சிந்தனையில் நான் ஒரு அரசியல்வாதி இல்லை. ஆதலால் எனக்கு கட்சி முக்கியம் அல்ல. மாறாக மக்களே முக்கியமானவர்கள் என வடக்கு மாகாண முதலமைச்சர் சி.வி.விக்னேஸ்வரன் தெரிவித்துள்ளார்.

வட மாகாண முதலமைச்சருக்கு எதிராக 22 உறுப்பினர்கள் நம்பிக்கையில்லா பிரேரணையை கொண்டு வருவதற்கு முயற்சித்துள்ள நிலையில், அது குறித்து ஊடகங்களுக்கு கருத்து தெரிவிக்கும் போதே முதலமைச்சர் இவ்வாறு குறிப்பிட்டுள்ளார். தொடர்ந்து கருத்து வெளியிட்டுள்ள அவர்,

வெளுத்ததெல்லாம் பால் என்ற எண்ணம் என்னிடம் இருப்பதால் எல்லோரையும் நம்பியிருந்தேன். இந்த எண்ணத்தில் தொடர்ந்தும் இருக்கிறேன்.

வடமாகாண சபையின் நடவடிக்கைகள் நிர்வாக ரீதியானதாக காணப்படுகின்றது. அதனால் அரசியில் கட்சிகளுடன் கூடிய தொடர்புகளை நான் பேணுவதில்லை. சிந்தனையில் நாம் ஒரு அரசியல்வாதி இல்லை. ஆதலால் எனக்கு கட்சி முக்கியம் அல்ல. மாறாக மக்களே முக்கியமானவர்கள்.

இதேவேளை, ஊழல் குற்றச்சாட்டுக்கள் நிரூபிக்கப்பட்ட இரண்டு அமைச்சர்களுக்கு எதிராக நடவடிக்கை எடுத்திருப்பது நியாயமானது. ஆனால் குற்றச்சாட்டு நிரூபிக்கப்படாத ஏனைய இரு அமைச்சர்களுக்கு எதிராக எவ்வாறு நீங்கள் நடவடிக்கை எடுப்பீர்கள் என இரா.சம்பந்தன் என்னிடம் வினவினார்.

ஏனைய இரு அமைச்சர்களுக்கு எதிராக சாட்சியங்களை முன்வைக்க சாட்சியாளர் விரும்புவதாகவும் அதேபோல் அவர்களுக்கு எதிராக மேலும் பல புதிய எழுத்து மூலமான முறைப்பாடுகள் கிடைத்துள்ளதாக நான் சம்பந்தனிடம் கூறினேன்.

எனவே அந்த இருவரும் தொடர்ந்தும் அமைச்சு பதிவிகளில் இருக்கலாம் எனவும் ஆனால் அவர்கள் அமைச்சின் அலுவலகங்களுக்கு செல்ல கூடாது எனவும் சம்பந்தனிடம் எடுத்து கூறியிருக்கிறேன்.

ஆனால் அவர்களுக்கு எதிராக நடவடிக்கை எடுப்பது தவறு என்று எதிர்க் கட்சித் தலைவர் சம்பந்தன் தெரிவித்திருந்தார். இருப்பினும் அதில் தவறில்லை. அது சரியானது தான் என்று நான் அவருக்கு தெரிவித்திருக்கிறேன் என்று குறிப்பிட்டார்.

இதேவேளை, தமிழரசுக் கட்சியின் தலைமையுடன் அதாவது இரா.சம்பந்தன், மாவை சேனாதிராஜா ஆகியோருடன் எனக்கு எந்தவித முரண்பாடுகளும் இல்லை என்றும் குறிப்பிட்டுள்ளார்.

ஹட்டன் – நானு ஓயாவில் இடம்பெற்ற வாகன விபத்தில் 6 வயது சிறுமியொருவர் உயிரிழந்ததை அடுத்து அங்கு பதற்ற நிலை ஏற்பட்டது.

நேற்று காலை 7 மணியளவில் பாடசாலை செல்வதற்காக 6 வயது சிறுமியொருவர் பாதசாரிக் கடவையைக் கடக்க முற்பட்ட போது, டிப்பர் வண்டி ஒன்று மோதி விபத்து நேர்ந்துள்ளது. ரதல்லை தோட்டத்தைச் சேர்ந்த சிறுமியே விபத்தில் உயிரிழந்துள்ளார்.

விபத்தையடுத்து வாகனம் நிறுத்தாமல் முன்னோக்கிச் சென்றதினால் குறித்த பகுதியில் பதற்ற நிலை ஏற்பட்டதுடன், பிரதேச மக்களால் டிப்பர் வண்டிக்கு தீ மூட்டப்பட்டுள்ளது.

இதன் பின்னர் வாகன சாரதி நானு ஓயா பொலிஸில் சரணடைந்திருந்தார். எனினும், குறித்த சாரதி சம்பவ இடத்திற்கு வருகை தரும் வரை சிறுமியின் சடலத்தை அகற்ற அனுமதிக்கப் போவதில்லை என மக்கள் தெரிவித்திருந்தனர்.

இதேவேளை, ஹட்டன் – நுவரெலியா பிரதான வீதியை மறித்து பிரதேச மக்களினால் சுமார் 8 மணி நேரம் கவனயீர்ப்புப் பேராட்டம் முன்னெடுக்கப்பட்டது.

இதன் காரணமாக ஹட்டன் – நானு ஓயா பிரதான வீதியின் வாகனப் போக்குவரத்து ஸ்தம்பிதமடைந்தது. மேலும், பதற்ற நிலைமை அதிகரித்ததை அடுத்து, பொலிஸ் விசேட அதிரடிப்படையினர் அங்கு குவிக்கப்பட்டனர்.

பின்னர் நுவரெலியா மாவட்ட நீதவான் சம்பவ இடத்திற்கு வருகை தந்திருந்தார். அவரினால் வழங்கப்பட்ட உத்தரவிற்கமைய, சடலம் நுவரெலியா மாவட்ட வைத்தியசாலைக்கு எடுத்துச்செல்லப்பட்டது.

இதன் பின்னர் கவனயீர்ப்புப் போராட்டத்தில் ஈடுபட்டிருந்த மக்கள் பிற்பகல் 2.30 மணியளவில் கலைந்து சென்றனர். இதேவேளை, நானு ஓயா பொலிஸ் நிலையப் பொறுப்பதிகாரி இடமாற்றம் செய்யப்பட்டுள்ளார்.

நானு ஓயா பொலிஸ் நிலையத்திலிருந்து அவரை நுவரெலியாவிற்கு இடமாற்றம் செய்துள்ளதாக பிராந்தியத்திற்குப் பொறுப்பான உயர் பொலிஸ் உத்தியோகஸ்தர் ஒருவர் குறிப்பிட்டார்.

விபத்து தொடர்பான விசாரணைகள் முன்னெடுக்கப்படும் வரை அவரை தற்காலிகமாக இடமாற்றம் செய்துள்ளதாகவும் பொலிஸார் கூறினர்.

இதேவேளை, விபத்து தொடர்பில் கைது செய்யப்பட்ட சந்தேகநபர் எதிர்வரும் 14 நாட்களுக்கு விளக்கமறியலில் வைக்கப்பட்டுள்ளார்.

 
வடமாகாண முதலமைச்சருக்கு எதிராக நேற்று முன்தினம் நம்பிக்கையில்லா பிரேரணை சமர்பிக்கப்பட்டிருந்த நிலையில் நேற்று முதலமைச்சர் சீ.வி.விக்னேஸ்வரன் மீது தமக்கு நம்பிக்கை உள்ளதாக கூறி வடமாகாண சபையின் 15 உறுப்பினர்கள் ஆளுநருக்கு இன்று பெயர் பட்டியலையும், சத்திய கடதாசியையும் சமர்பித்திருக்கின்றனர்.

வடமாகாண முதலமைச்சர் சீ.வி.விக்னேஸ்வரன் முறைகேட்டு குற்றச்சாட்டு சுமத்தப்பட்ட அமைச்சர்களுக்கு எதிராக நடவடிக்கை எடுத்தமையினையடுத்து வடமாகாண முதலமைச்சருக்கு எதிராக மாகாணசபை உறுப்பினர்கள் 16 பேர் இணைந்து நம்பிக்கையில்லா பிரேரணையினை சமர்பித்திருந்தனர்.

இந்நிலையில் நேற்று (15.06.2017) இரவு 10 மணிக்கு வடமாகாண ஆளுநர் றெஜினோல்ட் கூரேயை அவருடைய அலுவலகத்தில் சந்தித்த மாகாணசபை உறுப்பினர்களான எம்.கே.சிவாஜிலிங்கம், க.சர்வேஸ்வரன் விந்தன் கனகரட்ணம் ஆகியோர் முதலமைச்சர் மீது நம்பிக்கை உள்ளது என 15 மாகாணசபை உறுப்பினர்களின் கையொப்பங்களையும் சத்திய கடதாசிகளையும் வழங்கியிருக்கின்றனர்.

இதேவேளை முதலமைச்சருக்கு சார்பாக எம்.கே.சிவாஜிலிங்கம், எம்.தியாகராஜா, ஜீ.குணசீலன், ஆர்.இந்திரராஜா, து.ரவிகரன், கே.சிவநேசன், திருமதி அனந்தி சசிதரன், க.சர்வேஸ்வரன், பொ.ஐங்கரநேசன், விந்தன் கனகரட்ணம், ஏ.புவனேஸ்வரன், செ.மயூரன், ஜீ.ரி.லிங்கநாதன், ப.கஜதீவன், சீ.வி.விக்னேஸ்வரன் ஆகியோர் கையொப்பமிட்டுள்ளனர்.

இவர்களில் 2 பேர் தமிழரசு கட்சி சார்ந்தவர்கள் என்பதுடன் மற்றயவர்கள் ஈ.பி.ஆர்.எல்.எவ் மற்றும் புளொட், ரெலோ ஆகிய கட்சிகள் சேர்ந்தவர்கள் என்பது இங்கே குறிப்பிடத்தக்கதாகும்.

இதேவேளை மேற்படி பெயர்பட்டியலையும் சத்திய கடதாசியையும் சமர்பித்து மாகாணசபை உறுப்பினர் எம்.கே.சிவாஜிலிங்கம் உரையாற்றுகையில்,மாகாணசபை உறுப்பினர்கள் சிலர் முதலமைச்சருக்கு எதிராக நம்பிக்கையில்லா தீர்மானம் சமர்பித்திருக்கின்றனர்.

இதற்கிடையில் இந்த பிரச்சினையை தீர்ப்பது தொடர்பாக முதலமைச்சருடன் தமிழ் தேசிய கூட்டமைப்பின் தலைவர் இரா.சம்பந்தன் பேச்சுவார்த்தை நடத்தியிருக்கின்றார்.

இதனடிப்படையில் அவர்களுடைய நம்பிக்கையில்லா தீர்மானம் மீள பெறப்படவேண்டும். இல்லையேல் நாங்கள் மாகாணசபையில் முதலமைச்சரின் பெரும்பான்மையை நிருபிப்போம் அது தமிழர்களின் வெற்றியாக அமையும் என்றார்.

பிளாஸ்டிக் அரிசி சம்பந்தமாக போலியான தகவல்களை உருவாக்கிய நபர்களுக்கு எதிராக நட்ட நடவடிக்கை எடுப்பதாக நுகர்வோர் பாதுகாப்பு அதிகாரசபை கூறியுள்ளது.

கொழும்பில் இன்று இடம்பெற்ற ஊடகவியலாளர் சந்திப்பில் நுகர்வோர் பாதுகாப்பு அதிகாரசபை இதனைத் தெரிவித்துள்ளது.

சமூக வலைத்தங்களில் பிளாஸ்டிக் அரிசி சம்பந்தமாக போலியான தகவல்களை உருவாக்கிய மற்றும் ஊக்குவித்த குழுக்கள் தொடர்பான தகவல்கள் குற்றப் புலனாய்வுத் திணைக்களத்திற்கு வழங்குவதற்கு அந்த அதிகாரசபை தீர்மானித்துள்ளதாக ஊடக சந்திப்பில் கலந்து கொண்ட நுகர்வோர் பாதுகாப்பு அதிகாரசபையின் தலைவர் கூறினார்.

மேலும், பிளாஸ்டிக் அரிசி சம்பந்தமாக போலியான சதி இதுவென்று அவர் குறிப்பிட்டுள்ளார்.

உலகின் மிக அரிய வகை திமிங்கிலங்கள் இனம் ஒன்று இலங்கையின் கடற்பரப்பில் உள்ளதாக கண்டுபிடிக்கப்பட்டுள்ளது.

இலங்கையின் தெற்கு கடலில் திமிங்கிலங்கள் தொடர்பில் ஆய்வு மேற்கொள்ளும் குழுவொன்றினால் இவை கண்டுபிடிக்கப்பட்டுள்ளன. “ஒமுரா” என்ற பெயரில் இந்த திமிங்கில வகை அடையாளப்படுத்தப்படுகின்றது.

இந்த திமிங்கில இனம் தெற்கு மற்றும் வட அட்லாண்டிக் கடல், மேற்கு பசுபிக் மற்றும் இந்தியப் பெருங்கடலில் வாழ்வதாக கண்டறியப்பட்டுள்ளது.

எனினும் வெற்று கண்களினால் இந்த திமிங்கிலங்களை காண்பதென்பது மிகவும் கடினமான விடயமாக குறிப்பிடப்படுகின்றது.

இந்த வகை திமிங்கிலங்கள் இலங்கையில் காணும் முதலாவது சந்தர்ப்பம் இதுவென அந்த குழுவினர் தெரிவித்துள்ளார்.

தெற்கு கடலில் கமராவில் பதிவாகிய புகைப்படங்கள் சிலவற்றை அந்த குழுவினர் வெளியிட்டுள்ளனர்.

1999 – 2000 ஆண்டு காலப்பகுதியில் இந்த திமிங்கிலங்களை வெற்று கண்களினால் காண்பதற்கு சந்தர்ப்பம் ஒன்று கிடைத்திருந்தமை குறிப்பிடத்தக்கது.

கொழும்பு நோக்கி பயணித்த கௌனிவெலி புகையிரதத்தில் மோதி உயிரிழந்த மாணவியின் மரணத்தில் சந்தேகம் இருப்பதாக அவரின் தந்தை தெரிவித்திருப்பதாக தகவல் வெளியாகியுள்ளது.

கவிந்தி பபசரா ஜயசேகர (18 வயது) என்ற மாணவி நேற்று இரவு 8.05 மணியளவில் புகையிரத்தில் மோதி உயிரிழந்தார். இந்த நிலையிலேயே அவரது தந்தை இதனை தெரிவித்துள்ளார்.

இதேவேளை உயிரிழந்த மாணவியின் சடலம் தற்போது ஹோமாகம மருத்துவமனையின் பிரேத அறையில் வைக்கப்பட்டுள்ளதாக தெரிவிக்கப்படுகிறது.

அத்துடன் சம்பவம் தொடர்பில் மேலதிக விசாரணைகளை கொட்டாவை பொலிஸார் முன்னெடுத்துள்ளனர்.

உயிரிழந்த மாணவி கொழும்பில் பிரபல பெண்கள் பாடசாலை ஒன்றில் கல்வி கற்று வந்துள்ளார் என்பது குறிப்பிடத்தக்கது.

வடமாகாண முதலமைச்சர் சீ.வி.விக்னேஸ்வரனுக்கு எதிரான கபட நாடகங்களுக்கு எமது எதிர்ப்பை தெரிவிக்கும் முகமாக வடகிழக்கில் நாளைய தினம் பொது கடையடைப்பு ஒன்றிற்கு தமிழ் மக்கள் பேரவை அழைப்பு விடுத்துள்ளது.

இது தொடர்பாக தமிழ்மக்கள் பேரவை இன்று விடுத்துள்ள அறிக்கையில் இவ்வாறு குறிப்பிடப்பட்டுள்ளது. மேலும் அவ்வறிக்கையில் தெரிவிக்கப்பட்டுள்ளதாவது,

குறுகிய முன் அறிவிப்பை பொறுத்துக்கொண்டு, இனத்தின் நலன்கருதி எமது உணர்வுகளை வெளிப்படுத்தும் நோக்குடன் அனைவரும் இந்த கடையடைப்புக்கு ஆதரவு தரவேண்டும் என நாம் வேண்டுகிறோம்.

முதல்வர் மீதான நெருக்கடிகளின் உச்சமாக, இந்த முறைகேடுகள் குறித்த விசாரணையில் குறிப்பிடப்பட்டவர்களை பாதுகாக்கும் நோக்குடன் அவர் மீது நம்பிக்கையில்லா தீர்மானம் ஒன்றை சிறிலங்கா அரசின் அங்கத்தவர்களுடன் இணைந்து சில தமிழ் அரசியல்வாதிகள் கொண்டுவந்திருக்கிறார்கள்.

இந்த நிலையில், இதை வெறும் மாகாண சபையின் நிர்வாக சிக்கலாகவோ அல்லது கட்சி உறுப்பினர்களின் பதவி மோகம் காரணமாக எழுந்த உட்கட்சி பிரச்சினையாகவோ இனியும் கருதமுடியாது.

தமிழர் இனப்பிரச்சினை தொடர்பிலான ஸ்ரீலங்கா அரசின் கபட நோக்கத்தை நிறைவேற்றுவதற்கு தடையாக இருந்தமைக்காக தமிழர்களின் கோட்பாடுகளை சமரசமின்றி முன்கொண்டு சென்றமைக்காக அவர் மீது இந்த நெருக்கடியை அரசும், அரசு சார்ந்தவர்களும் கொண்டு வந்திருக்கின்ற நிலையில்,

இனத்தின் நலன்சார்ந்து இந்தக் கொள்கைகளை முன்கொண்டு சென்றமைக்காக அவர் இலக்கு வைக்கப்பட்டாரோ அந்தக் கொள்கைகள் மக்களின் கொள்கைகளே என்பதை மீண்டும் வெளிப்படுத்தும் நோக்குடன், பொது மக்கள் அனைவரும் ஒன்றிணைய வேண்டும் என தமிழ் மக்கள் பேரவை கோருகின்றது.

வடமாகாணசபை முதலமைச்சரின் மீது சில மாகாணசபை உறுப்பினர்களால் கொண்டுவரப்பட்டிருக்கும் நம்பிக்கையில்லா தீர்மானத்திற்கு தமிழ் மக்கள் சார்பில் கடுமையான கண்டனத்தை தமிழ் மக்கள் பேரவை பதிவு செய்கிறது.

எமது மக்களின் இலட்சிய அரசியல் முதலமைச்சர் சீ.வி. விக்னேஸ்வரன் மீதான இந்த நம்பிக்கையில்லாத் தீர்மானமும் அவர் தன் ஆட்சியை செவ்வனே கொண்டு செல்லமுடியாது.

ஏற்படுத்தப்பட்ட இடையூறுகளும் திடீரென எழுந்த ஒன்றல்ல. சிறிலங்கா அரசின் தமிழர் விரோதப்போக்கை எதுவித மூடிமறைத்தல் இன்றி வெளிப்படுத்தியமையும், தமிழர்களின் அரசியல் அபிலாசைகளில் எந்தவித விட்டுக்கொடுப்புகளுமின்றி இருந்தமையும் அந்தக் கோரிக்கைகளை சமரசமின்றி சர்வதேச இராஜதந்திரிகளிடம்

முன்வைத்து அழிக்கப்படுகின்ற எமது மக்கள் சார்பாக குரல் கொடுத்தமையுமே தற்போது நிகழும் அரசியல் கபட நாடகங்களின் பின்புலமாகும் என்பது தற்போது வெளிப்பட்டிருக்கிறது.

தமிழ்த் தேசியம் குறித்த முதலமைச்சர் அவர்களின் புரிதலும் சமரசமற்று அதை மக்கள் மத்தியில் முன்னெடுத்தமையும் சிறிலங்கா அரசு தனது அடக்கியாளும் திட்டத்தைத் தன் பிரமுகர்கள் மூலம் முன்னெடுக்க பாரிய இடையூறாக இருந்தது.

குறிப்பாக, மாகாணசபைக்குள் தமிழர் அரசியலை முடக்கிவிடும் கபட நோக்கோடு , சிறிலங்கா அரசும் சில தமிழ் அரசியல்வாதிகளும் தமது முயற்சிகளை செய்து கொண்டு வருகையிலே , 13 ஆம் திருத்தத்தின் வழியிலான மாகாணசபை முறைமை எமது அரசியல் வேட்கையை ஒரு போதும் பூர்த்தி செய்யாது.

தன் ஆட்சி அனுபவம் மூலமாகவும் தன் சட்ட நிபுணத்துவம் ஊடாகவும் அவர் மிகத்தெளிவாக மக்களுக்கும் சர்வதேசத்துக்கும் வடக்கு மாகாணசபையில் இருந்து கொண்டே அறிவித்தமை சிறிலங்கா அரசின் கபட திட்டத்தை முறியடித்திருந்தது.

அதுபோலவே, தொடர்ச்சியாக எமது மக்கள் மீது நடத்தப்படுவது கட்டமைக்கப்பட்ட இன அழிப்பே என்பதையும் பக்கச்சார்பற்ற சர்வதேச விசாரணை ஒன்றே இதற்கான பொறுப்புக்கூறலிற்கும் நீதிக்கும் வழிசமைக்கும் என்பதையும் மிக ஆணித்தரமாக, ஒரு ஜனநாயக மன்றின் தீர்மானமாக வெளிப்படுத்தப்பட்டமையும் அது சர்வதேச அரங்கில் மிகப்பெரிய கவனிப்பிற்குள்ளாகியமையும் சிறிலங்கா அரசினால் கடும் விசனத்துடனேயே பார்க்கப்பட்டது.

எமக்கு இழைக்கப்பட்டது கட்டமைக்கப்பட்ட இனப்படுகொலையே என்பதை தனக்கு உள்ளிருந்தும் வெளியிலிருந்தும் வந்த அழுத்தங்களையும் மீறி முதலமைச்சர் என்று அறிவித்தாரோ, ஒரு பக்கச்சார்பற்ற சர்வதேச விசாரணைதான் எமக்கான நீதியை பெற்றுக்கொடுக்குமென்பதை வெளிப்படையாக எப்போது

அறிவித்தாரோ இந்த மாகாணசபை முறைமை எமக்கான தீர்வாக அமையாது என்பதை ஆணித்தரமாக என்று தெரிவித்தாரோ அன்றுமுதல் முதல்வர் விக்னேஸ்வரன் அவர்கள் சிறிலங்கா அரசாலும் சில தமிழ் அரசியல்வாதிகளாலும் தொடர்ச்சியான நெருக்கடிகளுக்குள்ளாக்கப்பட்டார்.

இன்று, தனது ஆட்சியின் கீழ் நடைபெற்றதாகக் குற்றம்சாட்டப்பட்ட முறைகேடுகளை விசாரிக்க நேர்மையுடனும் தற்துணிவுடனும் ஒரு விசாரணைக்குழுவை நியமித்து எமது அரசியலில் முறைகேடுகளுக்கு இடமே இருக்க முடியாது எனும் தூய்மையான இலட்சியத்தை பேச்சில் மட்டுமல்லாது செயலிலும் காட்டி இருந்தார்.

முதலமைச்சர் முன் கொண்டு செல்லும் எமது அரசியலின் அடிப்படைக்கொள்கைகளுக்கு பின்னால் எமது மக்கள் எப்போதும் அணிதிரண்டு வருவார்கள் என்பதை நாம் எமது அணிதிரள்வுகள் மூலம் அனைவருக்கும் தெரியப்படுத்தவேண்டும் எனவும் தமிழ் மக்கள் பேரவை கோருகிறது.

சகல உள் புற அழுத்தங்களையும தாண்டி எமது தேசத்தின் அடிப்படை அரசியற் கோட்பாடுகளுக்கு தலைமையேற்று முன்கொண்டு செல்லுமாறு தமிழினத்தின் பெயரால் மக்களின் முதல்வருக்கு அழைப்பு விடுக்கிறோம்.

மேலும், பதவி போன்ற அற்ப பேரங்களுக்காக கோட்பாடுகளை விட்டுக்கொடுக்காது , எமக்காக புரியப்பட்ட தியாகங் களையும் அர்ப்பணிப்புகளையும் மனதில் கொண்டு மனச்சாட்சியுடன் செயற்பட முன்வருமாறு வடமாகாண சபையின் அங்கத்தவர்கள் அனைவரையும் இனத்தின் பெயரால் தாழ்மையுடன் கேட்டுக் கொள்கின்றோம் எனவும் தமிழ்மக்கள் பேரவை வேண்டுகோள் விடுத்துள்ளது.

தமிழரசுக் கட்சியின் தான்தோன்றித்தனமான, சர்வதிகாரப் போக்குடைய செயற்பாடே வடமாகாண முதலமைச்சர் மீதான நம்பிக்கையில்லா பிரேரணை முன்மொழிவு என வன்னிப் பாராளுமன்ற உறுப்பினர் சிவசக்தி ஆனந்தன் தெரிவித்துள்ளார்.

வடமாகாண சபையின் தற்போதைய நிலை தொடர்பில் கேட்ட போதே அவர் இவ்வாறு தெரிவித்தார். இதன்போது தொடர்ந்து தெரிவிக்கையில்,

ஊழல் மோசடிக்கு எதிராக வடமாகாண முதலமைச்சர் நடவடிக்கை எடுத்தையடுத்து அவருக்கு எதிராக நம்பிக்கையில்லாப் பிரேரணை கொண்டு வருவதை எக்காரணம் கொண்டு ஏற்க முடியாது.

கூட்டமைப்பின் தலைவர் இரா.சம்பந்தன் முதலமைச்சர் இந்த விவகாரத்தில் முடிவெடுத்து செயற்படலாம் எனத் தெரிவித்த பின்னர் அவரை முடிவெடுக்க விடாமல் தமிரசுக் கட்சியின் தலைவர் மாவைசேனாதிராஜா தொலைபேசியில் உரையாடியிருக்கிறார்.

நான்கு அமைச்சர்கள் தொடர்பில் முடிவெடுத்தால் மோசமான விளைவுகளை சந்திக்க நேரிடும் எனவும் எச்சரித்துள்ளார்.

அதன் தொடர்ச்சியாக அரசாங்க கட்சியுடன் கூட்டுச் சேர்ந்து ஒரு சர்வதிகாரப் போக்குடன், தான்தோன்றித்தனமாக தமிழரசுக் கட்சி முடிவெடுத்து ஏனைய பங்காளிக் கட்சிகளின் கருத்துக்ளைப் பெறாது வடமாகாண முதலமைச்சருக்கு எதிராக நம்பிக்கையளில்லா தீர்மானத்தை கொண்டு வந்துள்ளது.

இதனை நாம் கண்டிக்கின்றோம். இத்தகைய செயற்பாடுகளுக்கு எமது கட்சி எப்போதும் உடந்தையாக செயற்பட மாட்டாது.

7 உள்ளூராட்சி சபைகளில் தமிரசுக் கட்சி ஈபிடிபியுடன் இணைந்து நம்பிக்னையில்லா பிரேரணையை முன்னர் கொண்டு வந்திருந்தது.

அதன் தொடர்ச்சியாக தற்போது அந்த நல்லுறவின் அடிப்படையில் அரச கட்சிகளுடன் இணைந்து வடக்கு மாகாண முதலமைச்சரையும் மாற்ற முயல்கிறது.

வடமாகாண முதலமைச்சர் தமிழரசுக் கட்சிக்குரியவர் அல்ல. அவர் மீது கட்சித்தலைவர்களுடன் பேசி முடிவெடுத்திருக்க வேண்டும். ஆனால் அது நடைபெறவில்லை.

அவர்களின் சர்வதிகாரப் போக்கை எமது கட்சி வன்மையாக கண்டிக்கிறது. முதலமைச்சரின் கரங்களைப் பலப்படுத்த எமது கட்சி குரல் கொடுக்கும் எனத் தெரிவித்தார்.