எகிப்தில் ஒரு அரசியல் அமைதியீனம் தொடருகின்ற போதிலும் அந்த நாட்டுக்கு எஃப்-16 ரக போர் விமானங்களை வழங்குவதற்கான திட்டத்தை அமெரிக்கா தொடரும் என்று மூத்த அமெரிக்க அதிகாரி ஒருவர் தெரிவித்துள்ளார்.

அதேவேளை, கடந்த வாரம் இராணுவத்தால் எகிப்திய அதிபர் முஹமட் மோர்சி அவர்கள் பதவியில் இருந்து நீக்கப்பட்ட விவகாரம் குறித்து அமெரிக்கா தொடர்ந்தும் ஆராய்ந்து வரும்.

இஸ்லாமியவாதத் தலைவரான மோர்சி நீக்கப்பட்டது ஒரு இராணுவ சதிப் புரட்சி என்ற முடிவுக்கு அமெரிக்கா வருமானால், எகிப்துக்கான அமெரிக்காவின் பாரிய இராணுவ உதவிகள் சட்டத்தின் அடிப்படையில் வெட்டுக்கு உள்ளாகும்.

மோர்சியை மீண்டும் அதிபராக நியமிக்க வேண்டும் என்று அவரது முஸ்லிம் சகோதரத்துவக் கட்சி போராடி வருகின்றது.

அவர் தடுத்து வைக்கப்பட்டிருப்பதாக நம்பப்படும் கெய்ரோவில் உள்ள இராணுவ குடியிருப்பு பகுதியில் அந்தக் கட்சியின் ஆதரவாளர்கள் போராட்டம் நடத்தி வருகின்றார்கள்.

திங்களன்று இராணுவத்துடன் நடந்த மோதல்களில் 50க்கும் அதிகமான முஸ்லிம் சகோதரத்துவ கட்சியின் உறுப்பினர்கள் கொல்லப்பட்டனர்.

மூளைச்சாவு அடைந்து விட்டதாக கருதப்பட்ட பெண்ணின் உடல் உறுப்புகளை வைத்தியர்கள் எடுக்க முயன்றபோது, அந்த பெண் கண் திறந்து, வைத்தியர்களை அதிர்ச்சியடையச் செய்த சம்பவம் அமெரிக்காவில் நடந்துள்ளது.

இதனால் தவறாக சிகிச்சை அளித்த மருத்துவமனைக்கு அபராதம் விதிக்கப்பட்டது. அமெரிக்காவின் நியூயோர்க் நகரைச் சேர்ந்தவர் 41 வயதான கொல்லின் பேர்ன்ஸ். இவர் கடந்த 2009 ஒக்டோபரில் அதிகளவில் மருந்துகளை சாப்பிட்டதால் நினைவிழந்தார்.

பின்னர் நியூயோர்க்கில் உள்ள சென்ட் ஜோசப் மருத்துவமனையில் பேர்ன்ஸ் அனுமதிக்கப்பட்டார்.
இவருக்கு வைத்தியர்கள் முறையாக சிகிச்சை அளிக்கவில்லை. அவர் சாப்பிட்ட மருந்தால் அவரது வயிறு, குடல் பகுதிகள் பாதிக்காமல் தடுக்க தேவையான நடவடிக்கைகளை மேற்கொள்ளவில்லை.

அவரது வயிற்றில் மருந்து தங்கியுள்ளதா என சோதனையிடவில்லை. மூளை செயல்படுகிறதா என்று ஸ்கேன் பரிசோதனை செய்யவில்லை. ஆனால், நீண்ட நாளாகியும் அவர் நினைவு திரும்பாததால் அவர் மூளைச்சாவு அடைந்து விட்டதாக வைத்தியர்கள் முடிவெடுத்து விட்டனர்.

பேர்ன்ஸ் கிட்டத்தட்ட இறந்து விட்டார் என்று அவரது உறவினர்களிடம் வைத்தியர்கள் கூறவே அவர்களும் பேர்ன்ஸ் உயிரை காப்பாற்ற வைக்கப்பட்டிருந்த உபகரணங்களை அகற்ற சம்மதித்தனர்.

மேலும், அவரது உடல் உறுப்புகளை தானமாக வழங்கவும் ஒப்புக்கொண்டனர். இதையடுத்து பேர்ன்ஸ் உறுப்புகளை எடுக்க வைத்தியர்கள் முடிவு செய்தனர். உடலை வெட்டி உறுப்புகளை எடுப்பதற்கு முன் சில சோதனைகளை மருத்துவ தாதி செய்தபோது அவரது உடலில் அசைவு தெரிந்தது.

சத்திரசிகிச்சை அறைக்கு அழைத்துச் சென்றபோது அவரது உதடு, நாக்கு அசைந்ததை அந்த மருத்துவ தாதி கவனித்துள்ளார்.
ஆனால், தாதி கூறியதை வைத்தியர்கள் ஒரு பொருட்டாகவே மதிக்கவில்லை. அறுவை சிகிச்சைக்கு முன் பேர்ன்ஸ்க்கு நரம்புகளை அமைதிப்படுத்தும் மருந்து ஊசி மூலம் செலுத்தப்பட்டது.

அப்போது யாரும் எதிர்பாராதவிதமாக அவர் திடீரென கண் விழித்தார். அவ்வளவு பேரும் ஆடிப் போய் விட்டனர். இந்த சம்பவம் பெரும் பரபரப்பை ஏற்படுத்தியது. விசாரணையில், சென்ட் ஜோசப் மருத்துவமனையில் தவறான சிகிச்சை அளிக்கப்பட்டது உறுதியானதால் மருத்துவமனைக்கு அபராதம் விதிக்கப்பட்டது.

மேலும் மருத்துவமனையின் தரத்தை உறுதி செய்ய ஆலோசகரை நியமிக்கவும், மூளைச்சாவு அடைந்ததை கண்டுபிடிக்க நரம்பியல் நிபுணர் மூலம் தனது ஊழியர்களுக்கு பயிற்சி அளிக்கவும் அந்த மருத்துவமனைக்கு உத்தரவிடப்பட்டது.

இங்கிலாந்தை சேர்ந்த ஒரு சிறுவன், வருங்காலத்தில் தான் விண்வெளி வீரராக வேண்டுமென்றால் என்ன செய்ய வேண்டுமென நாசா மையத்திற்கு கடிதம் எழுதி அசத்தியுள்ளார்.

7 வயது சிறுவன் டெக்ஸ்டர் இவருக்கு வருங்காலத்தில் விண்வெளி வீரர் ஆகவேண்டு மென்பதுதான் இலட்சியம்.
இது தொடர்பாக இந்த சிறுவன் அண்மையில் அமெரிக்காவின நாசா விண்வெளி ஆராய்ச்சி மையத்திற்கு ஒரு கடிதத்தை எழுதியுள்ளார்.

விண்வெளி வீரராகவேண்டுமென்ற ஆர்வத்தை பாராட்டி நாசா மையம் இந்த சிறுவனின் கடிதத்திற்கு ஒரு பதிலையும் விண்வெளி புகைப்படங்களையும் அனுப்பியுள்ளது.

நாசாவிற்கு எழுதிய கடித்தத்தில், அச்சிறுவன்,

அன்புள்ள நாசா,

எனது பெயர் டெக்ஸ்டர். நீங்கள் செவ்வாய் கிரகத்துக்கு இரண்டு பேரை அனுப்பப் போவதாக அறிந்தேன். எனக்கும் செவ்வாய் கிரகத்துக்கு செல்ல ஆசையாக உள்ளது. ஆனால் எனக்கு ஏழு வயது தான் ஆகிறது.

எனவே, நான் வருங்காலத்தில் விண்வெளிக்கு செல்ல ஆசைப்படுகிறேன். நான் ஒரு விண்வெளி வீரர் ஆக என்ன செய்ய வேண்டும்?”

எனக் கேட்டிருந்தார்.

இதற்கு நாசா, சிறுவனை ஊக்கப்படுத்தும் விதத்தில் பதிலளித்திருந்தது. இது டெக்ஸ்டரை மகிழ்ச்சியில் ஆழ்த்தியுள்ளது.

இதுக்குறித்து தெரிவித்த டெக்ஸ்டரின் தாய் கத்ரினா,

டெக்ஸ்டரின் ஆர்வத்திற்கு நாசாஅளித்துள்ள பதில் மகிழ்ச்சி அளிக்கிறது. அந்த கடிதத்தை பிரித்து படித்ததும் டெக்ஸ்டர் மகிழ்ச்சி அடைந்தான்.

அங்கிருந்து அனுப்பப்பட்ட புகைப்படங்களை தனது அறையில் பத்திரப்படுத்தி வைத்திருக்கிறான் எனக் கூறினார்.

அமெரிக்க ஜனாதிபதி ஒபாமா மற்றும் அவரது மனைவி மிச்சல் ஒபாமாவும் அசிங்கமானவர்கள் என ஒரு நடிகை கூறியுள்ளமை அனைவரையும் அதிர்ச்சிக்குள்ளாக்கியுள்ளது.

ஆனால் அதனை சொன்னவர் யார் என்று சொன்னால், அட அவர் இந்த மாதி‌ரி சொல்லவில்லை என்றால்தான் ஆச்ச‌ரியம் என்பார்கள்.

சில பிரபலங்களுக்கு ஒரு வியாதி அடுத்தவர்களை மட்டம் தட்டி அந்த விளம்பரத்தில் பெயரை தக்க வைத்துக் கொள்வது நடிகை அமண்டா பைன்ஸுக்கு முற்றிய நிலையில் உள்ளது இந்த வியாதி.

கடந்த காலங்களில் சக நடிகைள் பலரையும் இதேபோல் வம்பிழுத்திருக்கிறார். ஒருமுறை அவர் வம்பிழுத்தவ‌ரின் காதலர், போய் கண்ணாடியில் உன் முகத்தை பார்த்துக்கொள் என்று பதிலடி கொடுத்ததும் நடந்திருக்கிறது.

இந்தநிலையில் சமூக வலைதளத்தில் அமண்டா அமெ‌ரிக்க ஜனாதிபதி ஒபாமாவும் அவரது மனைவியும் அசிங்கமானவர்கள் (Ugly) என்ற அர்த்தத்தில் எழுதியிருந்தார்.அவ‌ரின் இந்த அத்துமீறல் கருத்துக்கு கடும் கண்டனங்கள் குவிகின்றன.