பறந்து கொண்டிருந்த விமானத்தில் இலங்கை பயணிகள் இருவர் கடுமையாக மோதிக் கொண்டதாக ஊடகம் ஒன்று தகவல் வெளியிட்டுள்ளது.

இருவருக்கும் இடையில் ஏற்பட்ட வாய் தகராறு இறுதியில் மோதலாக மாறியுள்ளதென விமான நிலைய பொலிஸார் தெரிவித்துள்ளனர்.

இலங்கையை சேர்ந்த 45 மற்றும் 35 வயதுடைய பயணிகள் இருவரே இவ்வாறு மோசமாக நடந்து கொண்டதாக குற்றம் சாட்டப்பட்டுள்ளது.

குறித்த இருவரும் தங்கொட்டுவ மற்றும் பம்பலப்பிட்டி பிரதேசத்தை சேர்ந்தவர்கள் எனவும், அவர்கள் ஜப்பானில் பல வருடங்கள் சேவை செய்துவிட்டு நாடு திரும்பியவர்கள் எனவும் பொலிஸார் குறிப்பிட்டுள்ளனர்.

நரீடா விமான நிலையத்தில் இருந்து கட்டுநாயக்க நோக்கி பயணித்த யு.எல்.455 என்ற விமானத்தில் 100க்கும் அதிகமான பயணிகள் பயணித்துள்ள நிலையில் அவர்கள் நீண்ட பயணம் மேற்கொண்டுள்ளனர்.

விமானத்தில் பலர் உறக்கத்தில் இருந்த வேளையில், இலங்கை பயணி ஒருவர் அதிகமான மது அருந்திவிட்டு அருகில் இருந்த பெண்ணிடம் தவறான முறையில் நடந்துக் கொண்டமையினால் குழப்ப நிலை ஏற்பட்டுள்ளது.

விமான பயணிகளுக்கு நெருக்கடி ஏற்படும் வகையில் நடத்துக் கொண்டிருந்த இந்த பயணி தொடர்பில் மற்றுமொருவர் அதனை தடுக்க முயன்றுள்ளார். இதன்போது இருவருக்கு இடையில் மோதல் நிலை ஏற்பட்டுள்ளது. இதில் ஒருவர் காயமடைந்துள்ளார்.

குறித்த விமானம் கட்டுநாயக்க விமான நிலையத்தை வந்தடைந்திருந்த நிலையில், விமான நிலைய ஊழியர்களினால் சம்பவம் தொடர்பில் கட்டுநாயக்க விமான நிலைய அதிகாரிகளிடம் அறிவிக்கப்பட்டுள்ளது.

அதன் பின்னர் குறித்த இரண்டு பயணிகளையும் கைது செய்வதற்கு பொலிஸார் நடவடிக்கை மேற்கொண்டுள்ளதாக குறித்த கொழும்பு ஊடகம் தகவல் வெளியிட்டுள்ளது.

பொரலஸ்கமுவ பிரதேசத்தில் மசாஜ் நிலையம் என்ற பெயரில் இயங்கி வந்த பாலியல் தொழில் நிலையம் ஒன்றை பொலிஸார் சுற்றிவளைத்துள்ளனர்.

மிரிஹான ஊழல் ஒழிப்பு பிரிவிற்கு கிடைத்த இரகசிய தகவலுக்கு அமையவே இந்த சுற்றிவளைப்பு இடம்பெற்றுள்ளது.

இதில் பாலியல் தொழில் நிலைய முகாமையாளரான முன்னாள் இராணுவ வீரர் ஒருவரும் 7 பெண்களும் கைது செய்யப்பட்டுள்ளனர்.

இந்த நிலையத்தில் உள்நுழைவதற்காக ரூபாய் 2 ஆயிரம் அறவிடப்பட்டுள்ளதுடன், பெண்கள் அதிக விலைக்கு விற்பனை செய்யப்பட்டுள்ளதாகவும் தகவல் கிடைத்துள்ளது.

இதேவேளை, கைது செய்யப்பட்டுள்ள பெண்கள், குருநாகல், காலி, இரத்மலானை, நீர்கொழும்பு மற்றும் மாத்தறை பிரதேசங்களை சேர்ந்தவர்கள் என பொலிஸார் கூறியுள்ளனர்.

இந்த மசாஜ் நிலையமான பாலியல் தொழில் நிலையம், இரண்டு மாடி கொண்ட சொகுசு கட்டடத்தில் ஒரு இலட்சத்து 50 ஆயிரம் ரூபாய் மாதாந்த வாடகை அடிப்படையில் பெறப்பட்டு நடத்திச் செல்லப்பட்டுள்ளமை குறிப்பிடத்தக்கது.

ஹம்பாந்தோட்டை சூரியவெவ பகுதியில் பெண் ஒருவர், தனது கணவனை தீ மூட்டி கொலை செய்துள்ளார். இந்த சம்பவம் நேற்று இடம்பெற்றதாகவும் உயிரிழந்த நபர் 67 வயதுடையவர் எனவும் பொலிஸார் தெரிவித்துள்ளனர்.

குடும்பத் தகராறு காரணமாகவே இந்த சம்பவம் இடம்பெற்றுள்ளது என பொலிஸார் கூறியுள்ளனர்.

கணவரை தீ மூட்டி கொலை செய்த மனைவி கைது செய்யப்பட்டுள்ளதுடன், மேலதிக விசாரணைகள் முன்னெடுக்கப்பட்டு வருவதாக ஹம்பாந்தொட்டை பொலிஸார் குறிப்பிட்டனர்.

கைது செய்யப்பட்டுள்ள பெண், ஹம்பாந்தோட்டை நீதவான் நிதிமன்றில் இன்றைய தினம் முன்னிலைப்படுத்தப்படவுள்ளார்.

தொழில் வாய்ப்பை பெற்று தென் கொரியாவுக்கு சென்று மரணமடைந்த இலங்கையரின் இறுதிக் கிரியைகள் இடம்பெறவுள்ளது.

பத்தேகம பொது மயானத்தில் குறித்த இளைஞரின் இறுதிக் கிரியைகள் இன்று இடம்பெறவுள்ளது. குறித்த இலங்கை இளைஞரின் சடலம் கடந்த 24ஆம் திகதி தென் கொரியாவில் உள்ள கங்கைக்கு அருகிலிருந்து மீட்கப்பட்டது.

2014ஆம் ஆண்டு கொரிய மொழிப் பரீட்சையில் தேர்ச்சி பெற்று தொழில் வாய்ப்பை பெற்று இவர் தென் கொரியாவுக்கு சென்றிருந்தார்.

தினமும் உறவினர்களை தொலைபேசியில் தொடர்புகொள்ளும் இளைஞன் கடந்த ஒரு வாரமாக உறவினர்களை தொடர்பு கொள்ளவில்லை என குடும்பத்தினர் தெரிவித்திருந்ததுடன், கடந்த 14 ஆம் திகதியே இளைஞன் கடைசியாக குடும்பத்தினருடன் தொலைபேசியில் உரையாடியுள்ளார்.

இந்த நிலையில் அவரது குடும்பத்தினர், வெளிநாட்டு வேலைவாய்பு பணியகத்தில் முறைப்பாடு பதிவு செய்திருந்தனர்.

இதனை தொடர்ந்து, இலங்கை வெளிநாட்டு வேலைவாய்பு பணியகம் மேற்கெணாண்ட விசாரணைகளை தொடர்ந்து இலங்கையரின் சடலம் மீட்கப்பட்டது.

மேலும், கொரியாவில் உள்ள இலங்கை தூதரகத்தின் தலையீட்டினால் குறித்த இளைஞனின் சடலம் இலங்கைக்கு கொண்டு வரப்பட்டமை குறிப்பிடத்தக்கது.

தனது மகளை துஷ்பிரயோகத்திற்கு உட்படுத்தி அதனை வீடியோவாக பதிவு செய்து வைத்திருந்த நபர் ஒருவருக்கு விளக்கமறியல் நீடிக்கப்பட்டுள்ளது.

இதன்படி, சந்தேகநபரை எதிர்வரும் 17ஆம் திகதி வரை விளக்கமறியலில் வைக்குமாறு மல்லாகம் நீதிமன்ற நீதிபதி ரி.கருணாகரன் உத்தரவிட்டுள்ளார்.

இது குறித்த வழக்கு நேற்று விசாரணைக்கு எடுத்துகொள்ளப்பட்ட போதே நீதிபதி இந்த உத்தரவை பிறப்பித்துள்ளார்.

திருட்டு குற்றச்சாட்டு தொடர்பில் கணவன் மற்றும் மனைவி ஆகியோரை சுன்னாகம் பொலிஸார் கைது செய்திருந்ததுடன், அவர்களிடம் இருந்து சான்றுப் பொருட்களையும் கைப்பற்றியிருந்தனர்.

இதன் போது மனைவியிடம் இருந்து கைப்பற்றப்பட்ட கைத்தொலைபேசியை சோதனை செய்த போது, அதில் சிறுமி ஒருவர் துஷ்பிரயோகம் செய்யப்பட்டமை வீடியோவாக பதிவு செய்யப்பட்டிருந்தது.

இது குறித்து விசாரணை செய்தபோது துஷ்பிரயோகத்திற்கு உட்படுத்தப்பட்டது சந்தேகநபரின் மகள் எனத்தெரிய வந்துள்ளது. இதனையடுத்து சம்பவம் தொடர்பில் பொலிஸார் பிரிதொரு வழக்கை தாக்கல் செய்திருந்தனர்.

இந்நிலையிலேயே, குறித்த வழக்கு நேற்று விசாரணைக்கு எடுத்துகொள்ளப்பட்ட போது, சந்தேகநபரின் விளக்கமறியல் நீடிக்கப்பட்டு உத்தரவு பிறப்பிக்கப்பட்டுள்ளமை குறிப்பிடத்தக்கது.