கொரோனா..

இலங்கையில் கோவிட் வைரஸின் மூன்றாவது அலையின் தாக்கம் மிகவும் மோசமான கட்டத்தை அடைந்து வருவதாக சுகாதார அதிகாரிகள் அச்சம் வெளியிட்டுள்ளனர்.

நாட்டில் கடந்த சில தினங்களாக ஆயிரத்திற்கும் மேற்பட்ட கோவிட் தொற்றாளர்கள் நாளாந்தம் அடையாளம் காணப்பட்டு வருகின்றனர். இன்றைய நாளின் மாலை ஐந்து மணி வரையிலான காலப்பகுதியில் 1,077 பேர் கொரோனா தொற்றாளர்களாக அடையாளம் காணப்பட்டுள்ளனர்.

நேற்றையதினம் 1451 தொற்றாளர்களும் நேற்று முன்தினம் 1111 தொற்றாளர்களும் அடையாளம் காணப்பட்டுள்ளனர். இலங்கையில் தொடர்ந்து மூன்று நாட்களுக்கு ஆயிரத்திற்கும் மேற்பட்ட தொற்றாளர் அடையாளம் காணப்பட்டால் அது பெரும் ஆபத்தாக மாறும் சுகாதார அதிகாரிகள் ஏற்கனவே எச்சரித்துள்ளனர்.

இந்நிலையில் நாட்டின் பல பகுதிகளில் கோவிட் தொற்றாளர்களின் எண்ணிக்க நாளுக்கு அதிகரித்து வருகின்றமை குறித்து பெரும் அச்சம் வெளியிடப்பட்டுள்ளது.

தற்போதைய ஆபத்தான நிலையை உணர்ந்து நாட்டு மக்கள் உரிய சுகாதார விதிமுறைகளை முறைப்படி கடைப்பிடிக்க வேண்டும் என வலியுறுத்தப்பட்டுள்ளது. தேவையற்ற காரணங்களுக்காக வெளியில் செல்வதை தவிர்த்து வீடுகளில் பாதுகாப்பாக இருக்குமாறு அறிவுறுத்தப்பட்டுள்ளனர்.

பரவும் கோவிட்..

நாட்டில் பரவும் கோவிட் மரபணு முன்னரை விடவும் ஆபத்தானது என்பதனால் மக்கள் சுகாதார வழிக்காட்டல்களை பின்பற்றுவது கட்டாயமாகும். அவ்வாறில்லை என்றால் நிலைமை மோசமடையும் என சுகாதார பிரிவு குறிப்பிட்டுள்ளது.

தற்போது வேகமாக பரவும் வைரஸ், கடந்த காலகளில் பிரித்தானியாவில் பரவி பாரிய உயிரிழப்புகளை ஏற்படுத்தியதென உறுதி செய்யப்பட்டுள்ளதாக ஸ்ரீ ஜயவர்தனபுர பல்கலைக்கழகத்தின் வைத்தியர் சந்திம ஜீவன்தர தெரிவித்துள்ளார்.

கொழும்பு, பொரலஸ்கமுவ மற்றும் குருநாகல் பிரதேசங்களில் பெற்றுக்கொள்ளப்பட்ட பீசீஆர் மாதிரிகளின் பின்னர் இந்த விடயம் உறுதி செய்யப்பபட்டதாக அவர் குறிப்பிட்டுள்ளார்.

எப்படியிருப்பினும் முதலாவது, இரண்டாவது அலையை விடவும் அபாயமானதெனவும், அந்த மரபணு இலங்கை முழுவதும் ஏப்ரல் மாதத்தில் பரவியுள்ளது. இவ்வாறு புதிதாக கண்டுபிடிக்கப்பட்ட புதிய மரபணு மற்றும் இதற்கு முன்னர் பரவிய மரபணுவின் அறிகுறிகளுடன் தொடர்புடையதாகும்.

இதற்கு முன்னர் நோய் அறிகுறிகளாக காய்ச்சல், இருமல், சுவாச பிரச்சினை காணப்பட்டது, புதிய மரபணுவில் உடல் வலி, தலைவலி, வாசனை தெரியாமை போன்ற விடயங்கள் காணப்படும் வைத்தியர்கள் சுட்டிக்காட்டியுள்ளனர்.

அத்துடன் இந்த புதிய மரபணு காரணமாக ஏற்படும் மரணங்கள் 55 வீதம் அதிகம் எனவும் மக்களுக்கு இடையில் 50 வீதம் அதிகமாக பரவும் எனவும் பரிசோதனையில் கண்டுபிடிக்கப்பட்டுள்ளது.

பிரித்தானிய மாறுபாடு ஏப்ரல் மாதம் 8ஆம் திகதி முதலில் ஏற்பட்டது. இது பரவினால் உயிரிழந்து விடுவோம் என்ற எண்ணமே எல்லோரிடமும் காணப்பட்டது. அது பரவியவுடன் சுகாதார பிரிவுகளிடம் தெளிவுப்படுத்தினோம்.

எனினும் 8 பேரிடம் மாத்திரம் காணப்பட்ட அந்த மரபணு மாறிய கொரோனா எல்லோரிடமும் எப்படி பரவியது என்பது தெரியவில்லை. எனினும் தற்போது எடுக்கப்பட்டுள்ள நடவடிக்கைகள் சிறப்பாக உள்ளதென ஜயவர்தனபுர பல்கலைக்கழகத்தின் வைத்தியர் சந்திம ஜீவன்தர தெரிவித்துள்ளார்.

– தமிழ்வின்-

தேங்காய் எண்ணெய் ..

‘N JOY’ என்ற பெயரில் சந்தையில் விற்பனை செய்யப்படும் தேங்காய் எண்ணையில் எப்லடொக்ஸின் என்கின்ற புற்றுநோயை ஏற்படுத்தக்கூடிய வேதியல் பொருள் இருப்பதாக கண்டுபிடிக்கப்பட்டுள்ளதாக தென்னிலங்கை ஊடகங்கள் தகவல் வெளியிட்டுள்ளன.

குறித்த தேங்காய் எண்ணெய் மாதிரிகளை பேராதனை பல்கலைக்கழக ஆய்வகத்தில் பரிசோதனைக்கு உட்படுத்தப்பட்டுள்ளது. அந்த பரிசோதனையின் போது அதில் புற்றுநோய் ஏற்படுத்தும் எப்லடொக்ஸின் உள்ளமை கண்டுபிடிக்கப்பட்டுள்ளது.

அதன் பின்னர் மேலும் சில ஆய்வகத்தில் மேற்கொள்ளப்பட்ட பரிசோதனைகளிலும் அந்த தேங்காய் எண்ணையில் எப்லடொக்ஸின் உள்ளமை உறுதியாகியுள்ளது.

அதற்கமைய இந்த பெயரின் கீழ் சந்தையில் விற்பனைக்கு விடப்பட்டுள்ள தேங்காய் எண்ணெய்யும் மீண்டும் பெற்றுக்கொள்ளுமாறு நுகர்வோர் விவகார அதிகாரி சபைக்கு அறிவிக்கப்பட்டுள்ளது.

அத்துடன் அந்த நிறுவனத்தின் கிரான்ட்பாஸ் களஞ்சிய அறைக்கும் சீல் வைக்கப்பட்டுள்ளது. அத்துடன் குறித்த நிறுவனத்திற்கு எதிராக விசாரணைகள் ஆரம்பிக்கப்பட்டுள்ளதாக நுகர்வோர் விவகார அதிகார சபை தெரிவித்துள்ளது.

-தமிழ்வின்-

பேரூந்து விபத்து..

நுவரெலியா – ஹைய்பொரஸ்ட் பகுதியிலிருந்து இராகலை நகரை நோக்கி பயணித்த தனியார் பஸ் ஒன்று இராகலை – கோணப்பிட்டிய பிரதான வீதியில் மாகுடுகல தோட்டப் பகுதியில் மரக்கறி தோட்டம் ஒன்றில் குடைசாய்ந்துள்ளது.

ஹைய்பொரஸ்ட் பகுதியிலிருந்து பயணிகளை ஏற்றிக் கொண்டு இராகலை பகுதிக்கு சென்ற குறித்த பஸ் இன்று (29.04.2021) பிற்பகல் 12 மணியளவில் பாதையை விட்டு விலகி சுமார் 20 அடி பள்ளத்தில் பாய்ந்து விபத்துக்குள்ளாகியுள்ளது. இவ்விபத்தில் பஸ்ஸில் பயணித்த 20 பேர் படுகாயங்களுக்குள்ளாகியுள்ளனர்.

பஸ் சாரதிக்கு ஏற்பட்ட திடீர் சுகயீனம் காரணமாக சாரதி கட்டுப்பாட்டை இழந்ததனால் இந்த விபத்து நேர்ந்ததாக நேரடி விசாரணைகளின் போது தெரியவந்துள்ளது.

இவ்விபத்தில் காயமடைந்த 20 பேரும், ஹைய்பொரஸ்ட் வைத்தியசாலையில் ஆரம்ப சிகிச்சைக்காக அனுமதிக்கப்பட்ட பின் மேலதிக சிகிச்சைக்காக நுவரெலியா மாவட்ட வைத்தியசாலைக்கு மாற்றப்பட்டுள்ளதாகவும், அங்கு சிகிச்சை பெற்று வருவதாகவும் வைத்தியசாலை வட்டாரங்கள் தெரிவித்தன.

இவ்வாறு காயமடைந்தவர்களில் சிறுவர்களும் அடங்குகின்றனர் என வைத்தியசாலை வட்டாரங்கள் மேலும் தெரிவித்தன. இவ்விபத்து தொடர்பில் இராகலை போக்குவரத்து பொலிஸார் மேலதிக விசாரணைகளை மேற்கொண்டு வருகின்றனர்.

விமான நிலையம்..

விமான நிலையத்தை மூடுவது அல்லது சுற்றுலாப் பயணிகளின் வருகையைக் கட்டுப்படுத்துவது தொடர்பான முடிவுகள் சுகாதார அமைச்சின் அறிவுறுத்தலுக்கு அமைய எடுக்கப்படும் என்று சுற்றுலாத்துறை அமைச்சர் பிரசன்ன ரணதுங்க இன்று ஊடகங்களிடம் தெரிவித்தார்.

விமான நிலையத்தின் வழியாக வருபவர்களில் பெரும்பாலானோர் வெளிநாட்டினர் என்பதால் விமான நிலையத்தை உடனடியாக மூட முடியாது எனவும், அமைச்சர் சுட்டிக்காட்டினார்.

எனினும், கோவிட் தொற்று தீவிரமடைந்துள்ள இந்தியாவிலிருந்து வரும் சுற்றுலாப் பயணிகளைக் கண்காணிக்க விசேட கண்காணிப்புப் பொறிமுறை ஒன்று முன்னெடுக்கப்பட்டு வருகின்றது எனவும் அவர் கூறினார்.

இந்தியா – இலங்கைக்கு இடையிலான பரஸ்பர விமானப் போக்குவரத்து ஊடாக இலங்கைக்கு வருகை தரும் இந்தியச் சுற்றுலாப் பயணிகளுக்கு ஏற்கனவே பல்வேறு கட்டுப்பாடுகள் விதிக்கப்பட்டுள்ளன எனவும் அவர் குறிப்பிட்டார்.

அத்தோடு இந்தியாவிலிருந்து வரும் சுற்றுலாப் பயணிகள் தனி ஹோட்டல் அறைகளில் தனிமைப்படுத்தப்பட்டுள்ளனர் எனவும், இவர்களின் வருகையைக் கட்டுப்படுத்துவது தொடர்பில் நடவடிக்கை எடுக்கப்பட்டுள்ளது எனவும் அவர் மேலும் தெரிவித்தார்.

உயர்தர பரீட்சை பெறுபேறுகள்..

2020 ஆம் ஆண்டு கல்வி பொதுத்தராதர உயர்தர பரீட்சை பெறுபேறுகள் எதிர்வரும் 7 நாட்களுக்குள் வௌியிடப்படும் என கல்வி அமைச்சர் ஜீ.எல்.பீரிஸ் தெரிவித்துள்ளார்.

கடந்த ஒக்டோபர் மாதம் 12 ஆம் திகதி முதல் நவம்பர் மாதம் 6 ஆம் திகதி வரையில் உயர்தர பரீட்சைகள் இடம்பெற்றிருந்தது. நாடளாவிய ரீதியில் உள்ள 2,648 பரீட்சை மத்திய நிலையங்களில் உயர்தர பரீட்சை இடம்பெற்றிருந்தது.

இம்முறை பரீட்சைக்காக 362,824 பரீட்ச்சார்த்திகள் தெரிவு செய்யப்பட்டிருந்தமை குறிப்பிடத்தக்கது. அத்துடன் நாடளாவிய ரீதியில் உள்ள பல்கலைகழகங்கள் மே மாதம் 10 ஆம் திகதி ஆரம்பிக்கப்படவுள்ளதாகவும் அவர் தெரிவித்துள்ளார்.

மேலும் பாடசாலைகளை ஆரம்பிப்பது தொடர்பான இறுதி தீர்மானத்தை 2 ஆம் திகதி எடுக்கவுள்ளதாகவும் அவர் தெரிவித்துள்ளார்.

முன் அறிவிப்பின்றி..

நாட்டில் எந்தவொரு பகுதியிலும் கோவிட் தொற்றாளர்கள் அடையாளம் காணப்பட்டால் முன்னறிவிப்பின் அந்த பகுதி முடக்கப்படும் என இராணுவ தளபதி ஷவேந்திர சில்வா தெரிவித்துள்ளார்.

தொற்றாளர்கள் அடையாளம் காணப்படும் பிரதேசம், பொலிஸ் பிரிவு, கிராம சேவகர் பிரிவு போன்றவைகள் உடனடியாக முடக்கப்படும் என அவர் குறிப்பிட்டுள்ளார். அவ்வாறான நிலைகளுக்கு முகம் கொடுப்பதற்கு மக்கள் தயாராக இருக்க வேண்டும் என இராணுவ தளபதி சுட்டிக்காட்டியுள்ளார்.

கடந்த காலங்களில் முடக்கப்படுவது தொடர்பில் முன்கூடிய மக்களுக்கு அறிவிக்கப்பட்டது. எனினும் இம்முறை அவ்வாறு முன்னறிவிப்பு விடுக்காமல் முடக்க நடவடிக்கை எடுக்கப்படும் என அவர் கூறியுள்ளார். எனினும் நாட்டை முழுமையாக முடக்குவதற்கு எதிர்பார்க்கவில்லை என இராணுவ தளபதி மேலும் தெரிவித்துள்ளார்.

இலங்கையில் கடந்த சில தினங்களான நாளாந்தம் ஆயிரத்திற்கும் மேற்பட்ட கோவிட் தொற்றாளர்கள் அடையாளம் காணப்பட்டு வருகின்றமை குறிப்பிடத்தக்கது.

கொரோன வைரஸ்..

பிரிட்டனில் திரிபடைந்த கொரோனா வைரஸ் நாட்டின் பல பகுதிகளில் பரவியதுடன், இவை 55 வீத மரணத்தையும் 50 வீத பரவும் வேகமும் கொண்டது என தெரிவிக்கப்பட்டுள்ளது.

குறித்த வைரஸ் தொடர்பில் ஸ்ரீ ஜயவர்தனபுர பல்கலைக்கழகத்தின் ஜீவ வாயு விஞ்ஞானத் துறை பணிப்பாளர் மருத்துவ நிபுணர் சந்திம ஜீவந்தர பல அதிர்ச்சித் தகவல்களை வெளியிட்டுள்ளார்.

கொழும்பு, குருநாகல், பொரலஸ்கமுவ போன்ற பிரதேசங்களில் கொரோனா வைரஸ் தொற்று நபர்களிடமிருந்து பெறப்பட்ட மாதிரி மூலமாக பிரிட்டனின் திரிபு வைரஸ் இலங்கையில் பரவியுள்ளமை இனங்காணப்பட்டுள்ளது. அது 50 வீதத்தை விட மிக வேகமாகப் பரவும் தன்மை கொண்டது என்றும் அவர் தெரிவித்துள்ளார்.

கடந்த இரண்டு மூன்று வாரங்களுக்குள் நாட்டில் கொரோனா வைரஸ் தொற்று நோயாளர்கள் அதிகமாக இனங்காணப்பட்டு வருகின்றனர். அதேபோன்று வைரஸ் தொற்று தொடர்பான அறிகுறிகள் தொடர்பிலும் சமூகத்திலிருந்து பெருமளவில் தெரிவிக்கப்பட்டு வந்தது.

அதனை கருத்திற் கொண்டு நாம் அது தொடர்பில் பரிசோதனைகளை மேற்கொண்டோம். கொழும்பு மற்றும் குருநாகல் ஆகிய பிரதேசங்களில் 43 மாதிரிகளை பெற்று நாம் ஆய்வு செய்தோம்.

நேற்றுக் காலை பெற்றுக்கொள்ளப்பட்ட அதன் பரிசோதனை அறிக்கைக்கிணங்க பிரித்தானியாவின் திரிபுபடுத்தப்பட்ட வைரஸ் இலங்கையில் பரவியுள்ளதை நாம் நூற்றுக்கு நூறு உறுதி செய்துள்ளோம்.

இது தொடர்பில் மக்கள் எச்சரிக்கையாக செயல்பட வேண்டும். அந்த வைரஸ் 55 வீதமான மரணங்களை ஏற்படுத்தலாம் எனவும் அதேபோன்று வைரஸ் பரவும் வேகம் 50 வீதமாக அதிகரிக்கலாம் என்றும் அறியமுடிகிறது என்பதையும் அவர் சுட்டிக்காட்டினார்.

இந்த வைரஸை கட்டுப்படுத்த அஸ்ட்ரா செனாகா தடுப்பூசியானது சிறந்த பெறுபேற்றை தந்துள்ளது. அனைவரும் தடுப்பூசியை செலுத்திக்கொள்வதன் மூலம் இதற்கு தீர்வை காண முடியும்.

ஆனால், எதிர்வரும் இரண்டு மூன்று மாதங்கள் இலங்கைக்கு மிகவும் தீர்மானமிக்க காலப்பகுதியாகும். கடந்தகாலத்தில் ஓரளவு பாதகமற்ற வைரஸ்தான் இருந்தது. புதிய வகை வைரஸானது மிகவும் ஆபத்தானது.

புதிய வகை வைரஸ் பரவியுள்ள நாடுகள் அனைத்து பாரிய இழப்புகளை சந்தித்துள்ளன. கடந்த ஜனவரி மாதத்தில்தான் பிரிட்டனில் இந்த வைரஸ் கண்டறியப்பட்டது. அங்கு பாரிய மரணங்கள் ஏற்பட்டுள்ளன. தடுப்பூசியின் ஊடாக ஓரளவு தீர்வை கண்டுள்ளனர்.

இந்தியாவிலும் புதியவகை கொவிட் வைரஸ் கண்டறியப்பட்டுள்ளது. எமது நாட்டுக்குள் தற்போதுதான் இந்த வைரஸ் கண்டறியப்பட்டுள்ளது. மக்கள் மத்தியில் இதனை பரவலடையாது கட்டுப்படுத்த வேண்டும். வைரஸானது மிகவும் வேகமாக இலங்கை முழுவதும் பரவலடைந்துள்ளது என்றார்.