வவுனியா விவசாய திணைக்களத்தின் முருகனூர் பண்ணையில் செய்கை பண்ணப்பட்ட அன்னாசி அறுவடை விழா இன்று சிறப்பாக இடம்பெற்றது.

வடமாகாண விவசாய அமைச்சின் நிதியுதவியில், முருகனூர் விவசாய பண்ணையில் செய்கை பண்ணப்பட்டுள்ள தென்னையப் பயிர்செய்கைக்குள் ஊடு பயிராக அன்னாசிப் பயிற்செய்கை மேற்கொள்ளப்பட்டிருந்தது.

இதன் மூலம் 75 அன்னாசிச் செய்கையாளர்களுக்கு பயிற்சிகள் வழங்கப்பட்டு செய்கை மேற்கொள்ள வடமாகாண விவசாய அமைச்சின் மூலம் விவசாய திணைக்களத்தால் மானியங்கள் வழங்கப்பட்டிருந்தது.

இந்த நிலையிலேயே இன்று அன்னாசி அறுவடை செய்யப்பட்டு ஒரு கிலோ 150 ரூபாய்க்கு விற்பனை செய்யும் நிகழ்வு இடம்பெற்றது.

வடமாகாண விவசாய அமைச்சர் பொ.ஐங்கரநேசனால் ஆரம்பித்து வைக்கப்பட்ட இவ் அறுவடை விழாவில் வடமாகாண சுகாதார அமைச்சர் ப.சத்தியலிங்கம், வடமாகாண சபை உறுப்பினர்களான ஜி.ரி.லிங்கநாதன், இ.இந்திரராசா, செ.மயூரன், ம.ஜெயதிலக, மாவட்ட விவசாய பணிப்பாளர், விவசாய கல்லூரி அதிபர், விவசாய திணைக்கள உத்தியோகத்தர்கள், மாணவர்கள், விவசாயிகள் எனப்பலரும் கலந்து கொண்டனர்.

 
வவுனியா பூந்தோட்டம் நலன்புரி முகாமில் 1995, 1996ஆம் ஆண்டு காலப்பகுதியிலிருந்து தங்கியுள்ள மக்களுக்கு லைக்கா நிறுவனத்தினால் சின்ன அடம்பன் இராசபுரம் பகுதியில் 68 வீடுகளும், புளியங்குளம் பரிசங்குளம் பகுதியில் 82 வீடுகளும் மொத்தமாக 150 வீடுகள் அமைக்கபட்டுள்ளன.

இன்று (28.04.2017) அங்கு சென்று குடியேறுவதற்கு இம் மக்களுக்கு திறப்புக்கள் மாவட்ட செயலகத்தினால் கையளிக்கவுள்ளதாக தெரிவித்ததுடன், இப்பகுதியில் சென்று குடியேற முடியாது, தமக்கான அடிப்படை வசதிகள் மின்சாரம், போக்குவரத்து, தண்ணீர், வைத்தியசாலை இன்றி அப்பகுதியில் சென்று குடியேற முடியாது தாம் கூலி வேலைகளையே நம்பி இருப்பதால் அங்கு சென்று வாழ்வாதாரத்திற்கு என்ன செய்வது? என்று தெரிவித்து இன்று காலை பூந்தோட்டம் நலன்புரி நிலையத்திலிருந்துத 97 குடும்பங்கள் செல்ல மறுத்து கவனயீர்ப்பு ஆர்ப்பாட்டத்தில் ஈடுபட்டனர்.

இவ்விடயம் தொடர்பாக வவுனியா மாவட்ட அரசாங்க அதிபரை தொடர்பு கொண்ட போது , இம் மக்களுக்கான அனைத்து வசதிகளும் செய்து வழங்கப்பட்டுள்ளது. இவர்கள் அங்கு சென்று குடியேறினால் இவர்களுக்கான மேலதிக வசதிகளையும் எங்களால் வழங்க முடியுமெனத் தெரிவித்தார்.

சமூக விழிப்புணர்வுக்கான மக்கள் அமைப்பின் பிரதான மே தினம் வடக்கின் தலைநகர் மாங்குளத்தில் நடைபெறவுள்ளதாக அமைப்பின் ஒருங்கிணைப்பாளர் நா.தேவகிருஸ்ணன் தெரிவித்தார்.

வவுனியாவில் இன்று ஊடகங்களுக்கு கருத்து தெரிவிக்கையிலேயே மேற்கண்டவாறு தெரிவித்தார். தொடர்ந்து கருத்து தெரிவித்த அவர்​,
​
ஆளும் தேசிய கூட்டரசே பலவந்தமாக காணாமல் ஆக்கப்பட்டவர்களுக்கு பதில் கூறு, அரசியல் கைதிகளை விடுதலை செய், வட மாகாணத்தின் தலைநகரமான மாங்குளத்தில் மாகாணசபையின் அதிகார மையத்தை நிறுவு,
பெண்களின் வாழ்க்கையை சிதைக்கும் நுண்கடன் கம்பனிகளை உடனே இழுத்து மூடு, மலையக மக்களுக்கான காணி உரிமையை வழங்கு,

போன்ற பிரதான கோசங்களுடன் வவுனியா மன்னார் முல்லைத்தீவு மாவட்டங்களை சேர்ந்த விவசாயிகள் தொழிலாளர்கள் மற்றும் மீனவர்களின் பரட்சிகர மேதினமானது வடக்கின் தலைநகர் மங்குளத்தின் தேசிய இளைஞர் சேவைகள் மன்றத்திற்கு முன்பாக 2.30 மணிக்கு பேரணி தொடங்கப்படுவதுடன் மாங்குளம் மகாவித்தியாலயத்தின் மைதானத்தில் மாலை 3.00 மணிக்கு பொதுக் கூட்டம் நடைபெறும்.

மே தினத்தை புரட்சிகர எழுச்சி நாளாக கருதி உழைக்கும் தொழிலாளர் மற்றும் விவசாயிகளை அணி திரளுமாறு சமூக விழிப்புணர்வுக்கான மக்கள் அமைப்பின் ஒருங்கிணைப்பாளர் நா.தேவகிருஸ்ணன் அழைப்பு விடுத்தார்.

நிகழ்வில் சமூக விழப்புணர்வுக்கான மக்கள் அமைப்பின் செயலாளர் ரி.தேவசாந்தன், வவுனியா மாவட்ட அமைப்பாளர் அயூப்கான், வவுனியா மாவட்ட ஊடக பேச்சாளர் எஸ்.சதீஸ்குமார் ஆகியோர் கலந்துகொண்டனர்.

 
வவுனியாவில் காணாமல் ஆக்கப்பட்டவர்களின் உறவினர்களினால் மேற்கொள்ளப்பட்டு வரும் சுழற்சி முறையிலான உணவு தவிர்ப்புப் போராட்டம் 64வது நாளாகவும் இன்று (28.04.2017) தொடர்கிறது.

குறித்த போராட்டம் படையினரிடம் கையளிக்கப்பட்ட தமது உறவினர்கள் தொடர்பில் பதிலளிக்க கோரியும், அரசியல் கைதிகளை விடுதலை செய்யகோரியும் மற்றும் பயங்கரவாத தடைச்சட்டத்தினை நீக்குமாறு கோரியும் முன்னெடுக்கப்பட்டு வருகின்றது.

மேலும் சாதகமான பதில் கிடைக்கும் வரையில் தங்களது போராட்டம் தொடரும் என போராட்டத்தில் ஈடுபட்டுள்ளவர்கள் குறிப்பிட்டுள்ளனர்.

இப் போராட்டத்திற்கு ஆதரவாக வவுனியாவில் நேற்று பூரண ஹர்த்தால் அனுஸ்டிக்கப்பட்டமை குறிப்பிடத்தக்கது.

 
அரசியல் தலையீடற்ற நிர்வாகமாக பள்ளிவாசல் நிர்வாகம் செயற்பட வேண்டும் என வன்னி மாவட்ட பாராளுமன்ற உறுப்பினரும் மாவட்ட அபிவிருத்திக்குழு இணைத்தலைவருமான கே.காதர் மஸ்தான் தெரிவித்தார்.

வவுனியா நேரியகுளம் ஜாமிஉல் மஸ்ஜிதுல் ஹைராத் ஜும்மா மஸ்ஜித் திறப்புவிழவில் பிரதம விருந்தினராக கலந்துகொண்டு உரையாற்றும்போதே அவர் இவ்வாறு தெரிவித்தார். குறித்த நிகழ்வில் மஸ்தான் எம்.பி உரையாற்றுகையில்..

பள்ளிவாசல் நிர்வாகங்கள் அரசியல்வாதிகளின் அட்டவணைக்கு செயற்படுவதை விடுத்து நிர்வாகம் எடுக்கும் முடிவுகளுக்கு அரசியல்வாதிகளை செயற்பட வைக்க வேண்டும்.

கடந்த காலங்களில் வவுனியா மாவட்டத்தில் பள்ளிவாசல் நிர்வாகத் தெரிவுகளில் அரசியல்வாதிகளின் தலையீடுகளால் நீதிமன்றம் சென்ற வரலாறுகளையும் எமது சமூகம் உருவாக்கி இருக்கின்றது என்பதில் வேதனையளிக்கிறது.

பள்ளிவாசல்களும் பொது அமைப்புக்களும் இணைந்தே ஒரு சமூகத்தை கட்டியெழுப்பவும், அபிவிருத்தியடையச்செய்யவும் முடியும், மாறாக ஒரு சிலரின் சுயநலத்துக்காக நிர்வாகங்ககள் துஷ்பிரயோகம் செய்யப்படுவதையும் அவதானிக்கிறோம் எனவே அவ்வாறான செயற்பாடுகளை இங்குள்ள பள்ளிவாசல் நிர்வாகம் செய்யாது என நான் நம்புகின்றேன்.

இலங்கை முஸ்லிம்கள் மீதான அல்லாஹ்வின் கோபப்பார்வையே நாளுக்கு நாள் நாம் பிரச்சினைகளை எதிர்கொள்ள காரமாக அமைகின்றது. எனவே இந்த பள்ளிவாசலை இறைவன் விரும்பும் வகையில் பயன்படுத்தி அவனது நெருக்கத்தை பெற்றுக்கொள்ளுமாறும் கேட்டுக்கொள்கிறேன்.

மேலும் இந்த நிகழ்விற்கு சிங்கள தமிழ் மத்தலைவர்களையும் அழைத்து அவர்களுக்கான உரிய கௌரவத்தை கொடுத்தது போல இனி வரும் காலங்களிலும் எமது அயல் கிராமங்களிலுள்ள சிங்கள தமிழ் மக்களுடன் சக வாழ்வை கட்டியெழுப்பும் வகையிலும் நடந்துகொள்ளுமாறும் கேட்டுக்கொள்கிறேன் என அவர் மேலும் தெரிவித்தார்.

அத்துடன் பள்ளிவாசல் நிர்வாகத்தினால் குறித்த பள்ளிவாசல் அமைவுக்கு உதவிய அனைத்து தனவந்தர்கள் மற்றும் கிராம மக்களுக்கும் நன்றியினை தெரிவித்துக்கொண்டனர்.

கலாநி பி.பி.அப்துல் ஹமீத் தலைமையில் இடம்பெற்ற இந்நிகழ்வில் உயர் அதிகாரிகள் பிரதேச ஜமாத்தார்கள் மற்றும் சகோதர இன மதத்தலைவர்கள், மக்கள், மத்ரஸா மாணவர்கள் என பலரும் கலந்துகொண்டனர்.

 
வவுனியா, செட்டிகுளம் மகாவித்தியாலய புதிய அதிபருக்கு எதிராக இரண்டாவது நாளாக இன்று (28.04.2017) மாணவர்கள், பெற்றோர்கள், பழைய மாணவர்கள் ஆர்ப்பாட்டத்தில் ஈடுபட்டனர்.

கடந்த 4 வருடங்களுக்கு மேலாக செட்டிகுளம் மகாவித்தியாலயத்தின் அதிபராக கடமையாற்றிய அதிபர் செ.தர்மரணட்னத்தின் காலத்தில் பாடசாலை கல்வி மற்றும் பௌதீக ரீதியில் அபிவிருத்தி அடைந்துள்ள நிலையில், புதிய அதிபராக நித்தியானந்தம் நியமிக்கப்பட்டுள்ளதாகவும், அவர் ஏற்கனவே பதவி வகித்த பாடசாலைகளில் ஊழல் மோசடிகளில் ஈடுபட்டதாகவும் அதனால் இவ் அதிபர் நியமனத்தை எதிர்ப்பதாகவும் தெரிவித்து மாணவர்கள், பெற்றோர்கள், பழைய மாணவர்கள் பாடசாலைககு முன்பாக ஆர்ப்பாட்டத்தில் ஈடுபட்டனர்.

குறித்த பாடசாலைக்கு தரம் 1 அதிபர் நியமிக்கப்படவேண்டும் எனவும் அதற்கான தகுதி தனக்குள்ள போதிலும் நியமனம் வழங்கப்படவில்லை என தெரிவித்து செட்டிகுளம் பிரதேசத்தினைச் சேர்ந்த நித்தியானந்தம் என்பவர் மனித உரிமை ஆணைக்குழுவில் முறைப்பாட்டை பதிவு செய்திருந்தார். அதன் அடிப்படையிலேயே குறித்த அதிபர் நியமனம் தற்போது இடம்பெற்றுள்ளது.

இருப்பினும், இரண்டாம் தவணை ஆரம்பித்த நாளில் இருந்து மாணவர்கள் பாடசாலைக்கு செல்லாது பாடசாலை முன்பாக பெற்றோர், பழைய மாணவர்களுடன் இணைந்து பேரராடி வருகின்றனர். தமக்கு பழைய அதிபர் அல்லது வேறு ஒரு அதிபரை நியமிக்குமாறும் தற்போது நியமிக்கப்பட்டவர் தமக்கு வேண்டாம் எனத் தெரிவித்தே குறித்த போராட்டத்தில் தொடர்ச்சியாக மேற்கொண்டு வருகின்றனர்.

தொடர் போராட்டங்களை செய்து வருவதால் தமது கற்றல் செயற்பாடுகள் பாதிப்படைந்துள்ளதாக தெரிவிக்கும் மாணவர்கள் கல்வித் திணைக்களம் இது தொடர்பில் விரைந்து நடவடிக்கை எடுக்க வேண்டும் எனவும் கோரியுள்ளனர்.