கொழும்பிலிருந்து வவுனியா நோக்கி பயணித்த இ.போ.ச பஸ் மீது இனந்தெரியாத நபர்கள் மேற்கொண்ட தாக்குதலில் ஐவர் காயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

கொழும்பிலிருந்து நேற்று (23.03.2017) மாலை வவுனியா நோக்கி பயணித்த இ.போ.ச. பஸ் இரவு 10.30 மணியளவில் அனுராதபுரத்தினை அண்மித்தது.

இதன் போது கொழும்பிலிருந்து வவுனியா நோக்கி பயணித்த தனியார் பஸ் இ.போ.ச. பஸ்ஸிற்கும் இடையே போட்டித்தன்மை ஏற்பட்டுள்ளது. அனுராதபுரம் உலுக்குளம் பகுதியில் வைத்து இ.போ.ச. பஸ்ஸை தனியார் பஸ் முந்திச் சென்ற 2 நிமிடங்களில் இ.போ.ச. பஸ் மீது கல்வீச்சு தாக்குதல் மேற்கொள்ளப்பட்டுள்ளது.

இத்தாக்குதலில் இ.போ.ச. பஸ்ஸின் சாரதி உட்பட ஐவர் காயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

சம்பவம் தொடர்பான மேலதிக விசாரணைகளை அனுராதபுரம் பொலிஸார் மேற்கொண்டு வருகின்றனர்.

 
வவுனியா கோவில்புதுக்குளம் இந்துக்கல்லூரி சரஸ்வதி மண்டபத்தில் வறிய பாடசாலை மாணவர்கள், பெண்தலைமை தாங்கும் குடும்பங்களின் 2017ம் ஆண்டு புலமைப்பரீட்சையில் தோற்றவுள்ள மாணவர்களுக்கு கற்றல் உபகரணங்கள், கைநூல்கள் வழங்கும் நிகழ்வு நேற்று (23.03.2017) மாலை 3.30 மணியளவில் பாடசாலை அதிபர் அ. பூலோகசிங்கம் தலைமையில் இடம்பெற்றது.

வவுனியா இறம்பைக்குளம் ஈஷி பூரண சுவிஷேச சபையின் அனுசரனையில் ஆயர் பி.எம்.இராஜசிங்கத்தினால் பெண் தலைமைதாங்கும் குடும்பங்கள், பின்தங்கிய வறிய மாணவர்களைத் தெரிவு செய்து 110 மாணவர்களுக்கு 2017ம் ஆண்டு புலமைப்பரிசில் பரீட்சையில் தோற்றவுள்ள மாணவர்களுக்கு கைநூல்கள், கற்றல் உபகரணங்கள் என்பன வழங்கிவைக்கப்பட்டன.

இந்நிகழ்வில் பிரதம விருந்தினராக வவுனியா உதவி பொலிஸ் அத்தியட்சகர் மல்வழகே, சிறப்பு விருந்தினராக வன்னி பிராந்திய சமூதாயப்பிரிவு பொறுப்பதிகாரி விஜயவர்த்தன, மற்றும் வவுனியா தலைமை பொலிஸ் நிலையப் பொறுப்பதிகாரி சோமரத்தின விஜயமுனி ஆகியோர் கலந்து கொண்டு மாணவர்களுக்கு கற்றல், கைநூல்களை வழங்கி வைத்தனர்.

நிகழ்வில் அயல் பாடசாலை அதிபர்கள், ஆசிரியர்கள், மாணவர்கள் பெற்றோர்கள் எனப் பலரும் கலந்து கொண்டனர்.

 
கிறிஸ்துவின் பாடுகளை நினைவுகூர்ந்து மன்னாரிலிருந்து பக்தர்கள் பாதயாத்திரையாக வவுனியாவை வந்தடைந்தனர்.

கிறிஸ்தவர்கள் தற்பொழுது கிறிஸ்துவின் பாடுகளை நினைவுகூர்ந்துவரும் தவக்காலத்தை முன்னிட்டு வவுனியா கோமரசன்குளத்தில் அமைந்துள்ள கல்வாரியில் நாளை வெள்ளிக்கிழமை (24.03.2017) நடைபெற இருக்கும் சமய வழிபாட்டில் கலந்து கொள்ளும்முகமாக மன்னார் பகுதியிலிருந்து பக்தர்கள் பாதயாத்திரையாக இன்று (23.03.2017) மாலை 5 மணியளவில் வவுனியாவை வந்தடைந்தனர்.

கடந்த புதன்கிழமை (22.03.2017) அதிகாலை மன்னார் பேராலயத்தில் ஒன்றுகூடி பேராலய பங்குதந்தை அருட்பணி பெப்பி சோசை அடிகளாரால் நடாத்தப்பட்ட வழிபாட்டில் கலந்து கொண்டு அவரிடமிருந்து ஆசீர்வாதம் பெற்றுக் கொண்டபின் சிலுவை சுமந்தவர்களாக தலைமன்னார் மதவாச்சி வீதியினூடாக வவுனியாவிற்கு தங்கள் பாதயாத்திரியை ஆரம்பித்த பக்தர்கள் இன்று (23.03.2017) மாலை 5 மணியளவில் வவுனியா இறம்பைக்குளம் புதிய அந்தோனியார் ஆலயத்தினை வந்தடைந்தனர்

இவர்கள் வெள்ளிக்கிழமை காலை (24.03.2017) வவுனியாவில் அமைந்துள்ள கல்வாரியை சென்றடைந்து அன்று அங்கு நடைபெறும் சிலுவைப் பாதை மற்றும் திருப்பலியிலும் கலந்து கொள்ளவுள்ளனர்.

இவர்கள் செல்லும் வழிகளில் வவுனியா பிரதேச செயலகம் உட்பட பல அரச மற்றும் அரசார்பற்ற நிறுவனங்கள் தாக சாந்திக்கான ஏற்பாடுகளும் மேற்கொள்ளப்பட்டுள்ளதுடன் பொலிசாரும் இவர்களின் பாதுகாப்புக்கான ஏற்பாடுகளை மேற்கொண்டுள்ளனர்.

வவுனியா இறம்பைக்குளம் புனித அந்தோனியார் ஆலய கத்தோலிக்க இளைஞர் ஒன்றியம் , இறம்பைக்குளம் புனித அந்தோனியார் ஆலயம் என இணைந்து பக்தர்களுக்காக தங்குமிடவசதி, இரவு உணவுகள் என்பனவற்றை ஏற்பாடு செய்துள்ளமை குறிப்பிடத்தக்கது.

 
வவுனியா நகரத்தில் டெங்கு நுளம்பு பெருக்கத்தை கட்டுப்படுத்தும் நடடிக்கையின் ஒரு பகுதியாக வவுனியா சிறு வியாபாரிகள் சங்கமும் வவுனியா பொலிஸ் நிலைய சூழல் பாதுகாப்பு பிரிவினரும் இணைந்து டெங்கு நுளம்பு பெருக்கத்தை கட்டுப்படுத்துவதற்காக சிரமதான பணியில் இன்று (23.03.2017) காலையில் ஈடுபட்டனர்.

வவுனியா பொலிஸ் நிலையத்திற்கு முன்பாக உள்ள சிறு வியாபார கடைப் பகுதிகளிலேயே இச் சிரமதானப் பணிகள் வவுனியா சிறு வியாபாரிகள் சங்கத்தின் தலைவர் யு.அயூப் கான் தலைமையில் நடைபெற்றது. சிறு வியாபாரிகளின் கடைத்தொகுதி உரிமையாளர்கள் ஊழியர்கள் இச் சிரமதானப்பணியில் ஈடுபட்டிருந்தனர்.

வவுனியா நகரசபைக்குட்பட்ட பகுதிகளில் வர்த்தக நியைங்கள் மற்றும் வீடுகளில் டெங்கு நுளம்பு பெருக்கம் ஏற்படக்கூடிய இடங்கள் அடையாளம் காணப்படுமிடத்து அதற்கு தண்டப்பணம் அல்லது வழக்கு தாக்கல் செய்யப்படும் என வவுனியா சுகாதாரப்பனிமனையின் பொது சுகாதார பரிசோதகர் மே.ஜெயா தெரிவித்துள்ளமையும் குறிப்பிடத்தக்கது.

 
வவுனியாவில் கடந்த 28 நாட்களாக தமது போராட்டத்தினை மேற்கொண்டு வரும் கையளிக்கப்பட்டு காணாமல் ஆக்கப்பட்ட உறவுகள் வவுனியா மத்திய அஞ்சல் அலுவலகத்திற்கு அருகே இன்று (23.03.2017) 28வது நாளாக தமது சுழற்சி முறையிலான உண்ணாவிரத போராட்டத்தினை முன்னெடுத்து வருகின்றனர்.

கையளிக்கப்பட்ட தமது உறவுகளை விடுவிக்கக்கோரியும், அரசியல் கைதிகளை விடுதலை செய்யக்கோரியும், அவசரகாலச்சட்டத்தினை நீக்குமாறு கோரி தமது போராட்டத்தினை முன்னெடுத்து வருகின்றனர்.

வவுனியாவில் கடந்த சில தினங்களில் 32பேருக்கு இன்புளுவன்சா (H1N1) தொற்று எற்பட்டுள்ளதாக வவுனியா பொது வைத்தியசாலைப் பணிப்பாளர் வைத்தியர் கு.அகிலேந்திரன் தெரிவித்தார். இது தொடர்பில் அவர் மேலும் தெரிவித்தபோது..

வவுனியாவில் இன்புளுவன்சா தொற்றுக் காரணமாக இதுவரை 32 பேர் வவுனியா வைத்தியசாலையில் அனுமதிக்கப்பட்டுள்ளனர். அவர்களுக்கு வைத்திய சிகிச்சைகள் அளிக்கப்பட்டு வருகின்றது. இதில் 20 பேர் வரையில் சிகிச்சையின் பின் வீடு திரும்பியுள்ளனர். ஏனையோர் வைத்தியசாலையில் விடுதியில் தங்கி சிகிச்சை பெற்று வருகின்றனர்.

மேலும் தொற்று ஏற்பட வாய்புக்கள் உள்ளதால் சிறியவர்களை தேவையின்றி வைத்திய சாலையில் தங்கியுள்ள உறவினர்களைப் பார்வையிடுவதற்கு அழைத்து வருவதைத் தவிர்க்கவும். குறிப்பாக கற்பிணித்தாய்மார், சிறுவர்கள் அவதானமாக இருக்குமாறும் அவர் தெரிவித்துள்ளார்.

அத்துடன் வைத்தியசாலையில் வைத்தியர்கள், தாதியர்கள், வைத்தியசாலைக்கு வரும் குழந்தைகள, சிறுவர்கள் அனைவருக்கும் சுவாசத்தை பாதிக்காதவாறு முககவசம் அணிந்து இருப்பதையும் காணக்கூடியதாக இருக்கின்றது.

இதேவேளை, இன்புளுவன்சா வைரஸ் தொற்று காரணமாக அண்மையில் வவுனியா வைத்தியசாலையில் இளம் குடும்பப் பெண் ஒருவர் மரணமடைந்திருந்தமை குறிப்பிடத்தக்கது