தரம் ஐந்து புலமைப் பரிசில் பரீட்சையில் வடக்கிற்கு சிறந்த பெறுபேறுகள் கிட்டியுள்ளன.

பரீட்சையில் சித்தியடைந்தோர் எண்ணிக்கை ஒப்பீட்டளவில் ஏனைய மாகாணங்களை விடவும் வடக்கில் அதிகமாகும் எனத் தெரிவிக்கப்படுகிறது.

கடந்த ஆண்டில் புலமைப் பரிசில் பரீட்சையில் 56.05 வீதமானவர்கள் சித்தியடைந்துள்ளனர். இந்த அண்டில் அந்த எண்ணிக்கை 62.62 வீதமாக உயர்வடைந்தள்ளது.

இதன்படி வடக்கில் கடந்த ஆண்டைவிடவும் 6.57 வீதமான மாணவர்கள் பரீட்சையில் சித்தியடைந்துள்ளனர். இது ஏனைய மாகாணங்களை விடவும் சிறந்த பெறுபேறாகும்.

ஊவா மாகாணத்தில் புலமைப் பரிசில் பரீட்சையில் சித்தியடைந்தோர் வீதம் 6.10 வீதத்தினால் உயர்வடைந்துள்ளது.

மூன்றாவது இடத்தை தென் மாகாணம் பெற்றுக் கொண்டுள்ளது.
கடந்த ஆண்டை விடவும் இந்த ஆண்டில் 5.66 வீதமான மாணவர்கள் பரீட்சையில் சித்தியடைந்துள்ளனர்.

சரிநிகர் பத்திரிகையில் தனது ஊடக பணியை ஆரம்பித்து, பின்னர் தினக்குரல் பத்திரிகையில் நீண்ட காலம் பணியாற்றிய ஊடகவியளாளரான ஆரையம்பதி பரமகுட்டி மகேந்திரராஜா என்ற ரவிவர்மன் நேற்று காலமானார்.

ரவிவர்மன் கலைத்துவமான பல படைப்புகளையும், செய்தி ஆக்கங்களையும், கட்டுரைகளையும் தந்த நல்லதொரு படைப்பாளியாவார்.

1980களின் நடுப்பகுதியில் தமிழீழ மக்கள் விடுதலைக்கழத்தில் (புளொட்), மது என்ற பெயரில் உறுப்பினராக இருந்த ரவிவர்மன் பின்நாளில் ஊடகத் துறையில் தன்னை இணைத்துக்கொண்டார்.

அன்னாரது பூதவுடல் இன்று மாலை 6.00 மணி வரை கொழும்பில் அவரது இல்லத்தில் வைக்கப்பட்டு பின் அவரது பிறப்பிடமான ஆரையம்பதிக்கு கொண்டு செல்லப்படும் என தெரிவிக்கப்பட்டுள்ளது.

இதேவேளை தினக்குரல் பத்திரிகையின் ஊடகவியலாளர் அமரர் ரவிவர்மாவுக்கு புளொட் அமைப்பு தனது அஞ்சலி தெரிவித்துள்ளது. அவ் அமைப்பு விடுத்துள்ள ஊடக அறிக்கையில் குறிப்பிடப்பட்டுள்ளதாவது,

தினக்குரல் பத்திரிகையின் பிரபல ஊடகவியலாளர் ரவிவர்மன் என்கின்ற பரமகுட்டி மகேந்திரராஜா மரணமடைந்த செய்தி எம்மையெல்லாம் பெருந்துயரில் ஆழ்த்தியுள்ளது.

கடந்த 1980களில் புளொட் அமைப்பில் தன்னை இணைத்துக்கொண்ட ரவிவர்மன் கழக ஊடகங்களின் வாயிலாகவும், புத்தகங்கள் வடிவிலும் தனது எழுத்தாற்றலை வெளிப்படுத்தி வந்தார். பின்னர் கழகத்திலிருந்து விலகி பத்திரிகைத் துறையில் தன்மை முழுமையாக ஈடுபடுத்திக் கொண்டார்.

ரவிவர்மாவுக்கு தனது இளம்வயதில் இயல்பிலேயே வாய்த்த அறிந்துகொள்ளும் ஆர்வமும், எழுத்தாற்றலும், சிநேகமனப்பாங்கும் அவரை ஒரு தேர்ந்த செய்தியாளராக உருவாக்கியிருந்தது.

ரவிவர்மா சமூக அக்கறையுடனும், பொறுப்போடும் பக்கச் சார்பின்றி நேர்மையாக துணிந்து நின்று செய்திகளையும், கட்டுரைகள் மற்றும் ஆக்கங்களையும் மக்களுக்கு வழங்கிவந்த ஒரு நீண்டகால பத்திரிகையாளராவார்.

ஒரு செய்தியாளராக இருந்து தமிழ் மக்களுடைய அவலங்களையும், அவர்களின் அன்றாட பிரச்சினைகளையும் வெளிக்கொணர்வதில் முழு மூச்சோடு பணியாற்றிவந்தவர்களில் ரவிவர்மனின் பங்கு அளப்பரியது.

யுத்த காலத்தில் பிரத்தியேகமாக தமிழ் மக்களின் உணர்வுகளை பிரதிபலிக்கும் விடயங்களை பல்வேறு நெருக்கடிகள் மத்தியிலும் அஞ்சாது செய்திகளாகவும் கட்டுரையாகவும் திறம்பட வெளிப்படுத்துவதில் ரவிவர்மா அயராது பாடுபட்டவர்.

தாம் சார்ந்திருந்த மற்றும் சாராத அரசியல் கட்சிகளுடன் மாத்திரமன்றி சகல தரப்பினரோடும் ஒரு அந்நியோன்ய உறவினைப் பேணிவந்த ரவிவர்மா சகலருடனும் மிகப் பண்பாகவும், இனிமையாகவும் பழகும் நற்குணம் வாய்ந்தவர்.

கடந்த சில நாட்களாக சுகவீனமுற்று கொழும்பு தேசிய வைத்தியசாலையில் சிகிச்சைபெற்றுவந்த நிலையில் அவர் நேற்றிரவு மரணமடைந்துள்ளார். அன்னாரின் இழப்பானது பத்திரிகைத் துறைக்கு மாத்திரமல்லாது தமிழ் சமூகத்திற்கும் ஓர் பேரிழப்பாகும்.

அன்னாரின் பிரிவால் துயருற்றிருக்கம் அன்னாரின் துணைவியார், மகன்மார், உறவினர்கள், நண்பர்கள் அனைவருடனும் தமிழீழ மக்கள் விடுதலைக் கழகத்தினராகிய நாமும் இப்பெருந் துயரினைப் பகிர்ந்து கொள்வதோடு, அன்னாருக்கு எமது அஞ்சலிகளையும் செலுத்துகின்றோம் என அவ் அறிக்கையில் மேலும் குறிப்பிடப்பட்டுள்ளது.

வடமாகாண சபையின் உறுப்பினர்கள் ஜனாதிபதியின் முன்பாக சத்தியப் பிரமாணம் செய்வதை, வாக்களித்த மக்கள் விருப்பவில்லை என கூட்டமைப்பின் சார்பில் மாகாணசபைத் தேர்தலில் போட்டியிட்ட சித்தார்த்தன் தெரிவித்துள்ளார்.

இலங்கை ஜனாதிபதியின் முன்பாக சத்தியப் பிரமாணம் செய்வது தொடர்பாக கட்சிக்குள் இரு வேறு வகையான கருத்துக்கள் இருந்தாலும், வடமாகாண மக்களில் பெரும்பாலானோர் அரசுக்கு எதிராகவே வாக்களித்திருக்கிறார்கள் என்பதால் ஜனாதிபதியின் முன்பாக சத்தியப் பிரமாணம் செய்யக் கூடாது என்ற கருத்துக்கே ஆதரவு அதிகமாக இருப்பதாகவும், தாமும் அதனையே ஆதரிப்பதாகவும் சித்தார்த்தன் கூறியுள்ளார் .

ஆனாலும் சுமூகமான ஆரம்பத்தை நோக்கியதாக தமிழ் தேசியக் கூட்டமைப்பின் செயற்பாடு இருக்க வேண்டும் என்று சர்வதேச சமூகமும் ஏனைய பலரும் கேட்டிருப்பதாக இரா. சம்பந்தன் அவர்கள் கூறியிருப்பதாகவும் அவர் குறிப்பிட்டார்.

இந்த விடயத்தை மக்கள் உணர்வுபூர்வமாகப் பார்ப்பதால், கட்சிகளும் அதனையே பிரதிபலிப்பதாகவும் அவர் குறிப்பிட்டார்.

இந்த நிலையில் தாங்கள் சிங்கள அரசிடம் சரணாகதி அடைந்து விட்டோம் என்ற கருத்து மக்கள் மனதில் ஏற்பட்டுவிடும் என்பதுதான் தமது கவலை என்றும் அவர் குறிப்பிட்டார்.

கொழும்பு தேசிய வைத்தியசாலையில் சேவையாற்று மருத்துவராக காட்டிக் கொண்டு அவுஸ்திரேலியாவுக்கு அனுப்பி வைப்பதாக கூறி லட்சக்கணக்கில் பணத்தை பெற்று மோசடி செய்த மருத்துவ மாணவி ஒருவரை கொஹூவல பொலிஸார் கைதுசெய்துள்ளனர்.

கொள்ளுப்பிட்டியில் உள்ள அமெரிக்க கல்லூரி ஒன்றில் பயின்று வரும் இந்த மருத்துவ மாணவி மோசடி செய்த பணத்தை வைப்புச் செய்திருந்த வங்கியின் கணக்கு புத்தத்தை வைத்திருந்த பேராசிரியர் ஒருவரை கைதுசெய்வதற்கான விசாரணைகள் ஆரம்பிக்கப்பட்டுள்ளதாக பொலிஸார் தெரிவித்தனர்.

மருத்துவராக வேண்டும் என்பதற்காக தன்னை மருத்துவராக இனங்காட்டி இந்த பண மோசடியில் ஈடுபட்டதாக மாணவி பொலிஸாரிடம் கூறியுள்ளார்.

கற்பதற்கு தேவையான புத்தகங்களை எடுப்பதற்காக இரவு நேரத்தில் கொழும்பு மருத்துவக்கல்லூரிக்குள் சென்று வந்துள்ளதாகவும் விசாரணைகளில் தெரியவந்துள்ளது.

கொழும்பு தேசிய வைத்தியசாலைக்குள் சென்று மருத்துவர்களின் டெத்தஸ்கோப் மற்றும் ஆடைகளை அணிந்து தன்னை மருத்துவர் போல் இனங்காட்டிக் கொண்ட இந்த மாணவி மாத்தறை சேர்ந்த பெண்ணொருவரிடம் 22 லட்சத்து 50 ஆயிரம் ரூபாவையும் கொஹூவல பிரதேசத்தை சேர்ந்த பெண்ணொருவரிடம் இரண்டு லட்சம் ரூபாவையும் பெற்றுள்ளார்.

இவர்களை அவுஸ்திரேலியாவுக்கு அனுப்பி வைப்பதாக கூறியே இவர் அந்த பணத்தை பெற்றுள்ளதாக பொலிஸார் குறிப்பிட்டனர்.

தொலைக்காட்சிப் பெட்டி விழுந்து உடல் நசுங்கி குழந்தை ஒன்று பலியாகியுள்ளதாக கல்கமுவ பொலிஸார் தெரிவித்தனர்.
இந்த சம்பவம் கல்கமுவ நான்னேரிய – அக்கரவத்தை என்ற பிரதேசத்தில் நேற்று இடம்பெற்றுள்ளது.

வீட்டில் இரும்பினால் செய்யப்பட்டிருந்த மேசையில் வைக்கப்பட்டிருந்த தொலைக்காட்சிப் பெட்டி சாய்ந்து குழந்தையின் மேல் விழுந்துள்ளது.

இந்த சம்பவத்தில் படுகாயமடைந்த குழந்தை வைத்தியசாலையில் அனுமதிக்கப்பட்ட பின்னர் உயிரிழந்துள்ளது.

மூன்று வயதும் நான்கு மாதங்களுமான ஆண் குழந்தையே சம்பவத்தில் உயிரிழந்துள்ளதாக பொலிஸார் குறிப்பிட்டனர்.