அமெரிக்க அதிபர் ஒபாமா குறித்து இதுவரை வெளிவராத சுவாரசியமான தகவல்கள் வெளியாகியுள்ளன.

ஐக்கிய அமெரிக்காவின் தற்போதைய குடியரசுத் தலைவர் பராக் உசைன் ஒபாமா. 2008ம் ஆண்டு குடியரசுத் தலைவர் தேர்தலில் மக்களாட்சிக் கட்சி வேட்பாளராகப் போட்டியியிட்டு வெற்றி பெற்றார், நவம்பர் 6, 2012 அன்று நடந்த அதிபர் தேர்தலில் குடியரசு கட்சி சார்பாக நின்ற மிட் ராம்னியை தோற்கடித்து மீண்டும் அதிபர் ஆனார்.

அமெரிக்க வரலாற்றில் ஆபிரிக்க அமெரிக்க இனத்தை சேர்ந்த முதலாவது குடியரசுத் தலைவர் என்ற பெருமையும், மற்றும் செனட் அவையின் உறுப்பினரான ஐந்தாவது ஆபிரிக்க-அமெரிக்க இனத்தவர் என்ற பெருமையும் இவருக்கு உண்டு. இது தவிர ஒபாமைப் பற்றி மேலும் சில சுவாரஸ்யமான தகவல்கள் வெளியாகியுள்ளன.

இரண்டாவது முறை அமெரிக்காவின் அதிபராக தெரிவு செய்யப்பட்டுள்ள ஒபாமாவின் அதிகாரப்பூர்வ இல்லமாகவும், அலுவலகமாகவும் வெள்ளை மாளிகை விளங்குகிறது. அம்மாளிகை 132 அறைகள், 35 குளியல் அறைகளுடன் 18 ஏக்கர் நிலப்பரப்பில் கட்டப்பட்டது. அதிபரின் மாளிகைக்கு மேலே விமானங்கள் பறக்க தடை செய்யப்பட்டுள்ளது.

இது தவிர வொஷிங்டனில் இருந்து 70 மைல் தொலைவில் உள்ள மேரிலேண்ட் பகுதியில் கேடோக்டின் மலையில் அமைக்கப்பட்டுள்ள கேம்ப் டேவிட் ஓய்வு இல்லத்திலும், 70 ஆயிரம் சதுரடி நிலப்பரப்பில் 20 படுக்கையறைகள், 35 குளியல் அறைகள் உள்பட 119 அறைகள் கொண்ட, வெள்ளை மாளிகையைவிட அளவில் பெரியதான ‘ப்ளெய்ர்’ இல்லத்திலும் ஒபாமா தங்கிக் கொள்ள அனுமதி உண்டு.

கடந்த 2008ம் ஆண்டு ஒபாமாவுக்கென சிறப்பாக வடிவமைக்கப்பட்ட போயிங்-747 ரக விமானத்தின் காக் பிட்டில் அமர்ந்திருக்கும்போது, விமானம் ஏறும்போதும் இறங்கும்போதும் எந்த மாற்றமும் உணரப்படுவதில்லை என்பது குறிப்பிடத்தக்கது.

இந்த மினாத்தில் அதிபர் உபயோகிக்கும் மேசை எதிர்விசையில் இயங்கி எப்போதுமே சம நிலையில் உள்ளது போல் இருக்கும். அவசர சிகிச்சைக்கு என தயார் நிலையில் மருத்துவ அறையும் இந்த விமானத்தினுள் உண்டு.

நாட்டு மக்களிடையே விமானத்தில் இருந்தபடியே பேசுவதற்கு வசதியாக, அனைத்து நவீன தொலைத்தொடர்பு தொழில்நுட்பமும் இந்த விமானத்தில் செய்யப்பட்டுள்ளது. அதிபர் பயணிக்கும்போது, விமானிகளிடமிருந்து எந்த அறிவிப்பும் ஒலிபரப்பப்பட மாட்டாது.

அதிபரின் மரணத்திற்கு பின்னர் அவரது சவப்பெட்டியை விமானத்தில் கொண்டு செல்ல நேர்ந்தால், அதற்கேற்ப உள்ளே இருக்கும் பொருட்களை மாற்றம் செய்ய முடியும். விமானத்தின் நடுப்பகுதியில், அதிபரின் சவப்பெட்டியை ஏற்றி, இறக்கும் அளவிற்கு பெரிய கதவுகள் அமைக்கப்பட்டுள்ளது குறிப்பிடத்தக்கது.

அதிபரின் சாலைவழி பயணத்துக்கென ‘கெடிலாக் வன்’ என்றழைக்கப்படும் சிறப்பு கார் உபயோகிக்கப்படுகிறது. நவீன தொலை தொடர்பு சாதனங்கள், தீயணைப்பு கருவி, ஒக்ஸிஜன் செலுத்தும் கருவி போன்ற வசதிகள் இந்த காரினுள் உள்ளன. டயர் பஞ்சரான நிலையிலும் நிற்காமல் ஓடும் வகையில், இந்த கார் வடிவமைக்கப்பட்டுள்ளது.

தினமும் காலை 7 மணிக்கு கண் விழிக்கும் ஒபாமா, 7.30 மணிக்கு ஜிம்மிற்குள் நுழைகிறார். தினமும் ஒரு மணி நேரம் உடற்பயிற்சி செய்யும் ஒபாமா, குளியலுக்குப் பின், காலை சிற்றுண்டியை முடித்துவிட்டு எல்லா நாளிதழ்களையும் புரட்டி, முந்தைய நாளின் முக்கிய நிகழ்வுகளை பார்வையிடுகிறார்.

லிப்ட் வழியாக தனது ஓவல் ஒஃபீஸ் வந்து சேரும் ஒபாமா, பாதுகாப்பு தொடர்பான செய்திகளை முதலில் அறிந்துக் கொள்வார். ஆரம்ப நாட்களில் ரகசிய செய்திகளை கேட்டு ஆச்சரியமடைந்த அவர், இப்போதெல்லாம் முன்னர் போல் ஆச்சரியத்தை வெளிப்படுத்துவதில்லை என அவரது அலுவலகத் தகவல்கள் தெரிவிக்கின்றன.

வொஷிங்டனில் இருக்கும்போது அரைநாள் பொழுதை தனது அலுவலகத்தின் உள்ளேயே செலவிடுகிறார். முதன்முறையாக முன்னாள் அதிபர் ஜோர்ஜ் புஷ்ஷை சந்திக்க இந்த அலுவலகத்தினுள் நுழைந்த அவர், இரண்டாம் முறையாக, அதிபராக பதவியேற்ற பின், தனது முதல் பணி நாளின்போதுதான் மீண்டும் இந்த அலுவலகத்திற்குள் வந்தார் என்பது குறிப்பிடத்தக்கது.

ஒபாமா அதிபராக பதவியேற்ற அலுவலகத்தில் ஜோர்ஜ் புஷ் காலத்தில் வைக்கப்பட்டிருந்த ‘ஒயில் பெயிண்டிங்’ படங்களை எல்லாம் அகற்றி விட்டு, தன் ரசனைக்கேற்ப மெதுமெதுவாக சில மாற்றங்களை செய்தார். அவர் பதவியேற்ற வேளையில் அமெரிக்க பொருளாதாரம் மிகவும் நலிவடைந்து இருந்தது குறிப்பிடத்தக்கது.

இரவு 10 மணிக்கு மேல் நள்ளிரவு வரை உள்ள நேரத்தை தனது குடும்பத்தாருடன் கழிக்கும் ஒபாமா, பின்னிரவு 1 மணியளவில் தூங்குகிறார். 6 மணி நேர உறக்கத்திற்கு பின்னர், மீண்டும் மறுநாளுக்கான அலுவல்கள் காலை 7 மணியில் இருந்து தொடங்குகின்றன.

உறங்கும்போது அவரை எழுப்பி யாரும், எந்த தகவலும் சொல்வதில்லை. அவசர தகவல்கள் ஏதுமிருப்பின், அவரது முதல் நிலை உதவியாளர்களுக்கு தெரிவிக்கப்படும். சூழ்நிலைக்கேற்ப அவர்களே முடிவெடுப்பார்களாம்.

உறக்கத்தில் இருந்த ஒபாமாவை, அவரது உதவியாளர்கள் ஒரேயொரு முறை மட்டும், ஒரு முக்கிய தகவலை கூறுவதற்காக எழுப்பியுள்ளனர். 2009ம் ஆண்டு, ஒக்டோபர் மாதம் 9ம் திகதி அமைதிக்கான நோபல் பரிசு அவருக்கு வழங்கப்பட்டுள்ளது என்ற செய்தியை உதவியாளர்கள் அவருக்கு தெரிவித்தனர்.

பொதுவாக அதிகமாக பேசும் பழக்கம் இல்லாத ஒபாமா ரத்தின சுருக்கமாக பேசக் கூடியவர். அடுத்தவர்களை பேசவிட்டு, அதிலிருக்கும் நல்ல கருத்துகளை தேர்வு செய்து கொள்வாராம் ஒபாமா. பல்வேறு சாதக-பாதகங்களை சீராய்ந்து முடிவெடுப்பதையே அவர் அதிகம் விரும்புகிறார்.

அமெரிக்க அதிபருக்கு சம்பளமாக ஆண்டுக்கு 4 லட்சம் டொலர்கள் வழங்கப்படுகின்றது. மேலும் பயணப்படிக்கென 1 லட்சம் டொலர்களும், அலுவலக விழாக்களுக்கென 19 ஆயிரம் டொலர்களும் உண்டு. சம்பள பணத்திற்கு மட்டும் வரிப்பிடித்தம் செய்யப்படுகின்றது. மற்ற படிகளுக்கு வரி கிடையாது.

2008ம் ஆண்டு மார்ச் மாத நிலவரத்தின்படி, முன்னாள் அதிபர்களுக்கு ஆண்டுதோறும் ஓய்வூதியமாக 1 லட்சத்து 91 ஆயிரத்து 300 டொலர்கள் தரப்படுகின்றது. அவர்களின் அலுவலகத்திற்கான இடமும், ஊழியர்களுக்கான சம்பளமும், அலுவலக செலவினங்களுக்கான நிதியும், பயணப்படியும் அமெரிக்க அரசு வழங்குகின்றது.

2003ம் ஆண்டிலிருந்து, அதிபரின் பாதுகாப்பு பணிக்கு அமெரிக்க ரகசிய பொலிசார் ஈடுபடுத்தப்பட்டுள்ளனர். அமெரிக்காவின் முன்னாள் அதிபர்கள், அரசியல் கட்சி தலைவர்களின் பாதுகாப்பையும் இவர்கள் தான் நிர்வகித்து வருகின்றனர்.

பல்வேறு பாதுகாப்புகளுக்கு மத்தியில் வாழும் ஒபாமா, மாதம் ஒன்றுக்கு சராசரியாக 500 கொலை மிரட்டல்களை அமெரிக்க அதிபர் எதிர்கொள்ள வேண்டியுள்ளது குறிப்பிடத்தக்கது.

சிரியாவின் பிரதான நகரங்களில் ஒன்றான அலெப்போ நகரில் மேற்கொள்ளப்பட்ட கொத்து குண்டு தாக்குதலில் நூற்றுக்கும் மேற்பட்டோர் பலியாகியுள்ளனர்.

கடந்த இரண்டு வார காலப்பகுதியில் மாத்திரம் 517 பொதுமக்கள் கொல்லப்பட்டுள்ளனர். இதில் 146 சிறுவர்களும் 47 பெண்களும் அடங்குவதாக சர்வதேச செய்திகள் தெரிவிக்கின்றன.

இந்த காலப்பகுதியில் சிரிய இராணுவத்தினரால் அலெப்போ நகரை குறிவைத்து வானூர்தியில் மூலம் கொத்து குண்டுகள் வீசப்பட்டதாக தெரிவிக்கப்படுகிறது.

சவூதி அரேபிய இளவரசருக்கு கொலைவழக்கில் மரண தண்டனை விதிக்கப்பட உள்ளது. துபாயில் சவூதி இளவரசர் தன்னுடன் தங்கியிருந்த சக சவூதி அரபியரை கொலை செய்துள்ளார்.

அந்நாட்டு வழக்கப்படி கொலையாளி சார்பில் கொலை செய்யப்பட்டவரின் குடும்பத்திற்க்கு பெருந்தொகை ஒன்றை கொடுத்து விட்டால் மரண தண்டனையிலிருந்து தப்பித்து கொள்ளலாம்.

ஆனால் இந்த வழக்கில் இளவரசர் தரப்பில் தரக்கூடிய தொகையை பெற்றுக்கொண்டு, மன்னிப்பு வழங்க கொலை செய்யப்பட்டவர் குடும்பம் முன்வரவில்லை. இதனால் சவூதி இளவரசருக்கு மரண தண்டனையை நிறைவேற்றும் நிலை உருவாகி உள்ளது.

மேலும் சவூதியில் இதுவரை மன்னர் குடும்பத்தில் யாருக்கும் மரண தண்டனை விதிக்கப்பட்டதில்லை என்பது குறிப்பிடதக்கது.

இங்கிலாந்து அரசின் அதிகாரப்பூர்வ இணையதளத்தில் விபச்சாரியாக வேலை செய்ய பெண்கள் தேவை என்று வெளியான விளம்பரத்தால் தலைநகர் லண்டனில் வசிக்கும் மக்களிடையே பெரும் பரபரப்பு ஏற்பட்டுள்ளது.

வேலை நிமித்தமாக தன்னந்தனியே வெளிநாடுகளுக்கு செல்லும் ஆண், பெண்களுக்கு பல நாடுகளில் இயங்கிவரும் தனியார் நிறுவனங்கள் அவர்களின் வழித்துணைக்கு பாதுகாவலர்களாக எதிர் பாலினத்தை சேர்ந்தவர்களை பணியமர்த்துகிறது. இவ்வாறு பணியமர்த்தப்படும் நபர்கள் அந்நாட்டில் உள்ள அனைத்து தகவல்களையும் விரல் நுனியில் வைத்திருப்பார்கள்.

தனியாக வரும் ஆணுக்கு துணையாக அழகான பெண்களையும், பெண்ணுக்கு துணையாக இளமையும், நல்ல உடல்கட்டும் கொண்ட ஆண்களையும் இந்த நிறுவனங்கள் ஏற்பாடு செய்து தருகின்றன.

ஒருவர் எந்த நாட்டுக்கு போக வேண்டுமோ அந்த நாட்டில் பிரபலமாக இயங்கிவரும் இதுபோன்ற நிறுவனங்களுக்கு முன்கூட்டியே தகவல் அளித்துவிட்டால் போதும். செல்பவர் ஆணாக இருந்தால் அழகான பெண்களின் புகைப்படங்களையும், பெண்ணாக இருந்தால் கட்டிளங்காளையர்களின் புகைப்படங்களையும் இந்த நிறுவனம் இ-மெயில் மூலமாக அனுப்பி வைத்துவிடும்.

வாடிக்கையாளர்களுக்கு பிடித்த நபரை தேர்வு செய்து தகவல் தெரிவித்து உறுதிபடுத்தி விட்டால் அவர்களை விமான நிலையத்திற்கே வந்து அந்த நபர்கள் அழைத்து செல்வார்கள்.

அந்த நேரம் முதல் வெளிநாட்டு வாடிக்கையாளரின் நிழல் போலவே இருந்து அவர் போகும் இடங்களுக்கு எல்லாம் கூடவே சென்று அவர் செலவிலேயே சாப்பிட்டு, அவர் தங்கும் அறையிலேயே இவர்கள் படுத்து தூங்குவார்கள்.

எஸ்கார்ட் செர்விஸ் என்றழைக்கப்படும் இந்த சேவைக்கு வாடிக்கையாளர்களிடம் இருந்து ஒரு பெரிய தொகையை கட்டணமாக பெறும் இந்த நிறுவனங்கள் தங்களது கமிஷன் போக பணியமர்த்தப்படும் நபர்களுக்கு சொற்ப தொகையை சம்பளமாக தருகின்றன.

இவ்வகையில், இங்கிலாந்தில் இயங்கிவரும் ஹார்னி எஸ்கார்ட்ஸ் என்ற நிறுவனத்தின் விளம்பரம் ஒன்று அரசின் வேலைவாய்ப்பு துறையின் அதிகாரபூர்வ இணயதளத்தில் தற்போது வெளியாகியுள்ளது. மேற்கண்ட நிறுவனத்தில் தங்களுக்கு வசதியான வேலை நேரங்களில் பணியாற்ற பெண்கள் தேவைப்படுகிறார்கள். அடிப்படை தகுதியாக செக்ஸ் உறவு வைத்துக் கொள்வதில் பிரியம் இருந்தால் போதும். விருப்பம் உள்ள பெண்களுக்கு ஒரு மணி நேரத்துக்கான சம்பளமாக 10 பவுண்டுகள் வழங்கப்படும் என அந்த விளம்பரத்தில் கூறப்பட்டுள்ளது.

இங்கிலாந்து அரசின் வேலை வாய்ப்பு மற்றும் ஓய்வூதிய அமைச்சகத்தின் அனுமதியுடன் வெளியிடப்பட்டுள்ள இந்த விளம்பரத்தை ஆதரித்தும், எதிர்த்தும் லண்டன் வாசிகளிடையே தற்போது சூடான பட்டிமன்றங்கள் நடைபெற்று வருகின்றன.

சிம்பாவேயில் முதலை வாய்க்குள் சிக்கிய மகனை தந்தை ஒருவர் போராடி மீட்டுள்ளார்.

சிம்பாப்வேயில் உள்ள ஒரு கிராமத்தை சேர்ந்தவர் தபாட்ஷ்வா கசேர். இவரது 11 வயது மகன் தபிவா. கிறிஸ்மஸ் பண்டிகை அன்று தந்தையும் மகனும் தங்கள் கிராமத்துக்கு செல்ல ஆற்றைக் கடந்தனர்.

அப்போது ஒரு முதலை தபிவாவை வாயால் கவ்விப் பிடித்தது. முதலை வாய்க்குள் சிக்கிய அவனை அப்படியே கடித்து தின்ன முயன்றது. இக்கொடூர சம்பவத்தை நேரில் பார்த்த அவனது தந்தை தபாட்ஷவாவிடம் ஆயுதம் எதுவும் இல்லை.

இருந்தாலும் ஆக்ரோஷத்துடன் முதலை மீது பாய்ந்தார். அதன் முதுகில் அமர்ந்து அதன் தாடையை அகற்ற முயன்றார்.

ஆனால் முடியவில்லை. தலையில் தனது கையால் ஓங்கி குத்தினார். இறுதியில் அதன் கண்ணில் ஓங்கி குத்தி கிழித்தார். இதனால் நிலை தடுமாறிய முதலை தனது வாயை திறந்தது. அதை தொடர்ந்து முதலை வாய்க்குள் சிக்கிய சிறுவன் தபிவா மீட்கப் பட்டான்.

ஆனால் முதலை கடித்ததில் அவனது ஒரு கால் துண்டானது. தபாட்ஷ்வா கையிலும் இரத்த காயம் ஏற்பட்டது. இவர்கள் இருவரும் வைத்தியசாலையில் அனுமதிக்கப்பட்டு சிகிச்சை பெற்று வருகின்றனர்.

சிம்பாப்வேயில் மழை காலத்தில் முதலைகள் தாக்குதல் சர்வ சாதாரணமாக நடக்கிறது.

பங்குத்தொழிலில் சம்பாதித்த பல மில்லியன் டொலர்கள் பெறுமதியான சொத்துகளையும் தானம் செய்துவிட்டு தனது 87வது வயதில் ஒரு அமெரிக்கர் தற்கொலை செய்துகொண்டுள்ளார்.

இறப்பதற்கு முன் தன்னிடம் மிச்சமிருந்த 100 மில்லியன் டொலர் சொத்துகளையும் இலாப நோக்கில்லாமல் நடைபெற்றுவரும் சுற்றுச்சூழல் குறித்து ஆலோசனைகள் அளித்துவரும் சுற்றுச்சூழல் பாதுகாப்பு நிதியத்திற்கு அளிப்பதாக எழுதி வைத்துவிட்டு தனது வீட்டின் 16வது மாடியிலிருந்து கீழே குதித்துத் தற்கொலை செய்துகொண்டுள்ளார்.

ரொபட் டபிள்யூ வில்சன் என்ற இந்த செல்வந்தர் அமெரிக்காவின் வால் ஸ்ட்ரீட்டில் நடைபெறும் பங்குத்தொழில் வர்ததகத்தில் முன்னணியில் இருந்தார்.

இதில் இவர் சம்பாதித்த தொகையின் மதிப்பு 800 மில்லியன் டொலராகும். பின்னர் சிறந்த கொடைவள்ளலாகவும் மாறினார். இவர் உதவி புரிந்த மற்ற நிறுவனங்களில் நியூயோர்க்கில் உள்ள ரோமன் கத்தோலிக மையம், உலக நினைவு சின்னங்கள் நிதியம், இயற்கை பாதுகாப்பு மற்றும் விலங்கு பாதுகாப்பு சங்கம் ஆகியவை அடங்கும்.

கடந்த 2010ம் ஆண்டில் ரோமன் கத்தோலிக்க மையத்திற்கு பெருந்தொகையை அளிக்க அவர் முடிவு செய்தபோது, நிதி குறைபாட்டினால் நாடு முழுவதும் உள்ள அவர்களின் பள்ளிகளை மூடவிருக்கின்றார்கள். பில்கேட்சிடம் இந்தப் பள்ளிகளைக் காப்பாற்றுவதற்குத் தேவையான பணம் இருந்திருந்தால் அவர் கொடுத்திருப்பார் என்று கூறியுள்ளார்.

சில மாதங்களுக்கு முன்னால் பக்கவாதத்தினால் பாதிக்கப்பட்ட அவர் இறப்பதற்கு முன் தான் கஷ்டப்பட விரும்பவில்லை என்று கூறியதாக அவரது நெருங்கிய நண்பர் ஸ்டீபன் விஸ்கசி தெரிவித்தார். சமீபத்தில் அவரை சந்தித்தபோதும் தான் இறப்பதற்கு இன்னும் 100 மில்லியன் டொலர் மீதியிருப்பதாக அவர் குறிப்பிட்டதாகவும் ஸ்டீபன் கூறினார்.

இறந்த ரொபர்ட்டின் சகோதரர் வில்லியம்(88) மட்டுமே இப்போது உயிருடன் இருக்கின்றார். அவருக்கும் குழந்தைகள் இல்லை.