மேல் மாகாணத்திலுள்ள பாடசாலைகளில் 58 வீதமானமை டெங்கு நுளம்பு பரவும் வகையில் காணப்படுவதாக சுகாதார அமைச்சு தெரிவித்துள்ளது.

கடந்த இரண்டு நாட்களாக முன்னெடுக்கப்பட்ட விசேட டெங்கு ஒழிப்பு நடவடிக்கைகளில் 889 பாடசாலைகள் சோதனைக்கு உட்படுத்தப்பட்டுள்ளதாக விசேட வைத்திய நிபுணர் பிரஷீலா சமரவீர சுட்டிக்காட்டியுள்ளார்.

இதேவேளை டெங்கு நுளம்பு பரவும் வகையில் பாடசாலை சூழலை வைத்திருந்தமை தொடர்பில் பாடசாலை அதிபர்களுக்கு எதிராக சட்ட நடவடிக்கை எடுக்கப்படும் என கல்வி அமைச்சு குறிப்பிட்டுள்ளது.

பாடசாலை சூழலை சுத்தமாக வைத்திருக்குமாறு சுற்று நிரூபத்தினூடாக ஏற்கனவே அதிபர்களுக்கு ஆலோசனை வழங்கியுள்ளதாக அமைச்சின் மேலதிக செயலாளர் அஷோக்க சேனானி தெரிவித்துள்ளார்.

வத்தளை, நீர்கொழும்பு வீதி ஓரத்தில் நிறுத்தி வைக்கப்பட்டிருந்த கார் ஒன்று தீப்பிடித்து எரிந்துள்ளதாக பொலிஸார் தெரிவித்துள்ளனர்.

இந்த சம்பவம் இன்று பிற்பகல் 2.30 மணியளவில் இடம்பெற்றுள்ளதாக தெரிவிக்கப்படுகின்றது. இதன் போது கார் முற்றாக எரிந்து சேதமடைந்துள்ளதாக தெரிவிக்கப்படுகின்றது.

இந்நிலையில், சம்பவ இடத்திற்கு விரைந்த தீயணைப்பு படையினர் தீயினை கட்டுப்பாட்டுக்குள் கொண்டு வந்துள்ளனர்.

இந்த விபத்தின் போது ஏற்பட்ட சேத விபரங்கள் எதுவும் வெளியாகாத நிலையில், பொலிஸார் மேலதிக விசாரணைகளை மேற்கொண்டு வருகின்றனர்.

கடுவலை பாலத்தில் இருந்து களனி கங்கையில் தாயால் தூக்கி வீசப்பட்ட குழந்தையின் சடலம் கைப்பற்றப்பட்டுள்ளது.

இன்று காலை கடுவலை பாலத்திற்கு அருகில் இருந்து இந்த சடலம் மீட்கப்பட்டுள்ளதாக பொலிஸார் குறிப்பிட்டுள்ளனர்.  மேலும், சம்பவத்தில் பலியானவர் ஆறு வயதான சிறுவன் எனத் தெரியவந்துள்ளது.

தற்கொலை செய்யும் நோக்குடன் குறித்த தாய் கடுவலை பாலத்தில் இருந்து சிறுவனுடன் கங்கையில் குதித்துள்ளார்.
எது எவ்வாறு இருப்பினும், அங்கிருந்தவர்கள் தாயை காப்பாற்றியுள்ளனர்.

மேலும், தாய் பியகம பொலிஸாரால் கைதுசெய்யப்பட்டுள்ளார்.

கடந்த சில மாதங்களாக இலங்கையில் நிலவி வரும் கடும் வறட்சியான காலநிலை தொடர்பில் சர்வதேச ஊடகம் ஒன்று கவனம் செலுத்தியுள்ளது.

கடந்த சில வாரங்களாக, தெற்காசியா முழுவதும் கடுமையான வெப்பநிலை உணரப்படுவதாக அல்ஜசீரா ஊடகம் தகவல் வெளியிட்டுள்ளது.

சமகாலத்தில் இலங்கை தீவிரமான வெப்ப நிலைமைக்கு முகம் கொடுத்துள்ளது. இதனால் பல்வேறு தரப்பினரும் பெரிதும் பாதிக்கப்பட்டுள்ளனர்.

கொழும்பில் காணப்படும் வெப்பநிலை, சராசரியிலிருந்து 31 டிகிரி செல்சியஸ் வரை ஏப்ரல் மாதத்தில் உணரப்பட்டுள்ளளது. எனினும் ஈரப்பதமான கடல் காற்று இன்னும் 36 செல்சியஸ் அளவில் உணரப்படுவதாக குறிப்பிடப்படுகின்றது.

அதிக வெப்பநிலை நிலவுகின்ற போதிலும், ஒரு பகுதி வீடுகளில் காற்றுச்சீரமைத்தல் இல்லை என சுட்டிக்காட்டப்பட்டுள்ளது.

கடுமையான வெப்பம் காரணமாக இளம் வயதினரும் முதியோர்களும் மிகவும் பாதிக்கப்பட்டுள்ளனர். இது குறித்து நாடு மக்களுக்கு எச்சரிக்கை விடுக்கப்பட்டுள்ளதாக குறிப்பிடப்படுகின்றது.

இலங்கையின் மலைநாட்டில் அமைந்துள்ள நுவரெலியா, தேயிலை வளம் கொண்ட நகரமாகும். இதனை குட்டி இங்கிலாந்து என்று அழைப்பார்கள். ஏனெனில் இந்த நகரத்தின் தட்பவெப்ப நிலை ஐரோப்பா பகுதிகளில் உள்ளதனை போன்று காணப்படும்.

நுவரெலியாவில் பொதுவாக ஏப்ரல் மாத வெப்பநிலை சுமார் 10 முதல் 15 செல்சியஸ் வரை காணப்படும். எனினும் கடந்த புதன்கிழமை மெர்குரி 24 செல்சியஸை அடைந்துள்ளது. அண்மைய நாட்களில் நுவரெலியாவில் 22 செல்சியஸிற்கும் அதிகமாக காணப்படுவதாக குறிப்பிடப்படுகின்றது.

தென்மேற்கு பருவமழை மற்றும் கோடை மழையின் ஆரம்பத்திலேயே இந்த வெப்பம் குறைவடையும் சர்வதேச ஊடகமொன்று செய்தி வெளியிட்டுள்ளது.

ஹொரணை பகுதியில் இடம்பெற்ற வாகன விபத்தில் இருவர் உயிரிழந்துள்ளனர்.

பிறிதொரு வாகனத்துடன் குறித்த இளைஞர்கள் பயணித்த மோட்டார் வாகனம் மோதியதாலேயே இந்த விபத்து ஏற்பட்டுள்ளதாக தெரிவிக்கப்படுகிறது.

விபத்தையடுத்து ஹொரணை வைத்தியசாலையில் அனுமதிக்கப்பட்ட இளைஞர்கள் இருவரும் உயிரிழந்துள்ளதாக கூறப்படுகிறது.

விபத்தில் 19 மற்றும் 20 வயதுடைய இளைஞர்களே உயிரிழந்துள்ளனர் என்றும், சம்பவம் தொடர்பில் வாகனத்தின் சாரதி கைது செய்யப்பட்டுள்ளார்.

இதேவேளை அவரை இன்று ஹொரணை நீதவான் நீதிமன்றில் முன்னிலைப்படுத்துவதற்கான நடவடிக்கைகள் எடுக்கப்பட்டுள்ளதுடன், சம்பவம் தொடர்பில் ஹொரணை பொலிஸார் மேலதிக விசாரணைகளை முன்னெடுத்து வருகின்றனர்.

மனைவியுடன் ஏற்பட்ட தகராறு காரணமாக வீட்டுக்கு தீ வைத்த ஒருவரை பொலிஸார் கைது செய்துள்ளனர். இந்த சம்பவம் நேற்றிரவு காத்தான்குடியில் நடந்துள்ளது.

மனைவியுடன் நேற்றிரவு ஏற்பட்ட மோதல் காரணமாக ஆத்திரமடைந்த சந்தே நபர் வீட்டுக்கு தீ மூட்டியுள்ளதாக பொலிஸார் தெரிவித்துள்ளனர்.

சந்தேக நபரை கைது செய்துள்ள காத்தான்குடி பொலிஸார் மேலதிக விசாரணைகளை மேற்கொண்டு வருகின்றனர்.

தலங்கம பகுதியிலுள்ள இரவுநேர விடுதியில் ஏற்பட்ட மோதலில் இளைஞர் ஒருவர் வெட்டி கொலை செய்யப்பட்டுள்ளார்.

தலவத்துகொட பகுதியில் அமைந்துள்ள இரவு நேர விடுதியில் நேற்றிரவு ஏற்பட்ட மோதலில் இளைஞர் வெட்டி கொலை செய்யப்பட்டுள்ளதாக பொலிஸார் தெரிவித்துள்ளனர்.

அத்துருகிரிய மஹஜன மாவத்தையை சேர்ந்த எல்லகொட கமகே இசுரு சம்பத் எனப்படும் லொக்கு பர்டி என்ற 25 வயதுடைய இளைஞரே இவ்வாறு கொலை செய்யப்பட்டுள்ளார்.

முச்சக்கர வண்டி சாரதியாக செயற்படும் குறித்த இளைஞர் கடந்த 27ஆம் திகதி இரவு நண்பர்களுடன் தலவத்துகொட பிரதேசத்தில் உள்ள இரவு நேர விடுதிக்கு சென்றிருந்தார்.

இந்நிலையில், அங்கு ஏற்பட்ட வாய்த்தகராறு முற்றியமையினால் அதிகாலை 3.10 மணியளவில் விடுதியை விட்டு வெளியே வந்த சந்தர்ப்பத்தில் சிலரினால் கூர்மையான ஆயுதத்தில் அவரது ஒரு கால் வெட்டப்பட்டுள்ளது.

ஒன்றைக் காலுடன் உயிரை காப்பாற்றிக் கொள்வதற்கு முயற்சித்த போது அவரை துரத்தி சென்று மற்றைய காலை வெட்டி எடுத்துள்ளனர்.

காயமடைந்தவர் கொழும்பு தேசிய வைத்தியசாலையில் அனுமதிக்கப்பட்டதன் பின்னர் உயிரிழந்துள்ளதாக பொலிஸார் தெரிவித்துள்ளனர்.

பழைய ஒப்பந்தத்தின் அடிப்படையில் சில குழுக்களினால் இந்த இளைஞர் இரவு நேர விடுதிக்கு அழைத்து செல்லப்பட்டு இவ்வாறு வெட்டி கொலை செய்யப்பட்டிருக்கலாம் என பொலிஸார் சந்தேகிக்கின்ற நிலையில் விசாரணைகளை ஆரம்பித்துள்ளனர்.

உயிரிழந்த இளைஞரின் சடலம் கொழும்பு தேசிய வைத்தியசாலையின் பிரேத அறையில் வைக்கப்பட்டுள்ள நிலையில் பிரேத பிரிசோதனை இடம்பெறவுள்ளது.