இன்றும் தனது ரகசிய காதலை தொடர்ந்து கொண்டேதான் இருக்கிறார் கேரளத்து பைங்கிளி மீரா ஜாஸ்மின்.
ரன், சண்டக்கோழி, ஆய்த எழுத்து உள்ளிட்ட பல படங்களில் நடித்தவர் மீரா ஜாஸ்மின்.

இவருக்கும், மாண்டலின் ராஜேஷுக்கும் காதல் மலர்ந்து திருமணம் வரை பேச்சுவார்த்தை சென்றது.

ஆனால் ராஜேஷின் குடும்பத்தினர் எதிர்ப்பால் அது நடக்கவில்லை.

இந்நிலையில் ஒரு வருடத்துக்கும் மேலாக புதிய படங்களில் நடிக்காமல் ஒதுங்கி இருந்த இவர் மல்லுவுட்டில் நட்சத்திர கலைவிழாக்களில் பங்கேற்கவில்லை என்பதற்காக சில பிரச்னைகளை எதிர்கொண்டார்.

தற்போது பிரச்சனைகள் ஓய்ந்த நிலையில் மீண்டும் மீராவின் காதல் விவகாரம் சூடுபிடிக்கத் தொடங்கி உள்ளது.

இருவரின் காதல் எந்த நிலையில் உள்ளது என்று கேட்டால், இருவரும் சிக்கலான நேரங்களை சந்தித்தது உண்மை, ஆனால் அது எங்களை பிரியும் அளவுக்கு கொண்டு செல்லவில்லை என்று அவரது தரப்பில் கூறப்படுகிறது.

கௌதம் மேனன் இயக்குவதாக அறிவித்த துருவநட்சத்திரம் படத்திலிருந்து விலகுகிறேன் என அதிரடியாக அறிவித்துள்ளார் சூர்யா.

கௌதம் மேனன் இயக்கப்போகும் துருவநட்சத்திரம் படத்தில் சூர்யா நடிக்கப்போவதாக கொலிவுட்டில் தண்டோராக்கள் வெளிவந்த வண்ணம் இருந்தன.

இதனை உறுதி செய்யும் வகையில் சூர்யாவும் ஒத்துக்கொண்டு அறிவிப்பு விடுத்திருந்தார்.

இந்நிலையில் கௌதம் மேனன் இயக்கத்தில் நான் நடிக்கவில்லை என்று அறிக்கை ஒன்றை விடுத்துள்ளார் சூர்யா.

இதுகுறித்து நேற்று மாலை அவர் விடுத்த அறிக்கையில், கடந்த 2012ம் ஆண்டு யூன் மாதம் கௌதம் வாசுதேவ் மேனனின் இயக்கம் மற்றும் தயாரிப்பில் நான் கதாநாயகனாக நடிப்பதாக முடிவானது.

இது அனைவரும் அறிந்த செய்தி, பல்வேறு காரணங்களால் நாங்கள் இருவரும் இப்போது இணைந்து பணியாற்ற இயலாத சூழல் ஏற்பட்டுள்ளது என்பதை வருத்தத்துடன் தெரிவித்துக் கொள்கிறேன்.

என்னுடைய திரையுலக அனுபவத்தின் அடிப்படையில் நான் நடிக்கும் படத்தின் கதை, மனதிற்கு முழுத்திருப்தி தந்த பிறகே படப்பிடிப்புக்குச் செல்வது என்பதை கொள்கை முடிவாக நடைமுறைப்படுத்தி வருகிறேன்.

ரசிகர்கள் என் மீது வைத்திருக்கும் அன்பையும், எதிர்பார்ப்பையும் பூர்த்தி செய்வதே ஒரு நடிகனாக என்னுடைய முதல் கடமையாகக் கருதுகிறேன்.

இயக்குனர் கௌதம் என்னுடைய இந்த கொள்கை முடிவை முதல் நாளே தெளிவாகச் சொல்லி அதற்கு அவர் சம்மதித்த பிறகே நாங்கள் இருவரும் இணைந்து பணியாற்றுவது என முடிவு செய்தோம்.

இதையே ஒப்பந்தமாகவும் செய்து கொண்டோம், ஆனால் ஒப்பந்தம் செய்து ஒரு வருட காலம் கழிந்த பிறகும் கௌதம் அவர்கள் இன்னும் முழு கதையை என்னிடம் திருப்தி அளிக்கும் வகையில் தரவில்லை.

சிங்கம் -2 படம் முடிந்த பிறகு ஆறு மாதங்களாக முழு கதையையும் எதிர்பார்த்துக் காத்திருந்தேன். முதலில் பூஜை போட்டு விடலாம் என்றார், நட்பின் அடிப்படையில் அதற்கும் ஒத்துழைத்தேன்.

மீண்டும் ஒரு டெஸ்ட் ஷுட் செய்து கெட்டப் மாற்றங்களை முடிவு செய்யலாம் என்றார். தயக்கம் இருந்தாலும் கௌதம் அவர்கள் மீது இருக்கும் நன்மதிப்பின் அடிப்படையில் அதற்கும் ஒத்துழைத்தேன்.

பல மாதங்களாக படப்பிடிப்பு போகாமல் வீட்டில் காத்திருக்கிறேன். கௌதம் அவர்களிடமிருந்து நடிகனாக எனக்கு திருப்தி அளிக்கும் முழுக் கதை கிடைக்கும் என்று இன்றுவரை காத்திருந்தேன். அது நடக்கவில்லை.

முன்பே கௌதம் அவர்களின் சென்னையில் ஒரு மழைக்காலம் படத்திற்கு பூஜை போட்டு ஒரு வாரம் மட்டும் படப்பிடிப்பு செய்து, எட்டு மாதங்கள் காத்திருந்தும் கடைசியில் அந்த படம் நடக்கவில்லை.

இப்போது இந்த படத்திற்கும் அதே அனுபவம் தொடர்ந்து ஏற்படுகிறது. ஆறு மாத கால காத்திருத்தலுக்குப் பிறகு இனி காத்திருக்க இயலாத சூழல் எனக்கும் ஏற்பட்டுள்ளது.

நானும், கௌதம் அவர்களும் கருத்தளவிலும் எதிரெதிர் திசையில் பயணிக்கிறோம் என்று தோன்றுகிறது.

இந்த நிலையில் நாங்கள் இருவரும் தொடர்ந்து பணியாற்ற இயலாது என்று உறுதியாக நினைக்கிறேன். ஒரு திரைப்படம் உருவாவதில் பலரின் பங்கு முக்கியமாகவும், அவசியமாகவும் இருக்கிறது.

நடிகனாக நம்பிக்கை இல்லாமல் செய்த படங்கள் எனக்கு சரியான பாடங்களைத் தந்திருக்கின்றன. நட்பின் அடிப்படையில் கௌதம் அவர்களுடன் இணைந்து பணியாற்ற என்னால் முடிந்த அனைத்து முயற்சிகளையும் எடுத்து விட்டேன்.

இனி நாங்கள் இருவரும் இந்த படத்தில் இணைந்து பணியாற்ற இயலாது. அதனால் கௌதம் படத்திலிருந்து விலகிக் கொள்கிறேன் என்பதைத் தெரிவித்துக் கொள்கிறேன் என்று சூர்யா கூறியுள்ளார்.

இனிமேல் ரீமேக் படங்களில் நடிக்க மாட்டேன் என்று அதிரடியான முடிவினை எடுத்துள்ளாராம் விஜய்.

பவன் கல்யாண் நடிப்பில் அண்மையில் வெளியான தெலுங்கு படமான அத்தாரின்டிகி தாரேதி பாக்ஸ் ஆபிஸில் சக்கைபோடு போட்டுவருகிறது.

படம் கல்லா கட்டிய வேகத்தை பார்த்து அதை தமிழில் ரீமேக் செய்ய தயாரிப்பாளர் பிவிஎஸ்என் பிரசாத்தை, கொலிவுட்டைச் சேர்ந்த பல தயாரிப்பாளர்கள் அணுகினர்.

இந்நிலையில் இந்த படத்தின் ரீமேக்கில் நடிக்க விஜய் ஆர்வமாக உள்ளதாக தகவல்கள் வெளியாகின.

இதனைத் தொடர்ந்து விஜய்யை அணுகியதில், அவரோ சாரி, நான் நடிக்க முடியாது என்று கூறிவிட்டாராம்.

மேலும் இனி ரீமேக் படங்களில் நடிக்க விரும்பவில்லை என்றும் தெரிவித்துள்ளாராம்.

பிரம்மாண்ட இயக்குனர் ஷங்கரின் இயக்கத்தில் வெளியாக இருக்கும் திரைப்படம் ஐ.

இதில் விக்ரம் நாயகனாக நடிக்க, ஜோடி போட்டுள்ளார் ஆங்கில தேவதை எமி ஜாக்சன்.

கதைப்படி சேரிப்பகுதியில் வசிக்கும் இளைஞராக வருகிறாராம் விக்ரம்.

உடற்பயிற்சியில் ஆர்வம் கொண்ட இவர் ஜிம்மிற்குச் சென்று உடலைக் கட்டுமஸ்தாக முறுக்கேற்றுகிறார்.

மாடலிங் பெண்ணான எமி ஜாக்சன், விக்ரம் செல்லும் ஜிம்மிற்கு அருகில் உள்ள பெண்கள் ஜிம்மிற்குச் செல்கிறார்.

இருவரும் எதார்த்தமாக அங்கு சந்தித்துக் கொள்ள, பதார்த்தமாக பற்றிக் கொள்கிறது காதல்.

பின்பு தமிழ் சினிமாவின் வழக்கப்படி எமியின் அண்ணன் சுரேஷ் கோபிக்கு இவர்களின் காதல் தெரியவருகிறது.

எல்லா அண்ணன்களைப் போல சுரேஷ் கோபியும் காதலுக்கு முதலில் எதிர்ப்பு தெரிவிக்கிறார்.

அந்த சமயத்தில் மிகப்பெரிய அளவில் ஆணழகன் போட்டிக்கான அறிவிப்பு வருகிறது.

அதில் கலந்து கொள்ள விரும்பும் விக்ரம், போட்டிக்காக இரவு, பகலால ஜிம்மிலேயே பழியாகக் கிடந்து உடற்பயிற்சி செய்கிறார்.

அப்போது சயின்டிஸ்டான சுரேஷ் கோபி சற்று வித்தியாசமாக சிந்திக்கிறார்.

விக்ரம்- எமியின் காதலுக்கு பச்சைக்கொடி காண்பிப்பது போல நடிக்கிறார்.

போட்டியில் வெற்றிபெற தான் உதவுவதாகச் சொல்லும் சுரேஷ் கோபி, விக்ரமுக்கு ஒரு ஊசி போடுகிறார்.

அந்த ஊசி விக்ரமின் உடலைச் சிதைத்து, ஸ்லிம்மாக மாற்றுகிறது. இதனால் போட்டியில் கலந்துகொள்ள முடியாமல் தவிக்கிறார்.

இந்த நேரத்தில் வேறு ஒருவரை எமிக்கு மாப்பிள்ளையாகப் பேசிமுடிக்கிறார் சுரேஷ் கோபி.

சுரேஷ் கோபியின் கபடத்தை உணரும் விக்ரம், வெகுண்டு எழுந்து தன் உடலை பழையபடி முறுக்கேற்றி போட்டியில் ஜெயிப்பதுடன், எமியையும் கைப்பிடிக்கிறார்.

இதுதான் படத்தின் கதை, இடையில் பாடல்கள், சண்டைக் காட்சிகள் என சேர்ந்து விரைவில் ரசிகர்களுக்கு விருந்து படைக்க வருகிறது ஐ.