கிளிநொச்சி இரணைமடு குளத்தில் இருந்து யாழ்ப்பாணத்திற்கு குடிநீர் வழங்கும் திட்டத்தில் கிளிநொச்சி மாவட்ட விவசாயிகளின் நலன்கள் குறித்தும் கவனம் செலுத்தப்படாவிட்டால் யாழ்ப்பாணத்திற்குக் குடிநீர் வழங்குவதற்கான ஒப்பந்தத்தில் கையெழுத்திடப் போவதில்லை என்று விவசாயிகள் தரப்பில் தெரிவிக்கப்பட்டுள்ளது.

விவசாயிகளின் உடன்பாடு இல்லாத காரணத்தினால் இந்தக் குடிநீர் வழங்கும் திட்டத்திற்கான நிதியைப் பெறுவதில் சிக்கல் ஏற்படுகின்ற நிலை உருவாகியிருப்பதாகவும் தெரிவிக்கப்பட்டுள்ளது.

இந்த நிலையில் கிளிநொச்சியில் சனிக்கிழமையன்று நடைபெற்ற முக்கிய கூட்டம் ஒன்றில் அந்த மாவட்டத்தைச் சேர்ந்த விவசாயிகளும் ஊர் முக்கியஸ்தர்களும் இரணைமடுக் குளத்தின் கிளிநொச்சி – யாழ்ப்பாணம் குடிநீர் விநியோகத் திட்டத்தில் தமக்கு ஏற்படவுள்ள பாதிப்புக்கள் மற்றும் சந்தேகங்கள் குறித்து வட மாகாண முதலமைச்சர் மற்றும் அமைச்சர்கள், முக்கியஸ்தர்களிடம் எடுத்துக் கூறியிருக்கின்றார்கள்.

இந்தக் குடிநீர்த் திட்டத்திற்கான ஆசிய அபிவிருத்தி வங்கியின் ஆலோசனை அதிகாரி எஸ்.எம்.குரூஸ் மற்றும் இந்தத் திட்டத்தின் கீழ் இரணைமடுக் குளத்தின் புனர்நிர்மாணப் பணிகளுக்குப் பொறுப்பான பொறியியலாளர் பாலசிங்கம் ஆகியோரும் கலந்து கொண்டனர்.

விவசாய அமைப்புக்களின் முக்கியஸ்தர்கள் பலரும் இந்தத் திட்டத்தினால் ஏற்படப்போகின்ற விவசாயச் செய்கைக்கான பாதிப்பு, கிளிநொச்சி மாவட்டத்தின் குடிநீர்த்தேவை உள்ளிட்ட பல்வேறு விடயங்களையும், இந்தக் குடிநீர்த் திட்டம் தொடர்பிலான ஒப்பந்தத்தில் விவசாயிகளைப் பாதிக்கத்தக்க வகையில் தெரிவிக்கப்பட்டுள்ளதாக அவர்கள் கருதும் விடயங்களையும் சுட்டிக்காட்டி, இந்த சிக்கல்களுக்கு வடமாகாண சபை நல்லதொரு தீர்வைக்காண நடவடிக்கை எடுக்க வேண்டும் என்று கேட்டுக்கொண்டனர்.

குடிநீர்த்திட்டம் தொடர்பான விபரங்கள் இதுவரையில் நடைபெற்றுள்ள வேலைகளின் நிலைமைகள் குறித்து அதிகாரிகள் எடுத்துக் கூறினர். இதனையடுத்து, இந்த விடயம் குறித்து வடமாகாண சபை செயற்படத் தொடங்கியதும் உடனடியாகக் கவனம் செலுத்தி நடவடிக்கை எடுக்கப்படும் என்று வடமாகாண முதலமைச்சர் சி.வி.விக்னேஸ்வரன் மற்றும் மாகாண விவசாய அமைச்சர் ஐங்கரநேசன் ஆகியோர் உறுதியளித்துள்ளனர்.

-பிபிசி தமிழ்-

வடக்கும், கிழக்கும் இணைந்து செயற்பட விரும்பினால் யாரும் எதிர்ப்புத் தெரிவிக்க முடியாது. கெஹலிய என்ன சொன்னாலும் இரு மாகாண சபைகளும் இணைய விரும்பினால் இணைத்துத்தான் ஆக வேண்டும் என்று வடக்கு மாகாண முதலமைச்சர் சீ.வி.விக்னேஸ்வரன் தெரிவித்தார்.

வலி.மேற்குப் பிரதேச சபையின் கட்டடத் திறப்பு விழாவில் பிரதம விருந்தினராகக் கலந்து கொண்டு உரையாற்றுகையிலேயே அவர் இவ்வாறு கூறினார். அங்கு அவர் மேலும் தெரிவித்ததாவது..

முழு நாட்டையும் நாடாளுமன்றம் நிர்வகிக்கும் போது நாடாளுமன்றத்தில் பெரும்பான்மையானோர் ஒரு குறிப்பிட்ட இனத்தையும் மதத்தையும் மொழியையும் கொண்டவர்களாக இருந்து மற்றைய இனங்களை, மதங்களை, மொழிகளை அசட்டை செய்யும் விதமாக நடந்து கொண்டதாலேயே அதிகாரங்கள் மத்திய அரசிடமிருந்து பிரிக்கப்பட்டு சிறிய அலகுகளுக்கு வழங்கப்பட வேண்டும் என்ற கோ­சம் எழுந்தது.

அந்த வகையில் 1980 ஆம் ஆண்டுக்கு முன்னர் உள்ளூர் அதிகார சபைகள் மத்திய அரசின் முகவர்கள் போலத்தான் செயற்பட்டு வந்தன. பங்குதாரர்களாக அல்ல. 1980 ஆம் ஆண்டின் 35 ஆம் இலக்கச் சட்டத்தால் அபிவிருத்திச் சபைகள் கொண்டுவரப்பட்டன.

இவை மாவட்ட மட்டத்தில் அதிகாரப் பகிர்வை ஏற்படுத்துவதாக அமைந்துள்ளது. ஆனால் போதுமானதாக அந்தப் பகிர்வு அமையவில்லை. 1987 ஆம் ஆண்டின் 15 ஆம் இலக்கப் பிரதேச சபைகள் சட்டம் ஓரளவு அதிகாரப் பகிர்வை பிரதேச மட்டத்தில் மக்களுக்கு அளிக்க முன்வந்தது.

இதன் பின்னர் தான் 1987 ஆம் ஆண்டின் 42 ஆம் இலக்க மாகாண சபைகள் சட்டமானது 13 ஆவது திருத்தத்துடன் கொண்டு வரப்பட்டது. கொண்டு வரப்பட்ட வடக்கு – கிழக்கு மாகாண சபைகள், சட்டத்தால் பிரிக்கப்பட்டுள்ளன. ஆனால் வடக்கு மாகாண சபையும், கிழக்கு மாகாண சபையும் சேர்ந்து இணங்கி இயங்க முற்பட்டால் எவரும் எதிர்ப்புத் தெரிவிக்க முடியாது.

இது தொடர்பில் அமைச்சர் கெஹலிய அப்படி எதுவுமே செய்ய முடியாது என்று கூறியுள்ளார். இது சட்டம் சம்பந்தமான விடயம். அதை அவர் ஏதோ தான் நினைத்தது சரியயன்று சொல்லியிருக்கிறார்.

முழு நாட்டையும் நாடாளுமன்றம் தனது எண்ணத்துக்கேற்ப நிர்வகித்த காலம் போய் மாகாண சபைகள் மாகாண மட்டத்தில் நிர்வகிப்பதையும் பிரதேச சபைகள் பிரதேச மட்டத்தில் நிர்வகிப்பதையும் அறிமுகப்படுத்தினர்.

இது மற்றைய மாகாணங்களுக்குத் தேவைப்படாமல் இருந்தபோதும் தமிழ் பேசும் மக்களுக்கு நாம் எதனையும் அதிகபடியாக வழங்கவில்லை என்று ஒரு கருத்தை அரசியல் ரீதியாகச் சிங்கள மக்களுக்கும் எடுத்துரைக்கும் வண்ணமாக மாகாண சபைகள் என்பது மாகாணங்களுக்கும் ஏற்புடையதாக்கப்பட்டன.

ஒன்றுபட்ட நாட்டினுள் அதிகாரப் பகிர்வு என்று கூறும் போது மத்திய அரசு தானாக முன்வந்து போதிய அதிகாரப் பகிர்வை பிரதேசங்களுக்கும் கொடுக்க முன்வந்தாலன்றி, ஒன்று மற்றொன்றின் செயற்பாடுகளில் சதா காலமும் குறுக்கீடு செய்து கொண்டேயிருக்கும்.

இதனால்தான் நாங்கள் சமஷ்டி முறையிலான அதிகாரப் பகிர்வைக் கோரி நிற்கின்றோம். எமது இளைஞர்கள் ஆயுதமெடுத்து, பிரித்துக் கொடுங்கள் என்று கேட்டுப் பிரிவினை பெறப்படாமல் ஆயுதங்கள் மெளனிக்கப்பட்ட நிலையில் தான் மீண்டும் சமஷ்டி அலகைத் தமிழ் மக்கள் தமது தேர்தல் ஊடாக வழங்கக் கோரியுள்ளார்கள் என்றார்.

நாட்டின் பல பாகங்களில் இன்றும் மழையுடன் கூடிய காலநிலை நிலவும் என வானிலை அவதான நிலையம் எதிர்வு கூறியுள்ளது.

இலங்கையைச் சுற்றியுள்ள கடற்பரப்புக்களிலும் மழையுடன் கூடிய காலநிலை நிலவும் அதேவேளை பலமான காற்றும் வீசும் என வானிலை அவதான நிலையம் தெரிவித்துள்ளது.

காலநிலை தொடர்பில் மக்கள் அவதானமாக இருக்கும் அதேவேளை கடலுக்குச் செல்வோர் எச்சரிக்கையாக செயற்படுமாறும் அந்நிலையம் கேட்டுக் கொண்டுள்ளது.