கொழும்பு துறைமுகத்திற்கு 11.6 கடல் மைல் தூரத்தில் “முத்தா பயனியர்” என்ற வர்த்தக கப்பல் விபத்துக்குள்ளாகியுள்ளது. எனினும் கப்பலில் இருந்த அனைவரும் இலங்கை கடற்படையினரால் காப்பாற்றப்பட்டுள்ளனர்.

டொமினிக்கா கொடியுடன் பயணித்து கொண்டிருந்த வர்த்தக கப்பலின் கப்டனால் கப்பலை கட்டுப்படுத்த முடியாமல் இடது பக்கமாக சரிந்துள்ளதாக கடற்படையினருக்கு அறிவிக்கப்பட்டவுடன், உடனடியாக செயற்பட்ட கடற்படையினர் கப்பல் ஊழியர்களை காப்பாற்றுவதற்கு நடவடிக்கை மேற்கொண்டுள்ளனர்.

கப்பலில் காப்பற்றப்பட்டவர்களில் 10 இலங்கையர்கள் மற்றும் இந்தோனேசிய நாட்டவர்களும் அடங்குகின்றனர்.

இந்த கப்பலின் உரிமையாளர் இந்தியர் எனவும், குறித்த கப்பலில் இருந்து மீட்டகப்பட்டவர்கள் கொழும்பு துறைமுக பொலிஸாரிடம் ஒப்படைக்கப்பட்டுள்ளனர்.

மன்னார் – தாழ்வுபாடு பிரதான வீதி, எழுத்தூர், செல்வநகர் பகுதியில் தனியார் பேருந்து ஒன்று வேகக்கட்டுப்பாட்டை மீறி 2 வாகனங்களுடன் மோதியதில் ஒருவர் சம்பவ இடத்திலேயே உயிரிழந்ததுடன், ஒருவர் படுகாயமடைந்துள்ளார்.

குறித்த விபத்து நேற்று இரவு 7.45 மணியளவில் இடம்பெற்றுள்ளதாக பொலிஸார் தெரிவித்துள்ளனர்.

மன்னார் எமிழ் நகர் கிராமத்தைச் சேர்ந்த சிறு வியாபாரியான 61 வயதுடைய பத்திரப்பன் சேது நம்பு என்பவரே இந்த விபத்தில் உயிரிழந்துள்ளார்.

மன்னார் நகரில் இருந்து தாழ்வுபாடு நோக்கி பயணித்த தனியார் பேருந்து வேகக்கட்டுப்பாட்டை இழந்த நிலையில், எழுத்தூர் செல்வநகர் பகுதியில் மோட்டார் சைக்கிளில் பயணித்தவர் மீது மோதியுள்ளது.

பின்னர் தாழ்வுபாட்டு பிரதான வீதியூடாக எமிழ் நகர் கிராமத்தில் உள்ள தனது வீட்டுக்கு மாங்காய் கொள்வனவு செய்து கொண்டு துவிச்சக்கர வண்டியில் சென்று கொண்டிருந்த குடும்பஸ்தர் மீதும் பேருந்து மோதியுள்ளது.

இதில் குறித்த நபர் சம்பவ இடத்திலேயே உயிரிழந்ததுடன், மோட்டார் சைக்கிளில் சென்றவர் படுகாயமடைந்துள்ளார். பேருந்தின் சாரதி பேருந்தை நிறுத்தாமல் தப்பிச் சென்றுள்ளார்.

உடனடியாக சம்பவ இடத்தில் ஒன்று கூடிய மக்கள் காயமடைந்த நபரை மன்னார் வைத்தியசாலைக்கு கொண்டு சென்றனர்.

எனினும் எமிழ் நகர் பகுதியைச் சேர்ந்த பத்திரப்பன் சேது நம்பு என்பவர் சம்பவ இடத்திலேயே உயிரிழந்ததுடன், அவரது சடலம் மன்னார் பொது வைத்தியசாலையில் ஒப்படைக்கப்பட்டுள்ளது.

குறித்த பேருந்தின் சாரதி இன்று காலை மன்னார் பொலிஸ் நிலையத்தில் சரணடைந்துள்ளமை குறிப்பிடத்தக்கது.

யாழ்ப்பாணம் – சுழிபுரத்தில் படுகொலை செய்யப்பட்ட சிறுமி தொடர்பில் பல தகவல்கள் வெளிவந்துள்ள நிலையில், தற்போதும் சில விடயங்கள் தெரியவந்துள்ளது.

இதில் கைது செய்யப்பட்டுள்ள 6 சந்தேகநபர்களில் பிரதான சந்தேகநபராக கருதப்படும் 21 வயதுடைய இளைஞன் வழங்கிய வாக்குமூலத்திலிருந்து பல விடயங்கள் வெளிவந்திருந்தன.

இந்த கொலையை தானே செய்ததாகவும், தோட்டுக்காக கொலை செய்ததாகவும், தான் மட்டுமே இதில் சம்பந்தப்பட்டு உள்ளதாகவும் தெரிவித்திருந்தார்.

தற்போது குறித்த நபர் தெரிவித்த மேலும் சில வாக்குமூலங்களை பொலிஸார் வெளியிட்டுள்ளனர். அதில் தெரிவிக்கப்பட்டுள்ளதாவது,

சம்பவ தினத்தன்று சிறுமி பாடசாலை முடிந்து வந்ததும் புறா காட்டுவதாக ஆசை வார்த்தை காட்டி மறைவான இடத்திற்கு சிறுமியை அழைத்து சென்றுள்ளார்.

அங்கு வைத்து குறித்த சிறுமி துன்புறுத்தல்களுக்கு உள்ளாக்கப்பட்டுள்ளார். எனினும் குறித்த சிறுமிக்கு பாலியல் துன்புறுத்தல்கள் கொடுக்கப்பட்டுள்ளதாக பிரேத பரிசோதனை அறிக்கையில் தெரிவிக்கப்பட்டுள்ளது.

இவருடைய துன்புறுத்தல்களால் குறித்த சிறுமி மயக்கமடைந்துள்ளார். பின்னர் சிறுமியின் தோட்டை எடுத்து விட்டு, மாடுகள் கட்டும் கயிற்றால் சிறுமியின் கழுத்தை நெரித்துள்ளார். பின்னர் சிறுமியின் உடலை கிணற்றுக்குள் வீசியுள்ளார்.

இவை அனைத்தும் 21 வயது இளைஞனின் வாக்குமூலத்தில் இருந்து தெரியவந்துள்ளது.

குறித்த இளைஞன் கூறியது போலவே சிறுமியின் சீருடை, புத்தகப்பை என்பவற்றை பொலிஸார் மீட்டுள்ளனர்.

இதேவேளை சிறுமியை காணவில்லை என ஊர் மக்கள் தேடும் போது இந்த இளைஞனும் சேர்ந்து சிறுமியை தேடியுள்ளார்.

ஆனால் இந்த இளைஞன் இதன்கு முன்னர் அப்பகுதிக்கு வராத நிலையில், அன்று மட்டும் வந்தது ஏன்? சிறுமியை தேடுவது ஏன்? என்ற சந்தேகம் எழுந்த நிலையில், பொலிஸாரிடம் இது குறித்து மக்கள் தெரிவித்துள்ளனர்.

இதையடுத்து மக்கள் வழங்கிய தகவலுக்கு அமைய சந்தேகத்தின் பேரில் 4 பேர் கைது செய்யப்பட்டிருந்தனர்.

மேலும், தந்தையை பழிவாங்குவதற்கு சிறுமி றெஜினாவை இளைஞர்கள் கொலை செய்துள்ளனர் என்றும், இதற்கு சிறுமியின் சிறிய தந்தையும் உதவியுள்ளார் என்றும் சில தகவல்கள் தெரிவிக்கின்றன.

ஆனால் குறித்த சிறுமி பாலியல் துன்புறுத்தல்களுக்கு உள்ளாக்கப்பட்டு, கயிற்றால் கழுத்து நெரிக்கப்பட்டு மூச்சு அடங்கி உயிரிழந்துள்ளதாக பிரேத பரிசோதனையில் தெரிவிக்கப்பட்டுள்ளது.

ஆகவே சிறுமியின் கொலையில் பல சந்தேகங்கள் எழுவதுடன் உண்மை கொலைகாரன் யார்? ஏன் கொலை செய்தான் என்பது பெரும் சந்தேகமாகவே இருக்கின்றமை குறிப்பிடத்தக்கது.

வெளிநாட்டிலிருந்து விடுமுறைக்காக தாயகம் திரும்பியிருந்த இளைஞர் ஒருவர் வீடுபோய்ச் சேர முன்னர் பேருந்து விபத்தில் உயிரிழந்துள்ளார்.

இந்தச் சம்பவம் சற்று முன்னர் தம்புள்ளைப் பிரதேசத்தில் நடைபெற்றுள்ளது. சவூதியில் பணியாற்றும் அம்பாறை மாவட்டத்தைச் சேர்ந்த இளைஞர் ஒருவர் இன்று மாலை விடுமுறையில் நாடு திரும்பியுள்ளார்.

இதனையடுத்து ஊருக்குச் செல்வதற்காக காத்தான்குடி ஊடாக அக்கரைப்பற்று செல்லும் இலங்கை போக்குவரத்துச் சபைக்குச் சொந்தமான பேருந்து ஒன்றில் ஏறியுள்ளார்.

இந்நிலையில் தம்புள்ளை அருகே உள்ள உணவகம் ஒன்றில் தேநீர் அருந்த நிறுத்தப்பட்ட பேருந்து மீண்டும் புறப்படத்தயாராகி சாரதி வண்டியை பின்னோக்கிச் செலுத்தியுள்ளார்.

இதன்போது அவசரமாக வண்டியில் ஏற முற்பட்ட குறித்த இளைஞர் வண்டிக்கும் அங்கிருந்த மரம் ஒன்றுக்கும் இடையில் சிக்கி சம்பவ இடத்திலேயே உயிரிழந்துள்ளார்.

சவூதியில் இருந்து நாடு திரும்பிய இளைஞன் வீடு சேரமுன்னர் உயிரிழந்த சம்பவம் பேருந்தில் இருந்தவர்களை பெரும் சோகத்தில் ஆழ்த்தியுள்ளது.

மட்டக்களப்பு – கிரான் பகுதியில் நேற்று இரவு இடம்பெற்ற வாகன விபத்தில் பிரான்சில் இருந்து தாயகம் திரும்பிய 10 வயது சிறுவன் ஒருவர் உயிரிழந்துள்ளார்.

மேலும், இந்த விபத்தில் உயிரிழந்த சிறுவனின் சகோதரன் மற்றும் அவருடைய தந்தை ஆகியோர் படுகாயமடைந்த நிலையில், வைத்தியசாலையில் அதிதீவிர சிகிச்சைப்பிரிவில் அனுமதிக்கப்பட்டுள்ளனர்.

காத்தான்குடியிலிருந்து கொழும்பு நோக்கிப் பயணித்துக் கொண்டிருந்த இரவுநேரப் பேருந்தும், கொழும்பில் இருந்து மட்டக்களப்பு நோக்கி சென்ற வானும் நேருக்கு நேர் மோதிக்கொண்டமையினால் இந்த விபத்து ஏற்பட்டிருந்தது.

இதில் வானின் சாரதி சம்பவ இடத்திலேயே உயிரழந்தார். மேலும், பிரான்சில் இருந்து தாயகம் திரும்பிய 10 வயது சிறுவன் வைத்தியசாலையில் அனுமதிக்கப்பட்ட நிலையில் உயிரிழந்துள்ளார்.

மேலும், விபத்தில் மோசமாக காயமடைந்துள்ள உயிரிழந்த சிறுவனின் தந்தை மற்றும் சகோதரன் ஆகியோர் வைத்தியசாலையில் அதிதீவிர சிகிச்சைப்பிரிவில் அனுமதிக்கப்பட்டுள்ளதாக தெரிவிக்கப்பட்டுள்ளது.

யாழ். சுழிபுரம் பகுதியில் படுகொலை செய்யப்பட்ட சிறுமி ரெஜினாவின் இறுதி கிரியை நிகழ்வுகள் இன்று மாலை இடம்பெற்றுள்ளன.

யாழ்ப்பாணம் சுழிபுரம் பகுதியில் உள்ள கிணறு ஒன்றில் இருந்து நேற்று மாலை ரெஜினா என்ற ஆறு வயது சிறுமியின் சடலம் மீட்கப்பட்டுள்ளது.

பாடசாலை சென்று வீடு திரும்பிய மாணவி, வீட்டில் யாரும் இல்லாத நிலையில் படுகொலை செய்யப்பட்டு கிணற்றில் போடப்பட்டிருந்தார்.

சம்பவம் தொடர்பில் அந்த பகுதியை சேர்ந்த இளைஞர்கள் சிலர் கைது செய்யப்பட்டு விசாரணைக்கு உட்படுத்தப்பட்டுள்ளனர். இந்நிலையில், பிரேத பரிசோதனையின் பின்னர் இன்று பிற்பகல் சடலம் உறவினர்களிடம் கையளிக்கப்பட்டது.

இதனையடுத்து சிறுமியின் வீட்டில் இடம்பெற்ற இறுதி கிரியை நிகழ்வுகளை தொடர்ந்து, சிறுமி ரெஜினாவின் சடலம் திருவடிநிலை மயானத்தில் நல்லடக்கம் செய்யப்பட்டது.

இதில், பொது மக்கள், காட்டுப்புலம் அ.த.க பாடசாலை அதிபர், ஆசிரியர்கள், வெண்கரம் ஆசிரியர்கள், செயற்பாட்டாளர்கள், சமூக அமைப்புக்களின் பிரதிநிதிகள், வலி.மேற்கு பிரதேச சபை உறுப்பினர்கள் என பலரும் கலந்துகொண்டனர்.

தந்தையை பழிதீர்க்கும் நோக்கிலேயே சிறுமி ரெஜினா கொலை செய்யப்பட்டுள்ளதாக வடக்கு மாகாண சிறப்பு பொலிஸ் பிரிவின் மூத்த பொலிஸ் அத்தியட்சகர் த.கணேசநாதன் தெரிவித்துள்ளார்.
அத்துடன், இந்த கொலைக்கு சிறுமியின் சிறிய தந்தை உள்ளிட்ட நால்வர் துணைபோயுள்ளதாகவும் அவர் குறிப்பிட்டுள்ளார்.

யாழ்ப்பாணம் சுழிபுரம் பகுதியில் உள்ள கிணறு ஒன்றில் இருந்து நேற்று முன்தினம் மாலை ரெஜினா என்ற ஆறு வயது சிறுமியின் சடலம் மீட்கப்பட்டுள்ளது. இந்த சம்பவம் தொடர்பில் சந்தேகநபர்கள் சிலர் கைது செய்யப்பட்டிருந்தனர்.

இந்நிலையில், சம்பவம் தொடர்பில் கருத்து தெரிவித்துள்ள வடக்கு மாகாண சிறப்பு பொலிஸ் பிரிவின் மூத்த பொலிஸ் அத்தியட்சகர் த.கணேசநாதன் இவ்வாறு கூறியுள்ளார்.

“சம்பவம் தொடர்பான விசாரணையின் பின் சிறுமியின் சீருடை மறைத்து வைக்கப்பட்டிருந்த இடத்தை பிரதான சந்தேகநபர் அடையாளம் காட்டியுள்ளார். இதனையடுத்து பாடசாலைச் சீருடை மீட்கப்பட்டது.

எனினும் தோடுகளை மறைத்து வைத்த இடத்தை சந்தேகநபரால் அடையாளம் காட்டமுடியவில்லை. சந்தேகநபர்கள் கஞ்சா போதைப் பொருளுக்கு அடிமையானவர்கள்.

அத்துடன், சந்தேகநபர்கள் 19 தொடக்கம் 23 வயதுக்குட்பட்டவர்கள். இவர்கள் பனைகளில் ஏறி திருட்டுத்தனமாக கள்ளு இறக்கி குடித்துள்ளனர். இதனை கொலை செய்யப்பட்ட சிறுமியின் தந்தை அறிந்துள்ளார்.

இதனையடுத்து சந்தேகநபர்களில் இருவரை அடித்து கண்டித்திருந்தார். இந்த சம்பவம் கடந்த ஒரு வாரத்திற்கு முன்னர் இடம்பெற்றுள்ளது.

இந்நிலையில், சிறுமியின் தந்தையை பழிதீர்க்கவேண்டும் என்ற வெறியோடு பிரதான சந்தேகநபர் இருந்துள்ளார். இதற்காக சிறுமி ரெஜினாவை கொலை செய்துள்ளனர். இதற்கு சிறுமியின் சிறிய தந்தையும் உடந்தையாக இருந்துள்ளார்.

கொலையை திசை திருப்ப தோடுகளை எடுத்ததுடன், சீருடையையும் களைந்துவிட்டு சடலத்தை கிணற்றுக்குள் போட்டுள்ளனர்” என குறிப்பிட்டுள்ளார்.

யாழ். சுழிபுரத்தில் படுகொலை செய்யப்பட்ட சிறுமி றெஜினா பாலியல் தொல்லைகளுக்கு உள்ளாகியுள்ளதாக தெரிவிக்கப்படுகிறது.

இந்த விடயம் பிரேத பரிசோதனையின் மூலம் தெரியவந்துள்ளது என யாழ். போதனா வைத்தியசாலையின் சட்டவைத்திய அதிகாரி உ.மயூரதன் குறிப்பிட்டதாக கொழும்பு ஊடகமொன்று செய்தி வெளியிட்டுள்ளது.

பாடசாலை சீருடையுடன் கடத்தப்பட்ட 6 வயது சிறுமி சிவனேஸ்வரன் றெஜினா, கொலை செய்யப்பட்ட நிலையில் சடலமாக மீட்கப்பட்டிருந்தார்.

சுழிபுரம் காட்டுப்புலம் அ.த.க பாடசாலையில் தரம் ஒன்றில் கல்வி பயிலும் குறித்த மாணவி பாடசாலைக்கு சென்று மதியம் வீடு திரும்பியுள்ளார்.

மாணவி வீட்டிற்கு வந்த நேரத்தில், தாயார் சமூர்த்தி வங்கிக்குச் சென்றுள்ளார். தகப்பனார் கூலி வேலைக்குச் சென்றுள்ளார்.

இந்த நிலையில் மாலை 3.00 மணியளவில் வீட்டிற்கு வந்த தாயார் மகளைக் காணவில்லை என தனது சகோதரியின் வீட்டிற்குச் சென்று தேடியுள்ளார்.

எனினும், அங்கு வரவில்லை என சிறுமியின் பெரியதாயார் தெரிவித்ததனையடுத்து குறித்த சிறுமியியை உறவினர்கள் ஒன்று சேர்ந்து தேடியுள்ளனர்.

விடயத்தினை அறிந்த அந்த பகுதி இளைஞர்கள் அனைவரும் சேர்ந்து கிராமம் முழுவதும் தேடியுள்ளனர்.

அப்போது அந்தப் பகுதியில் இருந்து 200 மீற்றர் தூரத்தில் ஆள் நடமாட்டம் அற்ற பகுதியில் காணப்பட்ட கிணற்றில் சிறுமியின் சடலம் கிடந்துள்ளது.

சிறுமியைச் சடலமாக கண்ட இளைஞர் கதறி அழுதவாறு தாயாருக்கு தெரிவித்துள்ளார். அதன்பின்னர் உறவினர்கள் வட்டுக்கோட்டைப் பொலிஸாருக்கு தகவல் வழங்கியுள்ளனர்.

தகவலின் பிரகாரம் சம்பவ இடத்திற்குச் சென்ற வட்டுக்கோட்டைப் பொலிஸார் சிறுமியின் சடலத்தினை மீட்டிருந்ததுடன் சம்பவம் தொடர்பான விசாரணைகளையும் மேற்கொண்டு வருகின்றனர்.