வவுனியா பூந்தோட்டம்  மகா வித்தியாலயத்தின் 2017ம் ஆண்டுக்கான இல்ல மெய்வல்லுநர் திறனாய்வு இன்று (02.02.2017) மாலை வவுனியா லயன்ஸ் கழக மைதானத்தில் இடம் பெற்றது.

பாடசாலையின் அதிபர் திருமதி கி.நந்தபாலன் தலைமையில் இடம்பெற்ற இந்நிகழ்வில் பிரதம விருந்தினராக வன்னி மாவட்ட பாராளுமன்ற உறுப்பினரும் பாராளுமன்ற குழுக்களின் பிரதித்தலைவருமான செல்வம் அடைக்கலநாதன், சிறப்பு விருந்தினர்களாக வட மாகாண சபை உறுப்பினர்களான செந்தில்நாதன் மயூரன், G.T லிங்கநாதன் ஆகியோருடன்,

கெளரவ விருந்தினர்களாக முன்னாள் வடமாகாண சபை உறுப்பினரும் கோட்டக்கல்விப்பணிப்பாளர் நடராஜ், உடற்கல்வி உதவிப்பணிப்பாளர் சுபசிங்க , வவுனியா மக்கள் வங்கி உதவியாளர் கோடீஸ்வரன் ஆகியோர் கலந்து கொண்டனர்.

இங்கு உரையாற்றிய பாராளுமன்ற உறுப்பினர், நான்கு நாட்கள் மைதானங்கள் வழங்கப்பட்டு சிறப்பாக இவ் விளையாட்டுப் போட்டியை சிறப்பாக ஒருங்கிணைத்த பாடசாலைச்சமூகத்துக்கு பாராட்டுக்களை தெரிவித்துக்கொள்கினறேன்.

இடைவேளையின் போது இடம்பெற்ற அன்ன நடனம் மிகச்சிறப்பாக இருந்தது. அதை பழக்கிய மற்றும் பங்குபற்றிய பாடசாலை மாணவர்கள் , ஆசிரியர்களுக்கு வாழ்த்துக்கள். இப்பாடசாலையானது வளங்கள் குறைவான நிலையிலும் மாணவர்கள் பலரை பல்கலைக்கழகத்துக்கு அனுப்பியமை பெருமை தருகின்றது.

தூர இடங்களில் இருந்து வந்து வன்னி மாவட்டத்தின் பல பகுதிகளிலும் கடைமையாற்றிக் கொண்டிருக்கிறார்கள் ஆசிரியர்கள் பலர். அவர்களுக்கு எனது நன்றிகள் .போரின் போதும் உயிரைக்கூட பொருட்படுத்தாது மரங்களுக்கு கீழ் சேவையாற்றியவர்கள் எமது ஆசிரியர்கள். எனவே மாணவர்களாகிய நீங்கள் கல்வியில் சிறந்து விளங்கி அவர்களுக்கு பெருமை சேர்க்க வேண்டும்.

மாணவர்கள் களியாட்டங்களிலும் , தொலைக்காட்சி திரைப்படங்களிலும் கவனத்தை செலுத்தாது கல்வியில் முன்னேற வேண்டும். பெற்றோர்கள் தங்கள் பிள்ளைகள் தங்களைப் போன்று கஸ்டப்படக்கூடாது என்று மாணவர்களாகிய நீங்கள் படித்து நல்ல நிலைக்கு வரவேண்டும் என்பதற்காக தங்களை வருத்தி உங்களுக்காக கஸ்டப்படுகின்றார்கள்.

மாணவர்கள் நீங்கள் அதை உணர்ந்து உங்கள் கல்வியில் முன்றேங்களை பெறவேண்டும். பெற்றோர்களாகிய நீங்கள் தொலைக்காட்சி போன்றவற்றில் மூழ்காமல் உங்கள் பிள்ளைகளுடன் நேரத்தை செலவழியுங்கள்.

ஒரு காலத்திலே முதலாவதாக விளங்கிய எமது மாகாணம் இன்று பின்தங்கியுள்ளது. மாணவர்கள் தேவையற்ற செயற்பாடுகளில் ஈடுபடக்கூடாது. உண்மையில் வன்னி மாவட்ட இளைஞர்களை எண்ணி பெருமை கொள்கிறேன். அவர்கள் அப்படியான செயற்பாடுகளில் ஈடுபடுவதில்லை . பாடசாலைக்கு தேவையான உதவிகளை வழங்கவுள்ளதாகவும் குறிப்பிட்டார்.

வவுனியாவில் கணவனின் தாக்குதலில் மனைவி படுகாயமடைந்து பொது வைத்தியசாலையில் அனுமதிக்கப்பட்டுள்ளார். இச் சம்பவம் தொடர்பாக மேலும் தெரியவருகையில்..

வவுனியா பழைய சுந்தரபுரம் பகுதியில் வசித்து வந்த நான்கு வயது ஆண் பிள்ளையின் தாயான வடிவேல் தமயந்தி 21வயது மீது கணவன் கத்தியால் இன்று (02.02.2017) அதிகாலை 5 மணிக்கு ஒளிந்திருந்து தாக்கியதில் படுகாயமடைந்து வவுனியா பொது வைத்தியசாலையில் அனுமதிக்கப்பட்டுள்ளார்.

மனைவி தனது கணவனுடன் முரண்பட்டு நீதிமன்ற வழக்கில் மனைவிக்கு கணவனால் மாதாந்தம் உதவித் தொகை வழங்கப்பட்டு வந்துள்ளது. மனைவி தனது தாய் தந்தையுடன் வசித்து வந்துள்ளார்.

எனினும் சில மாதமாக மனைவிக்கு செலுத்தவேண்டிய தொகையினை வழங்க தவறியுள்ளார். இதையடுத்து இருவருக்கும் இடையே சண்டை ஏற்பட்டுள்ளது.

நேற்று தனது மகனை பார்வையிடச் சென்றதுடன் மனைவியின் தந்தையிடம் உங்கள் மகளை வெட்டுவேன் என்று தெரிவித்து விட்டு சென்றுள்ளார்.

இதையடுத்து இன்று காலை கணவன் ஒளிந்திருந்து மனைவி மீது கத்தியால் வெட்டியதில் தலையில் படுகாயமடைந்து வவுனியா பொது வைத்தியசாலையில் அனுமதிக்கப்பட்டுள்ளார்.

இச்சம்பவத்தினையடுத்து பொலிசார் மேற்கொண்ட விசாரணைகளின்போது கணவன் தற்போது கைது செய்யப்பட்டு மேலதிக விசாரணைகளை பொலிசார் மேற்கொண்டு வருகின்றனர்.

வவுனியாவில் நேற்று முன்தினம் கட்டுத்துவக்கு வெடித்ததில் ஒருவர் படுகாயமடைந்து வவுனியா பொது வைத்தியசாலையில் அனுமதிக்கப்பட்டுள்ளார். இது தொடர்பாக மேலும் தெரியவருகையில்..

நேற்று முன்தினம் இறம்பைக்குளம் பகுதியைச் சேர்ந்த பிரான்சிஸ் என்ற இரண்டு பிள்ளைகளின் தந்தை இரவு தனது கல்னாட்டிகுளம் பகுதியிலுள்ள வயலை பார்வையிடுவதற்காக சென்றுள்ளார்.

அங்கு காட்டு யானைகள் நின்றதை அவதானித்து அவற்றை கலைத்துக் கொண்டு சென்றபோது வயலில் வைக்கப்பட்ட கட்டுத் துவக்கில் அகப்பட்டு இரண்டு கால்களும் காயமடைந்த நிலையில் வைத்தியசாலையில் அனுமதிக்கப்பட்டு சிகிச்சை பெற்று வருகின்றார்.

 
வவுனியா இ.போ. சபையின் டிப்போ ஊழியர்கள் தங்களுக்கு வவுனியா பழைய பேருந்து தரிப்பிடத்தை தருமாறு கோரியும் வவுனியா டிப்போ முகாமையாளரை மாற்றுமாறு கோரியும் இன்றிலிருந்து தமக்கு ஒரு முடிவு கிடைக்கும் வரை பணிப் புறக்கணிப்பில் ஈடுபட்டுள்ளனர்.

புதிய பேருந்து நிலையம் திறந்து வைக்கப்பட்டதிலிருந்து தனியார் பேரூந்தினருக்கும் இ.போ.ச பேரூந்தினருக்கும் இடையில் முறுகல் நிலை காணப்பட்டு இரு தரப்பினருக்கு இடையில் சமரசம் செய்து வைக்கப்பட்டாலும் பிரச்சினை தீர்வுக்கு வந்ததாகவே இல்லை.

இ.போ.ச ஊழியர்கள் இன்று வடமாகாண ரீதியாக இலங்கைப் போக்குவரத்து சபையின் அலுவலகத்தின் வாயிலை மூடி அலுவலக வளாகத்தில் பணிப்புறக்கணிப்பில் ஈடுபட்டுக்கொண்டிருக்கின்றார்கள்.

இதனால் போக்குவரத்து செய்வதில் மக்கள் பெரும் சிரமத்தை எதிர்நோக்குகின்றார்கள். அத்துடன் பாடசாலைக்கு செல்லும் மாணவர்கள், அரச உத்தியோகத்தர்கள் பருவ கால சீட்டுடன் வந்தும் நேரத்துக்கு செல்ல முடியாத நிலையில் காத்திருந்தமையையும் அவதானிக்கக் கூடியதாக இருந்தது.

இ.போ.ச வவுனியா சாலைக்கு சென்ற பாராளுமன்ற உறுப்பினர் சிவசக்தி ஆனந்தன் அவர்களுடன் கலந்துரையாடியதுடன் இன்றைய தினம் வவுனியா மாவட்ட அரசாங்க அதிபர் கொழும்பு சென்றிருப்பதால் நாளைய தினம் அவருடன் கலந்துரையாடி உடனடியாக இதற்கான தீர்வினை பெற்றுத் தருவதாக தெரிவித்தார்.

 
கொழும்பில் கொள்முதல் செய்யப்பட்டு வவுனியாவில் கட்டுப்பாட்டு விலையான 93ரூபாய் விலைக்கு விற்பனை செய்யமுடியாமல் இருப்பதாக தெரிவித்து நேற்று முதல் சீனிக் கொள்வனவில் ஈடுபடப் போவதில்லை என்று நேற்று (01.02.2017) மாலை வவுனியா வர்த்தகர் சங்கத்தில் சீனிக் கொள்வனவாளர்களுடன் இடம்பெற்ற கலந்துரையாடலில் முடிவு செய்யப்பட்டுள்ளது.

இதனால் வவுனியாவில் சீனிக்கு பெரும் தட்டுப்பாடு நிலவவுள்ளது. இலங்கை வர்த்தக மானியில் கட்டுப்பாட்டு விலையாக 93 ரூபாவாக விற்பனை செய்யுமாறு அறிவிக்கப்பட்டுள்ளது.

இதையடுத்து கொழும்பில் கொள்முதல் செய்யப்பட்டு வவுனியாவிற்கு எடுத்துவந்து விற்பனை செய்யும்போது சில்லறை விற்பனையாளர்களுக்கு 90 ரூபாவிற்கு விற்பனை செய்யவேண்டிய தேவை ஏற்படுகின்றது.

அவர்கள் உள்ளுர் வியாபார நிலையங்களில் 93 ரூபாவாக விற்பனை செய்யவேண்டும். சீனி கொள்வனவு செய்து போக்குவரத்து செய்து வவுனியாவிற்கு எடுத்து வந்து விற்பனை செய்யமுடியாத கட்டத்தில் உள்ளதால் நேற்று முதல் வவுனியாவிற்கான சீனி கொள்வனவினை நிறுத்தியுள்ளதாகவும். இது விடயம் தொடர்பாக ஏற்கனவே அரச மட்டத்தில் கலந்துரையாடப்பட்டுள்ளதாகவும் அதில் தமக்கு சாதகமான பதில் கிடையாத பட்சத்தில் நேற்று வவுனியா வர்த்தக சங்கத்தில் இடம்பெற்ற கலந்துரையாடலில் தாம் இந்த முடிவிற்கு வந்துள்ளதாகவும் வவுனியா சீனி கொள்வனவாளர்கள் தெரிவித்துள்ளனர்.

இக் கலந்துரையாடலில் வவுனியா வர்த்தக சங்கத் தலைவர் ரி.கே.இராஜலிங்கம், செயலாளர், பொருளாலர் மற்றும் நிர்வாக உத்தியோகத்தர்கள் எனப் பலரும் கலந்து கொண்டனர்.