அமெரிக்காவின் வடமேற்கு பகுதியில் உள்ள அலாஸ்கா நகரில் விமானம் விபத்துக்குள்ளானதில் விமானி உட்பட 10 பரிதாபமாக உயிரிழந்தனர்.

மலைகள் சூழ்ந்த அலாஸ்கா பகுதியில் இருந்து நாட்டின் பிற இடங்களுக்கு செல்ல விமான பயணம் ஒன்றையே பெரும்பாலான மக்கள் தேர்வு செய்கின்றனர்.

கடுமையான தட்பவெப்ப நிலை மற்றும் பாதையில் குறுக்கிடும் பெரும் மலைத் தொடர்கள் இவற்றைப் பற்றி எல்லாம் கவலைப்படாத அலாஸ்கா மக்கள் வான்வழிப் போக்குவரத்தை தொடர்ந்துக் கொண்டே வருகின்றனர்.

இந்நிலையில், அலாஸ்காவில் உள்ள விமான நிலையத்தில் இருந்து 9 பயணிகளுடன் புறப்பட்ட தனியார் விமானம் ஓடு பாதையை விட்டு உயர எழும்பும்போது கட்டுப்பாட்டை இழந்து தரையில் விழுந்து நொறுங்கியது.

விழுந்த வேகத்தில் பெரும் தீப்பிழம்பாக மாறிய விமானத்தை தீயணைப்பு படையினரால் நெருங்க முடியவில்லை. இந்த விபத்தில் விமானத்தினுள் இருந்த 9 பயணிகள் மற்றும் விமானி உட்பட 10 பேர் பரிதாபமாக பலியாகினர்.

விபத்துக்கான காரணம் குறித்து விமான நிலைய அதிகாரிகள் விசாரித்து வருகின்றனர்.

தென்மேற்கு பசிபிக் கடற்பகுதியில் அமைந்துள்ள பப்புவா நியூ குனியாவில் இன்று காலை அடுத்தடுத்து இரண்டு முறை நிலநடுக்கம் ஏற்பட்டது. உள்ளூர் நேரப்படி இன்று அதிகாலை4.35 மணிக்கு நியூ அயர்லாந்து தீவில் இருந்து 110 கிலோ மீட்டர் தூரத்தில் 7.2 ரிக்டர் அளவில் பயங்கர நிலநடுக்கம் ஏற்பட்டது.

தரைமட்டத்தில் இருந்து 379 கிலோ மீட்டர் ஆழத்தில் மையம் கொண்ட இந்த நிலநடுக்கத்தால் நியூ அயர்ல்ந்து மற்றும் தரோன் பகுதிகள் கடுமையாக குலுங்கின.

இதனையடுத்து, சுமார் 2 மணி நேரத்திற்கு பிறகு நியூ பிரிட்டன் பகுதியில் உள்ள கண்ட்ரியன் நகரை இரண்டாவது நிலநடுக்கம் தாக்கியது. ரிக்டர் அளவில்6.8 என பதிவாகிய இந்த நிலநடுக்கம் தரை மட்டத்தில் இருந்து 62 கிலோ மீட்டர் ஆழத்தில் உருவானது என்று அமெரிக்க வானிலை ஆய்வு மையம் அறிவித்துள்ளது.

இந்த நிலநடுக்கங்கள் நகரின் ஒதுக்குப்புறமான பகுதிகளில் ஏற்பட்டதால் அதிகமான பொருட்சேதமோ, உயிர் சேதமோ ஏற்படவில்லை. மேலும்,சுனாமி எச்சரிக்கையும் விடப்படவில்லை.

நிலநடுக்கங்கள் அடிக்கடி ஏற்படும் ‘நெருப்பு வளையம்’ பகுதிக்குள் அடங்கியுள்ள நாடுகளில் ஒன்று பப்புவா நியூ குனியா என்பது குறிப்பிடத்தக்கது.

நேபாளத்தில் 3,300 ஆண்டுகள் பழமையான கோவிலின் சிதிலங்களை தொல்பொருள் ஆய்வாளர்கள் கண்டெடுத்துள்ளனர்.புத்தர் பிறந்த லும்பினி பகுதி இப்போது நேபாளத்தில் உள்ளது. அப்பகுதியில் அமைந்துள்ள கோவில்கள் அனைத்தும் மன்னர் அசோகர் காலத்தைச் சேர்ந்தவையாகவே இதுவரை கருதப்பட்டு வந்துள்ளன. அவர் கி.மு. 3ஆவது நூற்றாண்டில் லும்பினியில் ஒரு தூணையும்,கோவிலையும் கட்டினார். இப்பகுதியில் புத்த மததத்தைப் பரப்புவதற்காக அவர் இந்த நடவடிக்கையை மேற்கொண்டார்.

இந்நிலையில், லும்பினி பகுதியில் சமீபத்தில் நேபாள மற்றும் சர்வதேச தொல்லியல் நிபுணர்கள் சமீபத்தில் நடத்திய அகழாய்வின் மூலம், அசோகர் காலத்துக்கு முன்பே அங்கு கோவில் இருந்தது தெரிய வந்துள்ளது. அங்கு 3,300 ஆண்டுகளுக்கு முன்பு இருந்த கிராமமும் கண்டறியப்பட்டுள்ளது. அந்தக் கிராமத்தில் இருந்த கோவிலின் சிதிலங்களை தொல்பொருள் ஆய்வாளர்கள் கண்டெடுத்துள்ளனர். இது குறித்து நேபாள சுற்றுலா மற்றும் கலாசாரத்துறை செயலாளர் சுஷீல் கிமிரே, காத்மாண்டில் செய்தியாளர்களிடம் கூறுகையில்,இப்பகுதியை உலகளாவிய மதிப்பு மற்றும் பாரம்பரியத்தைக் காப்பாற்ற நேபாள அரசு நடவடிக்கை எடுக்கும் என்றார்.

லும்பினியில் புத்தர் பிறந்த பகுதிக்கு சில நூறு மீட்டர் தூரத்தில் கி.மு.1,300ஆம் ஆண்டில் இந்த கிராமம் இருந்துள்ளதற்கான அடையாளங்கள் கிடைத்துள்ளன. இப்பகுதியில் ஆயிரம் ஆண்டுகளுக்கு முன் குடியேற்றங்கள் நடந்துள்ளன. இது குறித்து பிரிட்டனின் துர்ஹாம் பல்கலைக்கழகத்தைச் சேர்ந்த ராபின் கோனிங்ஹாம் கூறுகையில், தெற்காசியாவில் முதன் முறையாக, அசோகர் காலத்துக்கு முந்தைய, செங்கற்களால் கட்டப்பட்ட கோவில் இருந்திருப்பது அகழாய்வு மூலம் தெரிய வந்துள்ளது என்றார்.

லும்பினி வளர்ச்சி அறக்கட்டளையின் துணைத் தலைவர் ஆசார்ய கர்மா சாங்கோ ஷேர்பா கூறுகையில், தொன்மையான கோவில், கிராமம் ஆகிய இரண்டும் கண்டறியப்பட்டுள்ளது பெரிய நடவடிக்கையாகும். இவை, புத்தரின் வாழ்க்கை மற்றும் லும்பினியின் முக்கியத்துவம் ஆகியவற்றை நாம் நன்கு புரிந்து கொள்ள உதவும் என்றார்.லும்பினி கடந்த1997ஆம் ஆண்டில் இருந்து ஐ.நா. அமைப்பான யுனெஸ்கோவின் பாரம்பரிய நினைவுச் சின்னங்கள் பட்டியலில் இடம்பெற்றுள்ளது.

சவுதி அரேபியாவில் சார்ஸ் போன்ற விஷக்கிருமி தொற்றுக்கு நேற்று இருவர் பலியாகியுள்ளனர். கடந்த 2003-ம் ஆண்டு உலகெங்கும் பரவிய சார்ஸ் கிருமி தொற்று நோய்க்கு சுமார் 800 பேர் பலியாகினர்.

இந்நோயின் முதல்கட்ட அறிகுறியாக லேசான சளி, இருமல், காய்ச்சல் போன்றவை ஏற்படும். பின்னர், இடைவிடாத காய்ச்சலாக மாறி சில நாட்களுக்குள் நோயாளி மரணம் அடைய நேரிடும்.

இந்த நோய்க்கு மாற்று மருந்து ஏதும் கண்டறியப்படவில்லை என்பது குறிப்பிடத்தக்கது.

தற்போது, சவுதி அரேபியாவில் சார்ஸ் கிருமியைப் போன்றே கண்ணுக்கு புலப்படாத நோய் கிருமி தொற்றினால் 77 பேர் பாதிக்கப்பட்டுள்ளனர்.

இதற்கு முன்னதாக இந்நோயினால் பாதிக்கப்பட்ட 36 பேர் பலியாகியுள்ளனர். நேற்று மேலும் 2 பேர் பலியானதையடுத்து இந்த மர்ம நோய்க்கு பலியானோர் எண்ணிக்கை 38 ஆக உயர்ந்துள்ளது.