வவுனியா இறம்பைக்குளம் வீதியிலுள்ள மின்சார கம்பங்கள் பாதிப்படைந்த நிலையில் காணப்படுவதுடன் அப்பகுதியில் வசித்துவரும் பொதுமக்கள், பாடசாலை மாணவர்களுக்கு ஆபத்தை விளைவிக்கக்கூடியதாகவும் காணப்படுகின்றது.

வவுனியா இறம்பைக்குளம் வீதியில் காணப்படும் இரும்புக் கம்பியிலான ஐந்து மின்கம்பங்களில் இருந்தே அப்பகுதியிலுள்ள வீடுகளுக்கு மின்சாரம் வழங்கப்பட்டுள்ளது.

குறித்த மின்கம்பங்களில் மழை காலங்களில் மின்சார ஒழுக்கு ஏற்பட்டுள்ளதாகவும் அதன் காரணமாக விலங்கினங்கள் சில இறந்துள்ளதாகவும், இப்பிரதேச மக்கள் குறிப்பிடுகின்றனர்.

மேலும் 30 வருடத்திற்கும் மேலாக குறித்த மின் கம்பங்கள் மக்கள் குடியிருப்பு பகுதியில் காணப்படுகின்றமையினால் எவ்வேளைகளிலும் ஆபத்துக்கள் ஏற்படலாம் என்ற அச்சத்துடன் வாழ்ந்து வருவதாகவும் அப்பகுதி மக்கள் தெரிவித்துள்ளனர்.

 
வவுனியா சந்தைசுற்றுவட்ட வீதியில் இயங்கி வந்த மசாஜ் நிலையம் ஒன்று இன்று (09.02.2017) பிற்பகல் 12.30 மணியளவில் மூடப்பட்டுள்ளது.

வவுனியாவில் பல ஆண்டுகளாக இயங்கிவந்த குறித்த மசாஜ் நிலையத்திற்கு இன்று திடீரென்று பார்வையிடுவதற்குச் சென்ற வவுனியா நகர சபை செயலாளர் ஆர்.தயாபரன் அங்கு அடிப்படை வசதிககள் ஏற்படுத்திக் கொடுக்கவில்லை என்றும் மின்பிறப்பாக்கி, தீ அணைக்கும் கருவிகள் போன்ற அத்தியவசியமான தேவைகள் நிறைவேற்றப்படவில்லை என்று தெரிவித்ததுடன் தற்காலிகமாக மூடுவதற்கும் பணித்துள்ளார்.

அடிப்படை தேவைகள் பூர்த்தி செய்யப்பட்டதும் திறக்குமாறு பணித்துள்ளார். இதையடுத்து இன்று குறித்த மசாஜ் நிலையம் மூடப்பட்டுள்ளது.

 
வவுனியாவில் இன்று (09.02.2017) தனியார் பேரூந்து உரிமையாளர்கள் சங்கம் முற்றுமுழுதான பணிப் பகிஸ்கரிப்பில் ஈடுபட்டுள்ளது.

கடந்த (03.02.2017) அன்று இலங்கை போக்குவரத்துசபை ஊழியர்கள் வவுனியா மத்திய பேரூந்து நிலையத்தை தங்களுக்கு வழங்கக்கோரி மாகாண ரீதியாக போராட்டத்தை முன்னெடுத்தபோது வடக்கு மாகாண போக்குவரத்து அமைச்சர் பா.டெனீஸ்வரனுக்கு எதிராக அவரது கொடும்பாவியை எரித்தமையை கண்டித்தே இந்த பணிப்பகிஸ்கரிப்பும் கண்டனப் பேரணியும் இடம்பெறுகிறது.

வட மாகாணம் தழுவிய இப் பணிப் பகிஸ்கரிப்பானது வவுனியாவிலிருந்து மற்றும் மன்னார், முல்லைத்தீவு, கிளிநொச்சி மாவட்டங்களிலிருந்து செல்லும் தனியார்பேரூந்து உரிமையாளர்கள் யாழ்ப்பாணத்தில் ஒன்றிணைந்து கண்டனப்பேரணியை ஆரம்பிக்கவுள்ளனர்.

வவுனியா A9 வீதியில் அமைந்துள்ள தனியார் பேரூந்து நிலையத்திலிருந்து பதாதைகள் கட்டப்பட்ட பேரூந்துகள் இன்று காலையில் யாழ்ப்பாணம் நோக்கி புறப்பட்டு செல்வதை காணக்கூடியதாக இருந்ததுடன் தனியார் பேரூந்து நிலையமானது வெறிச்சோடிக்காணப்பட்டது.

 
நீண்டகாலமாக எந்தவித கொடுப்பனவுகளும் இன்றி மாணவர்களின் கல்வி வளர்ச்சிக்காக உழைத்த தொண்டர் ஆசிரியர்களின் நியமனத்தை விரைவுபடுத்த வேண்டும் என வன்னி மாவட்ட பாராளுமன்ற உறுப்பினர் சிவசக்தி ஆனந்தன் தெரிவித்துள்ளார்.

வவுனியா, சேமமடு சண்முகானந்தா வித்தியாலயத்தில் நேற்று முன்தினம் (07.02.2017) நடைபெற்ற வருடாந்த இல்ல விளையாட்டுப் போட்டியில் கலந்து கொண்டு உரையாற்றும் போதே இவ்வாறு தெரிவித்தார். அவர் தொடர்ந்தும் தெரிவிக்கையில்,

வடக்கு மாகாணம் யுத்தத்தால் மிகவும் பாதிக்கப்பட்ட பிரதேசம். இங்குள்ள மாணவர்கள் வளப்பற்றாக்குறையுடன் கல்வி கற்கும் அதேவேளை ஆசிரியர் வளம் இன்றியும் மிகவும் கஸ்ரப்பட்டே தமது கல்வியைத் தொடர்ந்தனர். இதன்போது மாணவர்களுக்கு கல்வியைப் புகட்டுவதற்காக பல இளைஞர், யுவதிகள் தொண்டர் ஆசிரியர்களாக எந்தவித கொடுப்பனவும் இன்றி பணியாற்றியிருந்தனர்.

இவர்களுக்கான நிரந்தர நியமனம் தொடர்ந்தும் இழுபறியில் இருந்து வருகிறது. இதனால் பலர் பாதிக்கப்பட்டுள்ளார்கள். அடுத்து தாம் என்ன செய்வது என்று தெரியாத நிலையில் பலர் உள்ளனர். தற்போது வெளியாகியுள்ள தொண்டர் ஆசிரியர் பெயர் பட்டியலில் வவுனியா வடக்கில் உள்ள சிலர் விடுபட்டுள்ளனர். அவர்களையும் உள்வாங்கி அவர்களுக்கான நியமனத்தை விரைவுபடுத்த மத்திய, மாகாண கல்வி அமைச்சுக்கள் நடவடிக்கை எடுக்க வேண்டும் எனத் தெரிவித்தார்.

பாடசாலை அதிபர் செ.சசிகுமார் தலைமையில் நடைபெற்ற இவ்விளையாட்டுப் போட்டியில் வன்னிப் பாரராளுமன்ற உறுப்பினர் சிவசக்தி ஆனந்தன் அவர்களின் 2016ம் ஆண்டு பன்முகப்படுத்தப்பட்ட நிதியிலிருந்து ஐந்து லட்சம் ரூபாய் செலவில் புதிதாக கட்டப்பட்ட பாடசாலை நுழைவாயில் பாராளுமன்ற உறுப்பினரால் திறந்து வைக்கப்பட்டது.

இன் நிகழ்வில் வவுனியா வடக்கு உதவிக் கல்விப் பணிப்பாளர்கள், ஆசிரியர்கள், மாணவர்கள், பெற்றோர்கள் எனப்பலரும் கலந்து கொண்டனர்.

 
வவுனியா இறம்பைக்குளம் பகுதியிலுள்ள மயானத்தின் பாதை சீர் இன்றி காணப்படுவதாக அங்குள்ள மக்கள் தெரிவிக்கின்றனர்.

அதனை புனரமைத்துத் தருமாறும் வீதிக்கு குறுக்கேயுள்ள கால்வாய் திறந்த நிலையில் காணப்படுவதால் அதனைக்கடந்தே செல்லவேண்டியுள்ளதால் பலசிரமங்களை எதிர்கொள்ளவேண்டியுள்ளதாகவும் வீதியும் செப்பனிடப்படாமல் குண்டும்குழியுமாக காணப்படுவதாக பொதுமக்கள் விசனம் தெரிவித்துள்ளனர்.

மேலும் இதற்க்கு பொறுப்பாக உள்ள அதிகாரிகள் மற்றும் அரசியல்வாதிகள் இதனை கவனத்தில் எடுக்குமாறு மக்கள் கேட்டுக்கொள்கின்றனர்.

கடந்த ஒரு வாரகாலமாக போராட்டத்தில் ஈடுபட்டுவரும் கேப்பாப்புலவு குடியிருப்பு மக்களுக்கு சமூக நீதிக்கான வெகுஜன அமைப்பு தமது ஆதரவைத் தெரிவிப்பதாக அவ்வமைப்பின் வவுனியா மாவட்டச் செயலாளர் சு.டோன் பொஸ்கோ தெரிவித்துள்ளார். இது தொடர்பில் அவர் வெளியிட்டுள்ள அறிக்கையில்,

யுத்தம் முடிவடைந்து ஏழு வருடங்கள் கழிந்த போதிலும் குடிமக்களின் காணிகள் மீள அளிக்கப்படவில்லை. அக்காணிகளை மீட்பதற்காக பல்வேறு பிரதேசங்களிலும் மக்கள் போராட்டத்தை நடத்தி வருகின்றார்கள். காணிகளை மீள வழங்குவோம். அரசியல் கைதிகளை விடுவிப்போம். பயங்கரவாத சட்டத்தை நீக்குவோம். காணாமல் போனோருக்கு பதில் கூருவோம்.

தேசிய இனப்பிரச்சினைக்கு தீர்வு காண்போம் என வாக்குறுதி அளித்து தமிழ் பேசும் மக்களின் வாக்குகளைப் பெற்று நல்லாட்சி என்ற பெயரில் அமைக்கப்பட்ட அரசாங்கம் பதவிக்கு வந்து இரண்டு வருடங்கள் கடந்த போதும் மக்களின் கோரிக்கையை உதாசீனம் செய்து வருகின்றது.

தனது வாக்குறுதிகளை நிறைவேற்றப் பின்னடிக்கின்றது. யுத்தத்தால் கடுமையாக பாதிக்கப்பட்ட இம் மக்களின் வாழ்வாதாரத்தை உயர்த்தி நல்லிணக்கத்தை உறுதிப்படுத்துவதற்குப் பதிலாக அவர்களது வாழ்வாதாரத்துக்கான நிலத்தை கையளிக்காதிருப்பது நல்லிணக்கத்திற்கு எதிரான செயற்பாடாகும்.

அரசாங்கம் இம் மக்களின் கோரிக்கையை ஏற்று நிலத்தை அம்மக்களிடம் அளிக்க வேண்டும் என வலியுறுத்துகின்றோம்.

அத்துடன் தமிழ் பேசும் மக்களின் வாக்குகளைப்பெற்று பாராளுமன்றம் சென்ற தமிழ்த் தேசியக் கூட்டமைப்பு அமைதியாக இருப்பது தமிழ் மக்களின் எதிர்கால இருப்புக்கு ஆரோக்கியமான விடயமாக அமையாது என்பதனையும் நாம் சுட்டிக்காட்ட விரும்புகின்றோம்.

எனவே இம்மக்களின் கோரிக்கையை வலியுறுத்தி கவனயீர்ப்புப் போராட்டம் ஒன்றினை 10.02.2017 வெள்ளிக்கிழமை காலை 9.30 மணிக்கு வவுனியா பஸ் நிலையம் முன்பாக நடாத்த தீர்மானித்துள்ளோம்.

அப்போராட்டத்தில் கலந்து கொள்ளுமாறு இம்மக்களின் போராட்டத்திற்கு ஆதரவான அரசியல் கட்சிகள், பொது அமைப்புக்கள், முற்போக்கு சக்திகள், தொழிற் சங்கங்கள், பொது மக்கள் அனைவருக்கும் அழைப்பு விடுக்கின்றோம் என அவ்வறிக்கையில் தெரிவித்துள்ளா