திருகோணமலை மாவட்டத்தில் கிண்ணியா நடுத்தீவு பகுதியில் நேற்று முந்தினம் (24.12) ஒரு பசு விசித்திரமான கன்று ஒன்றை பிரசவித்துள்ளது.

கிண்ணியா நடுத்தீவு பகுதியில் உள்ள நஜிம் முகமட் சுகைப் என்பவருக்கு சொந்தமான பசுவே இவ்வாறு விசித்திரமான கன்றை பிரசவித்துள்ளதாக குறிப்பிடப்படுகின்றது.

இந்தக் கன்றுக்கு ஏழு கால்களும் இரண்டு உடம்பும் காணப்படுகின்றது. இதைப்பார்க்கும் போது இரண்டு கன்றுகளுக்கு ஒரு தலை இருப்பதைப் போல் காணப்படுகின்றது.

எனினும் இக்கன்று பிரசவித்து சுமார் ஒரு மணித்தியாலத்திற்குப் பின் இறந்து விட்டது.

சுவிஸ்லாந்தில் காதலியை கொலை செய்த இலங்கையர் ஒருவருக்கு 15 ஆண்டுகள் சிறைத்தண்டனை விதித்து அந்நாட்டு நீதிமன்றம் தீர்ப்பளித்துள்ளது.

கடந்த 2000ம் ஆண்டு இடம்பெற்ற கொலை சம்பவம் தொடர்பிலேயே குறித்த நபருக்கு சிறைத்தண்டனை விதித்து தீர்ப்பளிக்கப்பட்டுள்ளதாக அந்நாட்டு ஊடகங்கள் செய்தி வெளியிட்டுள்ளன.

23 வயதான தன் காதலியை கொடூரமான முறையில் கொலை செய்த நிலையில், சுவிட்ஸர்லாந்தில் இருந்து வெளியேறிய குறித்த சந்தேகநபர் போலி ஆவணங்களை தயார் செய்து நியூசிலாந்தில் குடியேறியுள்ளார்.

பின்னர் 2004ம் ஆண்டு அந்நாட்டு குடியுரிமையை பெற்றுக்கொண்டு, Auckland நகரில் குடியேறிய அவர் வேறு ஒரு திருமணம் செய்து கொண்டு வாழ்ந்து வந்துள்ளார்.

எனினும், கடந்த 2014ம் ஆண்டு கொலை செய்யப்பட்ட காதலியின் உடலில் இருந்து பெற்றுக்கொள்ளப்பட்ட மரபணு மூலம் குறித்த தமிழர் தான் கொலையாளி என தெரியவந்துள்ளது.

இதனையடுத்து, 2015ம் ஆண்டு நியூசிலாந்து அரசின் அனுமதியுடன் சுவிட்ஸர்லாந்துக்கு அழைத்து வரப்பட்ட சந்தேகநபரிடம் விசாரணைகள் இடம்பெற்று வந்தன.

இந்நிலையில், அவர் மீதான குற்றம் நிரூபிக்கப்பட்ட நிலையில், 15 ஆண்டுகள் சிறைத்தண்டனை விதித்து அந்நாட்டு நீதிமன்றம் கடந்த வெள்ளிக்கிழமை தீர்ப்பளித்துள்ளதாக அந்நாட்டு பிரதான செய்தித்தாள் ஒன்று தகவல் வெளியிட்டுள்ளது.

பிரான்ஸ் தலைநகர் பாரிசில் தமிழர் ஒருவர் கத்திக்குத்துக்கு இலக்காகி உயிரிழந்துள்ளார். தமிழகம் கும்பகோணத்தை சேர்ந்த 26 வயதான மணிமாறன் என்பவரே இவ்வாறு படுகொலை செய்யப்பட்டுள்ளார்.

பிரான்ஸ் ஊடகங்களை மேற்கோள்காட்டி வெளியாகியுள்ள செய்தியில் இந்த விடயம் தெரிவிக்கப்பட்டுள்ளது.

தனது நண்பரை பார்ப்பதற்காக பாரிஸ் வாகிரார்ட் மெட்ரோ புகையிரத நிலையத்தை வந்தடைந்த மணிமாறனை, இனந்தெரியாத நபர்கள் கொடூரமான முறையில் கத்தியால் குத்தியுள்ளனர்.

எனினும், படுகாயமடைந்த மணிமாறன் தனது நண்பர் வீட்டை நோக்கி ஓடியுள்ளார். இந்நிலையில், வீட்டு அழைப்பு மணியை அழுத்திய மணிமாறன் அந்த இடத்திலேயே உயிரிழந்துள்ளார்.

இந்நிலையில், வீட்டு கதவை திறந்து பார்த்த நண்பர், மணிமாறன் உயிரிழந்து கிடப்பதை கண்டு அந்நாட்டு பொலிஸாருக்கு தகவல் வழங்கியுள்ளார்.

இதனையடுத்து, சம்பவ இடத்திற்கு விரைந்த பொலிஸார் வழக்கு தாக்கல் செய்து விசாரணைகளை மேற்கொண்டு வருகின்றனர் என அந்நாட்டு ஊடகங்கள் வெளியிட்டுள்ள செய்தியில் மேலும் தெரிவிக்கப்பட்டுள்ளது.

அமைதியான அதிகாலை நேரம். உலகமே நினைத்துப் பார்த்திருக்காது இப்படி ஒரு நாளாக இந்த நாள் மாறும் என்று. அமைதியாக இருந்த இயற்கை பொங்கி எழுந்து உலக வரலாற்றையே திசைத்திருப்பி போட்டது. அது தான் உலக வரலாற்றில் கறுப்பு ஞாயிறு என பதியப்பட்ட 2004 டிசம்பர் 26

இலகுவில் மறந்திருக்க மாட்டோம். நத்தார் பண்டிகையை கோலாகலமாக குடும்பத்தினருடன் கொண்டாடிவிட்டு மறுநாளே தமது குடும்பத்தை இழந்து நின்ற மக்களின் கதை பேசும் நாள் இது.

சுனாமி எனும் இராட்சத அலைக்கு பல்லாயிரக்கணக்கான உயிர்களை பலி கொடுத்து, அழுது புரண்ட நிமிடங்கள் உருண்டோடி இன்றோடு 12 வருடங்களை தொட்டு விட்டோம்.

தெற்காசிய கடலோர நாடுகளை சில மணி நேரங்களுக்கு உலுக்கி சுமார் 3 லட்சம் மனித உயிர்களை காவு கொண்டதுடன், பல லட்சம் மக்களை நொடிப் பொழுதில் இடம்பெயர வைத்து விட்டது.

சுனாமி எனும் பேரலையினால் எத்தனை கிராமங்கள் உலக வரைபடத்தில் இருந்து துடைத்தெறியப்பட்டன. அந்த இழப்பின் வேதனைகளை தாங்கிக் கொள்ள முடியாது அடிப்படை வசதிகள் கூட பூர்த்தி செய்ய முடியாத அவல நிலையில் இன்று வரை மக்கள் வாழ்ந்து கொண்டுதான் இருக்கிறார்கள்.

2004 டிசம்பர் 26 காலை 7 மணியளவில் உருவெடுத்த அலையானது பேரலையாக பொங்கி எழுந்து லட்சம் உயிர்களை காவு கொண்டு விட்டது.

சுமாத்திரா தீவுப்பகுதியில் தகட்டோடு விலகியதன் காரணமாகவே சுனாமி பேரலை உருவெடுத்தது என்று விஞ்ஞானிகள் பல விதமான ஆதாரங்களை முன்வைத்தார்கள்.

ஆனாலும் என்ன பயன்? கடந்த நாட்கள் மீண்டும் வரவா போகின்றது. இவற்றிலும் துரதிஷ்ட்டம் என்னவென்றால் இலங்கையை பொருத்த மட்டில் ஆழிப்பேரலை தாக்கி ஆயிரக்கணக்கான உயிர்களை பலியெடுத்ததன் பின்னரே பலருக்கும் தெரிய வந்தது இதுதான் சுனாமி என்று.

அன்றைய தினம் இலங்கை மட்டுமல்ல இந்தியா, இந்தோனேசியா, அந்தமான், தாய்லாந்து போன்ற நாடுகளிலும் லட்சக்கணக்கான உயிர்களை பலியெடுத்தது.

சுனாமி எனும் பேரலையின் கோரத்தாண்டவம் முடிவடைந்து இன்றோடு 12 வருடங்கள் நிவர்த்தியாகின்றன. ஆழிப்பேரலையால் அன்றைய தினம் அழுத மக்கள் ஒரு புறம்.

இன்றுவரை தினம் தினம் கண்ணீர் வீடும் மக்கள் ஒருபுறம் என சுனாமியின் தாக்கம் இன்று வரை இடைவிடாது தொடர்கின்றது.

எதிர்பாராத சோகத்தினால் இழந்த எமது சொந்தங்களையும், அவர்களின் நினைவுகளையும் மீட்டுப்பார்க்கும் நாள் இது, கண்ணீருடன் நினைவு கூறுவோம். அதேநேரம் இறைவனையும் பிரார்த்திப்போம் வரலாற்றில் இதேபோல் இன்னுமோர் சுனாமி வரக்கூடாது என்பதற்காக.

மீன், தேங்காய் மற்றும் அரசி ஆகியனவற்றின் விலைகள் உயர்வடைந்துள்ளன.

மீன் வகைகளின் விலை சடுதியாக உயர்வடைந்துள்ளது.
பண்டிகைக் காலத்தில் மீனவர்கள் கடலுக்கு மீன்பிடிக்கச் செல்லாத காரணத்தினால், மீன்களன் விலைகள் உயர்வடைந்துள்ளதாக படகு உரிமையாளர்கள் தெரிவித்துள்ளனர்.

பெரிய வகை மீன்கள் கிலோ ஒன்று 1100 முதல் 1200 ரூபா வரையில் விற்பனை செய்யப்படுவதாகவும், இதனால் நுகர்வோர் சிரமங்களை எதிர்நோக்கி வருவதாகவும் தெரிவிக்கப்படுகிறது.

இதேவேளை, தேங்காயின் விலையும் உயர்வடைந்துள்ளது.தேங்காயின் விலை 60 மற்றும் 65 ரூபாவிற்கு விற்பனை செய்யப்பட்டு வருகின்றது.

அரசியின் விலையும் அண்மைக் காலமாக தொடர்ச்சியாக உயர்வடைந்து செல்கின்றமை குறிப்பிடத்தக்கது.

அரிசி விலையை குறைப்பதற்கு அரசாங்கம் முயற்சிகளை எடுத்து வருவதாக அறிவிக்கப்பட்டுள்ளது.

நெதர்லாந்து நாட்டை சேர்ந்த பெண்ணொருவரை ஹூங்கம கடற்கரையில் வைத்து பாலியல் வல்லுறவுக்கு உட்படுத்தியதாக கூறப்படும் நபரை பொலிஸார் கைது செய்துள்ளனர்.

சம்பவம் தொடர்பில் முறைப்பாடு கிடைத்து 24 மணி நேரத்திற்குள் இந்த நபரை பொலிஸார் கைது செய்துள்ளனர்.

61 வயதான நெதர்லாந்து பெண்ணே பாலியல் வல்லுறவுக்கு உட்படுத்தப்பட்டுள்ளதுடன் சம்பவம் தொடர்பில் 26 வயதான நபர் கைது செய்யப்பட்டுள்ளார்.

சம்பவம் குறித்து வெளிநாட்டு பெண் பொலிஸ் அவசர அழைப்பு தொலைபேசி இலக்கமான 119 தொடர்பு கொண்டு தெரியப்படுத்தியதை அடுத்து, ஹூங்கம பொலிஸ் அதிகாரிகள் சந்தேக நபரை கைது செய்துள்ளனர்.

சந்தேக நபர் அடிக்கடி கடற்கரையில் உலாவும் நபர் என தெரியவந்துள்ளது. பாலியல் வல்லுறவுக்கு உட்படுத்தப்பட்ட பெண் மருத்துவ பரிசோதனைக்கு உட்படுத்தப்பட்டுள்ளார்.