண்டுகள் சிறைத்தண்டனை விதிக்கப்படும் என எச்சரிக்கை விடுக்கப்பட்டுள்ளது.

பயணத் தடை அறிவிக்கப்பட்டுள்ள நிலையில் போலியான ஆவணங்களைப் பயன்படுத்தி தனிமைப்படுத்தல் சட்டங்களை மீறி கொழும்பு நகரிற்குள் பிரவேசிக்கும் நபர்களுக்கு ஐந்து ஆண்டுகள் வரையில் சிறைத்தண்டனை விதிக்க சட்டத்தில் இடமுண்டு என பொலிஸார் தெரிவிக்கின்றனர்.

மேலும் இவ்வாறு தனிமைப்படுத்தல் சட்டங்களை மீறியவர்களுக்கு எதிராக ஐம்பதாயிரம் ரூபா வரையில் அபராதம் விதிக்கப்பட முடியும் என குறிப்பிடுகின்றனர்.

தனிமைப்படுத்தல் சட்டங்களை மீறுவோருக்கு எதிராக எதிர்வரும் நாட்களில் கடுமையான நடவடிக்கை எடுக்கப்படும் என பொலிஸ் ஊடகப் பேச்சாளர் அஜித் ரோஹன தெரிவித்துள்ளார்.

போலி ஆவணங்களைப் பயன்படுத்தி கடந்த நேற்று முன்தினம் பெரும் எண்ணிக்கையிலானவர்கள் கொழும்பு நகரிற்குள் பிரவேசித்திருந்தனர் என அவர் குறிப்பிட்டுள்ளார்.

-தமிழ்வின்-

கோதுமை மா..

பிரிமா நிறுவனம் உற்பத்தி செய்யும் கோதுமை மாவின் விலை இன்று முதல் 4 ரூபாயால் அதிகரித்துள்ளதாக அந்த நிறுவனத்தின் முகவர்கள் தெரிவித்துள்ளனர்.

கொத்து ரொட்டி, தேங்காய் ரொட்டி, கிழங்கு ரொட்டி, முட்டை ரொட்டி, புட்டு, இடியப்பம் மற்றும் பராட்டா உள்ளிட்ட உணவுகள் இந்த கோதுமை மாவின் மூலமே தயாரிக்கப்படுகின்றன. நுகர்வோரும் இந்த உணவுகளை அதிகளவில் பயன்படுத்தி வருகின்றனர்.

பிரிமா நிறுவனம் உற்பத்தி செய்யும் கோதுமை மாவின் விலை இன்று முதல் 4 ரூபாயால் அதிகரித்துள்ளதாக அந்த நிறுவனத்தின் முகவர்கள் தெரிவித்துள்ளனர்.

-தமிழ்வின்-

புதிய காய்ச்சல்..

சிறார்களுக்கு இடையில் பரவி வரும் நோய் ஒன்றை பொரள்ளை ரிஜ்வே சிறுவர் வைத்தியசாலையின் விசேட சிறுவர் மருத்துவ நிபுணர் தீபால் பெரேரா கண்டறிந்துள்ளார்.

இது ஒரு வகையான காய்ச்சல் நோய் எனவும் இந்த நோய் 5 வயது முதல் 16 வயதுக்குட்பட்ட பிள்ளைகளுக்கு அதிகளவில் ஏற்படும் எனவும் அவர் கூறியுள்ளார்.

கண், நாக்கு, தோல் என்பன சிவந்து போதல், மூட்டு வலி, மூட்டு வீக்கம், சருமத்தில் கெப்பலங்களல் ஏற்படுவது இந்த காய்ச்சல் நோயின் ஆரம்ப அறிகுறிகள் எனவும் தீபால் பெரேரா கூறியுள்ளார்.

இந்த நோய் அறிகுறிகள் அல்லது காய்ச்சல் என்பன 14 நாட்களுக்கு மேல் நீடித்தல் கட்டாயம் வைத்தியசாலையில் அனுமதிக்கப்பட வேண்டும். அத்துடன் இந்த நோயை கோவிட் தொற்று நோயின் பக்கவிளைவாகவும் கருத முடியும் எனவும் மருத்துவர் தீபால் பெரேரா குறிப்பிட்டுள்ளார்.

டெங்கு நோய்..

சில கொரோனா தொற்று அறிகுறிகள் டெங்கு நோய் தொற்றிற்கு சமமானதாக உள்ளதென வைத்தியர்கள் தெரிவித்துள்ளனர். இதன் காரணமாக நோய் நிலைமை ஒன்று ஏற்பட்டால் வீட்டில் இருந்து ஆராயாமல் வைத்திய ஆலோசனைகளை உடனடியாக பெற்றுக் கொள்ளுமாறு தேசிய டெங்கு தடுப்பு பிரிவு மக்களிடம் கேட்டுக்கொண்டுள்ளது.

இது தொடர்பில் கருத்து வெளியிட்ட சுகாதார அமைச்சின் தேசிய டெங்கு நோய் தடுப்பு பிரிவின் வைத்தியர் வீரசிங்க, காய்ச்சல் மற்றும் உடல் வலி டெங்கு மற்றும் கொவிட் ஆகிய இரண்டு நோய்களும் காண கூடிய அடையாளங்கள் என குறிப்பிட்டுள்ளார்.

இது தொடர்பில் தொடர்ந்து கருத்து வெளியிட்ட வைத்தியர் இந்திக்க விரசிங்க “வீட்டில் காய்ச்சல் ஏற்பட்டால் எனக்கு ஏற்பட்டது டெங்கு காய்ச்சலா? சாதாரண வைரஸ் காய்ச்சலா அல்லது கொவிட் தொற்றா என தீர்மானிப்பது நல்லதல்ல.

நோய் அறிகுறிகள் உள்ளவர்கள் உடனடியாக வைத்தியரிடம் அல்லது வைத்தியசாலைகளுக்கு செல்ல வேண்டும். ஒரு நோய் அறிகுறி உள்ளவருக்கு வேறு ஏதாவது நோய்கள் இருப்பின் அது ஆபத்தான நிலைமைக்கு கொண்டு செல்ல கூடும். இதனால் கொவிட் தொற்றாளர் ஒருவருக்கு டெங்கு நோய் தொற்றினால் ஆபத்து அதிகமாகிவிடும்” என அவர் மேலும் தெரிவித்துள்ளார்.

கொரோனா..

யாழ்ப்பாணத்தில் 149 பேர் உட்பட வடக்கில் நேற்று 247 பேருக்கு கொரோனா தொற்று உறுதி செய்யப்பட்டுள்ளதாக கோவிட் 19 பரவலை தடுப்பதற்கான தேசிய செயல்பாட்டு மையத்தினால் இன்று காலை வெளியிடப்பட்ட நாளாந்த நிலவர அறிக்கையில் தெரிவிக்கப்பட்டுள்ளது.

யாழ்ப்பாணம் மாவட்டத்தில் 149 பேர், மன்னார் மாவட்டத்தில் 46 பேர், கிளிநொச்சி மாவட்டத்தில் 27 பேர், வவுனியா மாவட்டத்தில் 16 போ், முல்லைத்தீவு மாவட்டத்தில் 09 பேர்.

இவ்வாறு வடக்கு மாகாணத்தில் நேற்று தொற்று உறுதி செய்யப்பட்டதாக கோவிட் 19 பரவலை தடுப்பதற்கான தேசிய செயல்பாட்டு மையத்தினால் வெளியிடப்பட்டுள்ள பிந்திய அறிக்கையில் கூறப்பட்டுள்ளது.

இதேவேளை, யாழ். ஆய்வுகூடங்களில் நேற்றைய தினம் முன்னெடுக்கப்பட்டிருந்த பரிசோதனை முடிவுகளின் அடிப்படையில் வட மாகாணத்தில் 135 பேருக்கு தொற்று உறுதி செய்யப்பட்டிருந்தது.

யாழ்ப்பாணம் மாவட்டத்தில் 96 பேர், மன்னார் மாவட்டத்தில் 14 பேர், வவுனியா மாவட்டத்தில் 11 போ், கிளிநொச்சி மாவட்டத்தில் 08 பேர், முல்லைத்தீவு மாவட்டத்தில் 06 பேர்

இவ்வாறு, யாழ். ஆய்வுகூட பரிசோதனை அறிக்கைகளின் அடிப்படையில் 135 பேர் வட மாகாணத்தில் நேற்றைய தினம் தொற்றாளர்களாக அடையாளம் காணப்பட்டிருந்தமை குறிப்பிடத்தக்கது.

நான்கு மணி நேரத்தில்…

சுமார் நான்கு மணி நேரத்தில் 55,944 வாகனங்கள் கொழும்பு நகரிற்குள் பிரவேசித்துள்ளதாக பொலிஸார் தெரிவித்துள்ளனர். நேற்று காலை 6.30 மணி முதல் 10.30 மணி வரையான காலப்பகுதியில் குறித்த வாகனங்கள் கொழும்பு நகரிற்குள் பிரவேசித்திருப்பதாக பொலிஸ் ஊடகப் பேச்சாளர் அஜித் ரோஹன தெரிவித்துள்ளார்.

சுகாதார சேவைகளுடன் இணைக்கப்பட்டுள்ள 20,440 வாகனங்கள், அத்தியாவசிய உணவுப் பொருட்களை கொண்டு சென்ற 7,000 வாகனங்கள், உணவு வழங்கும் 4,760 வாகனங்கள், நோயாளிகளைக் கொண்டு செல்லும் 8,232 வாகனங்கள் மற்றும் அத்தியாவசிய சேவைகள் தொடர்பான 8,232 வாகனங்கள் இதில் அடங்குவதாக தெரிவிக்கப்பட்டுள்ளது.

எவ்வாறாயினும், பயணக் கட்டுப்பாடுகளை மீறி 3,528 வாகனங்கள் கொழும்புக்குள் நுழைந்ததாக அவர் குறிப்பிட்டுள்ளார். ஊடகங்களிடம் பேசிய அவர் இதனை கூறியுள்ளார்.

தொடர்ந்தும் கருத்து வெளியிட்ட அவர், பயணக் கட்டுப்பாடுகளை மீறிய நபர்கள் தனிமைப்படுத்தப்பட்ட விதிமுறைகளின் கீழ் சட்ட நடவடிக்கைகளை எதிர்கொள்ள நேரிடும் என எச்சரிக்கை விடுத்தார்.

மாகாணங்களுக்கு இடையேயான பயணக் கட்டுப்பாடுகளை மீறும் நபர்கள் தொடர்பில் இன்றும் சோதனைகள் மேற்கொள்ளப்படும், அத்துடன், முன்னுரிமை பெற்ற அத்தியாவசிய சேவைகளில் பணியாற்றும் நபர்கள் மட்டுமே மாவட்டங்களுக்கு இடையே பயணிக்க அனுமதிக்கப்படுவார்கள் என அவர் கூறியுள்ளார்.

இதேவேளை, அத்தியாவசிய உணவுப் பொருட்கள் மற்றும் உணவு விநியோக சேவைகளை விற்கும் வாகனங்கள் உப பாதைகளில் பயணிப்பதில்லை என்று முறைப்பாடுகள் பதிவு செய்யப்பட்டுள்ளன.

இவ்வாறான முறைப்பாடுகள் தொடர்ந்தால் பிரதேச செயலாளர்களால் வழங்கப்படும் அத்தகைய விற்பனையாளர்களின் பயண அனுமதிகளை இரத்து செய்ய பொலிஸ்துறை நடவடிக்கை எடுக்கும் என அவர் மேலும் கூறியுள்ளார்.

கொரோனா…

இலங்கையில் மேலும் 43 கோவிட் மரணங்கள் பதிவாகியுள்ளதாக அரசாங்க தகவல் திணைக்களம் வெளியிட்டுள்ள அறிக்கையில் தெரிவிக்கப்பட்டுள்ளது. இதன்படி, இலங்கையில் கோவிட் தொற்றினால் உயிரிழந்தவர்களின் மொத்த எண்ணிக்கை 1484 ஆக உயர்ந்துள்ளது.

இதேவேளை, நேற்றைய தினம் 2,882 கோவிட் தொற்றாளர்கள் அடையாளம் காணப்பட்டுள்ளனர். இதற்கமைய கோவிட் தொற்றாளர்களின் மொத்த எண்ணிக்கை 186,334 ஆக அதிகரித்துள்ளது.

நாட்டில் கோவிட்-19 தொற்றிலிருந்து குணமடைந்தோர் எண்ணிக்கை 150,000 ஐ கடந்துள்ளது. இதற்கமைய,நேற்று மேலும் 1,915 பேர் கோவிட் தொற்றிலிருந்து குணமடைந்து சிகிச்சை மையங்களிலிருந்து வெளியேறியுள்ளனர்.

தொற்றுநோய் தடுப்புப்பிரிவின் புதுப்பிக்கப்பட்ட நாளாந்த அறிக்கையில் இந்த தகவல் தெரிவிக்கப்பட்டுள்ளது . இதன்படி நாட்டில் கோவிட் தொற்றுக்குள்ளாகி இருந்தவர்களில், 151,740 பேர் இதுவரையில் குணமடைந்துள்ளனர்.