இரணைமடு..

கிளிநொச்சி, இரணைமடு குளத்தின் வான்கதவுகள் ஆறு அங்குலம் அளவில் இன்று காலை திறக்கப்பட்டுள்ளன. கிளிநொச்சியில் தொடர்ச்சியாக பெய்துவரும் கன மழை காரணமாக இரணைமடு குளத்தின் நீர் மட்டம் உயர்வடைந்துள்ளது.

குளத்தில் தேங்கியுள்ள மேலதிக நீரை வெளியேற்றுவதற்காக குளத்தின் இரண்டு வான்கதவுகள் திறந்து விடப்பட்டுள்ளன. இரணைமடு குளம் 36 அடி வரையில் நீரை சேமிக்க கூடியதாக இருப்பினும் தற்போது வரையில் அதன் நீர்மட்டம் 31 அடியாக உள்ளது.

இருப்பினும் தொடர் மழைகாரணமாக அதிகளவு நீர் குளத்திற்கு வந்துகொண்டிருப்பதனால் 31 அடி நீர் மட்டத்தில் குளத்தின் இரண்டு வான்கதவுகளும் திறந்துவிடப்பட்டு நீர் வெளியேற்றப்பட்டுவருகின்றது.

எனவே இரணைமடு குளத்தின் வான் நீர் வெளியேறும் பகுதிகளில் வாழ்கின்ற பொது மக்கள் இது தொடர்பில் முன்னெச்சரிக்கையாக இருக்குமாறு கிளிநொச்சி அனர்த்த முகாமைத்துவ நிலையத்தினால் எச்சரிக்கப்பட்டுள்ளனர்.

பேக்கரி உற்பத்திகளின் விலை..

பாண் தவிர்ந்த ஏனைய பேக்கரி உற்பத்திகளின் விலைகள் குறைக்கப்பட உள்ளதாக பேக்கரி உரிமையாளர்கள் சங்கத்தின் தலைவர் ஏ.ஆர். ஜயவர்தன தெரிவித்துள்ளார்.

பெறுமதி சேர் வரி மற்றும் தேசத்தை கட்டியெழுப்புதல் வரி ஆகியன தொடர்பில் அரசாங்கம் வழங்கியுள்ள சலுகைகளை மக்களுக்கு வழங்கும் நோக்கில் இவ்வாறு விலை குறைப்பு அறிமுகம் செய்யப்பட உள்ளது. பனிஸ் வகைகள் உள்ளிட்ட ஏனைய பேக்கரி உற்பத்தி வகைகளின் விலைகள் 5 ரூபாவினால் குறைக்கப்பட உள்ளது என ஜயவர்தன தெரிவித்துள்ளார்.

அரசாங்கத்தின் வரிக் கொள்கையினால் பேக்கரி உரிமையாளர்களுக்கு பாரியளவு சலுகைகள் கிடைக்கப் பெற்றுள்ளதாகக் குறிப்பிட்டுள்ளார். இந்த வரிச் சலுகை காரணமாக ஒரு கிலோ கேக்கின் விலையை 50 ரூபாவினால் குறைக்க முடியும் என ஜயவர்தன ஊடகங்களுக்குத் தெரிவித்துள்ளார்.

கனமழை

கடந்த சில தினங்களாக நாட்டின் தென் பகுதியில் நிலவி வந்த தாழமுக்கம் , தற்போது நாட்டை விட்டு வெளியேறியுள்ளதாக வளிமண்டல திணைக்களத்தின் பணிப்பாளர் அதுல கருணாநாயக்க தெரிவித்தார்.

நாட்டில் நிலவும் சீரற்ற காலநிலை தொடர்பில் இன்று கொழும்பில் ஊடகங்களுக்கு கருத்து தெரிவிக்கும் போதே இவ்வாறு குறிப்பிட்டார். அவர் மேலும், நாட்டில் தற்போது நிலவும் சீரற்ற காலநிலை எதிர்வரும் நாட்களிலும் தொடர கூடிய வாய்ப்புக்கள் அதிகளவில் உள்ளன.

வடக்கு, வடமத்திய, கிழக்கு, ஊவா, மத்திய, சபரகமுவ ஆகிய மாகாணங்களிலும் ஹம்பாந்தோட்டை மாவட்டத்திலும் தொடர்ச்சியாக மழை பெய்யும். அதிகாலை வேளையில் இப்பகுதிகள் அதிகளவில் இருளாக இருப்பதை அவதானிக்க முடியும். கருமுகில் கூட்டத்துடன் மழை பெய்வதற்கான சாத்தியங்கள் உள்ளன.

யாழ்ப்பாணம், கிளிநொச்சி, மன்னார், முல்லைத்தீவு, திருகோணமலை, அம்பாறை, மட்டக்களப்பு, மொனராகலை , நுவரெலியா போன்ற மாவட்டங்களில் இவ்வாறு மழை பெய்யக்கூடிய வாய்ப்புக்கள் காணப்படுகின்றன. மேலும் சபரகமுவ, மத்திய மற்றும் மேல் மாகாணங்களில் 100 மில்லிமீட்டர் அளவில் மழை வீழ்ச்சி எதிர்பார்க்கப்படுகின்றது.

கரையோர பிரதேசங்களில் காற்றின் வேகம் அதிகரித்து காணப்படுவதுடன் கடற்கொந்தளிப்பு தன்மையையும் காணக் கூடியதாக இருக்கும். தெற்கு, வடகிழக்கு,மேற்கு பகுதிகளை அண்மித்த கடற்பகுதிகளில் கனமழை பெய்யும்.

நாளை மற்றும் நாளை மறுதினம் மழை சற்று குறைவடைந்தாலும் வங்காள விரிகுடாவில் ஏற்பட்டுள்ள தாழமுக்கம் காரணமாக எதிர்வரும் 8ஆம் திகதிக்கு பின்னர் மழை வீழ்ச்சி தற்போதுள்ள அளவை விட அதிகளவாக பதிவாகும், என்று தெரிவித்துள்ளார்.

டெங்குக் காய்ச்சலால்..

மன்னாரில் டெங்கு காய்ச்சலினால் பாதிக்கப்பட்ட சிறுமி ஒருவர் மன்னார் பொது வைத்தியசாலையில் அனுமதிக்கப்பட்ட நிலையில் சிகிச்சை பலனின்றி இன்று அதிகாலை உ யிரிழந்துள்ளார்.

மன்னார் நகர பொது சுகாதார வைத்திய அதிகாரி பிரிவுக்குற்பட்ட மன்னார் சின்னக்கடையில் வசிக்கும் மன்னார் புனித சவேரியார் பெண்கள் தேசிய பாடசாலையில் 3ஆம் ஆண்டு கல்வி கற்ற மாணவியான மரியதாசன் டிவினியா (வயது 9) என்பவரே டெங்கு காய்ச்சலிற்கு உள்ளாகி உ யிரிழந்துள்ளார்.

முசலி மரண விசாரணை அதிகாரி ஏ.ஆர்.நசீர் மேற்கொண்ட ம ரண விசாரணையில் இறந்த சிறுமிக்கு கடந்த 30 ஆம் திகதி காய்ச்சல் வந்ததாகவும் பின் முதலாம் திகதி மன்னார் பொது வைத்தியசாலையில் மருந்து எடுக்கப்பட்டு வீட்டுக்கு அழைத்துச் சென்றதாகவும்,

ஆனால் காய்ச்சல் சுகமாகாததால் மீண்டும் 3ஆம் திகதி செவ்வாய்கிழமை மன்னார் பொது வைத்தியசாலையில் அனுமதித்து சிகிச்சை வழங்கப்பட்டது. எனினும் சிகிச்சை பலனளிக்காமையால் குறித்த சிறுமி இன்று அதிகாலை உ யிரிழந்துள்ளதாக தெரிவிக்கப்பட்டுள்ளது.

ரயில் சேவைகள் பாதிப்பு

தியத்தலாவ மற்றும் பண்டாரவளை ரயில் நிலையங்களுக்கு இடைப்பட்ட ஒபாட எல்ல பகுதியில் ஏற்பட்ட பாரிய மண்சரிவு காரணமாக மலையக ரயில் சேவைகள் பாதிப்படைந்துள்ளன.

பாதிப்பேற்பட்டுள்ள ரயில் பாதையை சீர்செய்யும் பணிகளில் ரயில் நிலைய ஊழியர்களும், தியத்தலாவ இராணுவத்தினரும் ஈடுப்பட்டுள்ளனர்.

மண்சரிவு காரணமாக மலையக புகையிரத பாதையின் ஊடான சேவைகள் தாமதமாகலாம் என ரயில் நிலைய கட்டுப்பாட்டு அதிகாரிகள் தெரிவிக்கின்றனர்.

அத்தோடு கொழும்பிலிருந்து பதுளை நோக்கி செல்லும் ரயில் சேவைகள் அப்புத்தளை புகையிரத நிலையம் வரை மட்டுப்படுத்தப்பட்டுள்ளதோடு, பதுளையிலிருந்து கொழும்பு நோக்கி செல்லும் அனைத்து ரயில் சேவையும் பண்டாரவளை வரை மட்டுப்படுத்தப்பட்டுள்ளது.

இதனை கருத்திற் கொண்டு பண்டாரவளைக்கும், அப்புத்தளைக்கும் இடையில் பயணிகள் பஸ் சேவை முன்னெடுக்கப்பட்டுள்ளது.

பாரிய மண்சரிவு என்பதன் காரணமாக சீர்செய்யும் பணிகளில் தாமதம் ஏற்படுவதாக இராணுவத்தினர் தெரிவித்தனர்.