இலங்கையில் கொரோனா தொற்றினால் 81 வீதமான ஆண்கள் பாதிப்பு!!

இலங்கையில் கொரோனா வைரஸ் தொற்றினால் பாதிக்கப்பட்டுள்ளவர்களில் 81 வீதமானோர் ஆண்கள் என்ற தகவல் வெளியாகியுள்ளது

அத்துடன் தொற்றாளர்களில் 45.2 வீதமானோர் 41வயதுக்கும் 50வயதுக்கும் இடைப்பட்டவர்கள் என்ற தகவலும் வெளியாகியுள்ளது

இந்தநிலையில் இலங்கையில் தற்போதைய நிலையில் முகக்கவசங்களை பொதுமக்கள் அணியவேண்டிய அவசியம் இல்லை.

எனினும் எதிர்ப்பு சக்தி குறைந்தவர்கள், அண்மையில் சத்திரசிகிச்சைகளுக்கு உட்பட்டவர்கள், விசேட சுகாதார தேவையுடையவர்கள் முகக்கவசத்தை அணியலாம் என்று சுகாதார அமைச்சின் தரப்புக்கள் தெரிவித்துள்ளன.

பயணம் செல்லும்போது முகக்கவசங்களை அணியலாம். அதேநேரம் பொதுமக்கள் அதிகமாக உள்ள இடங்களை தவிர்ப்பது சிறந்தது.

இதேவேளை கைககளை அடிக்கடி கழுவுதல், முகத்தையும் மூக்கையும், வாயையும் தொடுதலை தவிர்த்தல் போன்றவையும் பாதுகாப்பான ஏற்பாடுகளாக இருக்கும்.

இந்தநிலையில் காய்ச்சல், இருமல், தொண்டை ஸ்தாபிதம், மூச்சு எடுக்க முடியாமை போன்ற குணங்குறிகள் தென்பாட்டால் சுகாதார அதிகாரிகளுக்கு தெரியப்படுத்துங்கள்.

உங்கள் பிரதேசத்துக்கு கடந்த 15நாட்களுக்குள் எவராவது வெளிநாடுகளில் இருந்து வந்திருந்தால் அவர்கள் தொடர்பில் சுகாதார அதிகாரிகளுக்கு தெரியப்படுத்துமாறு சுகாதார அதிகாரிகள் தெரிவித்துள்ளனர்.

சீனர்களே உலகத்திற்கு கொரோனாவை கொண்டு வந்தனர் : தனிமைப்படுத்தல் நிலையத்தில் இருக்கும் இலங்கையர்!!

இலங்கைக்கு முதலில் கொரோனா வைரஸை முதலில் கொண்டு வந்தவர் ஒரு சீனப் பெண் என தனிமைப்படுத்தல் நிலையத்தில் தங்க வைக்கப்படடுள்ள இத்தாலியில் தொழில் புரிந்து வந்த இலங்கையர் ஒருவர் தெரிவித்துள்ளார்.

சீனர்களே உலகத்திற்கு கொரோனா வைரஸை கொண்டு வந்தனர் எனவும் அந்த நபர் குற்றம் சுமத்தியுள்ளார்.

சீனர்கள் கொண்டு வந்த கொரோனா வைரசுக்காக இத்தாலியில் தொழில் புரியும் இலங்கையர்களை திட்ட வேண்டாம் எனவும் அந்த நபர் எச்சரித்துள்ளார்.

இத்தாலியில் இருக்கும் இலங்கையர்களுககு தமது தாய் நாட்டுக்கு வரும் உரிமை இருப்பதாகவும் அதனை எவராலும் இல்லாமல் செய்ய முடியாது எனவும் அந்த நபர் குறிப்பிட்டுள்ளார்.

ஊரடங்குச் சட்டத்தை மீறினால் கடும் நடவடிக்கை- நாடு முழுவதும் 45 ஆயிரம் பொலிஸார் கடமையில்!!

பொலிஸ் ஊரடங்குச் சட்டத்தை மீறும் நபர்களுக்கு எதிராக செயற்பாடுகளை முன்னெடுப்பதற்காக 45 ஆயிரம் பொலிஸார் நாடு முழுவதும் கடமையில் ஈடுபடுத்தப்பட்டுள்ளதாக பொலிஸ் சட்டப் பிரிவின் பிரதிப் பொலிஸ் மா அதிபர் அஜித் ரோஹன தெரிவித்துள்ளார்.

தனிமைப்படுத்தல் சட்டத்தை மீறும் நபர்களின் அசையா சொத்துக்கள் சீல் வைக்கப்படும் என்பதுடன் அசையும் சொத்துக்களை பொலிஸார் கைப்பற்ற நடவடிக்கை எடுக்கப்படும் எனவும் அவர் கூறியுள்ளார்.

ஊரடங்குச் சட்டம் அமுலில் இருக்கும் நேரத்தில் சட்டத்தை மீறும் நபர்களுக்கு எதிராக சட்டத்தை செயற்படுத்தும் அதிகாரம் பொலிஸாருக்கு இருப்பதாக இலங்கை சட்டத்தரணிகள் சங்கத்தின் முன்னாள் தலைவர் யு.ஆர்.டி. சில்வா தெரிவித்துள்ளார்.

ஊரடங்குச் சட்டம் அமுலில் இருக்கும் நேரத்தில் சம்பந்தப்பட்ட பொலிஸ் நிலையங்களில் வழங்கப்படும் அனுமதிப் பத்திரங்களை வைத்திருக்கும் நபர்கள் மாத்திரம் தமது அத்தியவசிய தேவைகளுக்காக வீட்டில் இருந்து வெளியில் செல்ல முடியும் எனவும் அவர் குறிப்பிட்டுள்ளார்.

இலங்கையில் கொரோனா வைரஸ் சந்தேகத்தில் அனுமதிக்கப்பட்ட பெண் : நலமாக குழந்தை பெற்ற தாய்!!

குழந்தை பெற்ற தாய்

கொழும்பில் கொரோனா வைரஸ் என சந்தேகிக்கப்பட்டு வைத்தியசாலையில் அனுமதிக்கப்பட்ட கர்ப்பிணி பெண் ஒருவருக்கு குழந்தை பிறந்துள்ளது. காசல் மகப்பேற்று வைத்தியசாலையில் அனுமதிக்கப்பட்டிருந்த பெண் குழந்தை பெற்ற நிலையில், தாயும் குழந்தையும் நலமாக உள்ளதாக வைத்தியசாலை தகவல்கள் தெரிவிக்கின்றன.

இந்த பெண்ணின் கணவர் இத்தாலியில் இருந்து வருகைத்தந்துள்ளார். இந்நிலையில் இந்த பெண்ணுக்கு கொரோனா வைரஸ் தொற்றிற்கான அறிகுறிகள் தென்பட்டுள்ளது. உடனடியாக அவர் வைத்தியசாலையில் அனுமதிக்கப்பட்டுள்ளார்.

கர்ப்பிணியான குறித்த பெண் நேற்றைய தினம் தனது குழந்தையை பெற்றெடுத்துள்ளார். வைத்தியர்கள் மற்றும் வைத்தியசாலை ஊழியர்கள் தங்கள் ஆபத்தை குறித்து சிந்திக்காமல் அவர்களின் கடமைகளை நிறைவேற்றியுள்ளனர்.

எனினும் குறித்த பெண்ணின் இரத்த மாதிரி கொரோனா பரிசோதனைக்காக அனுப்பி வைக்கப்பட்டது. பரிசோதனை அறிக்கைக்கமைய அவருக்கு கொரோனா தொற்று ஏற்படவில்லை என வைத்தியசாலை இயக்குனர் குறிப்பிட்டுள்ளார்.

வவுனியாவில் அரச அலுவலர் ஒருவர் கொரோனா சந்தேகத்தில் வைத்தியசாலையில் அனுமதி!!

வவுனியா செட்டிகுளம் பிரதேசத்தில் கடைமையாற்றும் அரச உத்தியோகத்தர் ஒருவர் கொரோனா வைரஸ் தாக்கியுள்ளதா என்ற சந்தேகத்தின் அடிப்படையில் வவுனியா வைத்தியசாலையில் அனுமதிக்கப்பட்டுள்ளார்.

வவுனியா செட்டிகுளத்தை சேர்ந்த குறித்த நபர் வெளிநாட்டில் வசிப்போருடன் தொடர்புகளை பேணியதன் காரணத்தினால் சந்தேகத்தின் அடிப்படையில் நேற்று காலை அம்புலன்ஸ் வாகனம் மூலம் வவுனியா பொது வைத்தியசாலையின் தொற்று நோய் பிரிவில் அனுமதிக்கப்பட்டார்.

அவரை பரிசோதித்த வைத்தியர்கள் அவரின் இரத்த மாதிரிகளை பெற்று அனுராதபுரம் வைத்தியசாலைக்கு மேலதிக பரிசோதனைக்களிற்காக அனுப்பிவைத்துள்ளனர்.

-தமிழ்வின்-

வவுனியாவில் 100க்கு மேற்பட்ட பொலிஸாரின் பாதுகாப்புடன் ஊரடங்குச் சட்டம் அமுலில்!!

ஊரடங்குச் சட்டம்

இலங்கையில் கொரோனா தொற்று தீவிரமடைந்துள்ள நிலையில் நேற்று (20.03.2020) முதல் எதிர்வரும் திங்கட்கிழமை (23.03.2020) வரை ஊரடங்குச் சட்டம் அமுல்படுத்தப்பட்டுள்ளது.

நாடளாவிய ரீதியில் அமுலுக்கு வரும் வகையில் நேற்று மாலை 6 மணி முதல் எதிர்வரும் திங்கள் கிழமை காலை 6 மணிவரை அமுலாகும் வகையில் ஊரடங்கு உத்தரவு பிறப்பிக்கப்பட்டுள்ளது.

நூற்றுக்கு மேற்பட்ட பொலிஸாரின் பாதுகாப்புடன் வவுனியா நகரத்தில் ஊரடங்கு சட்டம் நடைமுறையில் பேணப்பட்டு வருவதுடன் வெளிநாடு செல்வதற்காக விமான நிலையம் செல்பவர்களுக்கு வவுனியா பொலிஸாரினால் விசேட அனுமதிப்பத்திரமும் வழங்கப்படுகின்றது.

ஊரடங்கு சட்டம் அமுல் படுத்தப்பட்டு 15 மணித்தியாலங்கள் கடந்துள்ள நிலையில் ஊரடங்கு சட்டத்தினை மீறிய குற்றத்தில் வவுனியாவில் எவ்வித கைது சம்பவங்களும் இடம்பெறவில்லை என்பது குறிப்பிடத்தக்கது.

வவுனியா பொலிஸாரின் அதிரடி செயற்பாடு : 8 மணித்தியாலத்தினுள் 6 பேருக்கு எதிராக சட்ட நடவடிக்கை!!

போக்குவரத்து பொலிஸார்

இலங்கையில் கொரோனா தொற்று தீவிரமடைந்துள்ள நிலையில் நேற்று (20.03.2020) மாலை 6.00 மணி தொடக்கம் நாளை மறுதினம் திங்கட்கிழமை (23.03.2020) காலை 6.00 மணி வரை ஊரடங்குச் சட்டம் அமுல்படுத்தப்பட்டுள்ள நிலையில் வவுனியா போக்குவரத்து பொலிஸார் மேற்கொண்ட திடீர் சோதனை நடவடிக்கையின் போது 6 நபர்களுக்கு எதிராக சட்ட நடவடிக்கை மேற்கொள்ளப்பட்டுள்ளது.

வவுனியா போக்குவரத்து பொலிஸ் பொறுப்பதிகாரி காமினி திஸாநாயக்க தலைமையில் வவுனியா நகர் முழுவதும் மேற்கொள்ளப்பட்ட போக்குவரத்து பொலிஸார் கடமையில் ஈடுபட்டிருந்ததுடன் ஊரடங்கு சட்டம் அமுல்படுத்தப்பட்டதின் பின்னர் வீதியில் செல்லும் அனைத்து வாகனங்களையும் பொலிஸார் சோதனைக்குட்படுத்திய சமயத்தில் 6 சாரதிகளுக்கு எதிராக சட்ட நடவடிக்கை மேற்கொள்ளப்பட்டுள்ளது.

குறித்த சோதனை நடவடிக்கையில் சாரதி அனுமதிப்பத்திரம் இன்மை, மது போதையில் வாகனத்தினை செலுத்தியமை, வீதி ஒழுங்குகளை மீறியமை போன்ற பல்வேறு குற்றங்களுக்காகவே குறித்த நபர்களுக்கு எதிராக சட்ட நடவடிக்கை மேற்கொள்ளப்பட்டது.

வவுனியாவில் இளைஞர்கள் இருவர் கைது!!

வவுனியா பொலிஸாரால் இரு இளைஞர்கள் இன்று இரவு கைதுசெய்யப்பட்டுள்ளனர். இச்சம்பவம் குறித்து மேலும் தெரியவருவதாவது,

குறித்த இருவரும் இன்று மாலை 6.30 மணியளவில் மோட்டார் சைக்கிளில் பயணித்த நிலையில் வவுனியா மணிக்கூட்டு கோபுர சந்தியில் கடமையில் இருந்த பொலிஸார் வழி மறித்துள்ளனர்.

எனினும் பொலிஸாரின் சைகையை மீறி இருவரும் அதிவேகமாக மோட்டார் சைக்கிளை செலுத்தி தப்பிசென்றனர்.

இதன்போது அப்பகுதியில் கடமையில் ஈடுபட்டிருந்த வவுனியா போக்குவரத்து பொலிஸ் குழுவினர் குறித்த இருவரையும் துரத்திச்சென்று பூங்காவீதியில் வைத்து மடக்கிப்பிடித்து கைதுசெய்தனர்

கைது செய்யப்பட்ட இருவரும் ஊரடங்கு சட்டம் அமுல்படுத்திய பின்னர் சென்றமை, மதுபோதையில் வாகனம் செலுத்தியமை, பொலிஸாரின் சைகையை மீறி பயணித்தமை போன்ற பல்வேறு பிரிவுகளில் வழக்குதாக்கல் செய்யவுள்ளதாக பொலிஸார் இதன்போது தெரிவித்தனர்.

கைது செய்த இருவரையும் பொலிஸாரின் வாகனத்தில் ஏற்றி சென்றிருந்தனர்.

வவுனியா ஊரடங்குச் சட்டத்தினால் மாலை 6.30 மணியுடன் முடங்கியது!!

ஊரடங்குச் சட்டம்

இலங்கையில் கொரோனா தொற்று தீவிரமடைந்துள்ள நிலையில் இன்று (20.03.2020) முதல் எதிர்வரும் திங்கட்கிழமை (23.03.2020) வரை ஊரடங்குச் சட்டம் அமுல்படுத்தப்பட்டுள்ளது.

நாடளாவிய ரீதியில் அமுலுக்கு வரும் வகையில் இன்று மாலை 6 மணி முதல் எதிர்வரும் திங்கள் கிழமை காலை 6 மணிவரை அமுலாகும் வகையில் ஊரடங்கு உத்தரவு பிறப்பிக்கப்பட்டுள்ளது.

இந் நிலையில் பொலிஸாரின் நடவடிக்கையுடன் வவுனியா நகரம் மாலை 6.20 மணிமுதல் முடக்கப்பட்டுள்ளது.

இலங்கையில் கொரோனா வைரஸ் தொற்றினால் பாதிக்கப்பட்டவர்கள் 70 ஆக அதிகரிப்பு!!

இலங்கையில் கொரோனா வைரஸினால் பாதிக்கப்பட்ட மேலும் 5 பேர் அடையாளம் காணப்பட்டுள்ளதாக சுகாதார அமைச்சர் பவித்திரா வன்னிஆராச்சி தெரிவித்துள்ளார்.

இதுவரை கொரோனா வைரஸினால் பாதிக்கப்பட்ட 70 அங்கொட தொற்றுநோய் தேசிய வைத்தியசாலையில் சிகிச்சை பெற்று வருகின்றனர்.

முதலாம் இணைப்பு : இலங்கையில் கொரோனா வைரஸினால் பாதிக்கப்பட்ட மேலும் 6 பேர் அடையாளம் காணப்பட்டுள்ளதாக சுகாதார சேவைகள் பணிப்பாளர் நாயகம் அனில் ஜாசிங்க தெரிவித்துள்ளார்.

இந்த வைரஸினால் இதுவரை 65 பேர் பாதிக்கப்பட்ட நிலையில் அவர்கள் அங்கொட தொற்றுநோய் தேசிய வைத்தியசாலையில் சிகிச்சை பெற்று வருகின்றனர்.

65 நோயாளர்களில் சிறுவர்கள் உடபட இளம் வயதினரும் உள்ளதாக அறிவிக்கப்பட்டுள்ளது.

இலங்கையில் திருமண நிகழ்வுகளை நடத்தினால் சட்ட நடவடிக்கை!!

நாட்டில் ஏற்பட்டுள்ள நெருக்கடியான சூழ்நிலையில் திருமண நிகழ்வுகள் நடத்தப்பட்டால் அதற்கு எதிராக சட்ட நடவடிக்கை எடுக்குமாறு கோரிக்கை விடுக்கப்பட்டுள்ளது.

பொலிஸ் உட்பட உரிய பிரிவிடம் இது தொடர்பில் கோரிக்கை விடுப்பதாக அரச வைத்திய அதிகாரிகள் சங்கம் கேட்டுள்ளது.

பொறுப்புடைய குடிமகனாக இந்த சந்தர்ப்பத்தில் அதிக அவதானம் செலுத்த வேண்டும். தனிப்பட்ட நோக்கத்திற்காக அல்லது பொது நோக்கத்திற்கா என தீர்மானிக்குமாறு சங்கத்தின் உதவி செயலாளர் வைத்தியர் நவீன் டி சொய்ஸா தெரிவித்துள்ளார்.

மக்கள் அவ்வாறான பொறுப்புகளை புரிந்து செயற்படவில்லை என்றால் அதிகாரிகள் உரிய நடவடிக்கை எடுக்க வேண்டும் என அவர் குறிப்பிட்டுள்ளார்.

கொரோனா வைரஸ் நாட்டினுள் பரவுவதனை தடுப்பதற்காக அரசாங்கம் மேற்கொண்டுள்ள தீர்மானத்திற்கு அவர் தனது பாராட்டுக்களை தெரிவித்துள்ளார்.

இலங்கையில் அனைத்து விதமான புகையிரத சேவைகளும் இடைநிறுத்தப்படுவதாக அறிவிப்பு!!

இலங்கையில் அனைத்து விதமான புகையிரத சேவைகளும் இடைநிறுத்தப்படுவதாக அறிவிக்கப்பட்டுள்ளது.

இன்றைய தினம் பிற்பகல் 3.30 மணிமுதல் புகையிரத சேவைகள் இடைநிறுத்தப்படுவதாக புகையிரத கட்டுப்பாட்டு அறை அறிவித்துள்ளது.

மீண்டும் எதிர்வரும் திங்கட்கிழமை (23) காலை 6 மணி முதல் புகையிரத சேவைகள் மீண்டும் ஆரம்பிக்கப்படும் என அந்த அறிவிப்பில் சுட்டிக்காட்டப்பட்டுள்ளது.

அந்த வகையில் இன்றைய நாளுக்கான இறுதி புகையிரதமானது கொழும்பு கோட்டையில் இருந்து மஹவ நோக்கி பிற்பகல் 3.30 மணிக்கு புறப்பட்டுச் செல்லவுள்ளதாக தெரிவிக்கப்பட்டுள்ளது.

இவ்வாறான சந்தர்ப்பத்தில் சகல அதிவேக பாதைகளும் இன்று மாலை 4 மணிமுதல் மூடப்படுவதாக வீதி அபிவிருத்தி அதிகாரசபையின் தலைவர் சமிந்த அதுலுவகே தெரிவித்துள்ளமை குறிப்பிடத்தக்கது.

ஊரடங்குச் சட்டம் தொடர்பில் நாட்டு மக்களுக்கு முக்கிய அறிவிப்பு!!

இலங்கையில் கொரோனா தொற்று தீவிரமடைந்துள்ள நிலையில் இன்று முதல் எதிர்வரும் திங்கட்கிழமை வரை ஊரடங்குச் சட்டம் அமுல்படுத்தப்பட்டுள்ளது.

இந்தப் காலப்பகுதிகளில் சில திணைக்களின் செயற்பாடுகளை அத்தியவாசிய சேவையாக அரசாங்கம் பிரகடனம் செய்துள்ளது.

ஊரடங்கு சட்டம் அமுலில் உள்ள காலப்பகுதியில் இயன்றவரை வெளியில் எங்கும் செல்லாமல் வீட்டில் இருக்குமாறு அரசு பொதுமக்களை கேட்டுக்கொண்டுள்ளது.

சுகாதார துறை , பாதுகாப்பு துறை மற்றும் துறைமுகம் போன்ற அத்தியாவசிய சேவை பணியாளர்கள் தங்கள் திணைக்களங்களின் அடையாள அட்டையை காண்பித்து பணிகளுக்கு செல்ல முடியும்.

பொதுமக்கள் அவசரத்தின் போது வைத்தியசாலை மற்றும் பார்மசிகளுக்கும் சென்று வர அனுமதி வழங்கப்பட்டுள்ளது.

வெளிநாடு செல்பவர்கள் தங்களது கடவுச்சீட்டை காண்பித்து கட்டுநாயக்க விமான நிலையம் செல்ல முடியும் என அரசாங்கம் அறிவித்துள்ளது.

இலங்கையில் கொரோனா வைரஸ் பரவலுக்கான பிரதான காரணம் இதுதானாம்!!

கொரோனா வைரஸ் பரவுவதற்கு புகைப்பிடித்தல் பிரதான காரணமாக அமைந்துள்ளதாக அரச மருத்துவ அதிகாரிகள் சங்கம் தெரிவித்துள்ளது.

கொழும்பில் நடைபெற்ற செய்தியாளர் சந்திப்பில் வைத்து சங்கத்தின் செயலாளர் மருத்துவர் ஹரித அளுத்கே இதனை கூறியுள்ளார்.

இந்த நிலைமை குறித்து தொடர்ந்தும் அரச மருத்துவ அதிகாரிகள் சங்கம் தெளிவுப்படுத்தி வந்துள்ளது.

நடைமுறையில் இருக்கும் சட்டம் போதுமானதாக இல்லை என்றால், சட்டத்தை உருவாக்கி நாட்டில் அவசர நிலையை அறிவிக்க வேண்டும்.

வர்த்தமானி அறிவித்தல் மூலம் சட்டத்தை அறிவிக்க வேண்டும். புகைப்பிடித்தல் வைரஸ் பரவலுக்கு காரணமாக அமைந்துள்ளது.

சிகரெட் விற்பனை மிகவும் ஆபத்தான நடவடிக்கை. புகைப்பிடிக்கும் நபர்களுக்கு வைரஸ் பரவும் வீதம் அதிகம்.

வாழ்க்கையை நேசிப்பவர்களாக இருந்தால் புகைப்பிடித்தலை உடனடியாக நிறுத்துமாறு மருத்துவர் அளுத்கே கேட்டுக் கொண்டுள்ளார்.

கம்பஹா, கொழும்பில் அதிகளவான கொரோனா நோயாளர்கள் கண்டுபிடிப்பு!!

இலங்கையில் கொரோனா வைரஸ் தொற்றினால் கம்பஹா மற்றும் கொழும்பு மாவட்டங்கள் அதிகமாக பாதிக்கப்பட்டுள்ளதாக சுகாதார துறையினர் அறிவித்துள்ளனர்.

முறையே கம்பஹாவில் 18 பேரும் கொழும்பில் 17 பேரும் இதுவரை பாதிக்கப்பட்டுள்ளனர். புத்தளத்தில் 12 பேர் பாதிக்கப்பட்டுள்ளனர்.

அத்துடன் குருநாகல் -04, களுத்துறை-04, இரத்தினபுரி -03, காலி -01, கேகாலை -01, மாத்தறை -01, மட்டக்களப்பு -01, பதுளை -01 என கொரோனா வைரஸ் தொற்று நோயாளர் அடையாளம் காணப்பட்டுள்ளனா்.

இலங்கையில் வெளிநாட்டவா்கள் 03 பேரும் தொற்றுக்குள்ளாகி அடையாளம் காணப்பட்டுள்ளனா்.

வயது ரீதியாக இலங்கையில் பாதிக்கப்பட்டவா்களில் 11 முதல் 20 வயதானோர் 5.6. வீதம், 21 முதல் 30 வயதானோர் -11.1 வீதம், 31 முதல் 40 வயதானோர் – 14.8 வீதம், 41 மதல் 50 வயதானோர் – 42.6 வீதம், 51 முதல் 60 வயதானோர் -16.7 வீதம், 61 முதல் 70 வயதினா் 7.4 வீதம், 71 முதல் 80 வயதினா் -7.4 வீதமாக உள்ளனா்.

பாலின ரீதியான 78 வீதம் ஆண்களும் 22 வீதம் பெண்களும் கொரோனா தொற்றுக்குள்ளாகியுள்ளனா்.

இலங்கையில் இதுவரை 65 பேர் கொரோனா வைரஸினால் பாதிக்கப்பட்ட நிலையில் அங்கொட தொற்றுநோய் தேசிய வைத்தியசாலையில் சிகிச்சை பெற்று வருகின்றமை குறிப்பிடத்தக்கது.

இத்தாலியை போன்று இலங்கையிலும் பாதிப்பு ஏற்படும் அபாயம் : அரசு மருத்துவ அதிகாரிகள் சங்கம்!!

இத்தாலியுடன் ஒப்பிடும் போது இலங்கை மோசமான நிலைக்குள்ளாகும் என அரசு மருத்துவ அதிகாரிகள் சங்கம் எச்சரிக்கை விடுத்துள்ளது.

இலங்கையில் கொரோனா வைரஸ் தொற்று ஏற்பட்டுள்ள வீகிதத்துடன் ஒப்பிட்டு இந்த தகவல் வெளியிடப்பட்டுள்ளது.

இலங்கை முதல் 7 நாட்களின் முடிவில் (முதலாவது உள்நாட்டு கொரோனா நோயாளி முதல்) இத்தாலியுடன் ஒப்பிடும்போது நாங்கள் மோசமான சூழ்நிலையில் இருக்கிறோம் என சங்கத்தினர் குறிப்பிட்டுள்ளனர்.

உலக சுகாதார ஸ்தாபனம் பரிந்துரை செய்ததற்கமைய இது தொடர்பில் தீவிர முடிகளை எடுக்கவில்லை என்றால் பாரிய நிலைமை ஒன்று இலங்கையில் ஏற்படும் என கூறியுள்ளனர்.

கொரோனா பரவலை கட்டுப்படுத்த உரிய நடவடிக்கை எடுக்கவில்லை என்றால் தமிழ் சிங்கள புத்தாண்டு காலப்பகுதியில் இந்த நிலைமை உச்சத்தை எட்டும் என அந்த சங்கம் மேலும் தெரிவித்துள்ளது.