யாழ். புங்குடுத்தீவு கடற்கரையில் சடலமாக மீட்கப்பட்ட தலைமன்னார் மீனவர்கள் இருவரின் இறுதிக்கிரியைகள் நேற்று இடம்பெற்றுள்ளன.

தலைமன்னார் கடற்பகுதியில் கடலில் பாய்ச்சப்பட்ட வலையை கரை சேர்ப்பதற்காக கடந்த வெள்ளிக்கிழமை கடலுக்கு சென்று காணாமல் போன ஒரே குடும்பத்தைச் சேர்ந்த சகோதரர்களான இரு மீனவர்கள் 5 நாட்களின் பின் யாழ். புங்குடுதீவு கடற்கரையில் சடலங்களாக மீட்கப்பட்டனர்.

தோ.கிறிஸ்ரின் கூஞ்ஞ (வயது-32) மற்றும் தோ.எமல்ரன் கூஞ்ஞ (வயது 37) ஆகிய இரு சகோதரர்களும் சம்பவம் அன்று காலை கடலில் போடப்பட்ட நண்டு வலையை கரை சேர்ப்பதற்காக படகு ஒன்றில் சென்றுள்ளனர்.

இதன்போது எதிர்பாராத விதமாக கடலில் மூழ்கி யாழ். புங்குடுதீவு கடற்கரையில் சடலமாக கரை ஒதுங்கினர்.

பின்னர் வைத்திய பரிசோதனைகளின் பின்னர் மரணம் அடைந்த இரு சகோதரர்களின் சடலங்களும் அவர்களது சொந்த இடமான தலைமன்னார் பகுதிக்கு நேற்று கொண்டுவரப்பட்டன.

சடலங்கள் உறவினர்களின் அஞ்சலிக்காக வைக்கப்பட்டு, பின்னர் தலை மன்னார் ஆலயத்தில் இறுதி திருப்பலி ஒப்புகொடுக்கப்பட்டு தலைமன்னார் பொது மயானத்தில் நல்லடக்கம் செய்யப்பட்டன.

மரணத்தில் கூட இணை பிரியாமல் இறந்த இரு சகோதரர்களுடைய நல்லடக்கத்தில் ஒட்டு மொத்த தலைமன்னார் சமூகமே ஒன்று திரண்டு கண்ணீர் சிந்தி வழி அனுப்பி வைத்ததை காணக்கூடியதாக இருந்தது.

இலங்கை விமான படையில் முதன்முறையாக பெண் விமானிகள் இணைத்துக் கொள்ளப்பட்டுள்ளனர். பெண்களுக்கு சம உரிமை வழங்கும் நோக்கில் இலங்கை விமானப்படைக்கு முதல் முறையாக பெண் விமானிகள் இணைத்து கொள்ளப்பட்டுள்ளனர்.

ஆயுதம் ஏந்தி தீவிர பயிற்சி பெற்ற ஜயனி தத்சரனி ஹேவாவித்தாரன, பவித்ரா லக்ஷானி குணரத்ன, பியுமி நிமல்கி ஜயரத்ன மற்றும் ரஞ்கனா வீரவர்தன ஆகியோரே இவ்வாறு தெரிவாகியுள்ளனர்.

விமானம் ஒன்றை ஓட்டுவதென்றால், மிகப்பெரிய பொறுப்பான தொழிலாகும். விமானத்தில் பயணிக்கும் பயணிகளின் உயிர்கள் விமானிகளின் கையில் உள்ளன.

இவ்வாறான நிலையில் சவால்களை வென்ற முதல் பெண் தன்னார்வ விமானிகளாக இவர்கள் இலங்கை விமானப்படை வரலாற்றின் இடம்பிடித்தனர்.

குறித்த விமானிகள் தற்போது திருகோணமலை சீன துறைமுகத்தில் விமான பயிற்சிகளை பெற்று வருகின்றனர்.

பயிற்சியின் இறுதி உலக விமானப்படை விமானிகளை கொண்ட நாடுகளில் இலங்கையும் இணையவுள்ளது.

பெண் விமானிகளை இணைத்து கொள்ளும் நாடுகள் பட்டியலில் தெற்காசியாவில் இலங்கை முன்னணி இடம் வகிக்கிறது என இலங்கை விமானப்படை தெரிவித்துள்ளது.

இந்தியா, பாகிஸ்தான், பங்களாதேஷ் ஆகிய 3 நாடுகளில் பெண் விமானிகள் இணைத்து கொள்ளப்பட்டுள்ளனர். எனினும் இலங்கையில் நிலவிய போர் நிலைமை காரணமாக பெண் விமானிகளை இணைத்து கொள்ள முடியாத நிலை ஏற்பட்டது.

குறித்த பெண் விமானிகளுக்கு 2 வருட பயிற்சிகள் வழங்க வேண்டும் என தெரிவிக்கப்படுகின்றது.

இலங்கையில் மிருகங்கள் மீது அதிக அன்பு கொண்ட இளம் நடிகை தொடர்பில் தகவல் வெளியாகி உள்ளது. 37 நாய்கள், 11 பூனைகள் மற்றும் மாடு ஒன்றை மரணத்தில் இருந்து காப்பாற்றி நடிகை ஒருவர் வளர்த்து வருகிறார்.

மீரிகம பிரதேசத்தை சேர்ந்த 21 வயதான இளம் தொலைகாட்சி நடிகையான சகுந்தலா என்பவரே இந்த சேவை செய்து வருகின்றார்.

அவர் தனது சகோதரன் மற்றும் தாயாருடன் வாழ்ந்து வருகின்றார். மிருகங்களுக்காக அவர் தனது வாழ்க்கையை அர்ப்பணித்த வரும் ஒருவராகும்.

37 நாய், 11 பூனைகள் மற்றும் மாடு ஒன்றை மரணத்தில் இருந்து காப்பாற்றி அவர் தனது வீட்டில் வளர்த்து வருகின்றார். இதற்கு மேலதிகமாக அவரால் காப்பாற்றப்பட்ட 4 மாடுகளை 4 வீடுகளுக்கு அவர் வழங்கியுள்ளதுடன், அதனையும் அவர் பாதுகாத்து வருகின்றார். 7 நாய்களையும் இதேபோன்று 7 வீடுகளுக்கு வழங்கியுள்ளார்.

தனது வீட்டில் உள்ள பிராணிகளை மாத்திரமின்ற வீதிகளில் உள்ள நாய், பூனைகளுக்கு அவர் உணவு வழங்குகின்றார்.

இந்த நாய், பூனைகளுக்காக அவர் 4 ஏக்கர் காணியை ஒதுக்கியுள்ளார். அனைத்து மிருகங்களும் ஒரே இடத்தில் வளர்த்து வருகின்றது. அவை ஒன்றுடன் ஒன்று சண்டையிட்டு கொள்ளாமல் வாழ்ந்து வருகின்றன.

அனைத்து மிருகங்களுக்கும் பெயர் வைக்கப்பட்டுள்ள நிலையில், பெயர் சொல்லி அழைத்தவுடன் அனைத்து மிருகங்களும் அருகில் வருவதாக தெரிவிக்கப்பட்டுள்ளது.

தான் சாதாரண குடும்பம் ஒன்றில் பிறந்தவர் எனவும், தனது வீட்டில் இடவசதி உள்ளது, எனினும் தனது வங்கி கணக்கில் 500 ரூபாயேனும் இல்லை அவர் குறிப்பிட்டுள்ளார். எதிர்காலத்திற்காக ஒன்றையும் சேர்க்கவில்லை என அவர் குறிப்பிட்டுள்ளார்.

இலங்கை மக்களுக்கு ஒரு எடுத்துக்காட்டாக இந்த பெண் வாழ்ந்து வருகின்றார் என பலர் அவரை பாராட்டியுள்ளனர்.

தனியார் கல்வி நிலையத்துக்கு சென்ற பதின்ம வயதுச் சிறுமிகளுக்கு பாலியல் தொல்லை வழங்கிய குற்றச்சாட்டில் யாழ். வட்டுக்கோட்டையைச் சேர்ந்த 41 வயதான ஆசிரியர் சந்தேகத்தில் கைதுசெய்யப்பட்டுள்ளார் என்று வட்டுக்கோட்டைப் பொலிஸார் தெரிவித்தனர்.

வட்டுக்கோட்டையிலுள்ள பிரபல பாடசாலைக்கு முன்பாகவுள்ள தனியார் கல்வி நிலையத்தில் கற்பிக்கும் ஆசிரியர், அவரிடம் கற்கச் செல்லும் பதின்ம வயது மாணவிகளுக்கு பாலியல் தொல்லை கொடுக்கின்றார் என்று சங்கானைப் பிரதேச செயலகத்துக்கு அநாமதேய முறைப்பாடுகள் கிடைத்துள்ளன.

கிடைக்கப்பெற்ற முறைப்பாடுகளுக்கமைவாக பிரதேச செயலகத்தினால் விசாரணைகள் முன்னெடுக்கப்பட்டுள்ளன. ஆசிரியர் கற்பிக்கும் பாடசாலையில் ஆரம்பத்தில் விசாரணை மேற்கொள்ளப்பட்டது.

குறித்த ஆசிரியர் பாடசாலை மாணவிகளை தனியார் கல்வி நிலையத்துக்கு ஆங்கிலமொழி மூலமான வகுப்புக்கு அழைத்துள்ளமையும், அவர்களிடம் பாலியல் ரீதியான தொல்லை வழங்கியுள்ளமையும் தெரியவந்துள்ளது.

பாதிக்கப்பட்ட மாணவிகள், அவர்களது பெற்றோர்கள் தகவலை வெளிப்படுத்தத் தயங்கியதாகவும் தெரிவிக்கப்படுகின்றது.

இதனை வெளியில் தெரியப்படுத்தினால் பெற்றோரைக் கொலைசெய்துவிடுவேன் என்று ஆசிரியர் மிரட்டியமையும், பாதிக்கப்பட்ட தரப்புகள் தயங்கியமைக்கு காரணம் என்று பொலிஸ் வட்டாரங்கள் தகவல் தெரிவித்தன.

இருப்பினும், ஒருசில மாணவிகள் வழங்கிய வாக்குமூலத்துக்கமைவாக ஆசிரியர் நேற்று முன்தினம் மாலை கைதுசெய்யப்பட்டுள்ளார்.