வவுனியா மாவட்ட பொது வைத்தியசாலைக்கு முன்பாக உள்ள பலசரக்கு பொருட்கள் விற்பனை நிலையத்தில் நேற்று (12.11.2017) மதியம் 1 மணியளவில் திருட்டுச்சம்பவத்துடன் தொடர்புடைய ஒரு மாணவன் பொதுமக்களால் மடக்கி பிடிக்கப்பட்டதுடன் இரு மாணவர்கள் தப்பி ஓடியுள்ளனர்.
இச் சம்பவம் தொடர்பாக மேலும் தெரியவருகையில்,

வவுனியா மாவட்ட பொது வைத்தியசாலைக்கு அருகே அமைந்துள்ள பலசரக்கு பொருட்கள் விற்பனை நிலையத்திற்கு சென்ற மூன்று பாடசாலை மாணவர்கள் குறித்த வர்த்தக நிலைய உரிமையாளரிடம் (முதியவர்) தொலைவிலுள்ள பொருளை காட்டி அதனை எடுத்துத்தருமாறு கேட்டுள்ளனர்.

அதனை வர்த்தக நிலைய உரிமையாளர் எடுத்துவரச் சென்ற சமயத்தில் ஒரு மாணவன் வர்த்தக நிலையத்திலிருந்த நூடில்ஸ் பொதியினை எடுத்துச் செல்ல முயற்சித்துள்ளார்.

இதனை அவதானித்த பொதுமக்கள் குறித்த மாணவர்களை மடக்கி பிடித்த சமயத்தில் இரு மாணவர்கள் தப்பித்து ஒடியுள்ளனர்.

உடனடியான வவுனியா பொலிஸாருக்கு தகவல் வழங்கியதையடுத்து சம்பவ இடத்திற்கு விரைந்த பொலிஸார் விசாரணைகளை மேற்கொண்டதுடன் குறித்த மாணவனை விசாரணைக்காக பொலிஸ் நிலையத்திற்கு அழைத்துச் சென்று மேலதிக விசாரணைகளை மேற்கொண்டு வருகின்றனர்.

 
வவுனியாவில் பெண்கள் வாழ்வில் வளமூட்டும் நிகழ்ச்சித் திட்டம் ஆரம்பித்து வைக்கும் நிகழ்வு நேற்று (12.11.2017) மாலை 4.30 மணியளவில் சாளம்மைக்குளம் பொதுநோக்கு மண்டபத்தில் கைத்தொழில் மற்றும் வர்த்தக அமைச்சர் றிஷாட் பதியுதீன் தலைமையில் இடம்பெற்றது.

இச் செயற்றிட்டத்தினை ஆரம்பித்து வைக்கும் நிகழ்வில் வடமாகாண சபை உறுப்பினர் ஜெயதிலக, பிரதேச சபை உறுப்பினர், கிராம சேவையாளர், பொதுமக்கள், பயனாளிகள் என பலரும் கலந்து கொண்டனர்.

இலங்கை புடைவை மற்றும் ஆடை நிறுவகத்தினால் (கைத்தொழில் மற்றும் வணிக அமைச்சு) ஒதுக்கப்பட்ட 20 மில்லியன் நிதியில் இச் செயற்றிட்டம் முன்னெடுக்கப்படுகின்றமை குறிப்பிடத்தக்கது.

 
வவுனியாவில் வறுமைக்கோட்டிற்குட்பட்ட 24 பாடசாலை மாணவர்களுக்கு வடமாகாண சபை உறுப்பினர் ப.சத்தியலிங்கத்தின் வடமாகாணசபையின் 2017ம் ஆண்டிற்கான பிரமான அடிப்படையிலான நன்கொடை நிதியின் கீழ் நான்கு லட்சத்தி எட்டாயிரம் ரூபாய் நிதியில் 24 துவிச்சக்கரவண்டிகள் நேற்று (11.11.2017) காலை 9 மணியளவில் இலங்கை தமிழரசுக்கட்சியின் மாவட்ட காரியலாயத்தில் வைத்து வடமாகாண சபை உறுப்பினர் ப.சத்தியலிங்கத்தால் வழங்கி வைக்கப்பட்டன.

சத்தியலிங்கத்தின் இணைப்பாளர் பாலச்சந்திரன் சிந்துஜன் தலமையில் இடம்பெற்ற இந் நிகழ்வில் பெண்கள் அபிவிருத்தி உத்தியோகத்தர் திருமதி சுபாசினி சிவதர்சன், வவுனியா வடக்கு வலய ஆலோசகர் சி.மகேஸ்வரன், தமிழரசு கட்சியின் உறுப்பினர்கள், பாடசாலை அதிபர்கள், பெற்றோர்கள், மாணவர்கள் என பலரும் கலந்து கொண்டிருந்தனர்.

வவுனியா வடக்கு வலயத்திற்குட்பட்ட பாடசாலைகளிலிருந்து 14 மாணவர்களும் வவுனியா தெற்கு வலயத்திலிருந்து 10 மாணவர்களும் தெரிவு செய்யப்பட்டிருந்தமை குறிப்பிடத்தக்கது.

வவுனியாவில் நேற்று (11.11.2017) இலங்கை தமிழரசுக்கட்சியின் மாவட்ட காரியாலயத்தில் வறுமைக்கோட்டிற்குட்பட்ட பாடசாலை மாணவர்களுக்குதுவிச்சக்கரவண்டி வழங்கி வைக்கும் நிகழ்வில் கலந்து கொண்டு கருத்துத் தெரிவிக்கும் போதே அவர் இவ்வாறு குறிப்பிட்டுள்ளார். அவர் தொடர்ந்தும் கருத்துத் தெரிவிக்கையில்,

இந்த வரவு செலவு திட்டத்தில் முன்னேற்றகரமான திட்டங்கள் வந்திருக்கிறது. பெண்களை தலைமைத்துவங்களை கொண்ட குடும்பங்களுக்கு அவர்களுடைய வாழ்வாதாரத்தை மேன்மை படுத்துவதற்கு இந்த வரவு செலவு திட்டத்தில் வந்திருக்கின்றது.

வீட்டுத்திட்டம் வந்திருக்கின்றது, இங்கே படித்த இளைஞர்கள், யுவதிகள் வேலை வாய்ப்புக்காக சில அபிவிருத்தி திட்டங்களை இங்கே கொண்டு வருவதற்கும் இருக்கின்றார்கள். சின்னச்சின்ன தொழிற்சாலைகளை கொண்டு வருவதற்குமுரிய முன்மாதிரிகள் இந்த முறை வரவு செலவுத்திட்டத்திலே கொண்டுவந்திருக்கின்றார்கள்.

ஆனால் வவுனியாவிலே எந்த ஒரு முன் மொழிவையும் காணவில்லை. எங்களுடைய பாராளுமன்ற உறுப்பினர்கள் கொடுத்து போடுபடவில்லையா? அல்லது எங்கடைய ஆட்கள் கொடுக்காமல் விட்டினமோ தெரியவில்லை.

பாராளுமன்றத்திற்கு போனால் மக்கள் பிரதிநிதிகளும் கதைப்பது பிரயோசனம் இல்லாத கதைதானே. எந்த நேரமும் வவுனியாவில் இருந்து எங்களுடைய பாராளுமன்ற உறுப்பினர்கள் திட்டங்களை கொண்டு போய் கொடுத்திருக்க வேண்டும். வவுனியா மாவட்டத்திலே என்ன என்ன தொழில் திட்டங்கள் எங்களுக்கு வேண்டும் என்று கொடுத்திருக்க வேண்டும்.

கேட்டார்களா? கேட்கவில்லையா என்பதை இந்த முறை எங்களுடைய வரவு செலவு திட்டத்திலே வவுனியா என்ற வார்த்தையே காணவில்லை. ஆனால் கிளிநொச்சி, மன்னார், முல்லைத்தீவு போன்ற மாவட்டங்கள் வந்திருக்கின்றன.

அபிவிருத்தி என்று பார்க்கும் போது வவுனியா என்ற சொல்லையே காணவில்லை. எங்கடைய ஆட்கள் கொடுத்தினமோ கொடுக்கலையோ தெரியவில்லை. இப்படியான விடயங்களை கொடுக்க வேண்டும். பெற்றுக்கொள்ள வேண்டும் என தெரிவித்தார்.

 
மடு பிரதேச செயலகத்திற்குட்பட்ட இரணைஇலுப்பைக்குளம் பகுதியில் தாய், தந்தையினை இழந்து சற்று மன நலம் பாதிக்கப்பட்ட அண்ணனுடன் வாழ்ந்து வரும் 10 வயதுடைய சிறுமிக்கு வவுனியா பசங்க அமைப்பினரால் விடுக்கப்பட்ட வேண்டுகோளிக்கினங்க ஊடக நண்பர் ராஜ்குமார் அவர்களினால் உடைகள், பாடசாலை செல்வதற்கான புத்தகப்பபை, சாப்பாத்து, 300 0ரூபாய் பணம் என்பனவும் வெளிச்சம் அறக்கட்டளையினால் கற்றல் உபகரணங்களும் சாய் மெபைல் நெற் (இரண்டாம் குறுக்குத்தெரு , வவுனியா) அவர்களினால் 3000 ரூபாய் பணமும் வழங்கி வைக்கப்பட்டன.

இவர்களுக்கான பொருட்களை வவுனியா பசங்க அமைப்பின் தலைவர் பாஸ்கரன் கதீஷன், செயலாளர் பாக்கியநாதன் லம்போதரன், அக்கிராம சமுர்த்தி உத்தியோகத்தர் ரஜீவன் குறித்த சிறுமிக்கு வழங்கி வைத்தனர்.

 
வவுனியா கிராமம் ஒன்றில் தெலுங்கு முறையில் வித்தியாசமான திருமணம் ஒன்று நடைபெற்றுள்ளது.

மல்காந்தி என்ற 19 பெண்ணுக்கும் அரவித்த குமார என்ற 20 வயதுடையவருக்கும் தெலுங்கு சம்பிரதாய முறைப்படி இந்த திருமணம் நடைப்பெற்றுள்ளது.

பெரியோர்கள் முன்னிலையில் ரபான் அடித்து, பாசி மாலை அணிந்து, மோதிரம் மாற்றி திருமண பந்தத்தில் குறித்த இருவரும் இணைந்துள்ளனர்.

வவுனியா, தெற்கு பிரதேச செயலகத்தின் நொச்சிகுளம் கிராமத்தில் வித்தியாசமான வாழ்க்கை முறையை கொண்ட சமூகம் ஒன்று வாழ்ந்து வருவதாக தெரிவிக்கப்படுகிறது.
இந்த சமூகத்தில் சுமார் 54 குடும்பங்கள் வாழ்ந்து வருவதாக புள்ளிவிபரங்கள் தெரிவிக்கின்றன.

குரங்கு வித்தை காட்டுதல், பாம்பு வித்தை காட்டுதல் போன்றவை இவர்களின் சம்பிரதாய தொழிலாகும். தற்போது இவர்கள், பயிர்ச் செய்கையில் ஈடுபடுதல், மீன் பிடித்தல் அல்லது பொருட்கள் விற்பனை செய்யும் தொழில்களில் இவர்கள் ஈடுபட்டு வருகின்றனர்.

இந்த திருமணத்தின் பின்னர் மணமகளின் தந்தையினால் இருவருக்கும் பாம்பு மற்றும் பாம்பு பெட்டி ஒன்று சீதனமாக வழங்கப்படுகின்றது. இதன் ஊடாக வாழ்க்கையை ஆரம்பிக்க வேண்டும் என கூறப்படுகின்றது.

 
வவுனியாவில் இன்று (12.11.2017) காலை முதல் பிற்பகல் 12 மணிவரையான காலப்பகுதியில் இருவேறு பகுதிகளில் 92 கிலோ கஞ்சாவினைக் கைப்பற்றியுள்ளதாக பொலிசார் தெரிவித்துள்ளனர்.

கனகராயன்குளம் பொலிஸாருக்கு கிடைத்த ரகசிய தகவலின் அடிப்படையில் யாழ்ப்பாணத்திலிருந்து கொழும்பு நோக்கி சொகுசு தனியார் பேரூந்தினுள் பயணப்பொதியினுள் வைத்து 90 கிலோ கஞ்சாவை கடத்தி சென்ற வவுனியா செட்டிகுளம் பகுதியைச் சேர்ந்த சகோதரர்கள் இருவரை இன்று (12.11.2017) காலை 5.30 மணியளவில் கனகராயன்குளம் பகுதியில் வைத்து கைது செய்துள்ளதாக கனகராயன்குளம் பொலிஸார் தெரிவித்தனர்.

இதேவேளை இன்று காலை 9.30 மணியளவில் புளியங்குளம் பகுதியில் பேரூந்தினுள் 2 கிலோ கஞ்சாவை தம்வசம் வைத்திருந்த இராணுவ வீரர் ஒருவரையும் கைது செய்துள்ளதாக புளியங்குளம் பொலிஸார் தெரிவித்தனர்.

இன்று வவுனியாவில் கைப்பற்றப்பட்ட 92 கிலோ கஞ்சாவினையும் சந்தேக நபர்கள் மூவரையும் விசாரணைகளின் பின்னர் மாவட்ட நீதவான் நீதிமன்றில் முற்படுத்த நடவடிக்கை மேற்கொண்டு வருவதாகவும் பொலிசார் மேலும் தெரிவித்தனர்.