தமிழ் திரைப்பட இயக்குனர் சங்க நிர்வாகிகளை தேர்வு செய்வதற்கான தேர்தல் இசைக் கலைஞர்கள் சங்க வளாகத்தில் நேற்று நடைபெற்றது. இதில் இயக்குனர் விக்ரமன் தலைமையிலான ஒரு அணியும் நடிகரும் இயக்குனருமான விசு தலைமையிலான ஒரு அணியும் போட்டியிட்டது.

இதில் விக்ரமன் தலைமையிலான அணியில் தலைவர் பதவிக்கு விக்ரமனும் செயலாளர் பதவிக்கு ஆர்.கே.செல்வமணியும், பொருளாளர் பதவிக்கு வி.சேகரும் போட்டியிட்டனர்.

மேலும், துணை தலைவர் பதவிக்கு பி.வாசுவும் , கே.எஸ்.ரவிக்குமாரும் போட்டியிட்டனர். இணை செயலாளர்கள் பதவிக்கு லிங்குசாமி, சண்முக சுந்தரம், ஏகம்பவாணன், பேரரசு ஆகியோரும், செயற்குழு உறுப்பினர்களாக திருமலை உள்ளிட்ட 12 பேர் போட்டியிட்டனர்.

விசு தலைமையிலான அணியில் தலைவர் பதவிக்கு விசுவும், செயலாளராக ஆர்.சுந்தர்ராஜன், பொருளாளர் பதவிக்கு யாரும் போட்டியிடவில்லை. துணை தலைவராக மங்கை அரிராஜன், அரவிந்த்ராஜ் ஆகியோரும் இணை செயலாளர்களாக செய்யாறு ரவி, வி.பிரபாகர், ஜெய்பிராகஷ், கண்ணன் ஆகியோரும், செயற்குழு உறுப்பினர்களாக ரவிமரியா உள்ளிட்ட 12 பேரும் போட்டியிட்டனர்.

2700 உறுப்பினர்களை கொண்ட இச்சங்கத்திற்கான தேர்தல் நேற்று காலை 8 மணிக்கு தொடங்கியது. இதில் இயக்குனர்கள், இணை இயக்குனர்கள், உதவி இயக்குனர்கள் வாக்களித்தனர்.

மேலும் நடிகர்கள், சத்யராஜ், பார்த்திபன், எஸ்.வி.சேகர், ராமராஜன் ஆகியோரும் படம் இயக்கி உள்ளதால் அவர்களும் வாக்களித்தனர். இந்த வாக்குபதிவு முடிவுகள் பின்னர் அறிவிக்கப்பட்டன.

இதில் இயக்குனர் விக்ரமன் 716 வாக்குகள் பெற்று வெற்றி பெற்றதாக அறிவிக்கப்பட்டார். அவரை எதிர்த்து போட்டியிட்ட விசு 556 வாக்குகள் பெற்று தோல்வியை தழுவினார். மற்ற பதவிகளுக்கான முடிவுகள் இன்று அறிவிக்கப்படும்.

இதேவேளை நடிகர் ரஜினின் மூத்த மகளும் நடிகர் தனுஷின் மனைவியும், இயக்குனருமான ஐஸ்வர்யா தனுஷ் இத்தேர்தலில் வாக்களிக்க வந்தார். ஆனால் உள்ளே நுழைந்த அவரை தேர்தல் அதிகாரிகள் வாக்களிக்க அனுமதிக்கவில்லை. இதுகுறித்து காரணம் கேட்டதற்கு, இயக்குனர் சங்கத்தில் உறுப்பினராக நீடிப்பதற்கு வருடா வருடம் ரூ.600 சந்தா செலுத்த வேண்டும்.

இயக்குனர் ஐஸ்வர்யா தனுஷ் இந்த தொகையை செலுத்தவில்லையாம். எனவே அவர் வாக்களிக்க அனுமதி கிடையாது எனக்கூறி திருப்பி அனுப்பப்பட்டார் என்று கூறப்படுகிறது.

ஐஸ்வர்யா தன்னுடைய கணவர் தனுஷை வைத்து ‘3’ என்ற படத்தை இயக்கினார். தற்போது கடல் படத்தில் நடித்த கௌதம் கார்த்திக்கை வைத்து புதிய படத்தை இயக்கிவருகிறார் என்பது குறிப்பிடத்தக்கது.

நான் செரிலாக்ஸ் சாப்பிட்டோ பாரக்ஸ் குடித்தோ வளர்ந்தவன் இல்லை. இளம் வயதில் சாப்பாட்டுக்கே வழியில்லாமல் ஏழ்மையில் வாடியவன் என்று கூறியுள்ளார் நடிகர் தனுஷ். தனுஷின் மரியான், ராஞ்ஜ்ஹனா படங்கள் வெளியாகவிருக்கின்றன. இதையொட்டி அவர் பேட்டிகள் கொடுத்து வருகிறார். சமீபத்தில் அவர் அளித்த பேட்டியில் தன் இளமை நாட்களை நினைவு கூர்ந்துள்ளார்.

ஏழ்மை..

அவர் கூறுகையில்  அடிப்படையில் ரொம்ப ஏழ்மையான குடும்பம் எங்களுடையது. என் இளமை மிகுந்த வறுமையில் கழிந்திருக்கிறது. நான் பிறப்பதற்கு சில மாதங்களுக்கு முன்புதான் என் பெற்றோர் சென்னைக்கு வந்தனர். என் அப்பா ஒரு மில்லில் மாதம் ரூ 15 கூலிக்கு வேலை செய்தார். நான் செரிலாக்ஸோ பாரக்ஸோ குடித்து வளரவில்லை. அதிகபட்ச நல்ல உணவு அக்கம்பக்கத்து வீடுகளில் கொடுத்த தயிர்சாதம்தான்.

அண்ணன் பட்ட கஷ்டம்..

நானாவது பரவாயில்லை என் அண்ணன் வெறும் தண்ணீரைக் குடித்து பசியைப் பொறுத்துக் கொண்டிருந்திருக்கிறார். அதனால் என் அம்மாவுக்கு இயல்பாகவே அவர் மீது பாசம் அதிகம். என் தந்தை அதற்குள் சினிமாவில் உதவி இயக்குநராக வேலைக்கு சேர்ந்தார். பின்னர் இயக்குநராகவும் ஆகிவிட்டார்.

ஹீரோவானது எப்படி?

என்னுடைய 16வது வயதில் அப்பா இயக்கிய துள்ளுவதோ இளமை படத்தில் நடித்த நான்கு சிறுவர்களில் ஒருவர் கடைசி நேரத்தில் விலகிக் கொள்ள அந்த வேடத்தில் நடிக்க 11-ம் வகுப்பு படித்துக் கொண்டிருந்த என்னை கூட்டிவந்துவிட்டார். முதல் படம் வெளியாகி நன்றாக ஓடினாலும் கூட என்னை ஒரு ஹீரோவாக யாரும் மதிக்கவில்லை. ஆனால் காதல் கொண்டேன் வந்தது. ஒரே நாளில் ஹீரோவாகிவிட்டேன்.

ரஜினியுடனான உறவு

எனக்கும் ரஜினிசாருக்கும் நல்ல புரிதல் இருக்கிறது. எங்களுடைய உறவு சாதாரணமானதாகவும், நல்ல மதிப்புடையதாகவும் இருக்கிறது. அவருக்கு ஒரு படம் பிடித்து விட்டால் மருமகனாக இருந்தாலும் அல்லது வேறு யாராக இருந்தாலும் சரி அவரே முன் வந்து பாராட்டுவார்.

எப்போதும் ரஜினி ரசிகன்

காதல் கொண்டேன் படம் திரையரங்கில் நல்லா ஓடிக்கொண்டிருந்தபோது ஒரு நாள் ரஜினி சார் அலுவலகத்தில் இருந்து போன் வந்தது. என்னை அவரின் பண்ணை வீட்டுக்கு வருமாறு அழைத்தார். அதன்படியே நான் அங்கு சென்றேன். அங்கு ரஜினி சார் என்னை வெகுவாக பாராட்டினார். நான் எப்போதுமே ரஜினிசாருடைய ரசிகன்தான். அது எப்போதும் எந்த வாழ்க்கையிலும் மாறாது.

தமன்னா அஜித் படத்தில் கவர்ச்சியாக நடிக்கமாட்டேன் என்று நான் சொல்லவே இல்லை. அதில் எனக்கு கவர்ச்சியான வேடம்தான் என்கிறார் தமன்னா. தெலுங்கிலும் இந்தியிலும் கிட்டத்தட்ட முக்கால் நிர்வாணம் எனும் அளவுக்கு கவர்ச்சி காட்டும் நடிகைகள் தமிழ் ரசிகர்களுக்கு மட்டும் கவர்ச்சி காட்டுவதில் ஏகத்துக்கும் தயங்குவது வழக்கம்.

அந்த நடிகைகள் வரிசையில் தமன்னாவும் சேர்ந்துவிட்டதாக தயாரிப்பாளர்கள் முணுமுணுக்க ஆரம்பித்தனர். நீண்ட நாளைக்குப் பிறகு தமிழில் அஜித்துக்கு ஜோடியாக நடிக்கும் புதிய படத்தில் குடும்பப் பாங்காகத்தான் நடிப்பேன் என்று தமன்னா அடம்பிடித்ததாகக் குற்றம்சாட்டினர்.

இதற்கு சமீபத்தில் விளக்கம் அளித்துள்ளார் தமன்னா. அவர் கூறுகையில், “நான் கவர்ச்சியாக நடிக்க மறுக்கவில்லை. காட்சிக்கு அவசியம் என்றால் கவர்ச்சியாக நடிக்கத் தயாராகவே இருக்கிறேன். மொழி வித்தியாசம் பார்ப்பதில்லை. அஜித் படத்தில் குடும்ப பாங்காகத்தான் நடிப்பேன் என்று அடம்பிடித்ததாக தவறான வதந்திகள் பரவியுள்ளன.

என் உடலுக்கு கவர்ச்சியான உடைகள் அணிவது தான் பொருத்தமாக இருக்கும். ஏற்கனவே பல படங்களில் மழைக் காட்சிகளில் கவர்ச்சியாக நடித்துள்ளேன். இனியும் கவர்ச்சியாகவே நடிப்பேன்,” என்றார்.

கமல்ஹாசன் இயக்கத்தில் வளர்ந்து வரும் விஸ்வரூபம் இரண்டாம் பாகத்தினை திரையுலகமே ஆவலுடன் எதிர்பார்த்துக் கொண்டிருக்கிறது.
விஸ்வரூபம் படத்தின் வெற்றியைத் தொடர்ந்து, இரண்டாம் பாகத்தின் 50 சதவீத காட்சிகள் படமாக்கப்பட்டுள்ளதாம்.

மேலும் தாய்லாந்தில் படப்பிடிப்பு நடைபெறுவதாகவும் சில நாட்களுக்கு முன்பு தகவல்கள் வெளியாகியுள்ளன.

தற்போது, விஸ்வரூபம் 2 படத்தின் ஒளிப்பதிவாளர் மாற்றப்பட்டு இருப்பதாகத் தகவல்கள் தெரிவிக்கிறது.

விஸ்வரூபம்’ படத்தில் சானு ஜான் வர்கீஸ் என்பவர் ஒளிப்பதிவாளராகப் பணியாற்றினார்.

இவரது ஒளிப்பதிவுக்கு பாராட்டுகள் கிடைத்திருந்தும், இரண்டாம் பாகத்தில் ஷாம்தத் என்பவரை ஒளிப்பதிவாளராக தெரிவு செய்திருக்கிறார் கமல்.

இவர் பணியாற்றிய ‘சாக்சம்’ என்ற படத்தின் ஃபுட்டேஜ் பார்த்த பின்பே கமல் இவரை தெரிவு செய்ததாகக் கூறுகின்றனர்.

‘விஸ்வரூபம் 2’ படத்தின் பெரும்பாலான காட்சிகள் ஏற்கனவே படமாக்கப்பட்டு விட்டதால், இறுதி கட்டப் படப்பிடிப்பை டெல்லியில் நடத்தவும் முடிவு செய்திருப்பதாக தகவல்கள் தெரிவிக்கின்றன.