தெற்கு சூடான் கலவரத்தில் உயிரிழந்தவர்களின் எண்ணிக்கை 1000த்தை தாண்டியது என ஐ.நா. தெரிவித்துள்ளது. இதுகுறித்து ஐ.நா. துணை செய்தித் தொடர்பாளர் ஃபர்ஹான் ஹக் கூறியதாவது..

தெற்கு சூடான் முன்னாள் துணை அதிபர் ரீக் மாச்சர் ஆதரவு கிளர்ச்சிப் படையினரின் கட்டுப்பாட்டில் உள்ள எண்ணெய் வளம் மிக்க பென்டியூ நகரத்தின் மீதுதான் முழு கவனம் செலுத்தப்பட்டு வருகிறது.

அந்த நகரத்தில் வெள்ளிக்கிழமை காலையில் குண்டு வெடித்ததாகவும், மோதல் நேரிட்டதாகவும் தகவல்கள் தெரிவிக்கின்றன. இதனால் 800-க்கும் மேற்பட்டோர் அங்கிருந்து வெளியேறி ஐ.நா. முகாமில் தஞ்சமடைந்துள்ளனர்.

எனவே பென்டியூ நகரத்தில் இன்னும் பலருக்கு அடைக்கலம் கொடுக்கும் வகையில் பாதுகாப்புப் பகுதியை ஐ.நா. படையினர் விரிவுபடுத்தி உள்ளனர் என்று ஹக் கூறினார். ஐ.நா. அமைதிப்படை தலைவர் ஹெர்வ் லாட்சூஸ் கூறியதாவது:

தெற்கு சூடான் முழுவதும் 60 000க்கும் மேற்பட்டோர் ஐ.நா. முகாம்களில் தஞ்சமடைந்துள்ளனர்.

தெற்கு சூடான் கலவரத்தால் 1 லட்சம் பேர் வரை உகாண்டாவிலும் (கடந்த இரண்டு நாள்களில் மட்டும் 32,000 பேர்), 10 ஆயிரத்துக்கும் மேற்பட்டோர் கென்யா மற்றும் எத்தியோப்பியாவிலும் தஞ்சமடைந்துள்ளனர். மொத்தத்தில் இரண்டரை லட்சம் பேருக்கு மேல் புலம் பெயர்ந்து விட்டனர்.

கலவரத்தில் உயிரிழந்தவர்களின் எண்ணிக்கை துல்லியமாகத் தெரியவில்லை. எனினும், டிசம்பர் 15ஆம் திகதி கலவரம் மூண்டதில் இருந்து இதுவரை 1000 பேருக்கு மேல் உயிரிழந்துள்ளனர்.

தெற்கு சூடானுக்கு மேலும் 5500 வீரர்களை அனுப்ப ஐ.நா. பாதுகாப்புக் கவுன்சில் அனுமதி அளித்துள்ளது. கூடுதலாக 850 வீரர்களை நேபாள அரசு அனுப்புகிறது.

ஐ.நா. அமைதிப்படை, தெற்கு சூடான் அதிபர் சல்வா கீர் அரசுக்கோ, கிளர்ச்சிப்படை தலைவர் ரீக் மாச்சர் தரப்புக்கோ சாதகமாகச் செயல்படாது என்று லாட்சூஸ் கூறினார்.

வட அமெரிக்காவில் இருக்கும் மிச்சிகன் என்ற ஏரி முழுவதும் பனிபந்துகளால் சூழப்பட்ட கடல் போல் காட்சியளிக்கிறது.

வட அமெரிக்காவின் துருவ சூழலால் வெப்ப நிலை பூஜ்யத்திற்கு குறைந்துள்ளது. கூடைபந்துகளை போல் உருவத்திலிருக்கும் இந்த மிச்சிகன் ஏரியின் பனிப்பாறைகள் அப்பகுதியின் அருகில் இருக்கும் கிலேன் ஆர்பர் என்ற நகரம் வரை அலைகளாய் படர்கிறது.

இதுகுறித்து வானிலை ஆய்வாளர் ஜோ சார்லிவேய்க்ஸ் கூறுகையில், மிச்சிகன் ஏரியிலிருக்கும் தண்ணீரின் வெப்ப நிலை உறையும் நிலைக்கு சற்று குறைவாகத்தான் உள்ளது.

எனினும் இதில் தோன்றும் சின்னஞ்சிறு பனிக்கட்டிகள் தண்ணீரில் கலந்து அலைகளோடு அலைகளாய் முன்னும் பின்னுமாய் வந்து தண்ணீரின் அளவை அதிகரிக்கின்றது என்றும் இதில் சில பனிக்கட்டிகள் பெரிய பனிக்கட்டிகளை போலவும் உருவெடுத்து, காற்றினால் கரையில் வீசப்பட்டு, அலைகளாய் மோதுகின்றது எனவும் தெரிவித்துள்ளார்.

மேலும் குளிர் காலத்தில் இது போன்ற பெரிய ஏரிகளில் தோன்றும் பனிக்கட்டிகளை பனிபாறைகள் அல்லது பனிபந்துகள் என அப்பகுதி மக்கள் அழைப்பார்கள்.

பாகிஸ்தானில் நடத்தப்படவிருந்த தற்கொலைத் தாக்குதல் ஒன்றை தடுத்து நிறுத்தும் முயற்சியில் மாணவன் ஒருவர் தன் இன் உயிரைத் தியாகம் செய்துள்ளார்.

பாகிஸ்தானில் கைபர்– பக்துன்கவா மாகாணம் தீவிரவாதிகள் ஆதிக்கத்தில் உள்ளது. இங்கு தற்கொலை தாக்குதல்கள் மற்றும் குண்டு வெடிப்பு சம்பவங்களில் தீவிரவாதிகள் ஈடுபடுகின்றனர்.

இந்த நிலையில், ஒரு பாடசாலையில் தற்கொலை தாக்குதல் நடத்த முயன்ற ஒரு தீவிரவாதியை மாணவன் ஒருவர் தடுத்து நிறுத்தியுள்ளார். அதன் மூலம் அந்த பாடசாலையில் படிக்கும் நூற்றுக்கணக்கான மாணவர்களின் உயிரை குறித்த மாணவர் காப்பாறியதோடு தன் உயிரை துறந்துள்ளார்.

அவனது பெயர் அய்த் ஜாஷ் ஹசன் (14). இவன் கைபர்–பக்துன்கவா மாகாணத்தின் ஹன்சு மாவட்டத்தில் இப்ராகிம் ஷாயில் என்ற இடத்தை சேர்ந்தவர். அவர் அங்குள்ள அரச பாடசாலையில் 9ம் வகுப்பில் படித்து வந்தார்.

நேற்று குறித்த மாணவன் அந்தப் பாடசாலையின் வாசலில் நின்று கொண்டிருந்தபோது சந்தேகப்படும் வகையில் ஒரு மர்ம நபர் அங்கு வந்தார்.

அவர் தற்கொலை தாக்குதல் நடத்த வந்த தீவிரவாதி என்பதை அறிந்த ஹசன், அந்த மர்ம நபரை பாடசாலைக்குள் நுழைந்து விடாதபடி ஓடோடிச் சென்று வாசலில் தடுத்து நிறுத்தினார்.

அதற்குள் தற்கொலை படை தீவிரவாதி தான் இடுப்பில் கட்டியிருந்த குண்டுகளை வெடிக்க செய்தார். அதில், தீவிரவாதியுடன் சேர்ந்து மாணவன் ஹசனும் உடல் சிதறி பலியானார். அந்த மாணவனின் தைரியத்தையும், தியாகத்தையும் கிராம மக்கள் பாராட்டினார்கள். தற்போது இவர் பாகிஸ்தானின் நாயகன் என புகழப்படுகிறார்.

வெனிசுவெலா நாட்டின் அழகியாக கடந்த 2004ம் ஆண்டு தேர்ந்தெடுக்கப்பட்டவர் மோனிகா ஸ்பியர் (29). இவர் தனது முன்னாள் கணவர் ஹென்ரி பெர்ரி (39) மற்றும் அவர்களது 5 வயது குழந்தையுடன் வெனிசுலாவில் ஓய்வெடுக்க வந்திருந்தார்.

சம்பவத்தன்று அவர்கள் மத்திய வெனிசுவெலாவில் உள்ள பியூர்ட்டோ காபெல்லோ மற்றும் வேலன்சியா நகருக்கிடையே நெடுஞ்சாலையில் காரில் வந்தபோது அவர்களை கொள்ளைக் கும்பல் சுட்டுக்கொன்றது. அவர்களது 5 வயது குழந்தை மட்டும் காலில் குண்டு காயத்துடன் உயிர்பிழைத்தது.

பெரும் பரபரப்பை ஏற்படுத்திய இந்த சம்பவம் தொடர்பாக பொலிசார் வழக்குப்பதிவு செய்து 7 பேரை கைது செய்தனர். அவர்களில் ஒருவர் வீட்டில் நடத்திய சோதனையில் மோனிகாவிடம் இருந்து திருடிச் சென்ற டிஜிட்டல் கமரா கண்டுபிடிக்கப்பட்டது.

அந்த கெமராவை பொலிசார் பறிமுதல் செய்தனர். அதில் இருந்த காட்சிகளை பரிசோதித்து பார்த்தபோது, கொலையாளிகளைப் பற்றிய முக்கிய தகவல்கள் கிடைத்துள்ளதாக பொலிசார் தெரிவித்துள்ளனர்.

இதன்மூலம் 11 பேர் கொண்ட கும்பல் இந்த கொலையை செய்தது உறுதிப்படுத்தப்பட்டுள்ளது. அந்த கும்பலின் தலைவன் டேனிலோ என்பதும் இதன்மூலம் தெரியவந்துள்ளது. கமராவில் கிடைத்த பதிவுகள் மோனிகாவின் கொலை வழக்கில் முக்கிய திருப்பு முனையாக அமைந்துள்ளது குறிப்பிடத்தக்கது.