அதிர்ச்சிப் புகைப்படங்கள்

கொழும்பு – கண்டி வீதியில் அமைந்துள்ள காட்டுப் பகுதியில் ஐ.எஸ் பயங்கரவாதிகள் பதுங்கியிருக்கும் முகாம் கண்டுபிடிக்கப்பட்டுள்ளது. நிட்டம்புவ, பஸ்யால காட்டுக்குள் தீவிரவாதிகளின் முகாம் ஒன்று உள்ளதாக பொலிஸார் சந்தேகம் வெளியிட்டுள்ளனர்.

அதற்கமைய நேற்று இரவு விசேட அதிரடிப்படையினர் மற்றும் பொலிஸார் காட்டுக்குள் நுழைந்து விசேட சுற்றிவளைப்பு ஒன்று மேற்கொண்டுள்ளனர்.

இந்த சுற்றிவளைப்பிற்கு முன்னர் அந்த பகுதி மக்களுக்கு பொலிஸார் எச்சரிக்கை விடுத்துள்ளனர். காட்டுக்குள் 4 பேர் மறைந்திருப்பதாகவும், அவர்கள் தப்பிக்க முடியாதளவு சுற்றிவளைப்பு மேற்கொள்ளப்பட்டுள்ளதாகவும் பொலிஸார் குறிப்பிட்டுள்ளனர்.

இதன்போது அந்தப் பகுதியில் முகாம் ஒன்று கண்டுபிடிக்கப்பட்டுள்ளதாக தெரிய வருகிறது. எனினும் இது குறித்து பொலிஸார் உத்தியோகபூர்வமாக இதுவரை அறிவிக்கவில்லை. இந்த முகாம் குறித்த புகைப்படங்கள் தற்போது சமூக வலைத்தளங்களில் வெளியாகியுள்ளது.

நீர்கொழும்பு பொலிஸ் பிரிவில் தங்கியிருந்த பாகிஸ்தான் பிரஜைகள் 600 பேர் நிட்டம்புவ பொலிஸ் பிரிவுக்குட்பட்ட அஹமதிய்யா நிலையத்திற்கு அனுப்பப்பட்டுள்ளதாக தகவல்கள் வெளியாகியுள்ளன.

பாகிஸ்தானில் காணப்படுகின்ற யுத்த சூழ்நிலை காரணமாக ஐக்கிய நாடுகள் அமைப்பினால் அவர்கள் இலங்கைக்கு அனுப்பி வைக்கப்பட்டுள்ளனர்.

கடந்த ஞாயிற்றுக்கிழமை இடம்பெற்ற குண்டுத் தாக்குதலை தொடர்ந்து நீர்கொழும்பில் தங்கியிருந்த வீடுகளில் இருந்து வௌியேறுமாறு அந்தந்த வீட்டு உரிமையாளர்கள் அவர்களிடம் கூறியுள்ளனர்.

இதனையடுத்தே அவர்கள் அனைவரும் அங்கிருந்து வெளியேற்றப்பட்டு அஹமதிய்யா நிலையத்திற்கு அனுப்பப்பட்டுள்ளதாக தெரிவிக்கப்படுகிறது.

குறித்த பாகிஸ்தான் நாட்டவர்களின் பாதுகாப்பு தொடர்பில் அச்சம் எழுந்துள்ளதாக நீர்கொழும்பு பொலிஸாருக்கு கிடைத்த தகவலுக்கமைய அவர்கள் இடமாற்றம் செய்யப்பட்டுள்ளனர்

பொலிஸார் விடுத்துள்ள முக்கிய அறிவிப்பு

நாட்டில் தற்போது ஏற்பட்டுள்ள அசாதாரண சூழ்நிலை குறித்த மக்கள் அச்சப்பட வேண்டாம் என பொலிஸார் தெரிவித்துள்ளனர். நாடு முழுவதும் தற்போது தீவிர சோதனைகள் இடம்பெற்று வருகின்றன.

சந்தேகத்திற்கிடமான வாகனங்களை அப்புறப்படுத்தும் நோக்கில் இந்த நடவடிக்கை முன்னெடுக்கப்படுகிறது. பல பிரிவுகளாக பொலிஸ் படை தீவிர சோதனைகளை மேற்கொண்டு வருகின்றன. இதற்கான பல வீதிகள் மூடப்பட்டு சோதனையிடப்படுகிறது.

கொழும்பு மாத்திரமன்ற நாட்டின் முழு பகுதியும் தீவிர சோதனை உட்படுத்தப்பட்டு வருகிறது. சந்தேகத்திற்கிடமானவர்கள் கைது செய்யப்பட்டு விசாரணை செய்யப்படுகின்றனர். இது தொடர்பில் மக்கள் அச்சம் கொள்ளத் தேவையில்லை என பொலிஸார் அறிவித்துள்ளனர்.

யாழில் ஐவர் கைது

கொழும்பு குண்டு வெடிப்பு சம்பவத்துடன் தொடர்புடையவர்கள் என்ற சந்தேகத்தின் பேரில் ஐந்து சந்தேகநபர்களை யாழ்ப்பாணம் பொலிஸார் கைது செய்துள்ளனர். யாழ். நாவாந்துறை ஐந்து சந்திப் பகுதியில் வைத்து இன்று காலை குறித்த சந்தேகநபர்கள் கைது செய்யப்பட்டுள்ளனர்.

இவர்கள் வெளிமாவட்டத்தை சேர்ந்தவர்கள் என்றும், குறித்த பகுதியில் சந்தேகத்திற்கிடமாக நடமாடியதால் கைது செய்யப்பட்டுள்ளதாகவும் பொலிஸார் தெரிவித்துள்ளனர்.

இந்த நிலையில் சந்தேகநபர்களிடம் விசாரணைகளை மேற்கொண்டு வருவதாக யாழ்ப்பாணம் பொலிஸார் குறிப்பிட்டுள்ளனர்.

இணுவில் ஆலய வளாகத்தில் பரபரப்பு

யாழ்ப்பாணம் இணுவில் ஆலயத்திற்கு அருகில் பாரிய தேடுதல் நடவடிக்கைகள் முன்னெடுக்கப்பட்டுள்ளது. ஆலய வளாகத்திற்கு அருகில் நிறுத்தி வைக்கப்பட்டிருந்த மோட்டார் சைக்கிள் மற்றும் சந்தேகத்திற்கிடமான பொதியின் காரணமாக குழப்ப நிலை ஏற்பட்டது.

இதனையடுத்து சம்பவ இடத்திற்கு வந்த அதிரடிப் படையினர் தீவிர சோதனை நடவடிக்கையில் ஈடுபட்டனர். குண்டு செயலிழக்கும் குழுவும் அந்தப் பகுதியில் தேடுதல் நடவடிக்கையை மேற்கொண்டது.

எனினும் மோட்டார் சைக்கிள் உரிமையாளர் வந்த நிலையில் அவரிடம் விசாரணை மேற்கொள்ளப்பட்ட பின்னர் அவர் விடுவிக்கப்பட்டார்.

குறித்த பகுதியிலுள்ள விளையாட்டு மைதானத்தில் இருந்த பொதியினை சோதனை செய்த இராணுவத்தினர் அதனை அங்கிருந்து கொண்டு சென்றுள்ளனர். இந்த சோதனை நடவடிக்கை காரணமாக அந்தப் பகுதியில் பரபரப்பு நிலை ஏற்பட்டுள்ளது.

என்ன தான் நடக்கின்றது இலங்கையில்?

கம்பஹாவில் சற்று முன்னர் குண்டு வெடிப்பு சம்பவம் ஒன்று ஏற்பட்டுள்ளதாக பொலிஸார் தெரிவித்துள்ளனர். பூகொட நீதிமன்ற வளாகத்திற்கு அருகில் இந்த சம்பவம் பதிவாகி உள்ளது.

தாக்கம் குறைத்த குண்டு வெடித்தமையினால் எவருக்கும் பாதிப்பு ஏற்படவில்லை என பொலிஸார் அறிவித்துள்ளனர். நீதிமன்றத்திற்கு அருகிலுள்ள காணி ஒன்றில் இந்த வெடிப்பு சம்பவம் இடம்பெற்றதாக அங்குள்ளவர்கள் தெரிவித்துள்ளனர்.

குறித்த சம்பவம் தொடர்பான மேலதிக தகவல்கள் எதுவும் இதுவரையில் வெளியாகவில்லை.

இளம் பெண் பலி

தெஹிவளையில் இடம்பெற்ற தற்கொலை குண்டுத் தாக்குதலில் திருமணத்திற்கு தயாராக இருந்த இளம் பெண்ணொருவர் உயிரிழந்துள்ளார். பாணந்துறையை சேர்ந்த 24 வயதான பியுமி ஷானிகா சல்காது என்பவரே உயிரிழந்துள்ளார்.

விவசாய திணைக்களத்தில் உதவி முகாமையாளராக செயற்பட்ட இவர், ஸ்ரீ ஜயவர்தனபுர பல்கலைக்கழகத்தில் பட்டம் பெற்றுள்ளார். படிப்பில் சிறந்த நிலையில் காணப்பட்டவர், தொழிலுக்கும் மிகவும் அக்கறையுடன் சென்று வருவார் என அவரது தாயார் கண்ணீருடன் தெரிவித்துள்ளார். சம்பவம் இடம்பெற்ற தினத்தன்று நுகேகொடை பிரதேசத்தில் வகுப்பறைக்கு சென்றிருந்தார்.

அன்று 11 மணியளவில் குண்டு வெடிப்பதனால் மகளுக்கு அழைத்து அவதானமாக இருக்குமாறு கூறினேன். பயப்பட வேண்டாம் அம்மா நான் படிக்கின்றேன் என மகள் கூறினார். சில மணி நேரங்களின் மீண்டும் அழைத்தேன் மகள் பதிலளிக்கவில்லை.

இறுதியாக அவரை சடலமாக வீட்டிற்கு கொண்டு வந்தனர் என தாயார் குறிப்பிட்டுள்ளார். கடந்த ஞாயிற்றுக்கிழமை தெஹிவளையில் நடத்தப்பட்ட பயங்கரவாத தாக்குதல் காரணமாக மூன்று பேர் உயிரிழந்திருந்தனர்.

இலங்கை கிரிக்கட் வீரர்

நீர் கொழும்பு கட்டுவாபிட்டிய புனித செபஸ்தியார் தேவாலயத்தில் உயிர்த்த ஞாயிறு தினம் இடம்பெற்ற குண்டுத் தாக்குதலில் தாம் தப்பிப் பிழைத்ததாக பிரபல கிரிக்கட் வீரர் தசுன் சங்க தெரிவித்துள்ளார்.

ஈஸ்டர் தினமன்று நிச்சயமாக தாம் தேவாலயம் சென்று வழிபாடுகளில் ஈடுபடுவது வழமை என்ற போதிலும், சனிக்கிழமையன்று 170 கிலோ மீற்றர் தூரம் பயணம் செய்து அனுராதபுரத்திலிருந்து வீடு வந்த காரணத்தினால் களைப்பு காரணமாக தாம் தேவாலயம் செல்லவில்லை என்று அவர் கூறியுள்ளார். எனினும், தாயும் பாட்டியும் தேவாலயத்திற்கு சென்றிருந்தனர் என்றும் அவர் குறிப்பிட்டுள்ளார்.

தெய்வாதீனமாக இரண்டு பேரும் காயங்களுடன் உயிர் பிழைத்திருந்தனர் என அவர் தெரிவித்துள்ளார். ஒட்டுமொத்த தேவாலயமும் சிதிலமாகியிருந்தது எனவும் அந்தக் காட்சியை பார்த்த எவரும் தேவாலயத்திற்குள் இருந்த எவரும் உயிருடன் இருப்பார்கள் என நம்ப மாட்டார்கள் என அவர் குறிப்பிட்டுள்ளார்.

தேவாலயத்திற்கு விரைந்த போது முதலில் தாயை தேட வேண்டுமென்பதே எனது இலக்காக இருந்தது, நானும் நாண்பர்களும் தாயை தேடிக் கண்டு பிடித்தோம் அவர் சிறு காயங்களுக்கு உள்ளாகியிருந்தார். பின்னர் பாட்டியாரைத் தேடிக் கண்டு பிடித்தோம் அவரைச் சுற்றியிருந்த அனைவரும் பிணமாகவே கிடந்தனர், தெய்வாதீனமாக பாட்டி உயிருடன் இருந்தார்.

உடனடியாக அவர்களை வைத்தியசாலைக்கு அழைத்துச் சென்று சிகிச்சை வழங்கினோம். இந்தப் பகுதியைச் சேர்ந்த மக்கள் மிகவும் சகவாழ்வான மக்கள் அடுத்தவரை பற்றி புறம் பேசாது தங்களுடைய பணிகளைளே மேற்கொள்ளும் மக்கள், இந்த சம்பவம் பேராதிர்ச்சியையும் கவலையையும் நீங்கா வடுக்களையும் ஏற்படுத்தியுள்ளது என அவர் குறிப்பிட்டுள்ளார்.

புர்கா அணிந்து சென்றவர் மீது தாக்குதல்

கொழும்பின் புறநகர் பகுதியான வத்தளையில் ஆணொருவர் புர்கா அணிந்து சென்ற சம்பவத்தால் பதற்றம் ஏற்பட்டுள்ளது.

புர்கா அணிந்த ஒருவர் வத்தளை பகுதியில் வீதியில் சென்றுள்ளார். இந்த நிலையில் அங்கிருந்த மக்களுக்கு குறித்த நபரின் நடவடிக்கையில் சந்தேகம் ஏற்பட்டுள்ளது.

இதனையடுத்து அவரை சுற்றிவளைத்த மக்கள் சோதனை செய்ய முயற்சித்துள்ளனர். இந்த நிலையில் அங்கு பதற்ற நிலை ஏற்பட்டுள்ளதாக தெரியவருகிறது. அத்துடன் இந்த விடயம் தொடர்பில் பொலிஸாருக்கும் அறிவிக்கப்பட்டுள்ளது.

இதேவேளை நேற்றைய தினம் நாடாளுமன்ற உறுப்பினர் ஆசு மாரசிங்க புர்கா அணிவதை தடை செய்ய வேண்டும் என நாடாளுமன்றத்தில் யோசனையை கொண்டு வந்திருந்தார். இதனையடுத்து எச்சரிக்கும் வகையிலான இரு தொலைபேசி அழைப்புகள் ஆசு மாரசிங்கவுக்கு கிடைத்துள்ளதாக தகவல்கள் தெரிவிக்கின்றன.

தற்கொலை தாக்குதல்கள் தொடரலாம்

ஐ.எஸ்.ஐ.எஸ். அமைப்பு இலங்கைக்குள் எதிர்காலத்திலும் பயங்கரவாத தாக்குதல்களை நடத்தும் ஆபத்து இருப்பதாக விமானப் படையின் புலனாய்வு பிரிவு, விமானப்படை உயர் அதிகாரிகளுக்கு அனுப்பியுள்ள கடிதம் ஒன்றில் தெரிவித்துள்ளது.

இந்த கடிதம் நேற்று அனுப்பி வைக்கப்பட்டுள்ளது. தற்கொலை தாக்குதல்கள், கிறிஸ்தவ, கத்தோலிக்க மற்றும் வெளிநாட்டவர்களை இலக்கு வைக்கும் தாக்குதல்கள் நடத்தப்படலாம் என விமானப்படை புலனாய்வு பிரிவு கூறியுள்ளது.

மக்கள் அதிகமாக நடமாடும் இடங்கள், அரச மற்றும் தனியார் சொத்துக்கள் இலக்கு வைத்து இந்த தற்கொலை தாக்குதல்கள் நடத்தப்படலாம் எனவும் சுட்டிக்காட்டப்பட்டுள்ளது. அத்துடன் பயங்கரவாத தாக்குதல்களை தடுக்க உரிய நடவடிக்கை எடுக்குமாறு விமானப்படை புலனாய்வு பிரிவு அதிகாரிகளை கேட்டு கொண்டுள்ளது.