காணாமல் போனதாக கூறப்பட்ட மராத்திய நடிகை சென்னையில் மீட்கப்பட்டுள்ளார். பின்னர் அவர் தானே பொலிசார் வசம் ஒப்படைக்கப்பட்டார். நடிகையின் நகைகளுடன் தலைமறைவான காதலனை பொலிசார் தேடி வருகிறார்கள்.

மராத்தி துணை நடிகை அல்கா புனேவர். 44 வயதான இவர் தானேயை சேர்ந்தவர். இவர் கடந்த மாதம் 27ம் திகதி மேடை நிகழ்ச்சியில் கலந்து கொள்வதற்காக நவிமும்பையை அடுத்த உரன் பகுதிக்கு சென்றவர் மாயமானார்.

இது தொடர்பாக அல்காவின் கணவர் சஞ்சய், பொலிசில் புகார் செய்தார். காணாமல் போன அன்று தன் மனைவி நிறைய நகைகள் அணிந்து இருந்ததாக புகாரில் தெரிவித்து இருந்தார். புகாரின்பேரில் பொலிசார் வழக்குபதிவு செய்து விசாரணை நடத்தி வந்தனர்.

இந்நிலையில் அல்காவின் நண்பர் சஞ்சய் சோன்கர் என்பவரை பொலிசார் பிடித்தனர். அவரிடம் விசாரணை நடத்தியபோது நடிகை அல்காவும், அவரது ஆண் நண்பர் அலோக் பலிவாலும் மராட்டியத்தை விட்டு ஓடிபோய்விட்டதாக தெரிவித்தார்.

இந்த சூழ்நிலையில் யாரும் எதிர்பாராத வகையில் நடிகை அல்கா, கடந்த திங்கட்கிழமை சென்னை பொலிஸ் கமிஷனர் அலுவலகம் வந்தார். அங்கு பொலிஸ் கமிஷனர் ஜார்ஜை சந்தித்து ஒரு புகார் மனு அளித்தார்.

அந்த புகார் மனுவில் கூறி இருப்பதாவது 44 வயதான நானும், அலோக் பாலிவாலும் கடந்த ஒரு வருடமாக காதலித்து வந்தோம். அலோக் பாலிவாலுக்கு 24 வயது தான் ஆகிறது.

எங்களது காதல் விவகாரம் எனது கணவர் சஞ்சய்க்கு சமீபத்தில் தெரியவந்தது. அவர் என்னை கண்டித்தார். இதனால் கடந்த மாதம் 27ம் திகதி வீட்டை விட்டு வெளியேறி அலோக் பாலிவாலை சந்தித்தேன். இனிமேல் வீட்டுக்கு செல்ல மாட்டேன் என்று அவரிடம் கூறினேன்.

அதன்பின் நாங்கள் இருவரும் கோபோலி பகுதிக்கு சென்றோம். யாருக்கும் சந்தேகம் வரக்கூடாது என்பதற்காக எனது காரை அங்கிருந்த பள்ளத்தில் உருட்டிவிட்டோம்.

இதற்கு எனது கார் சாரதி மற்றும் நண்பர் சஞ்சய் சோன்கர் ஆகியோர் உதவியாக இருந்தனர். அதன்பின் அங்கிருந்து பெங்களூர் சென்றோம். அங்கிருந்து சென்னை வந்தோம்.

சென்னையில் எனது காதலன் அலோக், என்னுடைய நகைகள் மற்றும் பணத்தை அபகரித்து கொண்டு என்னை தவிக்கவிட்டு விட்டு சென்று விட்டார் என்று அல்கா மனுவில் குறிப்பிட்டு இருந்தார்.

இதைத் தொடர்ந்து சென்னை பொலிசார், தானே பொலிசாருக்கு தகவல் கொடுத்தனர். இதை தொடர்ந்து அங்கிருந்து பொலிசார் விமானம் மூலம் சென்னை விரைந்தனர்.

இதற்கிடையே நடிகை அல்கா சென்னை வேப்பேரியில் உள்ள பெண்கள் விடுதியில் பொலிஸ் பாதுகாப்புடன் தங்க வைக்கப்பட்டிருந்தார்.

சென்னை வந்த தானே பொலிசார் நடிகை அல்காவை மீட்டு தானே திரும்பினர். நடிகை அல்காவை திருமணம் செய்வதாக கூறி ஏமாற்றி அவரிடம் இருந்து நகை, பணத்தை அபகரித்துக் கொண்டு தப்பியோடிய அவரது காதலன் அலோக் பாலிவாலை பொலிசார் வலைவீசி தேடிவருகிறார்கள்.

மிஸ்டிக் பிலிம்ஸ் சார்பாக அவுஸ்திரேலியா வாழ் தமிழர் எம்.எஸ்.ஆனந்த் தயாரிக்கும் படம் யாழ். இப்படத்தில் வினோத், சசி கதாநாயகர்களாக நடிக்க, கதாநாயகிகளாக லீமா,மிஷா ஆகியோர் நடித்திருக்கிறார்கள்.

சானா, சார்மி, வீரசந்தானம் ஜெ.பி, கைலாசம்பிள்ளை, சஞ்சீவி, சார்லஸ் மற்றும் முக்கிய கதாபாத்திரத்தில் குழந்தை நட்சத்திரம் ரக்ஷனாவும் நடித்துள்ளனர்.

இயக்குனர் எம்.எஸ்.ஆனந்த் யாழ் திரைப்படம் ஒரு வித்தியாசமான முயற்சி. இத்திரைப்படத்தின் கதை ஆரம்பம் முதல் இறுதிவரை இலங்கையிலே நடக்கிறது. இதில் இந்திய, தமிழ் கதாபாத்திரங்கள் எதுவும் கிடையாது. அனைத்து கதாபாத்திரங்களும் ஈழத்தமிழர்களே என்பது குறிப்பிடத்தக்கது.

இத்திரைப் படத்தின் பாடல்கள் ஈழத்தமிழில் இருப்பதும், பாடலாசிரியர்களும் இலங்கை தமிழர்களே என்பதும் இதுவே முதல் முறை. வசனம் முழுவதும் இலங்கை தமிழிலே இருக்கும்.

யாழ் என்பது ஈழத்தமிழர்களால் உருவாக்கப்பட்ட ஒரு இசைக்கருவி. பாணர்கள் என்பவர்கள் இக்கருவியை வைத்துக் கொண்டு சைவ சித்தாந்த கருத்துகளையும், தமிழர்களின் கலை மற்றும் கலாசாரத்தையும், பண்பாட்டையும் ஊர் ஊராக சென்று பரப்பினார்கள்.

யாழ்ப்பாணம் என்ற ஊருக்கு பெயர் வந்ததே அதனால் தான். யாழ் இசையும், யாழ் கலையும், கலாச்சாரமும் சம்மந்தப்பட்ட கதாபாத்திரங்களுக்கு இடையில் இப்பொழுது இறுதி போரின் போது அவர்களுக்கு நடந்த நட்பு, காதல், போன்ற சம்பவங்களை மிக ஜனரஞ்சகமாக எடுத்துள்ளோம்.

இதுவரை உலக சினிமாவிலே சொல்லப் படாத திரைக்கதை இதில் பார்ப்பீர்கள் என்று கூறுகிறார்.

சென்னையை அடுத்துள்ள சேலையூரை சேர்ந்தவர் ஆர்.மகேந்திரன். இவர், சென்னை 16வது உதவி சிட்டி சிவில் நீதிமன்றத்தில் தாக்கல் செய்துள்ள மனுவில் கூறியிருப்பதாவது..

சவுமிதா ஸ்ரீ ஆர்ட்ஸ் என்ற சினிமா தயாரிப்பு நிறுவனத்தை நடத்தி வருகிறேன். நடிகர் பிரகாஷ்ராஜ், நடிகை ஸ்ரேயா ஆகியோர் தெலுங்கில் நடித்த பகீரதா என்ற படத்தை தமிழில் ஜில்லா என்ற பெயரில் மொழியாக்கம் செய்தேன். இந்த ஜில்லா என்ற படத்தின் தலைப்பை தென்னிந்திய திரைப்படம் மற்றும் டி.வி. தொடர் தயாரிப்பாளர் கில்டில் 2008ம் ஆண்டு பதிவு செய்தேன்.

இந்த தமிழாக்கம் செய்யப்பட்ட ஜில்லா படத்தை திரையரங்குகளில் வெளியிட தணிக்கை சான்றிதழை 28.5.2008 அன்று பெற்றுள்ளேன். இதன்பின்னர் இந்த படத்தை வெளியிட தகுந்த நேரத்தை பார்த்து காத்திருந்தேன்.

இந்த நிலையில் நடிகர் விஜய் நடித்துள்ள ஜில்லா என்ற பெயரில் தயாரிக்கப்பட்ட படம் வருகிற 10ம் திகதி வெளியாகப் போவதாக பத்திரிகையில் விளம்பரம் வெளியாகியுள்ளது. எனவே விஜய் நடித்துள்ள ஜில்லா என்ற பெயரில் படத்தை வெளியிட தடை விதிக்கவேண்டும் என்று அதில் கூறப்பட்டுள்ளது.

இந்த வழக்கு நேற்று முன்தினம் விசாரணைக்கு வந்தது. அப்போது நீதிமன்ற உத்தரவின்படி, எதிர்மனுதாரரான ஜில்லா படத்தின் தயாரிப்பாளர் சூப்பர் குட்ஸ் பிலிம்ஸ் நிறுவனம் உள்ளிட்ட பலருக்கு நோட்டீஸ் அனுப்பப்பட்டது. இந்த வழக்கு இன்று (வியாழக்கிழமை) மீண்டும் விசாரணைக்கு வருகிறது.

விஜய், காஜல் அகர்வால் ஜோடியாக நடித்த ஜில்லா படம் நாளை 10ம் திகதி ரிலீசாகிறது. இப்படத்தை நேசன் இயக்கியுள்ளார். சூப்பர் குட்பிலிம்ஸ் சார்பில் ஆர்.பி. சவுத்ரி தயாரித்துள்ளார். தணிக்கை குழுவினர் ஜில்லாவுக்கு யு சான்றிதழ் அளித்துள்ளனர்.

டிக்கெட் முன்பதிவு துவங்கியுள்ளது. உலகம் முழுவதும் 1200 திரையங்குகளில் ஜில்லா படம் திரையிடப்பட உள்ளது என்று ஆர்.பி.சவுத்ரி கூறினார்.

கேரளாவில் வெளியாகும் உரிமையை மோகன்லால் வாங்கி இருப்பதாகவும், கேரளா முழுவதும் 300 திரையங்குகளில் வெளியிடுகிறார் என்றும் அவர் தெரிவித்தார். மேலும் ஆர்.பி.சவுத்ரி கூறும் போது விஜய்யை வைத்து எங்கள் நிறுவனம் தயாரிக்கும் 6வது படம் இது. விஜய் தற்போது மாஸ் ஹீரோவாக உள்ளார். அதற்கேற்ப இப்படத்தின் திரைக்கதை உருவாக்கப்பட்டு உள்ளது.

அதிக பொருட் செலவில் தயாரிக்கப்பட்டு உள்ளது. பெரிய வெற்றி பெறும் என்றும் கூறினார். இயக்குனர் நேசன் கூறும் போது விஜய் மோகன்லால் என இரு பெரிய ஹீரோக்களை வைத்து இயக்கியுள்ளேன். விஜய் என்னை புதுமுக இயக்குனராக நடத்த வில்லை. முழு சுதந்திரம் கொடுத்தார். விஜய் வற்புறுத்தல் பேரில் படத்தின் டைட்டிலில் மோகன்லால் பெயரை முதலில் போட்டுள்ளோம். மதுரை பின்னணி கதையம்சத்தில் தயாராகியுள்ளது. தந்தை மகன் உறவை சித்தரிப்பதாக இருக்கும் என்றார்.