சூர்யா – லிங்குசாமி இணையும் படத்தின் படப்பிடிப்பு துவங்கியுள்ளது.

சிங்கம் 2வின் பிரம்மாண்ட வெற்றிக்குப் பிறகு சூர்யா, லிங்குசாமி கூட்டணியில் இணைந்துள்ளார். இப்படத்தில் சூர்யாவுக்கு ஜோடியாக சமந்தா நடிக்கவுள்ளார்.

இவர்களுடன் வித்யூத் ஜாம்வால், மனோஜ் பாஜ்பாய், ராஜ்பால் யாதவ் முக்கிய வேடத்தில் நடிக்கவுள்ளனர். யுவன் ஷங்கர் ராஜா இசையமைக்கும் இப்படத்திற்கு சந்தோஷ் சிவன் ஒளிப்பதிவு செய்கிறார்.

இன்னும் பெயரிடப்படாத இப்படத்தின் படப்பிடிப்பு, இன்று மும்பையில் தொடங்கி தொடர்ந்து 20 நாட்கள் நடைபெறவுள்ளது.

இயக்குனர் லிங்குசாமி இப்படத்தை மூன்று செட்யூளில் முடிக்க திட்டமிட்டுள்ளார். திருப்பதி பிரதர்ஸ் பிலிம் மீடியா சார்பில் லிங்குசாமி தயாரிக்கும் இப்படத்தின் 80 சதவீத படப்பிடிப்பை மும்பையிலும், ஹைத்ராபாத்தில் 20 சதவீதமும் காட்சிப்படுத்தவுள்ளனர்.

இப்படத்திற்கு உலகிலையே முதன் முறையாக ரெட் டிராகன் டிஜிட்டல் கமெராவை சந்தோஷ் சிவன் பயன்படுத்தப்போவது குறிப்பிடத்தக்கது.

மும்பையில் ரொம்ப கவனமாக இருக்க வேண்டும் என்று தன் மகளுக்கு அறிவுரை கூறியுள்ளாராம் கமலஹாசன்.

நேற்று முன்தினம் கமல் ஹாசனின் மூத்த மகளும், பிரபல நடிகையுமான ஸ்ருதி ஹாஸன் அவரது மும்பை வீட்டில் மர்ம நபரால் தாக்கப்பட்டார்.

சட்டென்று சுதாரித்துக் கொண்டதால், பெரிய அசம்பாவிதத்தை தவிர்த்தார்.

இந்த சம்பவம் பாலிவுட்டையே அதிர வைத்துள்ளது. மேலும் சக நடிகர், நடிகைகள் இதுகுறித்து அதிர்ச்சி தெரிவித்துள்ளார்.

ஸ்ருதியின் தந்தை கமல்ஹாசன் நேற்று முன்தினம் மகளுடன் தொலைபேசியில் தொடர்பு கொண்டு நடந்த சம்பவம் குறித்து விசாரித்துள்ளார்.

கோவாவில் நடக்கும் சர்வதேச திரைப்பட விழாவில் பங்கேற்க வந்த அவர் இதுகுறித்து கூறுகையில், நேற்று ஸ்ருதியுடன் பேசினேன். அவர் இப்போது மும்பையில் நலமாக உள்ளார் அவருக்கு நான் சொன்னதெல்லாம், இது மும்பை, நாமதான் ரொம்ப கவனமா இருக்கணும், இன்னும் ரொம்ப விழிப்போட இருக்கச் சொன்னேன் என்று கூறியுள்ளார்.

மும்பையில் தங்கி படப்பிடிப்புகளில் கலந்து கொண்டுவந்த சுருதிஹாசன் தற்போது புறநகர்ப்பகுதியான பந்த்ராவில் ஒரு அடுக்குமாடி குடியிருப்பில் புதிதாக வீடு வாங்கி குடியேறினார்.

அங்கு அவர் தனியாக வசித்து வந்தார். நேற்று முன்தினம் காலை 9.30 மணிக்கு சுருதிஹாசன் வீட்டில் இருந்த போது காலிங்பெல் ஒலிக்கும் சத்தம் கேட்டது. சுருதி கதவை திறந்து யார் என்று விசாரிப்பதற்குள் 27 வயது மதிக்கத்தக்க மர்ம மனிதன் ஒருவர் வீட்டுக்குள் புகுந்தான்.

திடீர் என்று சுருதி கழுத்தைப் பிடித்து தாக்கினான். உடனே சுதாரித்துக் கொண்ட சுருதி அவனை வெளியே தள்ளி கதவை சாத்தினார். இதற்கிடையே சத்தம் கேட்டு காவலாளி வந்து விட்டதால் மர்ம மனிதன் தப்பி ஓடிவிட்டான்.

அந்த மர்ம மனிதன் சுருதியின் தீவிர ரசிகர் என்று தெரிய வந்துள்ளது. சுருதியை கடந்த ஒரு வருடமாகவே கண்காணித்து வந்துள்ளார். டுவிட்டர் இணைய தளத்திலும் அடிக்கடி தொடர்பு கொண்டு இருக்கிறான். சுருதியை சந்திக்கும ஆவலில் படப்பிடிப்பு தளங்களில் சுற்றி வந்தான்.

பிரபுதேவா டைரக்ஷனில் ராமய்யா வஸ்தாவய்யா படத்தில் சுருதி நடித்தபோது ஒரு ரசிகர் சுருதியை நெருங்கியபோது படப்பிடிப்பு குழுவினர் அவனை விரட்டி அனுப்பினர். அவன்தான் நேற்று முன்தினம் வீட்டுக்கு சந்திக்க வந்து இருக்கிறான். ஆனால் அவனை சுருதி இதற்கு முன் பார்த்ததில்லை. இதனால் அதிர்ச்சி அடைந்த சுருதி இந்த சம்பவம் பற்றி பந்த்ரா போலீசில் நேற்று புகார் செய்தார்.

போலீசார் வழக்குப்பதிவு செய்து மர்ம மனிதனை தேடிவருகிறார்கள். சுருதியை சந்திக்கும் ஆவலில் வந்தானா? அல்லது முன் விரோதமா? யாராவது அவனை ஏவி விட்டார்களா என்ற கோணத்தில் விசாரணை நடக்கிறது.

சுருதி அடுத்ததாக ‘வெல்கம் பேக்’ என்ற இந்திப் படத்தில் நடிக்க ஒப்பந்தமாகி உள்ளார். இதன் படப்பிடிப்பில் சுருதிக்கு தனியாக மெய்க்காப்பாரை நியமிக்க முடிவு செய்யப்பட்டுள்ளது. சுருதி தற்போது தோழி வீட்டில் தங்கி உள்ளார். அதிர்ச்சியில் இருந்து மீண்டதும் வீடு திரும்புகிறார். வீட்டுக்கு தனியாக காவலாளியை நியமித்து பாதுகாப்பு போடவும் முடிவு செய்துள்ளார்.

அமிதாப்பச்சனுடன் இணைந்து இந்திப் படமொன்றில் நடிக்கிறார் தனுஷ். இப்படத்தை பால்கி இயக்குகிறார். இளையராஜா இசையமைக்கிறார்.

ஏற்கனவே ‘ராஞ்சனா’ படம் மூலம் இந்தியில் அறிமுகமான தனுசுக்கு இது இரண்டாவது படம். அமிதாப்பச்சனுக்கு இதில் முக்கிய வேடமாம். தனுஷ் தற்போது ‘வேலை இல்லா பட்டதாரி’, ‘அநேகன்’ ஆகிய இரு தமிழ் படங்களில் நடிக்கிறார். இந்த படங்களை முடித்து விட்டு இந்திக்கு போகிறார்.

தனுஷ் ஜோடியாக நடிக்க கமலஹாசனின் இரண்டாவது மகள் அக்ஷரா பெயர் அடிப்படுகிறது. இதுகுறித்து தனுஷ் கூறும் போது, இந்தியில் அடுத்து பால்கி இயக்கும் படத்தில் நடிக்கிறேன். இதில் அமிதாப்பச்சனுடன் இணைந்து நடிப்பது பெருமையாகவும் மகிழ்ச்சியாகவும் இருக்கிறது. இளையராஜா இசையமைப்பது மேலும் சந்தோஷத்தை கொடுக்கிறது என்றார்.

தமிழில் நடிகர் பரத் கடைசியாக நடித்து வெளிவந்த படம் ‘555’. இப்படத்தை சசி இயக்கியிருந்தார். இப்படத்திற்காக சிக்ஸ் பேக் உடற்கட்டு வைத்த நடிகர் பரத்துக்கு, அது இந்தி படவாய்ப்பைப் பெற்றுக் கொடுத்தது.

தற்போது இந்தியில் ‘ஜாக்பாட்’ என்ற படத்தில் நடித்து வருகிறார். இப்படத்தில் சன்னி லியோன், நஸ்ருதின் ஷா ஆகியோருடன் பாண்டிச்சேரி இளைஞனாக நடித்து வருகிறார். இப்படத்தைத் தவிர மலையாளத்தில் ‘கூதாரா’ என்ற படத்திலும் நடித்து வருகிறார்.

இந்நிலையில், இயக்குனர் ஏ.ஆர்.முருகதாஸிடம் அசோசியேட் இயக்குனராக பணியாற்றிய ஆர்.செந்தில்குமார் என்பவர் இயக்கும் புதிய படத்தில் நடிகர் பரத் நடிக்கிறார். இது பரத்துக்கு 25-வது படமாகும்.

இந்த படத்தில் இவருக்கு ஜோடியாக முன்னணி கதாநாயகி ஒருவர் நடிக்கவிருக்கிறார். மேலும், இப்படத்தில் சத்யராஜ் முக்கிய கதாபாத்திரத்தில் நடிக்கவிருக்கிறாராம். இப்படத்திற்கு இன்னும் பெயர் வைக்கப்படவில்லை.