இலங்கை கிரிக்கட் அணியின் நட்சத்திர முன்னாள் வீரர் சனத் ஜயசூரியவிற்கு விதிக்கப்பட்டிருந்த தடைக்காலம் நேற்றுடன் பூர்த்தியாகின்றது.
சர்வதேச கிரிக்கட் பேரவையினால் சனத் ஜயசூரியவிற்கு எதிராக இரண்டாண்டு காலம் தடை விதிக்கப்பட்டிருந்தது. இந்த தடை நீங்குவதாக சர்வதேச கிரிக்கட் பேரவையினால் நேற்று அதிகாரபூர்வமாக அறிவிக்கப்பட்டுள்ளது.
கிரிக்கட் விளையாட்டு தொடர்பான எந்தவொரு விடயத்திலும் பங்கேற்கக் கூடாது என்ற அடிப்படையில் தடை விதிக்கப்பட்டிருந்தமை குறிப்பிடத்தக்கது.
தற்பொழுது இந்த இரண்டாண்டு கால தடை நீக்கப்பட்டுள்ளதனால் சனத் ஜயசூரிய சர்வதேச கிரிக்கட் வர்ணனை, பயிற்றுவிப்பு உள்ளிட்ட பல்வேறு விடயங்களில் ஈடுபட முடியும் என்பது குறிப்பிடத்தக்கது.
ஊழல் மோசடி தொடர்பான விசாரணைகளுக்கு சனத் ஜயசூரிய ஒத்துழைப்பு வழங்கவில்லை என்ற அடிப்படையில் இந்த தடை விதிக்கப்பட்டிருந்தமை குறிப்பிடத்தக்கது.
மினுவாங்கொட கொரோனா கொத்தணியை முழுமையாகக் கட்டுப்படுத்த இரண்டு மாதங்கள் செல்லலாம் என, பிரதி சுகாதார சேவை பணிப்பாளர் விசேட வைத்தியர் ஹேமந்த ஹேரத் தெரிவித்துள்ளார்.
இது குறித்து தொடர்ந்தும் பேசிய அவர், “மினுவாங்கொட பிரெண்டிக்ஸ் நிறுவனத்திலிருந்து முதலாவது தொற்றாளர் அடையாளம் காணப்பட்டு, இன்றுடன் ஒரு மாதம் நிறைவடைகின்றது.
தற்போது இந்த கொத்தணி ஓரளவுக்கு கட்டுப்பாட்டுக்குள் கொண்டுவரப்பட்டுள்ளது. கடந்த 30 நாள்களுக்குள் இந்த கொத்தணியிலிருந்து 7,856 தொற்றாளர்கள் அடையாளம் காணப்பட்டுள்ளதாகவும் தெரிவித்துள்ளார்.
இதேவேளை, இலங்கையில் கொரோனா தொற்று உறுதியானவர்களின் மொத்த எண்ணிக்கை 11,744 ஆக உயர்வடைந்துள்ளது.
இலங்கையில் கொரோனா தொற்றுக்கு உள்ளானவர்களில் மேலும் 332 பேர் பூரணமாக குணமடைந்து இன்று வீடு திரும்பியுள்ளதாக சுகாதார அமைச்சு தெரிவித்துள்ளது.
இதன்படி, கொரோனா தொற்றுக்கு உள்ளானவர்களில் 5,581 பேர் இதுவரை பூரணமாக குணமடைந்துள்ளனர். 23 பேர் கொரோனா தொற்றினால் உயிரிழந்துள்ளமை குறிப்பிடத்தக்கது.
அண்மையில் மேல் மாகாணத்தில் அடையாளம் காணப்பட்ட கொரோனா தொற்றாளர்களில் 30 சதவீதமானோர் 60 வயதை விட அதிக வயதுடையவர்களாவர் என தெரிவிக்கப்பட்டுள்ளது.
விசேட வைத்தியர் பாலித கருணாபேம இதனை தெரிவித்துள்ளார். இது குறித்து தொடர்ந்தும் பேசியுள்ள அவர், முன்னரை விட தற்போதுள்ள வைரஸின் தன்மையானது பரவும் வேகம் அதிகமாகும்.
சுமார் 25 வயதுடைய இளைஞர்களுடன் 60 வயதுடையவர்களை ஒப்பிட்டு அவதானிக்கும் போது 60 வயதுடையோர் மரணிக்கக் கூடிய எச்சரிக்கை 30 சதவீதம் அதிகமாகக் காணப்படுகிறது.
முதியவர்கள் எந்தளவு பாதுகாப்பாக இருக்க வேண்டும் என்பது இதன் மூலம் தெளிவாகிறது. அத்துடன், நாட்பட்ட தொற்றா நோயால் பாதிக்கப்பட்டுள்ளவர்களுக்கும் இந்த அவதான நிலைமை காணப்படுகிறது. அதிக இரத்த அழுத்தம் , இதய நோய் மற்றும் நீரிழிவு நோய் என்பவற்றில் பாதிக்கப்பட்டவர்கள் இதில் உள்ளடங்குவர்.
அண்மையில் மேல் மாகாணத்தில் இனங்காணப்பட்ட தொற்றாளர்களில் 30 சதவீதமானோர் 60 வயதை விட அதிக வயதுடையவர்களாவர். ஊடகவியலாளர்களும் ஊடக நிறுவனங்களும் தமது சேவைகளை ஆற்றும் போது அடிப்படை சுகாதார விதிமுறைகளைப் பின்பற்ற வேண்டும்.
மக்கள் ஒன்று கூடும் இடங்களில் வைரஸ் பரவுவதற்கான வாய்ப்புக்கள் அதிகமுள்ளதால் இயன்றவரை உற்சவங்கள் வைபவங்களை குறைத்துக் கொள்ளுமாறு அவர் கூறியுள்ளார்.
இலங்கையில் இலவசமாக இணைய டேட்டா வழங்குவதாக தனிப்பட்ட தரவுகளை திருடும் நடவடிக்கை முன்னெடுக்கப்படுவதாக எச்சரிக்கைப்பட்டுள்ளது.
இலவசமாக டேட்டா வழங்குவதாக சமூக வலைத்தளம் ஊடாக ஆபத்தை ஏற்படுத்தும் மென்பொருள் தொலைபேசிகளில் தறவிறக்கம் செய்யும் செயற்பாடு தொடர்பில் தகவல் கிடைத்துள்ளதளாக இலங்கை தகவல் தொழில்நுட்ப சங்கம் தெரிவித்துள்ளது.
இலவசமாக டேட்டா வழங்குவதாக வரும் தகவலுடன் உள்ள Linkஐ அழுத்தும் போது அது மேலும் சமூக ஊடக பயனாளர்கள் 20 பேர் அல்லது அதற்கும் அதிகமானோருக்கு குறித்த இணைப்பை பகிர்ந்து, உங்கள் தனிப்பட்ட தகவல்களை வழங்கினால் அரசாங்கத்தினால் வழங்கப்படும் இலவச டேட்டாவை பெற்றுக் கொள்ள முடியும் என அந்த குறுந்தகவலில் குறிப்பிடப்பட்டிருக்கும்.
தற்போது இந்த தகவல்கள் இணைய மூலம் கற்கும் மாணவர்களுக்கும் கற்பிக்கும் ஆசிரியர்களுக்கு மத்தியில் எவ்வித தேடலுமின்றி பகிரப்பட்டுள்ளதாக குறிப்பிடப்படுகின்றது.
இந்த மோசடி நடவடிக்கையில் அதிகளவான பல்கலைக்கழக மாணவர்கள் சிக்கியுள்ளதாக இலங்கை தகவல் தொழில்நுட்ப சங்கம் தெரிவித்துள்ளது. இவ்வாறான போலி தகவல் ஊடாக ஆபத்தான மென்பொருள்கள் தொலைபேசியில் தரவிறக்கம் செய்யப்படுகின்றது.
இதன் மூலம் தனிப்பட்ட தகவல்கள் மற்றும் சமூக வலைத்தள கணக்குகள் திருடப்படுவதாக இலங்கை தகவல் தொழில்நுட்ப சங்கம் எச்சரிக்கை விடுத்துள்ளது.
யாழ்ப்பாணம்- உடுவில் சுகாதார மருத்துவ அதிகாரி பிரிவில் 9 அகவை சிறுமி ஒருவருக்கு கொரோனா தொற்று உறுதி செய்யப்பட்டுள்ளது. வடக்கு மாகாண சுகாதார சேவைகள் பணிப்பாளர், மருத்துவர் ஆ.கேதீஸ்வரன் இதனை தெரிவித்துள்ளார்.
உடுவில் – சங்குவேலியில் தமது வீட்டில் சுயதனிமைப்படுத்தப்பட்ட ஒருவருக்கே வைரஸ் தொற்று ஏற்பட்டுள்ளது. யாழ்ப்பாணம் போதனா வைத்தியசாலை ஆய்வுகூடத்தில் இடம்பெற்ற பி.சி.ஆர் பரிசோதனை முடிவில் இது உறுதிசெய்யப்பட்டுள்ளதாக அவர் கூறியுள்ளார்.
கொழும்பு – கொட்டாஞ்சேனையில் உள்ள விருந்தகம் ஒன்றில் பணியாற்றும் தந்தையிடம் சென்று திரும்பிய தாய் மற்றும் மகள்கள் இருவர் வீட்டில் சுயதனிமைப்படுத்தப்பட்டனர். அவர்கள் மூவரிடமும் நேற்று மாதிரிகள் பெறப்பட்டன.
இந்தநிலையில் அவர்களில் 9 அகவை சிறுமிக்கே கொரோனா உள்ளமை இன்று உறுதிப்படுத்தப்பட்டுள்ளது என்று வடமாகாண சுகாதார சேவைகள் பணிப்பாளர் குறிப்பிட்டார்.
தாய்க்கும் மற்றொரு பிள்ளைக்கும் முதல் பரிசோதனையில் தொற்று இல்லை என்று உறுதிப்படுத்தப்பட்டுள்ளது. எனினும் அவர்கள் தொடர்ந்து சுயதனிமைப்படுத்தப்பட்டுள்ளனர்.
இதேவேளை, கடந்த வாரம் உடுவில் அம்பலவாணர் வீதி – உதயசூரியன் சந்தியில் தாய் மற்றும் 2 அகவைக்கொண்ட மகளுக்கு கொரோனா தொற்று உறுதி செய்யப்பட்டமை குறிப்பிடத்தக்கது.
கொரோனா தொற்றின் இரண்டாம் அலை வேகமாக பரவி வரும் நிலையில், என்றும் இல்லாத அளவிற்கு பிரித்தானியா கடனில் மூழ்கும் என நிபுணர்கள் எச்சரிக்கை விடுத்துள்ளனர்.
அந்நாட்டு ஊடகங்கள் வெளியிட்டுள்ள செய்தியில் இந்த விடயம் தெரிவிக்கப்பட்டுள்ளது.
இந்நிலையில், கொரோனா பாதிப்பினால் இந்த ஆண்டு மேலும் 30 லட்சம் பேர் பிரித்தானியாவில் வேலை இழப்பார்கள் எனவும் நிபுணர்கள் சுட்டிக்காட்டியுள்ளதாக அந்த செய்தியில் தெரிவிக்கப்பட்டுள்ளது.
பிரித்தானியாவில் இரண்டாவது ஊரடங்கு தொடர்பான அறிவிப்பு வெளியானதும், குளிர்காலத்தில் நிலைமை மோசமாக இருக்கும் என தொழில் செய்வோர் கணித்துள்ளனர்.
அத்துடன், ஏற்கனவே வீழச்சியடைந்திருக்கும் பொருளாதாரத்திற்கு, அது மீண்டும் ஒரு அடியாக இருக்கும் என பொருளாதார நிபுணர்கள் கருத்து தெரிவித்துள்ளார்கள்.
பணிக்கால விடுமுறை முடிந்து மீண்டும் மக்கள் பணிக்கு திரும்பும் நேரத்தில், 30 லட்சம் பேருக்கு வேலை இருக்காது என அவர்கள் கணித்துள்ளனர்.
வர்த்தகம் சரியாக நடக்காததாலும், பொருளாதார வீழ்ச்சியால் வரி வசூல் பாதிக்கப்படுவதாலும், அரசின் கடன் இதுவரை இல்லாத அளவில் 50,000 கோடி பவுண்டுகளை எட்டலாம் என்றும் அவர்கள் எச்சரித்துள்ளனர்.
அத்துடன், பிரித்தானியாவில் இரட்டை மந்த நிலை என்னும் ஒரு வகை பொருளாதார வீழ்ச்சியை அவர்கள் கணித்துள்ளார்கள்.
இரட்டை மந்த நிலை என்பது என்னவென்றால், ஒரு முறை வீழ்ச்சி அடைந்த பொருளாதாரம் மீண்டும் நல்ல நிலைமைக்கு வரத்துவங்கும்போது, அது மேலும் உயராமல் மீண்டும் வீழ்ச்சியை நோக்கி செல்வதாகும்.
பிரித்தானியாவில் அதுதான் நிகழப்போவதாக பொருளாதார நிபுணர்கள் எச்சரிக்கிறார்கள். பிரித்தானியாவில் பொருளாதாரம், ஆண்டின் முதல் காலாண்டில் 2.5 சதவிகிதம் வீழ்ச்சியடைந்தது.
இரண்டாவது காலாண்டில் 19.8 சதவிகிதம் வீழ்ச்சியடைந்தது. மூன்றாவது காலாண்டில், கட்டுப்பாடுகள் நெகிழ்த்தப்பட்டு, தொழில்கள் மீண்டும் துவக்கப்பட்டதும் பொருளாதாரம் மீண்டும் வளர்ச்சியடையத் தொடங்கியது,
அதாவது ஜூலை முதல் செப்டம்பர் வரையிலான காலகட்டத்தில். அதனால், கொரோனாவால் ஏற்பட்ட பொருளாதார வீழ்ச்சியிலிருந்து பிரித்தானியா விடுபட்டுவிடும் என்ற ஒரு நம்பிக்கை உருவானது.
ஆனால், இப்போது மீண்டும் ஊரடங்கு அறிவிக்கப்பட இருக்கும் நிலையில், ஆண்டின் நான்காவதும் கடைசியுமான காலாண்டில் மீண்டும் பிரித்தானியாவில் பொருளாதாரம் வீழ்ச்சியடையும் என்ற நிலைமை ஏற்பட்டுள்ளது.
வவுனியா பிராந்திய பிரதி விவசாயப் பணிப்பாளர் விதை, நடுகைப்பொருள் அபிவிருத்தி நிலையத்தினால் இன்று (03.11) 1000 கிலோகிராம் உழுந்து நியாய விலையில் பயனாளிகளுக்கு பகிர்ந்தளிக்கப்பட்டது.
இலங்கையில் வவுனியா மாவட்டத்திலிலேயே அதிகளவிலான உழுந்து விளைச்சல் காணப்படுகின்றது. நாட்டின் உள்ளுர் விவசாயிகளின் பொருளாதாரத்தினை முன்னேற்றும் நோக்கில் அரசாங்கத்தினால் உழுந்து இறக்குமதி தடை செய்யப்பட்டு உள்ளுர் உழுந்து உற்பத்தியினை ஊக்குவிக்கும் செயற்பாடு முன்னெடுக்கப்படுகின்றது.
வவுனியா மாவட்டத்தில் காலபோகத்தில் உழுந்து செய்கை பிரதான பயிராக செய்கை பண்ணப்பட்டு வரப்படுகின்றது. காலபோகம் 2020/21 உழுந்து செய்கைக்கான விதை உழுந்து மிகவும் தட்டுப்பாடாக காணப்படுவதாலும் அதிக விலைக்கு விற்பனை செய்யப்படுவதால்,
விவசாயிகள் உழுந்துச்செய்கையை மேற்கொள்வதற்கு தடையாக காணப்படுகின்றது எனினும் காலபோகச்செய்கைக்காக பிரதி விவசாயப்பணிப்பாளர் விதைகள் நடுகைப்பொருட்கள் நிறுவனம் இதுவரை 25650 கிலோ விதை உழுந்தை விநியோகித்துள்ளது.
இதன் இறுதி விநியோகம் இன்று 03.11.2020 இல் 1000 கிலோ விதை உழுந்து விநியோகிக்கப்பட்டது. இதில் விவசாயிகள் ஆர்வமாக காணப்பட்ட போதும் அனைத்து விவசாயிகளுக்கும் விநியோகிக்க முடியாததன் காரணத்தினால் விவசாயிகள் விதை உழுந்து கிடைக்காமையினால் மிகுந்த மனத்தாக்கத்துடன் திரும்பியிருந்தனர்.
இலங்கைக்குள் மேலும் 272 கொரோனா தொற்றாளிகள் கண்டறியப்பட்டுள்ளனர். இதில் 03 பேர் தனிமைப்படுத்தல் நிலையங்களில் இருந்தும், 269 பேர் தொற்றாளிகளின் தொடர்புகளில் இருந்தும் கண்டறியப்பட்டுள்ளதாக இராணுவ தளபதி அறிவித்துள்ளார்.
இந்தநிலையில் கடந்த மார்ச் மாதம் முதல் இதுவரைக்குமான காலப்பகுதியில் கொரோனா தொற்றாளிகளின் மொத்த எண்ணிக்கை 11ஆயிரத்து 607 ஆக உயர்ந்துள்ளது.
6005 பேர் மருத்துவமனைகளில் சிகிச்சைப் பெற்று வருகின்றனர். 5581 பேர் கொரோனா தொற்றில் இருந்து குணமடைந்துள்ளனர். இதேவேளை, இலங்கையில் கொரோனா தொற்றுக்கு இலக்காகி மேலும் ஒருவர் உயிரிழந்துள்ளதாக அறிவிக்கப்பட்டுள்ளது.
கொழும்பு – 15 பகுதியைச் சேர்ந்த 61 வயதுடைய பெண்ணொருவரே இவ்வாறு உயிரிழந்துள்ளதாக சுகாதார சேவைகள் பிரிவு தெரிவித்துள்ளது.
வெளி மாவட்டங்களில் இருந்து வவுனியாவில் நுழைவோருக்கு எல்லைப் பகுதிகளில் வெப்ப பரிசோதனையுடன் பதிவு நடவடிக்கை முன்னெடுக்கப்படவுள்ளதாக மேலதிக அரசாங்க அதிபர் தி.திரேஸ்குமார் தெரிவித்துள்ளார்.
வவுனியா மாவட்ட கொரோனா பாதுகாப்பு நடவடிக்கை தொடர்பில் கேட்ட போதே இவ்வாறு தெரிவித்தார். அவர் மேலும் தெரிவிக்கையில்,
வெளி மாவட்டங்களில் இருந்து வவுனியா மாவட்டத்திற்குள் நுழைபவர்களுக்கு வெப்ப பரிசோதனை மேற்கொள்வதுடன், பதிவு நடவடிக்கைகளும் முன்னெடுக்கப்படவுள்ளது.
நாடாளவிய ரீதியில் கொரோனா தாக்கம் அதிகரித்து வரும் நிலையில் வவுனியா மாவட்டத்தில் அதனைக் கட்டுப்படுத்த மாவட்ட செயலகம் மற்றும் சுகாதார திணைக்களம் என்பன பாதுகாப்பு தரப்புடன் இணைந்து பல்பேவறு நடவடிக்கைகளை முன்னெடுத்து வருகின்றது.
அந்தவகையில் ஹொரவப்பொத்தானை வீதியில் மடுகந்தை, கண்டி வீதியில் ஈரப்பெரியகுளம், யாழ் வீதியில் ஓமந்தை, மன்னார் வீதியில் பறயனாலங்குளம் ஆகிய பகுதியில் இவ் நடவடிக்கையை முன்னெடுக்கவுள்ளோம்.
இதற்கு பாதுகப்பு தரப்பினரின் உதவியைப் பெற்றுக் கொள்வதற்கும் தீர்மானிக்கப்பட்டுள்ளது. அத்துடன் தென்பகுதியில் இருந்து அத்தியாவசிய சேவையில் ஈடுபடும் சாரதி, நடத்துனர்களுக்கு தொடர்ச்சியாக பிசீஆர் பரிசோதனை முன்னெடுக்கப்படவுள்ளது எனவும் தெரிவித்தார்.
இலங்கையில் 23 ஆவது கொரோனா மரணம் பதிவாகியுள்ளதாக சுகாதார அமைச்சு அறிவித்துள்ளது. கொழும்பு 15 பிரதேசத்தை சேர்ந்த 61 வயதுடைய பெண் ஒருவர் நேற்று (02.11.2020) அவரது வீட்டில் உயிரிழந்த நிலையில் பிரேத பரிசோதனையின் போது அவருக்கு கொவிட் 19 தொற்று உறுதிப்படுத்தப்பட்டுள்ளது.
குறித்த பெண் காய்ச்சல், இருமல், தொண்டை வலி ஆகிய நோய்களினால் பீடிக்கப்பட்டிருந்ததாக பிரேத பரிசோதனையில் தெரியவந்துள்ளது. எவ்வாறாயினும், சுவாசப்பை கோளாறு காரணமாவே உயிரிழந்துள்ளதாக இனங்காணப்பட்டுள்ளது.
இந்த மரணம் இலங்கையில் பதிவான 23 ஆவது கொரோனா மரணமாக பதிவாகியுள்ளதாக சுகாதார சேவைப் பணிப்பாளர் நாயகம் தெரிவித்துள்ளார்.
வவுனியா வடக்கு கல்வி வலயத்தில் பெரும் நிதி மோசடி இடம்பெற்றதாக தெரிவித்து மாகாண கல்வித் திணைக்களம் விசாரணைகளை முன்னெடுத்து வருகின்றது.
வவுனியா வடக்கு கல்வி வலயத்தின் நிதிக் கிளையில் பாணியாற்றியவர் இந்த மோசடியில் ஈடுபட்டுள்ளமை ஆரம்ப கட்ட விசாரணைகளில் தெரியவந்துள்ளது. இம் மோசடியில் தொடர்புடையவர்கள் தொடர்பில் விசாரணைகள் இடம்பெற்று வருகின்றன.
கடந்த பல மாதங்களாக இந்த நிதி மோசடி இடம்பெற்று வந்த நிலையில், தற்போது குறித்த நிதிக்கிளையில் பணியாற்றிய நபர் ஒருவருக்கு இடமாற்றம் வழங்கப்பட்டு புதிய உத்தியோகத்தர் ஒருவர் கடமையேற்ற நிலையிலேயே குறித்த விடயம் தெரிய வந்துள்ளதாக தெரிவிக்கப்படுகிறது. இது தொடர்பான விசாரணைகள் முழுமையாக தற்போது இடம்பெற்று வருகின்றன.
அங்கு 3 கோடிக்கும் மேல் நிதி மோசடி இடம்பெற்றுள்ளதாக உறுதிப்படுத்தப்படாத தகவல்கள் கூறுகின்றன. இதேவேளை 8 ஆசிரியர்களின் பெயரில் மாதாந்த ஊதியத்தை கடந்த ஒன்றரை வருடங்களுக்கும் மேலாக மோசடி செய்துள்ளதாக கூறப்படுகின்றது.
ஐரோப்பிய நாடுகளில் கொரோனா வைரஸ் மீண்டும் பரவி வரும் நிலைமையில், அந்த வைரஸ் தொற்றுக்கு இலக்காகி இத்தாலி மற்றும் இங்கிலாந்தில் வசிக்கும் மூன்று இலங்கையர்கள் உயிரிழந்துள்ளதாக அந்நாடுகளில் உள்ள இலங்கை தூதரகங்களின் தகவல்கள் தெரிவிக்கின்றன.
இத்தாலியின் மிலான் நகரில் வசித்து வந்த ஒருவரும், இங்கிலாந்தின் லண்டனில் வசித்து வந்த இரண்டு பெண்களும் இவ்வாறு உயிரிழந்துள்ளனர். இவர்கள் வைத்தியசாலைகளில் சிகிச்சை பெற்று வந்த நிலையில் உயிரிழந்துள்ளனர்.
மிலான் நகரில் உயிரிழந்த நபர் குருணாகல் பிரதேசத்தை சொந்த இடமாக கொண்டவர். சில வருடங்களாக அவர் தனது குடும்பத்தினருடன் இத்தாலியில் வசித்து வந்துள்ளார். 56 வயதான ஸ்ரீலால் ஹேரத் என்ற இந்த நபர் ஓய்வுபெற்ற இராணுவ அதிகாரி என தெரிவிக்கப்பட்டுள்ளது.
மிலான் நகரில் உயிரிழந்த இந்த இலங்கையரின் குடும்பத்தினர் அவர்களின் வீட்டில் தனிமைப்படுத்தப்பட்டுள்ளனர். மிலான் நகர சபை தனிமைப்படுத்தல் சட்டத்திற்கு அமைய இறந்தவரின் இறுதி கிரியைகளை மேற்கொண்டுள்ளது.
லண்டனில் உயிரிழந்த இலங்கையை சேர்ந்த இரண்டு பெண்கள் நீண்டகாலமாக அங்கு வசித்து வந்துள்ளனர். இந்த பெண்களில் ஒருவரின் கணவருக்கு கொரோனா வைரஸ் தொற்றியுள்ளதுடன் அவர் லண்டனில் உள்ள வைத்தியசாலை ஒன்றில் தீவிர சிகிச்சைப் பிரிவில் சிகிச்சை பெற்று வருகிறார்.
இத்தாலியின் மிலான் நகர் மற்றும் அதனை அண்டிய பிரதேசங்களில் வசிக்கும் பல இலங்கையர்களுக்கு கொரோனா வைரஸ் தொற்றியுள்ளதாக தகவல்கள் கிடைத்து வருவதாகவும் அவர்களுக்கு உதவும் நடவடிக்கைகளை ஆராய்ந்து வருவதாக மிலான் நகரில் உள்ள இலங்கை தூதரகப் பிரதிநிதியின் அலுவலகம் தெரிவித்துள்ளது.
இதனிடையே பிரித்தானியாவில் கொரோனா வைரஸின் இரண்டாவது அலையுடன் வைரஸ் தொற்றாளர்களின் எண்ணிக்கை அதிகரித்து வருவதன் காரணமாக நேற்றைய தினம் முதல் நாட்டை முற்றாக முடக்க பிரித்தானிய அரசாங்கம் நடவடிக்கை எடுத்துள்ளது. கொரோனா முதலாவது அலையில் அந்த வைரஸ் தொற்றுக்கு உள்ளான 30க்கும் மேற்பட்ட இலங்கையர்கள் இதற்கு முன்னர் உயிரிழந்துள்ளனர்.
கொரோனா தொற்றானது தற்போது சமூகத்தில் வலுவாக பரவுகின்ற போது அது சிறுவர்களை தாக்கும் எனவும் இதனால் சிறுவர்களுக்கும் பாதிப்பு ஏற்படலாம் எனவும் யாழ்.மாவட்ட போதனா வைத்தியசாலையின் பிரதி பணிப்பாளர் சி.யமுனாநந்தா தெரிவித்தார்.
கொரோனா தொற்றும் சிறுவர்களும் என்ற தொனிப்பொருளில் கருத்துரைக்கும் போதே இவ்வாறு தெரிவித்தார்.
இதே நேரம் சிறுவர்களுக்கு சாதாரணமாக இருமல், தடிமன், ஆஸ்மா போன்ற நோய்கள் இருக்கும் பொழுது அவர்களுக்கு கொரோனா தொற்றோ என்ற பயத்தில் சிகிச்சைக்கு செல்லாமல் விடக்கூடிய சூழ்நிலை ஏற்படும்.
ஏற்கனவே ஆஸ்மா நோய் உள்ளவர்களுக்கு உரிய மருந்துகள் கிரமமாக கொடுக்கப்படவேண்டும்.
அதே போல தூசிகளுக்குள் விளையாடும் பொழுது தொண்டை அழற்சி நோய்கள் ஏற்படலாம்.
சிறுவர்களுக்கு அவ்வாறு வரும் போது அதற்குரிய மருந்து கொடுக்கவேண்டும்.
அதையடுத்து குழந்தைகளின் ஆரோக்கியத்திற்கு உதவும் சிறந்த போசணை மிக்க உணவுகளை சிறுவர்களுக்கு வழங்குவதன் மூலம் தொற்று ஏற்படும் காலங்களில் உடல்நிலை பாதிப்பதை தவிர்க்கலாம்.
குறிப்பாக புரதச்சத்து நிறைந்த பால் போன்றவற்றை எடுத்தல் வேண்டும்.
எனவே குழந்தைகளுக்கு தொற்று ஏற்படும் பொழுது காய்ச்சல் இருக்கலாம், தொண்டை நோ இருக்கலாம், இருமல் இருக்கலாம் எனவே இவற்றை வைத்தியரின் ஆலோசனைப்படி கலந்தாலோசித்தல் வேண்டும்.
வீட்டில் குழந்தை உள்ளவர்கள் பொது இடங்களுக்கு சென்று விட்டு வந்து கைகளை நன்றாக கழுவி விட்டு வீட்டுக்குள் செல்ல வேண்டும்.
குறிப்பாக அதிகளவானோர் உள்ள வீடுகளில் சிறுவர்களுடன் அதிகளவில் நெருங்கி பழகுவதை தவிர்த்தல் வேண்டும்.
வீட்டில் உள்ள குழந்தைகளுக்கு தொற்று ஏற்படுமாயின் பெரியவர்கள் அல்லது அங்கு உள்ள மூத்தவர்கள் தான் காரணமாக இருப்பார்கள். எனவே அதற்குரியவாறாக அவதானமாக செயற்பட வேண்டும்.
அதே போல சிறுவர்களை வெளியிலிருந்து வருபவர்கள் கட்டி அணைத்து முத்தமிடுதல் போன்ற செயற்பாடுகளை தவிர்த்தல் வேண்டும்.
அவ்வாறு செய்வதானால் கைகளை நன்றாக கழுவுதல் வேண்டும். கண்டபடி ஆட்கள் வந்து குழந்தைகளை தொடுதலும் தொற்றை ஏற்படுத்தும்.
குறிப்பாக நெருக்கமான இடங்களில் அயலில் உள்ளவர்களுடன் விளையாடும் போதும், தொடுகையின் போதும் தொற்று ஏற்படலாம்.
எனவே தற்போதைய சூழ்நிலையில் சுகாதார பழக்கவழக்கங்களான கைகளை கழுவுதல் போன்ற சுகாதார நடைமுறைகளைப் பின்பற்றுதல் நல்லது.
நோயினால் சிறுவர்கள் அதிகளவில் உடல் ரீதியாக பாதிப்படையலாம். விளையாடவிடாது அல்லது தொடர்ச்சியாக வீடுகளில் இருக்கும் போது அல்லது வெளியிடங்களுக்குச் செல்லாமல் இருக்கும் போது அவர்களது உளநலமும் பாதிக்கலாம்.
எனவே இது தொடர்பிலும் கவனம் செலுத்தல் வேண்டும். அதேபோல் உணவு பழக்கவழக்கத்தை பொறுத்த வரை பழரசங்கள் கூடுதலாக நல்லது.
குழந்தைகளுக்கு நெத்தலி, கருவாடு, பால், பெருங்காயம், இஞ்சி, மஞ்சள், மற்றும் பச்சை இலைகளிலான உணவு நல்ல உணவாக அமையும்.
அடுத்ததாக அயடின் கூடிய பழங்கள், எலுமிச்சம் பழம் மற்றும் கொய்யாப்பழம், வாழைப்பழம் போன்ற சிறந்த நோய் எதிர்பு சக்தியுள்ள உணவு வகைகளை கொடுக்க வேண்டும்.
அடுத்ததாக சிறுவர்களுக்கு போதியளவு நீர் சிறந்த ஆகாரமாக அமையும் எனவும் கூறினார்.
வவுனியாநகரில் அமைந்துள்ள சிறுவர் பூங்காக்கள் நகரசபையின் அறிவுறுத்தலின் பேரில் தற்காலிகமாக மூடப்பட்டுள்ளது. நாட்டில் கொரோனா வைரஸ்பரவல் அதிகரித்து செல்கின்ற நிலையில் அதனை கட்டுப்படுத்துவதற்கான பல்வேறு நடவடிக்கைகள் சுகாதாரப்பிரிவினரால் முன்னெடுக்கப்பட்டுவருகின்றது.
அந்தவகையில் வவுனியா நகரசபையின் நிர்வாகத்தின் கீழ் உள்ள சிறுவர் பூங்காக்களை இன்றிலிருந்து மறு அறிவித்தல் வரை மூடுமாறு சபையினால் அறிவிக்கப்பட்டுள்ளது.
அதற்கமைய இன்றைய தினத்திலிருந்து சிறுவர் பூங்காக்களின் செயற்பாடுகள் தற்காலிகமாக இடைநிறுத்தப்பட்டுள்ளமை குறிப்பிடத்தக்கது.
பாடசாலை மாணவர்களுக்காக புதிய தொலைக்காட்சி சேவை ஒன்றை ஆரம்பிக்க கல்வி அமைச்சு தீர்மானித்துள்ளது. தரம் 3 முதல் 13ஆம் தரம் வரையான பாடசாலை மாணவர்களுக்காக இந்த தொலைக்காட்சி சேவை ஒளிபரப்பு செய்யப்படவுள்ளது.
சிங்களம், தமிழ் மற்றும் ஆங்கிலம் ஆகிய 3 மொழிகளிலும் இந்த நிகழ்ச்சி ஒளிபரப்பப்படவுள்ளது. அதற்கமைய அரச மற்றும் தனியார் தொலைகாட்சி மற்றும் வானொலி சேவையின் உதவியுடன் இந்த வேலைத்திட்டம் முன்னெடுக்கப்படவுள்ளது.
இந்த செயற்பாட்டுக்காக கல்வி அமைச்சர் சமர்ப்பித்த யோசனைக்கு அமைச்சரவையின் அனுமதி கிடைத்துள்ளது. கொரோனா வைரஸ் பரவல் காரணமாக மூன்றாம் தவணைக்கான கல்வி நடவடிக்கைகளை ஆரம்பிப்பதில் தாமதம் ஏற்பட்டுள்ளது.
இதனை கருத்திற் கொண்டு மாணவர்களுக்கு நன்மை பயக்கும் வகையில் தொலைக்காட்சி சேவை ஆரம்பிக்கப்படவுள்ளமை குறிப்பிடத்தக்கது.
தனிமைப்படுத்தல் ஊரடங்கு சட்டம் அமுல்படுத்தப்படாத பிரதேசங்களில் இடம்பெறும் திருமணங்கள் மற்றும் மரண சடங்குகளுக்கு வரும் நபர்களின் எண்ணிக்கையை மட்டுப்படுத்த சுகாதார அமைச்சு ஆலோசனை வழங்கியுள்ளது.
ஊரடங்கு சட்டம் அமுல்டுத்தப்படாத பிரதேசங்களில் செயற்பாடுகளை மட்டுப்படுத்த வேண்டிய முறை தொடர்பில் அரசாங்கத்தினால் வெளியிடப்பட்டுள்ள வழிகாட்டி அமைப்பில் இந்த விடயங்கள் குறிப்பிடப்பட்டுள்ளது.
அதற்கமைய குறித்த பிரதேசங்களில் திருமண நிகழ்வுகளில் கலந்து கொள்ள வேண்டியவர்களின் அதிகபட்ச எண்ணிக்கை 50ஆக மட்டுப்படுத்தப்பட்டுள்ளது. மரண வீட்டில் கலந்து கொள்ள வேண்டியவர்களின் அதிக பட்ச எண்ணிக்கை 25ஆக மட்டுப்படுத்தப்பட்டுள்ளது.
ஆலயங்கள், விகாரைகள், தேவாலயங்கள் மற்றும் பள்ளிவாசல்களில் பொது மக்கள் ஒன்று கூடும் செயற்பாடுகள் அல்லது கூட்டங்கள் நடத்துவதற்கு அனுமதி வழங்கப்படவில்லை.
அவ்வாறான இடங்களில் எந்தவொரு சந்தர்ப்பங்களிலும் இருக்க வேண்டிய பக்தர்களின் எண்ணிக்கை அதிக பட்சம் 25ஆக காணப்பட வேண்டும் என குறிப்பிடப்பட்டுள்ளது.