புகையிரதம்..

யாழில் இருந்து கொழும்பு நோக்கி புறப்பட்ட புகையிரதம் வவுனியாவை அணமித்த போது திடீரென் தீ ஏற்பட்ட நிலையில் புகையிரத ஊழியர்கள் விரைந்து செயற்பட்டு தீயைக் கட்டுக்குள் கொண்டு வந்தனர்.

யாழ்ப்பாணத்தில் இருந்து இன்று (09.11) பிற்பகல் கொழும்பு நோக்கி சென்ற கடுகதி புகையிரத நிலையம் வவுனியா, தாண்டிக்குளத்தை அண்மித்த போது புகையிரதத்தின் கொட்பொக்ஸ் பகுதியில் திடீரென தீ பிடித்துள்ளது.

இதனை அவதானித்த புகையிரத ஊழியர்கள் விரைந்து செயற்பட்டு தீயணைக்கும் பம்பியை செயற்படுத்தி தீயினைக் கட்டுக்குள் கொண்டு வந்து அதனை அணைந்தனர்.

இதனையடுத்து புகையிரதத்தின் பாதுகாப்பு உறுதிப்படுத்தப்பட்ட பின்னர் சுமார் ஒரு மணித்தியாலய தாமத்தின் பின் குறித்த புகையிரதம் கொழும்பு நோக்கி தனது பயணத்தை தொடர்ந்தது.

சீரற்ற காலநிலை..

வவுனியாவில் சீரற்ற காலநிலை காரணமாக ஒரு வீடு பகுதியளவில் சேதமடைந்துள்ளதுடன், 4 பேர் பாதிக்கப்பட்டுள்ளதாக மாவட்ட அனர்த்த முகாமைத்துவ நிலைய உதவிப் பணிப்பாளர் எஸ்.இன்பராஜ் தெரிவித்துள்ளார்.

வவுனியாவில் கடந்த சில நாட்களாக தொடர்ந்து மழை பெய்து வருகின்றது. மழையின் தாக்கம் காரணமாக தாழ் நிலப் பிரதேசங்களில் வெள்ள நீர் தேங்கியுள்ளதுடன், குளத்து நீர்மட்டமும் உயர்வடைந்து வருகின்றது. இதனால் குளங்களின் கீழ் பகுதிகளில் உள்ள மக்கள் அவதானமாக இருக்க வேண்டும்.

அத்துடன், வவுனியா வடக்கு பகுதியில் மழை காரணமாக ஒரு வீடு பகுதியளவில் சேதடைந்துள்ளதுடன், 4 பேர் பாதிக்கப்பட்டுள்ளனர். அவர்களுக்கான இழப்பீடுகளை வழங்க பிரதேச செயலகம் ஊடாக நடவடிக்கை எடுக்கப்பட்டுள்ளது.

மழை தொடந்தும் பெய்து வருதானால் மக்களின் இயல்பு நிலை பாதிக்கப்பட்டுள்ளதுடன், பாடசாலைக்கு மாணவர்கள் செல்லும் வீதமும் குறைவடைந்துள்ளதாக மாவட்ட அனர்த்த முகாமைத்துவ நிலைய உதவிப் பணிப்பாளர் மேலும் தெரிவித்துள்ளார்.

பணிப்புறக்கணிப்பு..

வவுனியா வைத்தியசாலையில் கடமை புரியும் தாதிய உத்தியோகத்தர்கள் உள்ளிட்ட நான்கு பிரிவினர் சம்பளப் பிரச்சனை உள்ளிட்ட பல்வேறு கோரிக்கைகளை முன் வைத்து அடையாள பணிப்புறக்கணிப்பு போராட்டத்தில் ஈடுபட்டுள்ளனர்.

நாடாளாவிய ரீதியில் பல்வேறு கோரிக்கைகளை முன்வைத்து தாதிய உத்தியோகத்தர்கள் உள்ளிட்ட பல்வேறு தரப்பினர் முன்னெடுத்துள்ள போராட்டத்திற்கு ஆதரவாக வவுனியா வைத்தியசாலையிலும் இன்று (09.11) காலை 7 மணி தொடக்கம் நாளை (10.11) காலை 7 மணிவரை குறித்த அடையாள பணிப்புறக்கணிப்பு போராட்டம் முன்னெடுக்கப்பட்டுள்ளது.

வவுனியா வைத்தியசாலையின் தாதிய உத்தியோகத்தர்கள், மருந்து கலவையாளர்கள், கதிர்பட இயக்குனர்கள் உள்ளடங்கலாக நான்கு பிரிவினர் குறித்த பணிப்புறக்கணிப்பு போராட்டத்தில் ஈடுபட்டுள்ளனர்.

சம்பளப் பிரச்சனை, மேலதிக கொடுப்பனவு வழங்கல் உள்ளிட்ட பல்வேறு கோரிக்கைகளை முன் வைத்து குறித்த பணிப்புறக்கணிப்பு போராட்டம் முன்னெடுக்கப்பட்டது.

பணிப்புறக்கணிப்பு போராட்டத்திற்கு மத்தியிலும் அவசர சிகிச்சைப் பிரிவுகள், விபத்துக்கள் பிரிவு என்பவற்றில் உத்தியோகத்தர்கள் கடமையில் ஈடுபட்டுள்ளனர்.

எனினும், இப் பணிப்புறக்கணிப்பு போராட்டம் காரணமாக விடுதிகளில் தங்கி சிகிச்சை பெறும் நோயாளர்கள் மற்றும் வைத்தியசாலைக்கு சிகிச்சைக்காக வருவோர் பல்வேறு சிரமங்களையும் எதிர் கொண்டுள்ளமை குறிப்பிடத்தக்கது.

சட்டவிரோத கட்டிடத்தில்..

வவுனியா குருமன்காடு ஸ்ரீ காளியம்மன் தேவஸ்தானத்திற்கு அருகாமையிலுள்ள முஸ்ஸிம் மையவாடி வளாகத்தில் இரவு இரவாக முன்னெடுக்கப்பட்ட சட்டவிரோத கட்டிடத்தில் கட்டுமான பணிகள் இளைஞர்களின் முயற்சியினால் தடுத்து நிறுத்தப்பட்டது.

குறித்த முஸ்ஸிம் மையவாடி வளாகத்தில் கடந்த சில வருடங்களுக்கு முன்னர் வர்த்தக நிலையத்தின் கட்டுமாணப் பணிகள் இடம்பெற்று வந்திருந்தன.

எனினும் அதிகாரிகளின் முயற்சியினால் தடுத்து நிறுத்தப்பட்டிருந்தது. இந்நிலையில் குறித்த கட்டிடத்தின் மீள் கட்டுமாண பணிகள் நேற்று முன்தினம் எவ்வித அனுமதியுமின்றி அரசியல் பின்புலத்தில் ஆரம்பிக்கப்பட்டிருந்தன.

இதனை தடுத்து நிறுத்துமாறு உரிய அதிகாரிகளிடம் பொதுமக்கள் முறைப்பாட்டினை மேற்கொண்டிருந்த போதிலும் அவர்கள் இதனை கவனத்தில் கொள்ளவில்லை.

அதன் பின்னர் சில இளைஞர்கள் ஒன்றினைந்து 119 அவசர தொலைபேசி இலக்கத்திற்கு அழைத்து முறைப்பாடு மேற்கொண்டதின் பிரகாரம் பொலிஸார் குறித்த இடத்திற்கு வருகை தருவதற்கு முன்னர் கட்டுமாண பணியில் ஈடுபட்டிருந்தவர்கள் அவ்விடத்திலிருந்து அகன்று சென்றிருந்தனர்.

அதன் பின்னர் முறைபாட்டினை மேற்கொண்டிருந்த இளைஞர்களிடம் பொலிஸார் வாக்குமூலத்தினை பெற்றுச் சென்றிருந்தனர்.

இச் சம்பவம் இவ்வாறு இடம்பெற்றிருந்தமையினையடுத்து நேற்றையதினம் வவுனியா நகரசபையினரினால் குறித்த கட்டிடத்தின் நிர்மான பணிகளுக்கு தடையுத்தரவு நோட்டிஸ் ஒட்டப்பட்டது.

தடுப்பூசி..

வவுனியாவில் சுகாதாரத் துறையினருக்கு மூன்றாவது டோஸ் கோவிட் தடுப்பூசிகள் ஏற்றும் நடவடிக்கை முன்னெடுக்கப்பட்டுள்ளது. நாடு முழுவதும் முன்னிலை பணியாளர்களுக்கு மூன்றாவது டோஸ் பூஸ்டர் கோவிட் தடுப்பூசி வழங்க நடவடிக்கை எடுக்கப்பட்டுள்ளது.

அதற்கமைவாக, வவுனியா பிராந்திய சுகாதார வைத்திய அதிகாரி பிரிவில் உள்ள முன்கள சுகாதாரப் பணியாளர்களுக்கு மூன்றாவது டோஸ் தடுப்பூசி ஏற்றும் பணிகள் முன்னெடுக்கப்பட்டன.

இதன்போது, வைத்தியர்கள், தாதியர்கள், சுகாதார உத்தியோகத்தர்கள், சுகாதார பரிசோதகர்கள் உள்ளிட்ட சுகாதார பணியாளர்களுக்கு தடுப்பூசிகள் ஏற்றப்பட்டன.

டெங்கு ஒழிப்பு..

வவுனியா ஒமந்தை அரச ஊழியர் வீட்டுத்திட்டத்தில் பொது சுகாதார பரிசோதகர் எம்.ரஞ்சன் தலைமையில் விசேட டெங்கு ஒழிப்பு செயற்றிட்டம் முன்னெடுக்கப்பட்டது.

மாவட்டத்தில் கோவிட் -19 தொற்று தற்போது சற்று குறைவடைந்து வருகின்ற இந்நிலையில் டெங்கு நோயின் தாக்கம் மறுபக்கத்தில் அதிகரித்து வருகின்றது.

அதனையடுத்து ஒமந்தை பொது சுகாதார பரிசோதகர் பிரிவுக்குட்பட்ட அரச ஊழியர் வீட்டுத்திட்டம் பகுதியில் அப்பகுதி மக்களின் ஒத்துழைப்புடன் டெங்கு ஒழிப்பு செயற்றிட்டம் இடம்பெற்றிருந்தது.

டெங்கு நுளம்பு பெருகின்ற இடங்கள் அடையாளம் காணப்பட்டால் உடனடியாக அதனை சுத்தம் செய்யுமாறு தெரிவிக்கப்பட்டுள்ளதுடன் எதிர்வரும் வாரங்களில் டெங்கு நுளம்பு பெருகும் வகையில் காணப்படும் இடங்களின் உரிமையாளர்களுக்கு எதிராக சட்ட நடவடிக்கை மேற்கொள்ளப்படும் என சுகாதார பிரிவினர் தெரிவித்துள்ளனர்.

குளவிக் கொட்டு..

வவுனியாவில் குளவிக் கொட்டுக்கு இலக்காகி 5 பேர் வவுனியா பொது வைத்தியசாலையில் அனுமதிக்கப்பட்டுள்ளனர். இன்று (08.11) மதியம் இடம்பெற்ற இச் சம்பவம் தொடர்பில் மேலும் தெரியவருவதாவது,

வவுனியாவில் மழையுடன் கூடிய காலநிலையானது கடந்த சில நாட்களாக நீடித்து வருகின்றது. இதன் காரணமாக வவுனியா, தவசிகுளம் பகுதியில் காணப்பட்ட மரம் ஒன்றில் காணப்பட்ட குளவிகள் கூட்டில் இருந்து கலைந்து சென்று அப் பகுதியில் நின்றவர்கள் மீது கொட்டியதில்,

பார்வதி (வயது 66), இரத்தினசிங்கம் (வயது 66), மூர்த்தி (வயது 47) ஆகிய மூவர் குளவிக் கொட்டுக்கு இலக்காகி வவுனியா வைத்தியசாலையில் அனுமதிக்கப்பட்டுள்ளனர்.

அத்துடன், வவுனியா, ஈச்சங்குளம் பகுதியில் உள்ள மரம் ஒன்றில் காணப்பட்ட குளவிக் கூட்டில் இருந்து கலைந்து சென்ற குளவிகள் கொட்டியதில் அப் பகுதியில் நின்ற லயந்தன் (வயது 13) மற்றும் அருண்குமார் (வயது 31) ஆகிய இருவர் பாதிப்படைந்து வவுனியா வைத்தியசாலையில் அனுமதிக்கப்பட்டுள்ளனர்.

இதனடிப்படையில் இருவேறு இடங்களில் குளவிக் கொட்டுக்கு இலக்காகிய 5 பேரும் வவுனியா வைத்தியசாலையில் சிகிச்சை பெற்று வருகின்றனர்.