கிளிநொச்சி பொலிஸ் பிரிவில் மோட்டார் சைக்கிள் ஒன்று கொள்ளையிடப்பட்டமை தொடர்பில் இளைஞர் ஒருவர் கைதுசெய்யப்பட்டுள்ளார்.

கிளிநொச்சி – பாரதிபுரம் பகுதியில் கடந்த 26ம் திகதி இந்தக் கொள்ளைச் சம்பவம் இடம்பெற்றுள்ளதாக பொலிஸில் முறையிடப்பட்டுள்ளது.

தனது மோட்டார் சைக்கிளை குறித்த பகுதியில் நிறுத்தி வைத்துவிட்டு அருகில் இருந்த உணவு விடுதியொன்றுக்கு சென்றதாகவும் பின் திரும்பி வந்து பார்த்த போது மோட்டார் சைக்கிளைக் காணவில்லை எனவும் முறைப்பாட்டாளர் குறிப்பிட்டுள்ளார்.

மேலும் இதன் பெறுமதி இரண்டு இலட்சம் ரூபா எனவும் தெரியவந்துள்ளது. இந்தநிலையில் சம்பவம் தொடர்பில் பாரதிபுரம் பகுதியைச் சேர்ந்த 33 வயதான ஒருவர் நேற்றைய தினம் கைதுசெய்யப்பட்டுள்ளார்.

சந்தேகநபர் இன்று கிளிநொச்சி நீதவான் நீதிமன்றத்தில் ஆஜர்படுத்தப்படவுள்ளார்

பொதுநலவாய உச்சி மாநாட்டை பகிஷ்கரிக்கப் போவதாக தமிழ் தேசியக் கூட்டமைப்பு எடுத்துள்ள முடிவிற்கு அரசாங்கம் கடும் அதிருப்தியை வெளிக்காட்டியுள்ளது.

அரசாங்கத்தின் பிரதம கொறடாவும் நீர் வழங்கல் வடிகாலமைப்பு அமைச்சருமான தினேஷ் குணவர்தன இது குறித்து கருத்து தெரிவிக்கும் போது..

அரசாங்கத்தின் கடும் அதிருப்தியை தெரிவித்ததுடன் உச்சி மாநாட்டிற்கான திகதி நெருங்கும் இச்சந்தர்ப்பத்தில் தமிழ் தேசியக் கூட்டமைப்பு எடுத்திருக்கும் முடிவு தவறானதெனவும் சுட்டிக்காட்டினார்.

இலங்கையில் 53 நாடுகளின் அரச தலைவர்களுடன் மிகவும் கோலாகலமாக நடத்தப்பட ஏற்பாடாகி வரும் பொதுநலவாய உச்சி மாநாட்டினை இவர்கள் எதிர்ப்பதாக அறிவித்திருப்பதில் ஆச்சரியப்படுவதற்கு ஒன்றுமில்லை எனவும் அவர் கூறினார்.

இலங்கையில் பொதுநலவாய மாநாடு நடத்தப்படுவதென்பது நாட்டிற்கும் மக்களுக்கும் அளப்பரிய பயன்களைப் பெற்றுத் தருமென்பதில் சந்தேகமில்லை.

தமிழ் தேசியக் கூட்டமைப்பினர் இதனை திட்டமிட்டு பகிஷ்கரிப்பது தாய்நாட்டிற்கும் அவர்களை நம்பி வாக்களித்த மக்களுக்கும் இழைக்கும் மிகப் பெரிய துரோகமாகு மெனவும் அமைச்சர் தினேஷ் குணவர்தன சுட்டிக்காட்டினார்.

தற்போது எமது நாட்டிற்கு வெளிநாடுகளிலிருந்து பொருளாதார ரீதியான உதவிகள் கிடைத்து வருகின்றன. இவற்றை நிறுத்தும் வகையிலேயே கூட்டமைப்பினர் செயற்பட்டு வருகின்றனர்.

இவர்களது செயற்பாட்டினால் வடக்கிலுள்ள மக்களின் முன்னேற்றமே தடைப்படப் போகிறது என்பதனை அறியாதவர்களாக இவர்கள் செயற்பட்டு வருகின்றனர்.

புலம்பெயர் வாழ் தமிழர்கள் போடும் தாளத்திற்கெல்லாம் ஆடிப் பழகிய இவர்களால் சுயமாக எந்தவொரு தீர்மானத்தையும் எடுக்க முடியவில்லை.

வடக்கு மக்களுக்கு பாரிய அபிவிருத்திகள் கிடைத்து வரும் இந்நேரத்தில் கூட்டமைப்பினரின் செயற்பாடுகள் மக்களுக்கு பாதகமாக அமையுமெனவும் அவர் தன் அதிருப்தியை தெரிவித்தார்.

வட மாகாண சபையின் முதலாவது அமர்வு கடந்த வெள்ளிக்கிழமை இடம்பெற்ற போது தான் அதில் கலந்து கொண்டதாகவும், முதலமைச்சர் சி. வி. விக்னேஸ்வரனின் உரையை செவிமடுத்ததாகவும் சில ஊடகங்களில் வெளிவந்துள்ள செய்திகள் உண்மைக்கு புறம்பானது என்று வட மாகாண ஆளுநர் ஜீ. ஏ. சந்திரசிறி தெரிவித்தார்.

வட மாகாண ஆளுநர் ஜி. ஏ.சந்திரசிறி இந்த விடயம் தொடர்பாக மேலும் விளக்கமளிக்கையில்..

வட மாகாண சபைக்காக புதிதாக நிர்மாணிக்கப்பட்ட கட்டடத் தொகுதி கடந்த 25ம் திகதி வெள்ளிக்கிழமை உத்தியோகபூர்வமாக திறந்து வைக்கப்பட்டது. காலை 8.30 மணிக்கு நடைபெற்ற அந்த நிகழ்விலேயே தானும், மாகாண முதலமைச்சரும் கலந்து கொண்டு கூட்டாக புதிய கட்டடத்தை திறந்து வைத்தோம்.

மாகாண ஆளுநர் என்ற வகையில் அந்த நிகழ்வில் கலந்துகொண்டதுடன் தேனீர் உபசாரத்திற்கு பின்னர் அங்கிருந்து வெளியேறிவிட்டேன். நான் அங்கிருந்து வெளியேறிய பின்னரே சபை அமர்வு காலை 9.30 மணிக்கு ஆரம்பமானது.

மாகாண சபை அமர்வு ஒன்றில் இலங்கையின் அரசியலமைப்பில் கூறப்பட்டுள்ளவாறு ஆளுநர் ஒருவர் கொள்கை பிரகடனம் போன்ற சம்பிரதாய நிகழ்வுகளைத் தவிர கலந்துகொள்ள முடியாது. இவற்றை தெரியாதவர்களே தான் அங்கு இருந்ததாகவும் முதலமைச்சரின் உரையை செவிமடுத்ததாகவும் எழுதியுள்ளனர்.

மாகாண சபை உறுப்பினர்களுக்காக கடந்த 24ம் திகதி யாழ். ரில்கோ ஹோட்டலில் ஒருநாள் வதிவிட செயலமர்வு நடைபெற்றது. அன்றைய தினம் அங்கு இடம்பெற்ற உரையை செவிமடுத்துக் கொண்டிருக்கும் போது எடுத்த புகைப்படத்தை தான் 25ம் திகதி சபை அமர்வில் கலந்து கொண்டது போன்று காண்பித்து செய்திகளை வெளியிட்டுள்ளது.

மாகாண ஆளுநர் என்பவர் ஜனாதிபதியின் பிரதிநிதியாவார். அவரை நியமிக்கும், அப்புறப்படுத்தும் அதிகாரம் ஜனாதிபதிக்கு மாத்திரம் உள்ள அதிகாரமாகும். எனவே ஆளுநருக்குரிய அதிகாரம் பிரகாரமே தான் சகல சந்தர்ப்பங்களிலும் செயற்பட்டு வருவதாகவும் அவர் சுட்டிக்காட்டினார்.

வடக்கு மாகாண முதலமைச்சர் சீ.வி.விக்னேஸ்வரன் 25ம் திகதி நடைபெற்ற கன்னி அமர்வில் உரையாற்றுகையில் இராணுவ அதிகாரி ஒருவர் ஆளுநராக இருப்பதை தாம் விரும்பவில்லை என தெரிவித்துள்ளதையடுத்தே ஆளுநர் சந்திரசிறியின் இந்த ஆதங்கமான தகவல் வெளியாகியுள்ளது குறிப்பிடத்தக்கது.

முல்லைத்தீவு தண்ணிமுறிப்பில் தமிழ் மீனவர்களின் 3 படகுகள் கடந்த 22ம் திகதி இனந்தெரியாதோரால் முழுமையாக எரித்து தீக்கிரையாக்கப்பட்டுள்ளன.

தண்ணிமுறிப்பு குளத்தில் நன்னீர் மீன்பிடியில் ஈடுபடுகின்ற அப்பகுதியைச் சேர்ந்த மீனவர்களின் படகுகளே இவ்வாறு எரிக்கப்பட்டிருக்கின்றன.

இதனையடுத்து, சம்பவம் தொடர்பில் அறிந்து கொண்ட வடமாகாணசபை உறுப்பினர் துரைராசா ரவிகரன் நேற்று சம்பவ இடத்திற்கு நேரில் சென்று எரிக்கப்பட்ட படகுகளைப் பார்வையிட்டுள்ளார்.

அங்கு அவர் கரைத்துறைப்பற்று கிராம அபிவிருத்திச் சங்கச் செயலாளர் மயூரன் குமுளமுனை, தண்ணிமுறிப்பு நன்னீர் மீன்பிடிச் சங்கத் தலைவர் யூட் நிரூபன், செயலாளர் சாந்தன் மற்றும் பாதிக்கப்பட்ட மீனவர்களிடம் குறித்த சம்பவம் தொடர்பிலான முழு விபரத்தைக் கேட்டறிந்தார்.

பாதிக்கப்பட்ட மீனவர்களின் தகவல்களின் அடிப்படையில், தண்ணிமுறிப்பின் மறுகரையில் இருந்த வந்த தென்னிலங்கை மீனவர்களின் நாசகாரச் செயல் என்று அறிந்த ரவிகரன், உடனடியாக அப்பகுதிக்கு விரைந்தார்.

அங்கு குறிப்பிட்ட சந்தேக நபரை அழைத்து விசாரித்ததுடன், சம்பவம் தொடர்பில் தனது வன்மையான கண்டனத்தைத் தெரிவித்தார். மேலும் அங்கு தடை செய்யப்பட்ட வலைகளைப் பயன்படுத்தி மீன்பிடித்துக் கொண்டிருந்த 3 மீனவர்களுக்கு விளக்கமளித்து எச்சரித்தார்.

பின்னர் பாதிக்கப்பட்ட மீனவர்களுக்கு ஆறுதல் கூறிய ரவிகரன், குறித்த சம்பவத்தை உடனடியாக உரியவர்களின் கவனத்திற்கு கொண்டு செல்வதுடன் தகுந்த நிவாரணம் வழங்க நடவடிக்கை எடுப்பதாகவும் தெரிவித்துள்ளார்.

மாணவர்கள் பலரை பாலியல் துஸ்பிரயோகத்திற்கு உட்படுத்திய குற்றச்சாட்டில் கைது செய்யப்பட்ட றக்குவானை, கந்தப்பொல பிரதேச பாடசாலை ஒன்றின் அதிபர் விளக்கமறியலில் வைக்கப்பட்டுள்ளார்.

சந்தேகநபர் பல்மடுல்ல நீதவான் நீதிமன்றில் நேற்று ஆஜர்படுத்தியதன் பின்னர் இன்று வரை விளக்கமறியலில் வைக்கப்பட்டுள்ளார். சந்தேகநபரான பாடசாலை அதிபர் நேற்று கைது செய்யப்பட்டார்

தனுஷ்கோடியில் இருந்து படகு மூலம் இலங்கை செல்ல தப்பிச் செல்ல முயன்ற நான்கு அகதிகளை இந்திய பொலிஸார் கைது செய்துள்ளனர்.

இலங்கை மன்னார், யாழ்ப்பாணத்தை சேர்ந்தவர் சந்திரசேகர் 37. இவரது மனைவி சுதா 33, மற்றும் அனோஜன் 35, ஏசுராஜ் 32 ஆகிய 4 பேரும் 1990 மற்றும் 2006ல் அகதிகளாக தமிழகம் சென்றுள்ளனர்.

இவர்கள் அறந்தாங்கி, ஈரோடு, திருப்பூர் முகாமில் தங்கினர். பின் முகாமில் இருந்து வெளியேறி கோவையில் பெயிண்டிங் வேலை செய்தனர்.

இதில் போதுமான வருமானம் இல்லாததால் மீண்டும் தனுஷ்கோடி வழியாக கள்ளபடகில் இலங்கை செல்ல திட்டமிட்டனர். இதற்காக முகவரிடம் 35 ஆயிரம் வாடகை பேசி முன்பணம் 5 ஆயிரம் கொடுத்துள்ளனர்.

நேற்று தனுஷ்கோடி பாறையடி எனும் கடற்கரைக்கு அகதிகள் 4 பேரும் வந்தனர். பொலிஸார் 4 பேரையும் பிடித்து விசாரித்து வருகின்றனர்.

தப்பிச் சென்ற தனுஷ்கோடி முகவர் முருகேசன் என்பவரை பொலிஸார் தேடி வருகின்றனர். இதுகுறித்து அகதிகள் கூறியதாவது..

பெயிண்டிங் வேலையில் போதுமான வருமானம் இல்லாமல் அவதிபட்டோம். அதனால் தனுஷ்கோடியில் இருந்து இலங்கை சென்று, கடவுச்சீட்டு பெற்று டுபாய் செல்ல முடிவெடுத்ததாக தெரிவித்தனர்.

தம்புள்ளை – தம்மன்னா எல பிரதேசத்தில் உள்ள மரக்கறி மற்றும் பழக்கடைகள் ஆறு திடீர் தீ விபத்தின் காரணமாக அழிவடைந்துள்ளன. நேற்று இரவு 9.00 மணியளவில் தீ விபத்து ஏற்பட்டுள்ளது.

தம்புள்ளை பொலிஸ், தம்புள்ளை நகரசபை தீயணைப்பு படையினர், மின்சார சபை மற்றும் பிரதேச மக்கள் இணைந்து தீயை அணைத்துள்ளனர். எனினும் விற்பனை நிலையங்கள் தீயினால் முற்றாக எரிந்து அழிவடைந்துள்ளன.

தீ விபத்தில் எந்தவொரு உயிர்ச் சேதமும் ஏற்படவில்லை.
இந்த விபத்தின் காரணமாக ஏற்பட்ட பொருட் சேதம் குறித்த தகவல்கள் இதுவரை வெளியாகவில்லை.

தீ விபத்து ஏற்பட்டமைக்கான காரணம் இதுவரையில் கண்டறியப்படவில்லை. தம்புள்ளை பொலிஸார் இந்த சம்பவம் குறித்த மேலதிக விசாரணைகளை மேற்கொண்டுள்ளனர்.