அமெரிக்காவில்..

இந்திய – அமெரிக்கர்களான தன்பால் ஈர்ப்பாளர் தம்பதிக்கு கடந்த 2019ல் திருமணம் நடைபெற்ற நிலையில் தற்போது தங்களின் முதல் குழந்தையை எதிர்பார்ப்பதாக மகிழ்ச்சியுடன் தெரிவித்துள்ளனர்.

அமெரிக்காவில் நியூஜெர்ஸியில் அமித்ஷா மற்றும் ஆதித்யா மடிராஜு என்ற 2 இந்தியர்கள் வசித்து வருகின்றனர். அமித்ஷா “ஸ்ப்ரிட்” என்ற நடனக்குழுவின் பொறுப்பாளர் ஆவார்.

ஆதித்யா பேரிடர் மேலாண்மை குழுவில் பணியாற்றி வருகிறார். 2016-ஆம் ஆண்டு முதல் இருவரும் ஒன்றாக பழகி வருகின்றனர். இதனிடையே இருவரது நட்பும் காதலாக மாறுவதை இருவரும் உணர்ந்தனர்.

ஓரினச்சேர்க்கையாளர்களான இருவரும் குடும்பத்தாரின் சம்மதம் பெற்று கடந்த 2019ல் இந்து முறைப்படி திருமணம் செய்து கொண்டனர். இந்த நிலையில் அமித்ஷா – ஆதித்யா தம்பதி வரும் மே மாதத்தில் தங்கள் முதல் குழந்தையை எதிர்பார்ப்பதாக தெரிவித்துள்ளனர்.

கருமுட்டை தானம் செய்பவர்கள், வாடகை தாய், ஒரு குழந்தையை வயிற்றில் சுமந்து பிரசவிக்கும் பெண் (குழந்தைக்கும் அவருக்கும் எந்த உயிரியல் தொடர்பும் இல்லை) போன்றவைகள் குறித்து முழுவதுமாக தம்பதி அறிந்து கொண்டனர்.

இதையடுத்து கருமுட்டையுடன், விந்தை இணைத்து, செயற்கையாக உருவாக்கப்படும் கருக்களை ஒரு பெண்ணின் கருப்பையில் தக்கமுறையில் வைப்பதன் மூலம் குழந்தை பெறும் வாய்ப்பை ஆதித்யா – அமித்ஷா பெற்றுள்ளனர்.

ஆதித்யா கூறுகையில், ஒரே பாலின ஜோடியாக இருந்தாலும் பரவாயில்லை, நாம் விரும்பும் வாழ்க்கையை நடத்த முடியும். எங்களுக்குப் பிறகு பல தன்பால் ஈர்ப்பாளர் தம்பதி திருமணம் செய்து கொண்ட நிலையில்,

இது அவர்களுக்கு ஒரு வழிகாட்டியாக இருக்கும் என்று நான் விரும்புகிறேன்,. நாங்கள் ஓரின சேர்க்கை பெற்றோராக இருக்க மாட்டோம், எல்லாரையும் போல நாங்கள் பெற்றோராக இருப்போம் என கூறியுள்ளார்.

கர்நாடகாவில்..

இந்திய மாநிலம் கர்நாடகாவில் 12 வயது சிறுவன் மாரடைப்பால் உயிரிழந்த சம்பவம் அதிர்ச்சியை ஏற்படுத்தியுள்ளது. 50 வயதுக்கு மேற்பட்டவர்களுக்கு மாரடைப்பு ஏற்படும் என்ற நிலை மாறி, சமீபகாலமாக 25 வயதினருக்கே மாரடைப்பு ஏற்பட்டு வருகிறது.

ஆனால் அதை விட மோசமான சம்பவம் ஒன்று கர்நாடகாவில் நடந்துள்ளது. மடிகேரி மாவட்டம் கூடுமங்களூரை சேர்ந்தவர் மஞ்சாச்சாரி. இவர் பாடசாலை பேருந்து ஓட்டுநரான பணியாற்றி வருகிறார். இவரது மகன் கீர்த்தன் ஆறாம் வகுப்பு படித்து வந்தார்.

கடந்த சனிக்கிழமை அன்று கீர்த்தனை தனது நண்பர்களுடன் மாலையில் விளையாடிவிட்டு வீட்டிற்கு வந்துள்ளார். அப்போது நெஞ்சில் வலி இருப்பதாக கூறிய அவர், உடனேயே கீழே மயங்கி விழுந்துவிட்டார்.

இதனால் அதிர்ச்சி அடைந்த சிறுவனின் பெற்றோர், அவனை மருத்துவமனைக்கு கொண்டு சென்றனர். அங்கு சிறுவனை பரிசோதித்த மருத்துவர்கள் ஏற்கனவே உயிரிழந்துவிட்டதாக கூறினர்.

மேலும் சிறுவனின் மரணத்திற்கு காரணம் மாரடைப்பு தான் என உறுதி செய்தனர். 12 வயது சிறுவன் மாரடைப்பால் உயிரிழந்த சம்பவம் அப்பகுதியில் அதிர்ச்சியையும், சோகத்தையும் ஏற்படுத்தியுள்ளது.

உத்தர பிரதேசத்தில்..

இந்திய மாநிலம் உத்தர பிரதேசத்தில் மணப்பெண் மணமகனின் இளைய சகோதரரை திருமணம் செய்துகொண்ட சம்பவம் பரபரப்பை ஏற்படுத்தியது.

உத்தர பிரதேச மாநிலம் சம்பல் மாவட்டம் அரியானா கிராமத்திற்கு உட்பட்ட பகுதியைச் சேர்ந்த நபர் ஒருவருக்கும், தவாய் குர்த் கிராமத்தின் காவல்நிலையத்திற்கு உட்பட்ட பகுதியை சேர்ந்த பெண்ணொருவருக்கும் திருமணம் முடிவானது.

அதனைத் தொடர்ந்து திருமண ஏற்பாடுகள் விமர்சியாக நடைபெற்றது. இரு வீட்டாரும் தங்கள் உறவினர்களுடன் வந்திருந்தனர். அப்போது பெண்ணொருவர் குழந்தைகளுடன் வந்து மணமகனின் மனைவி என்றும், தனக்கு தெரியாமல் தன் கணவர் வேறொரு பெண்ணை திருமணம் செய்வதாகவும் குற்றம்சாட்டியுள்ளார்.

இதுகுறித்து தகவல் அறிந்த பொலிஸார் அங்கு விரைந்தனர். அப்போது நடத்திய விசாரணையில் மணமகன் 5 ஆண்டுகளுக்கு முன்பே குறித்த பெண்ணை திருமணம் செய்துள்ளார் என்றும், இரண்டு குழந்தைகள் அவர்களுக்கு உள்ளனர் என்றும் தெரிய வந்தது.

மணமகளின் குடும்பத்தினர் இதனைக் கேட்டு அதிர்ச்சியடைந்தனர். அதனைத் தொடர்ந்து பொலிஸார் இரு தரப்பினரையும் காவல்நிலையத்திற்கு அழைத்துச் சென்று பேச்சுவார்த்தை நடத்தினர்.

அதன் பின்னர் இரண்டாவது திருமணம் செய்த பெண்ணை மணமகன் விவாகரத்து செய்ய வேண்டும் என்றும், மணமகனின் இளைய சகோதரரை அப்பெண் திருமணம் செய்ய வேண்டும் என்றும் முடிவானது. அதனைத் தொடர்ந்து மணமகனின் இளைய சகோதரரை கரம்பிடித்த மணமகள், அவருடன் சென்றுவிட்டார். இந்த சம்பவம் அப்பகுதியில் சர்ச்சையை ஏற்படுத்தியது.

கேரளாவில்..

சுரேந்திரன் கே பாட்டேல், தற்போது இந்தியர்கள் மத்தியில் பிரபலமான பெயராக உருவெடுத்து வருகிறது. கேரளாவைச் சேர்ந்த இவர், பள்ளி மற்றும் கல்லூரி படிக்கும் போது, வறுமை காரணமாக குடும்பத்திற்கு உதவும் வகையில் கூலி வேலை செய்தவர்.

பதின்பருவத்தில், அவர் பணம் சம்பாதிப்பதற்காக பீடிகளை சுருட்டும் கூலி வேலை செய்தவர். சுரேந்திரன், 10 ஆம் வகுப்புக்குப் பிறகு தனது கல்வியைத் தொடர வேண்டாம் என்று முடிவு செய்தவர். ஒரு வருடம் பள்ளிக்கு செல்லாமல் வறுமை காரணமாக வேலைக்கு சென்றவர்.

ஒரு வருட இடைவெளிக்குப் பிறகு, ஈ.கே. நாயனார் நினைவு அரசு கல்லூரியில் சேர்ந்து படிப்பை முடித்தார். பிறகு அவர் கோழிக்கோடு அரசு சட்டக் கல்லூரியில் எல்.எல்.பி படிக்க விரும்பினார், போதுமான பணம் இல்லாததால் அவரது நண்பர்களின் உதவியுடனும், ஒரு ஹோட்டலில் வேலை செய்தும், அவர் 1995 இல் சட்டப் படிப்பில் பட்டம் பெற்றார்.

இதைத் தொடர்ந்து, 1996-ல் கேரளாவில் உள்ள ஹோஸ்துர்க்கில் வக்கீலாக பயிற்சி செய்யத் தொடங்கிய அவர், படிப்படியாக சீனியர் வழக்கறிஞராகத் திகழ்ந்தார். 2007 இல், அவர் அமெரிக்காவிற்கு குடிபெயர்ந்தார், அங்கு அவரது மனைவி ஒரு முக்கிய அமெரிக்க மருத்துவ நிறுவனத்தில் பணிபுரிய தேர்வு செய்யப்பட்டார்.

தம்பதியினர் நிரந்தர விசா பெற்று தங்கள் மகளுடன் டெக்சாஸின் ஹூஸ்டன் நகருக்கு குடிபெயர்ந்தனர். சுரேந்திரன், டெக்சாஸில் பார் கவுன்சில் தேர்வில் கலந்து கொண்டு முதல் முயற்சியிலேயே தேர்ச்சி பெற்று ஹூஸ்டன் பல்கலைக்கழக சட்ட மையத்தில் LL.M படிப்பிற்கு விண்ணப்பித்தார்.

2011 இல் பட்டம் பெற்ற பிறகு, சுரேந்திரன் கே குடும்பச் சட்டம், குற்றவியல் பாதுகாப்பு, சிவில் மற்றும் வணிக வழக்குகள், ரியல் எஸ்டேட் மற்றும் பரிவர்த்தனை விஷயங்கள் தொடர்பான வழக்குகளைக் கையாண்டார், பின்னர் தனது சொந்த சட்ட நிறுவனத்தை நிறுவினார்.

தற்போது அமெரிக்காவின் டெக்சாஸில் வாழும் இந்திய வம்சாவளியைச் சேர்ந்த வழக்கறிஞர் சுரேந்திரன், டெக்சாஸின் ஃபோர்ட் பெண்ட் கவுண்டியில் உள்ள 240வது நீதித்துறை மாவட்ட நீதிமன்றத்தின் நீதிபதியாகப் பதவியேற்றுள்ளார். 51 வயதான அவர் கேரளாவில் காசர்கோட்டில் பிறந்தவர்.

கேரளாவில்..

கேரளாவை சேர்ந்த மொத்த குடும்பமும் வீட்டில் தற்கொலை செய்து கொண்ட சம்பவம் சோகத்தை ஏற்படுத்தியுள்ளது. திருவனந்தபுரத்தை சேர்ந்தவர் ரமேஷன் (48).

இவர் வளைகுடா நாட்டில் வேலை செய்து வந்த நிலையில் கடந்த வியாழன் அன்று சொந்த ஊருக்கு வந்தார். இந்த நிலையில் நேற்று முன் தினம் நள்ளிரவு 12.30 மணிக்கு ரமேஷன் வீட்டில் நெருப்பு எரிவதை கண்ட அக்கம்பக்கத்தினர் பதறியடி போய் கதவை உடைத்து உள்ளே பார்த்தனர்.

அப்போது ரமேஷன், அவர் மனைவி சுலஜா குமாரி (46), மகள் ரேஷ்மா (23) ஆகிய மூவரும் சடலமாக கிடந்தனர். கடன் தொல்லையால் மூவரும் தற்கொலை செய்து கொண்டது பொலிஸ் விசாரணையில் தெரியவந்துள்ளது.

அதன்படி, ரமேஷனுக்கு பெரும் கடன் இருந்ததாகவும், பொருளாதார ரீதியாக சிரமப்பட்டு வந்ததாகவும் உறவினர்கள் தெரிவித்தனர். வங்கியில் கடனை திருப்பிச் செலுத்தத் தவறியதால் குடும்பம் வீட்டை விட்டு வெளியேற்றப்படும் நிலையை எதிர்கொண்டதும் தெரியவந்துள்ளது. தொடர்ந்து பொலிசார் சம்பவம் தொடர்பில் விசாரணை நடத்தி வருகின்றனர்.

புதுச்சேரியில்..

புதுச்சேரி அடுத்த வில்லியனூர் அருகே உள்ள கோபாலன்கடை அம்மா நகரை சேர்ந்தவர் ராஜா (32). ரவுடியான இவர் ஏற்கனவே திருமணமான ஒரு பெண்ணுடன் சேர்ந்து வாழ்ந்து வருகிறார். அந்த பெண்ணுக்கு முதல் கணவர் மூலம் 2 மகள்களும், ஒரு மகன் உள்ளனர். இந்த பிள்ளைகளுக்கு ராஜா வளர்ப்பு தந்தையாக இருந்து வந்தார்.

இந்த நிலையில் நேற்று முன்தினம் மாலை ராஜா தனது வீட்டில் இருந்து ஸ்கூட்டரில் வெளியே சென்றார். கோபாலன்கடை மெயின்ரோடு அருகே சென்றபோது மோட்டார் சைக்கிளில்வந்த 6 பேர் கொண்ட கும்பல் அவரை வழிமறித்து, ஓட ஓட விரட்டி அரிவாளால் சரமாரியாக வெட்டினர்.

இதில் சம்பவ இடத்திலேயே ராஜா ரத்த வெள்ளத்தில் இறந்துபோனார். இந்த படுகொலை தொடர்பாக வில்லியனூர் போலீசார் வழக்குப்பதிவு செய்து விசாரித்தனர்.

விசாரணையில், ராஜாவின் வளர்ப்பு மகளும், அப்பகுதியை சேர்ந்த பிரகாஷ்ராஜ் என்பவரும் காதலித்து வந்துள்ளனர். இதற்கு வளர்ப்பு தந்தை ராஜா எதிர்ப்பு தெரிவித்தார். இதனால் வளர்ப்பு மகளின் காதலனுக்கும், ராஜாவுக்கும் கடந்த சில நாட்களுக்கு முன்பு மோதல் ஏற்பட்டது.

மேலும் கொலை சம்பவம் நடப்பதற்கு முந்தைய நாள் ராஜாவின் வளர்ப்பு மகளின் காதலன் பிரகாஷ்ராஜ் வீட்டிற்கு சென்று காதலை விட்டுவிடும்படியும் இல்லையென்றால் கொலை செய்து விடுவேன் எனவும் மிரட்டியுள்ளார். இந்த விரோதத்தில் வளர்ப்பு மகளின் காதலன் பிரகாஷ்ராஜ் தனது கூட்டாளிகளுடன் சேர்ந்து ராஜாவை படுகொலை செய்தது தெரியவந்துள்ளது.

இதையடுத்து தலைமறைவாக இருந்த குற்றவாளிகளை தனிப்படை போலீசார் தேடி வந்தனர். தமிழக பகுதியான பெரம்பையில் பதுங்கியிருந்த காதலன் பிரகாஷ்ராஜ் அவரது நண்பர்களான மணிகண்டன், தங்கமணி, தினேஷ் ஆகியோரை போலீசார் கைது செய்தனர்.

பின்பு அவர்களிடம் இருந்து கொலைக்கு பயன்படுத்திய ஆயுதங்களையும் பறிமுதல் செய்தனர். அவர்களிடம் நடத்திய விசாரணையில் கொலை செய்ததை ஒப்புக்கொண்டனர். மேலும் இதில் தொடர்புடைய 5 பேரை போலீசார் தேடி வருகின்றனர். கைது செய்யப்பட்ட 4 பேரையும் நீதிமன்றத்தில் ஆஜர்படுத்தி, காலாப்பட்டு மத்திய சிறையில் போலீஸ் அடைத்தனர்.