கேரளாவில்..

கேரளாவில் இளம்பெண் ஒருவர் பிரியாணி சாப்பிட்டு உயிரிழந்ததாக கூறப்படும் வழக்கில் திடீர் திருப்பமாக அவரது உடற்கூராய்வு முடிவு வெளியாகியுள்ளது. கேரள மாநிலத்தை சேர்ந்தவர் அஞ்சுஸ்ரீ பார்வதி.

வெறும் 20 வயதே ஆகும் இவர், அந்த பகுதியிலுள்ள கல்லூரி ஒன்றில் படித்து வந்தார். இந்த நிலையில் இவர், புத்தாண்டுக்கு முந்தைய தினம் இரவு (டிசம்பர் 31) பிரியாணி சாப்பிட எண்ணியுள்ளார்.

அதன்படி ஆன்லைனில் குழிமந்தி என்ற பிரியாணியையும், சிக்கன் 65-யும் ஆர்டர் செய்துள்ளார். இதனை இவருடன் சேர்ந்து இவரது தங்கை மற்றும் உறவினர்கள் என அனைவரும் உண்டுள்ளனர்.

ஆனால் இதனை சாப்பிட்ட பிறகு அஞ்சுவுக்கு ஒரே வாந்தியாக வந்துள்ளது. இதனால் பதறிப்போன பெற்றோர் அவரை மருத்துவமனையில் அனுமதித்தனர். அங்கு தீவிர சிகிச்சை பெற்று வந்த அஞ்சு, கடந்த 7-ம் தேதி சிகிச்சை பலனின்றி உயிரிழந்தார்.

இது பெரிய சர்ச்சையை ஏற்படுத்திய நிலையில் பாதிக்கப்பட்ட பெண்ணின் குடும்பத்தார் காவல்துறையில் புகார் அளித்தனர். அதன்பேரில் தீவிர விசாரணை மேற்கொண்டனர். தொடர்ந்து பெண்ணின் உடலை கைப்பற்றி உடற்கூறாய்வுக்கும் அனுப்பி வைத்தனர்.

அதோடு இந்த சம்பவம் குறித்து விசாரணை நடத்தி அறிக்கை தாக்கல் செய்ய உணவு பாதுகாப்பு ஆணையருக்கு கேரள சுகாதாரத் துறை அமைச்சர் வீணா ஜார்ஜ் உத்தரவிட்டிருந்தார். தரமற்ற உணவால் கல்லூரி மாணவி உயிரிழந்தது தெரியவந்தால் உணவகத்தின் உரிமம் ரத்து செய்யப்படும் என்றும் அவர் கூறியிருந்தார்.

தொடர்ந்து உணவகத்தில் செய்யப்பட்ட ரெய்டில் ஓட்டலில் எந்தவொரு பிரச்னையும் இல்லை என்று தெரியவந்தது. மேலும் இவர் உணவு வாங்கிய அன்றே சுமார் 120 பேர் ஆன்லைனில் ஆர்டர் செய்து உணவு வாங்கியுள்ளனர். ஆனால் அவர்கள் யாருக்கும் இதுபோன்ற நிகழ்வு ஏற்படவில்லை என்று தெரியவந்தது.

தொடர்ந்து தீவிர விசாரணை மேற்கொள்ளப்பட்டு வந்த நிலையில், தற்போது உயிரிழந்த மாணவியின் உடற்கூறாய்வு அறிக்கை வெளியாகியுள்ளது. அதில் மாணவி, சாப்பிட்டால் இறக்கவில்லை என்றும் அவருக்கு இருந்த மஞ்சள் காமாலை நோயால் அவரது உள் உறுப்புகள் சில பாதிக்கப்பட்டதாகவும், குறிப்பாக கல்லீரல் பதிப்படைந்ததால் அவர் இறந்ததாகவும் தெரியவந்துள்ளது. இதனால் பாதிக்கப்பட்ட பெண்ணின் பெற்றோர் அதிர்ச்சியில் ஆழ்ந்துள்ளனர்.

முன்னதாக கேரளாவிலுள்ள கோட்டயத்தில் இருக்கும் உணவகம் ஒன்றில் அரசு மருத்துவமனை செவிலியர் ஒருவர் மந்தி பிரியாணி வாங்கி சாப்பிட்டு, சிறிது நேரத்திலேயே உயிரிழந்துள்ளது கேரளாவில் பெரும் அதிர்ச்சியை ஏற்படுத்தியது என்பது குறிப்பிடத்தக்கது.

நாமக்கல்லில்..

நாமக்கல் மாவட்டம் பரமத்திவேலூர் ஒலப்பாளையத்தில் வசித்து வருபவர் பிரபாகரன். இவர் தேங்காய் நார் மில் நடத்தி வருகிறார். இந்த மில்லில் பலர் பணிபுரிந்து வருகின்றனர். இதில் பீகாரில் வசித்து வரும் பஞ்சாரம், அவரின் மனைவி மனிஷா தேவி குடும்பமாக பணிபுரிந்து வருகின்றனர்.

இவர்களின் குழந்தை ஒன்றரை வயது தீஷ்குமார். நேற்று மனிஷா தனது குழந்தையை மடியில் வைத்து கொண்டே தேங்காய் நார் மில்லில் மிஷினில் வேலை பார்த்துக் கொண்டிருந்தார்.

திடீரென குழந்தை தாயின் மடியிலிருந்தவாறே ஓடிக்கொண்டிருக்கும் மிஷனின் பெல்ட்டை பிடித்துவிட்டது. இதனால் மிஷினுக்குள் குழந்தை இழுத்து செல்லப்பட்டது. தாயின் கண்ணெதிரே மிஷினில் சிக்கி அரைக்கப்பட்டது .

உடனடியாக மிஷினை நிறுத்திவிட்டு குழந்தையை மீட்டு நாமக்கல் அரசு மருத்துவக்கல்லூரி மருத்துவமனையில் சிகிச்சைக்காக எடுத்து சென்றனர். ஆனால் பரிசோதனை செய்த மருத்துவர்கள் குழந்தை வரும் வழியிலே உயிரிழந்துவிட்டதாக தெரிவித்தனர்.

தாயின் கண்ணெதிரே குழந்தை மிஷினில் சிக்கி உயிரிழந்தது அப்பகுதியில் பெரும் அதிர்ச்சியையும், சோகத்தையும் ஏற்படுத்தியுள்ளது. இச்சம்பவம் குறித்து வழக்கு பதிவு செய்து தீவிர விசாரணை மேற்கொள்ளப்பட்டு வருகிறது.

திருநெல்வேலியில்..

நொடி பொழுதில் நடைப்பெறுகிற சில சம்பவங்கள் வாழ்நாளுக்குமான சோகத்தையும், துயரத்தையும் தேக்கி வைத்திருக்கிறது. கல்லூரியில் படிக்கும் தனது தங்கையைப் பார்க்க ஆசையாசையாக சென்ற அக்காள், பேருந்து சக்கரத்தில், தந்தையின் கண்முன்னே உடல் நசுங்கி உயிரிழந்த சம்பவம் ஆரல்வாய்மொழியில் சோகத்தை ஏற்படுத்தியுள்ளது.

திடீரென ஓட்டுநரின் கட்டுப்பாட்டை இழந்த அரசு பேருந்து, நிலைதடுமாறி, மகராசி மீது மோதி, இழுத்து சென்றதில் பேருந்தின் ஓட்டுநர் ஸ்டீயரிங் மீது மயக்கமடைந்து விழுந்து கிடந்தார்.

திருநெல்வேலி மாவட்டம் மூலக்கரைப்பட்டியைச் சேர்ந்தவர் ஜெயபால். அந்த பகுதியில் கூலி வேலைச் செய்து வரும் ஜெயபாலுக்கு மகராசி(22), செல்வி என இரண்டு மகள்களும் ஒரு மகனும் உள்ளனர்.

பெரிய மகள் மகராசி நாகர்கோவிலில் உள்ள கல்லூரியில் படித்து முடித்த நிலையில், 2வது மகள் செல்வி தற்போது அதே கல்லூரியில் விடுதியில் தங்கியிருந்து படித்து வருகிறார். இந்நிலையில், கல்லூரியில் படிக்கும் செல்வியைப் பார்த்து விட்டு வருவதற்காக நேற்று ஜெயபாலும், மகராசியும் பைக்கில் நாகர்கோவிலுக்குப் புறப்பட்டு சென்றனர்.

இவர்களது இருசக்கர வாகனம், காவல் கிணறு – நாகர்கோவில் தேசிய நெடுஞ்சாலையில், ஆரல்வாய் மொழி பகுதியில் வந்த போது, அந்த பகுதியில் உள்ள டீக்கடை ஒன்றில் சாலையோரமாக இருசக்கர வாகனத்தை நிறுத்தி விட்டு இருவரும் டீ குடித்ததாக கூறப்படுகிறது. அதன்பின்னர், வாகனத்தை எடுக்க இருவரும் நடந்து சென்று கொண்டிருந்தனர்.

இந்நிலையில், எதிரே நாகர்கோவிலில் இருந்து திருநெல்வேலி செல்லும் அரசு பேருந்து வேகமாக ஓட்டுநரின் கட்டைப்பாட்டை இழந்து சாலையோரம் நின்று கொண்டிருந்த மகராசி, ஜெயபால் மற்றும் இருசக்கர வாகனம் மீது மோதியுள்ளது. இதில் இருசக்கர வாகனம் பல அடி தூரம் இழுத்து செல்லப்பட்ட நிலையில், பேருந்து சக்கரத்தில் சிக்கி உடல் நசுங்கி சம்பவ இடத்தில் மகராசி உயிரிழந்தார்.

மேலும் ஜெயபால் லேசான காயங்களுடன் உயிர் தப்பினார். இந்த விபத்து நடந்த இடத்தில் பரபரப்பு ஏற்பட்ட நிலையில் இச்சம்பவம் குறித்து ஆரல்வாய்மொழி போலீசாருக்கு தகவல் தெரிவிக்கப்பட்டது. தகவலின் பேரில் சம்பவ இடத்திற்கு விரைந்து வந்த ஆரல்வாய்மொழி இன்ஸ்பெக்டர் கோபி, எஸ்ஐ ராஜமணி, ஏட்டு உதயா மற்றும் போலீசார் விசாரணை நடத்தினர்.

பின்னர் மகராசி உடலை மீட்டு பிரேத பரிசோதனைக்காக அனுப்பி வைத்தனர். மேலும் பஸ் ஸ்டியரிங்கில் மயங்கி கிடந்த அரசு பேருந்து ஓட்டுநர் மற்றும் பைக்கோடு இழுத்து செல்லப்பட்ட ஜெயபாலை மீட்டு ஆசாரிபள்ளம் அரசு மருத்துவமனைக்கு அனுப்பி வைத்தனர். மேலும் வழக்குப் பதிவு செய்து விசாரித்து வருகின்றனர்.

கர்நாடகாவில்…

கர்நாடகா மாநிலம் பெங்களூருவில் கட்டுமானப் பணியில் இருந்த மெட்ரோ தூண் இருசக்கர வாகனத்தின் மீது விழுந்ததில் ஒரு பெண்ணும் அவரது இரண்டு வயது மகனும் உயிரிழந்தனர். அவரது கணவர் மற்றும் மகள் காயமடைந்தனர்.

இந்த சம்பவம் பெங்களூரு நாகவரா பகுதியில் இன்று (ஜனவரி 10) காலை பதிவாகியுள்ளது. தம்பதியரும் அவர்களது இரட்டை குழந்தைகளும் (ஒரு மகள் மற்றும் ஒரு மகன்) பைக்கில் சென்றபோது இரும்புத் தூண் அவர்கள் மீது மோதியதாக அதிகாரிகள் தெரிவித்தனர்.

இந்த விபத்தில் தாய் தேஜஸ்வானி மற்றும் அவரது மகன் விஹான் ஆகியோர் பலத்த காயம் அடைந்தனர். அந்த வழியாக சென்றவர்கள் அவர்களை மீட்டு அருகில் உள்ள மருத்துவமனைக்கு கொண்டு சென்றனர், அங்கு சிகிச்சை பலனின்றி உயிரிழந்தனர்.

தேஜஸ்வானியின் கணவர் லோஹித் மற்றும் மகள் மருத்துவமனையில் சிகிச்சை பெற்று வருகின்றனர். லோஹித் பைக்கை ஓட்டி வந்ததாகவும், தேஜஸ்வினி பின்னால் அமர்ந்திருந்ததாகவும், இருவரும் ஹெல்மெட் அணிந்திருந்ததாகவும் பொலிஸார் தெரிவித்தனர்.

உலோக கம்பிகளால் ஆன தூண் சுமார் 40 அடி நீளம் இருந்தது. இந்த சம்பவத்தையடுத்து இரண்டு நாட்களாக வெளிவட்டச் சாலையில் பணிகள் நிறுத்தப்பட்டுள்ளன.தூண் இடிந்து விழுந்ததற்கான காரணத்தை நிபுணர்கள் விபத்து நடந்த இடத்தில் ஆய்வு செய்துவருகின்றனர்.

விபத்து குறித்து விரிவான விசாரணை நடத்தப்படும் என கர்நாடக முதல்வர் பசவராஜ் பொம்மை உறுதி அளித்துள்ளார். பெங்களூரு மெட்ரோ ரயில் கார்ப்பரேஷன் லிமிடெட் (BMRCL) பாதிக்கப்பட்ட குடும்பத்திற்கு ரூ. 20 லட்சம் நிதியுதவி அறிவித்துள்ளது.

புதுச்சேரியில்..

தாய் தந்தைக்கும் இடையே அடிக்கடி சண்டை சச்சரவு இருந்து வந்ததாலும், தந்தை தன்னைக் கண்டித்ததாலும் புதுவையில் 9ம் வகுப்பு படிக்கும் மாணவன் மின் விசிறி கொக்கில் சேலையால் தூக்கிட்டு தற்கொலை செய்து கொண்ட சம்பவம் பரபரப்பை ஏற்படுத்தியுள்ளது.

புதுச்சேரி யூனியன் முத்தியால்பேட்டை கணேஷ் நகர் 3வது குறுக்கு தெருவில் வசித்து வருபவர் தசரதன். கட்டிட தொழிலாளியான இவருக்கு இளவரசி என்ற மனைவி உள்ளார்.

இந்த தம்பதிக்கு சக்திமுருகன், பாலமுருகன் என்று இரு மகன்கள் உள்ளனர். இதில் சக்திமுருகன் காரைக்கால் நவோதயா பள்ளியிலும், இவர்களது 2வது மகன் பாலமுருகன் (14). அந்த பகுதியில் உள்ள தனியார் பள்ளி ஒன்றில் 9ம் வகுப்பு படித்து வந்தான்.

பாலமுருகன் புதுவை வேல் சொக்கநாதன் திருமண மண்டபம் அருகில் உள்ள டியூசன் சென்டரில் படித்து வந்தான். தினமும் காலை 5 மணிக்கு பாலமுருகனை அவரது தந்தை டியூசனுக்கு அழைத்து சென்று பின் 7 மணிக்கு திரும்பி வீட்டிற்கு அழைத்து வருவது வழக்கம்.

ஆனால் நேற்று முன்தினம் டியூசனுக்கு பாலமுருகன் செல்லவில்லை. இதனை தசரதன் கண்டித்ததால், கணவன் – மனைவிக்கு இடையே தகராறு ஏற்பட்டது. பின்னர் அவர்கள் இருவரும் வேலைக்கு சென்றுவிட்டனர். பாலமுருகன் மட்டும் வீட்டில் இருந்தான்.

இந் நிலையில் மாலையில் வேலையை முடித்து விட்டு தசரதன் வீட்டிற்கு வந்தார். அப்போது பாலமுருகன் வீட்டின் 2வது மாடியில் உள்ள மின்விசிறி கொக்கியில் சேலையால் தூக்குப்போட்டு தற்கொலை செய்து பிணமாக தொங்கியது தெரியவந்தது. இதை பார்த்து அதிர்ச்சியடைந்த அவர் கதறி அழுதார்.

இது குறித்து தகவல் அறிந்து சம்பவ இடத்திற்கு விரைந்து வந்த முத்தியால்பேட்டை போலீசார் பாலமுருகனின் உடலை கைப்பற்றி பிரேத பரிசோதனைக்காக கதிர்காமம் அரசு மருத்துவமனைக்கு அனுப்பி வைத்தனர். மேலும் இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

சேலத்தில்..

சேலம் மாவட்டம் எடப்பாடி அருகே சித்தூர் கிராமத்தை சேர்ந்தவர் கட்டிட தொழிலாளி மெய்யப்பன். இவரது மனைவி மைதிலி. இவர்களுக்கு இரண்டு மகள்களும் ஒரு மகனும் உள்ளனர். மூத்த மகள் திவ்யா (வயது 16). இவர் சித்தூர் அரசு மேல்நிலைப்பள்ளியில் 11ஆம் வகுப்பு பயின்று வருகிறார்.

இந்நிலையில் திவ்யாவுக்கு கடந்த ஆண்டு கண் அறுவை சிகிச்சை செய்யப்பட்டது. சிகிச்சைக்கு பிறகு அவர் மூக்கு கண்ணாடி அணிந்து கொள்ள வேண்டும் என மருத்துவர்கள் பரிந்துரைத்துள்ளதாகவும் தெரிகிறது.

கட்டிட வேலை செய்து போதிய வருவாய் ஈட்ட முடியாமல் பிள்ளைகளைக் காப்பாற்ற போராடி வந்த பெற்றோர்களால் மூத்த மகள் திவ்யாக்கு மூக்கு கண்ணாடி வாங்கி தர இயலவில்லை என்று கூறப்படுகிறது.

இந்நிலையில் நேற்று காலை பள்ளிக்கு சென்ற திவ்யா பாதியிலே 10 மணிக்கு வீடு திரும்பியுள்ளார். பெற்றோர் வேலைக்கு சென்ற நிலையில் வீட்டில் தனியாக இருந்த பள்ளி மாணவி தனது துப்பட்டாவால் தூக்கிட்டு தற்கொலை செய்துக்கொண்டுள்ளார்.

வேலைக்கு சென்ற சிறுமியின் தாய் மைதிலி மதியம் உணவு அருந்த வீட்டிற்கு வந்துள்ளார். அப்போது வீடு உள்பக்கமாக தாழிடப்பட்டிருந்தது. நீண்ட நேரமாக கதவை தட்டியும் மகள் கதவை திறக்காததால் கதவை உடைத்து பார்த்துள்ளனர்.

அப்போது சிறுமி தூக்கில் தொங்கியநிலையில் சடலமாக இருந்துள்ளார். மகளை பார்த்து அவரது தாய் கதறி அழுத்துள்ளார். மைதிலியின் கதறல் சத்தம் கேட்டு அக்கம்பக்கத்தினர் ஓடி வந்தனர். தூக்கில் தொங்கிய நிலையில் இருந்த சிறுமியை இறக்கி பார்த்தபோது அவர் ஏற்கனவே இறந்தது தெரியவந்துள்ளது.

இந்த சம்பவம் தொடர்பாக பூலாம்பட்டி போலீஸாருக்கு தகவல் தெரிவித்தனர். சம்பவ இடத்துக்கு வந்த போலீஸார் சிறுமியின் உடலை கைப்பற்றி எடப்பாடி அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து வழக்குப்பதிவு செய்த விசாரணை மேற்கொண்டு வருகின்றனர்.

சென்னையில்..

உங்களுக்கு பிடிச்சதை என்னால் படிக்க முடியலை. நான் விரும்புறதைப் படிக்க முடியலை. நெனைச்சப்படி வாழவும் முடியலை. என் தங்கச்சியாவது சந்தோஷமா வாழட்டும்’ என்று உருக்கமாக கடிதம் எழுதி வைத்து விட்டு, 12ம் வகுப்பு மாணவன் தூக்கிட்டு தற்கொலைச் செய்து கொண்டது ஆவடி அருகே பெரும் சோகத்தை ஏற்படுத்தியுள்ளது.

சென்னை ஆவடி அடுத்து உள்ள கோவர்த்தனகிரி செல்வா நகர் 2-வது தெருவில் வசித்து வருபவர் விஜயன் (47). இவர், ஸ்ரீபெரும்புதூரில் உள்ள தனியார் கார் தொழிற்சாலையில் மேலாளராக பணிபுரிந்து வருகிறார். இவரது மனைவி ஜெயலட்சுமி.

இந்த தம்பதிக்கு பாலாஜி (17) என்ற மகனும், ஹரிணி (14) என்ற மகளும் உள்ளனர். இதில், பாலாஜி ஆவடி அடுத்த பருத்திப்பட்டு பகுதியில் உள்ள தனியார் சிபிஎஸ்இ பள்ளியில் ப்ளஸ்-2 படித்து வந்தார். அதே பள்ளியில் ஹரிணி 9-ம் வகுப்பு படித்து வருகிறார்.

விஜயனும், அவருடைய மனைவி ஜெயலட்சுமியும் பொங்கல் பண்டிகைக்கு ஜவுளி எடுக்க ஆவடி மார்க்கெட் பகுதியில் உள்ள துணிக்கடைக்கு சென்றிருந்தனர். வீட்டில் பாலாஜி மற்றும் அவரது தங்கை ஹரிணி இருவர் மட்டும் இருந்தனர்.

இந்நிலையில் பாலாஜி, படுக்கை அறைக்குள் சென்று கதவை உள்புறமாக தாழ்ப்பாள் போட்டுக் கொண்டார். நீண்ட நேரம் ஆகியும் அண்ணன் வெளியே வராததால் சந்தேகம் அடைந்த ஹரிணி, கதவை தட்டியும் திறக்காததால் ஜன்னல் வழியாக பார்த்தார்.

அப்போது பாலாஜி, தூக்கில் தொங்குவதை கண்டு அதிர்ச்சியில் அலறினார். சத்தம் கேட்டு அக்கம் பக்கத்தினர் ஓடி வந்து பாலாஜியை மீட்டு அருகில் உள்ள மருத்துவமனைக்கு கொண்டு சென்றனர். அங்கு அவரை பரிசோதனை செய்த மருத்துவர்கள், பாலாஜி ஏற்கனவே இறந்து விட்டதாக தெரிவித்தனர்.

இதுகுறித்து தகவல் அறிந்து வந்த ஆவடி போலீசார், தற்கொலை செய்த பாலாஜி உடலை மீட்டு பிரேத பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர்.

மேலும் அவரது அறையில் போலீசார் சோதனை செய்தனர். அதில் பாலாஜி ஆங்கிலத்தில் எழுதிய கடிதம் சிக்கியது. அதில் அவர், “நீங்கள் விரும்பும் படிப்பை எனக்கு படிக்க விருப்பம் இல்லை. என் இஷ்டத்துக்கு நீங்கள் வாழ விடுவதில்லை.

30 வயதுக்கு மேல் திருமணமாகி வேலைக்கு போன பிறகு தான் நான் ஜாலியாக இருக்க முடியுமா? நான் உயிருடன் இருந்து என்ன பண்ணப் போகிறேன். என் தங்கையாவது நல்லா இருக்கட்டும்” என உருக்கமாக கடிதத்தில் எழுதி இருந்ததாக போலீசார் தெரிவித்தனர்.

ப்ளஸ்-2 படித்து வந்த பாலாஜி, ஜேஇஇ தேர்வுக்கும் பயிற்சி பெற்று வந்தார். இதனால் அவர் மிகுந்த மன உளைச்சலில் இருந்து வந்ததாக தெரிகிறது. இதில் ஏற்பட்ட விரக்தியில் பாலாஜி தற்கொலை செய்து கொண்டாரா? அல்லது வேறு ஏதும் காரணமா? என்ற கோணத்தில் ஆவடி போலீசார் வழக்குப் பதிவு செய்து விசாரித்து வருகின்றனர்.

இந்தியாவில்..

இந்தியாவில் சமையல்காரராக பணிபுரியும் நபர் தற்கொலை செய்து கொண்ட நிலையில் தனது மரணத்திற்கு காரணம் மனைவியின் குடும்பத்தார் தான் என இறப்பதற்கு முன் தெரிவித்துள்ளார்.

ராஜஸ்தான் மாநிலத்தை சேர்ந்தவர் முகேஷ் டாங்க். சமையல்காரராக உள்ளார். இவரும் ரூபம் என்ற இளம்பெண்ணும் கடந்தாண்டு காதலித்து திருமணம் செய்து கொண்டனர்.

ரூபம் சார்ட்டட் அக்கவுண்டண்டாக இருக்கிறார். தம்பதிக்கு பண விடயத்தில் எந்தவொரு பிரச்சனையும் இல்லாமல் வசதியாக இருந்தனர். இந்த நிலையில் ரூபம் இரண்டு மாதங்களுக்கு முன்னர் தனது பெற்றோர் வீட்டிற்கு திடீரென சென்ற நிலையில் முகேஷ் பல முறை அழைத்தும் திரும்பி வரவில்லை.

இதனால் மனமுடைந்த முகேஷ் நேற்று தற்கொலை செய்து கொண்டார். இறப்பதற்கு முன்னர் இரண்டு வீடியோவை பதிவிட்டதோடு ஒரு கடிதமும் எழுதி வைத்துள்ளார். அதில், என் மனைவி அப்பாவி!

ஆனால் அவரின் குடும்பத்தார் என்னை மிகவும் துன்புறுத்தினார்கள், அவர்கள் தான் தற்கொலைக்கு காரணம் என குறிப்பிட்டிருந்தார். இதையடுத்து ரூபம் பெற்றோர் உள்ளிட்ட குடும்ப உறுப்பினர்கள் மீது பொலிசார் வழக்குப்பதிவு செய்து விசாரணை நடத்தி வருகின்றனர்.