மூங்கிலாறு சிறுமி கொலை..

முல்லைத்தீவு – உடையார்கட்டு வடக்கு – மூங்கிலாறு கிராமத்தில் பாலியல் ரீதியில் துஷ்பிரயோகத்திற்கு உட்படுத்தப்பட்டுக் கொலை செய்யப்பட்டதாகச் சந்தேகிக்கப்படும் சிறுமிக்கு நீதி கோரி முல்லைத்தீவில் நேற்று ஆர்ப்பாட்டமொன்று முன்னெடுக்கப்பட்டது.

இதனிடையே உயிரிழந்த சிறுமியின் வீட்டுக்கு இராஜாங்க அமைச்சர் பியல் நிஷாந்த நேற்று சென்ற நிலையில் அவரின் வாகனத்தை வழிமறித்து மக்கள் கவனயீர்ப்புப் போராட்டத்தில் ஈடுபட்டனர்.

புதுக்குடியிருப்பு பிரதேச செயலாளர் எஸ். ஜெயகாந்தன், புதுக்குடியிருப்பு பொலிஸ் நிலைய பொறுப்பதிகாரி ஆகியோர் கவனயீர்ப்பில் ஈடுபட்ட மக்களுடன் கலந்துரையாடினர்.

முல்லைத்தீவு மாவட்டத்தின், மூங்கிலாறு வடக்கில் கடந்த சனிக்கிழமை சடலமாக மீட்கப்பட்ட சிறுமி விவகாரத்தில் பொலிஸார் தொடர்ந்து விசாரணை மேற்கொண்டுள்ளனர்.

சிறுமியின் மாமா கைது செய்யப்பட்டுள்ள நிலையில், ஏனைய குடும்ப உறுப்பினர்களிடமும் விசாரணை நடத்தப்பட்டது. இதேவேளை, சிறுமியின் பூதவுடல் நேற்று மாலை நல்லடக்கம் செய்யப்பட்டது.

நேற்று முன்தினம் சிறுமியின் உடலில் மேற்கொள்ளப்பட்ட பிரேதப் பரிசோதனையில் சிறுமி 2 மாத கர்ப்பமாக இருப்பது தெரியவந்ததுள்ளது. சிறுமிக்குச் சட்டவிரோதமாக மேற்கொள்ளப்பட்ட கருக்கலைப்பின் போதே உயிரிழந்திருக்கலாமென கருதப்படுகிறது.

புதுக்குடியிருப்பு பொலிஸ் பிரிவிற்குட்பட்ட, உடையார்கட்டு வடக்கு மூங்கிலாறு 200 வீட்டுத் திட்டம் பகுதியில் கடந்த புதன் கிழமை 12 வயதுடைய சிறுமி ஒருவர் காணாமல் போயுள்ளதாகப் புதுக்குடியிருப்பு பொலிஸ் நிலையத்தில் சிறுமியின் தாயாரால் முறைப்பாடு பதிவு செய்யப்பட்டிருந்தது.

15 ஆம் திகதி மகள் தன்னுடன் வீட்டிலிருந்ததாகவும் அயல் வீட்டார் திருகோணமலை சென்றுவிட்டதால், அங்கு எரிந்து கொண்டிருந்த மின்விளக்குகளை அணைக்க காலை 6.30 மணியளவில் சென்றதாகவும்,

பின்னர் வீடு திரும்பவில்லை எனவும் எல்லா இடமும் தேடிவிட்டு, மதியம் 2 மணிக்குப் புதுக்குடியிருப்பு பொலிஸ் நிலையத்தில் முறைப்பாடு செய்ததாகவும் தாயார் தெரிவித்துள்ளார்.

யோகராசா நிதர்சனா என்ற 13 வயது சிறுமியே இவ்வாறு காணாமல் போயிருந்தார். இதையடுத்து, கிராம மக்கள், பொலிஸார், இராணுவத்தினர் தேடுதல் பணிகளை முன்னெடுத்திருந்தனர்.

இந்த நிலையில் கடந்த சனிக்கிழமை சிறுமி சடலமாக மீட்கப்பட்டிருந்தார். ஆடைகள் கலைந்த நிலையில் சிறுமியின் வீட்டுக்கு அருகாமையில் உள்ள ஆள் நடமாட்டமில்லாத காணி ஒன்றில் சடலமாக மீட்கப்பட்டுள்ளார்.

சிறுமியின் உடல் நேற்று முன்தினம் பிரேத பரிசோதனைக்குப்படுத்தப்பட்டதில் திடுக்கிடும் தகவல்கள் வெளியாகியிருந்தன.

சிறுமி 2 மாத கர்ப்பமாக இருந்திருக்கிறார். அதன் காரணமாகச் சட்டவிரோதமான முறையில் கருக்கலைப்பு மேற்கொள்ளப்பட்டபோது ஏற்பட்ட அதிக இரத்தப் பெருக்கு காரணமாகச் சிறுமி உயிரிழந்திருக்கலாம் என பொலிஸார் சந்தேகம் வெளியிட்டுள்ளனர்.

உயிரிழந்த நிதர்சனா, திருகோணமலையில் தங்கியிருந்து கல்வி கற்று வந்துள்ளார். சில மாதங்களுக்கு முன்னர் மூங்கிலாற்று பிரதேசத்துக்கு வந்திருந்துள்ளார். 6 பிள்ளைகளைக் கொண்ட குடும்பத்தில், யோகராசா நிதர்ஷனா கடைசிப் பிள்ளையாவார்.

விடுமுறைக் காலத்தில் சிறுமி வீட்டில் தங்கியிருந்த காலப்பகுதியில், அக்காவின் கணவரால் சிறுமி துஷ்பிரயோகம் செய்யப்பட்டு, கர்ப்பமாக்கப்பட்டுள்ளமை விசாரணையில் தெரிய வந்துள்ளது.

காணித் தகராறு..

ஓட்டமாவடி பிரதேச செயலாளர் பிரிவில் அல் மஜ்மா மேற்கு வயல் பிரதேசத்தில் தாய் மாமனுக்கும் மருமகனுக்கும் ஏற்பட்ட கை கலப்பில் தாய் மாமன் கொலை செய்யப்பட்டுள்ள சம்பவம் இடம் பெற்றுள்ளதாக வாழைச்சேனை பொலிஸ் நிலைய பொறுப்பதிகாரி லசந்த பண்டார தெரிவித்துள்ளார்.

ஓட்டமாவடி பிரதேச செயலாளர் பிரிவில் அல் மஜ்மா மேற்கு முள்ளிவட்டவான் விவசாய கண்டத்தில் உள்ள வயல் காணி தொடர்பாக சகோதரர் ஒருவருக்கும் அவரது சகோதரிக்கும் இடையில்,

காணி தகராறு சென்று கொண்டிருந்த சந்தர்ப்பத்தில் இன்று(21.12) சகோதரியின் மகனுக்கும் தாய் மாமனுக்கும் ஏற்பட்ட தகராறே இந்த கொலைக்கான காரணம் என்று ஆரம்பக் கட்ட விசாரணைகளில் இருந்து தெரிய வந்துள்ளது.

சம்பவம் குறித்து உயிரிழந்தவரின் தாயாரான சேகு இஸ்மாயில் உம்மு சல்மா என்பவர் தெரிவிக்கையில், நானும் எனது கொலை செய்யப்பட்ட மகனும் வயலுக்கு உரம் எற்றிவதற்கு வந்த போது வயலுக்குள் எனது மகளின் மகன் வேலை செய்து கொண்டிருந்தார்.

அப்போது எனது மகன் ஏன் எனது காணிக்குள் வந்தாய் என்று எனது பேரனிடம் கேட்ட போது அவருக்கு அடித்து வெட்டிவிட்டு என்னிடம் உனது மகனை வெட்டியுள்ளேன் கொண்டு போ என்று சொல்லிவிட்டு எனது பேரன் போனார் என்று தெரிவித்தார்.

இது தொடர்பாகக் முள்ளிவட்டவான் விவசாய அமைப்பு தலைவர் ஐ.எல்.எம். முஸ்தபா கருத்து தெரிவிக்கையில், நானும் என்னுடன் மற்றுமொரு விவசாயியும் முச்சக்கரவண்டியில் வரும் போது உசனார் பௌசான் என்பவர் எனது மாமாவை வெட்டி விட்டேன், அவரை உங்கள் முச்சக்கரவண்டியில் வைத்தியசாலைக்குக் கொண்டு செல்லுங்கள் என்று தெரிவித்தார்.

அவருடன் நானும் என்னுடன் வந்தவர்களும் வந்து பார்த்த போது “அவர் மரணித்து விட்டார், நீங்கள் அம்புளன்ஸ்சுக்கு அறிவியுங்கள்” என்று பௌசான் சொல்லிவிட்டுச் சென்றார் என்று தெரிவித்தார்.

மீறாவோடை மாஜ்சோலை பள்ளிவாசல் வீதியைச் சேர்ந்த மூன்று பிள்ளைகளின் தந்தையான அலியார் ஹமீட் (வயது – 38) என்பவர் மரணமடைந்துள்ளதுடன், சந்தேகத்தின் பேரில் இரண்டு பேர் வாழைச்சேனை பொலிஸாரால் கைது செய்யப்பட்டுள்ளனர். இச்சம்பவம் தொடர்பாக வாழைச்சேனை பொலஸார் விசாரணைகளை மேற்கொண்டு வருகின்றனர்.

பேருந்துக் கட்டணம்..

இலங்கையில் பேருந்துக் கட்டணங்களை அதிகரிக்குமாறு கோரிக்கை விடுக்கப்பட்டுள்ளது. தனியார் பேருந்து உரிமையாளர் சங்கம் மற்றும் அகில இலங்கை தனியார் பேருந்து நிறுவன சம்மேளனங்கள் ஆகியன இந்த கோரிக்கையை அரசாங்கத்திடம் விடுத்துள்ளன.

நாட்டில் நேற்று நள்ளிரவு முதல் பெற்றோல் மற்றும் டீசலின் விலை அதிகரிக்கப்பட்டுள்ளது. இந்த அதிகரிப்புக்கு ஏற்ப பேருந்துகளின் பயணங்களை மேற்கொள்வதற்கு பேருந்துக் கட்டணங்கள் அதிகரிக்கப்படவேண்டும் என்று இந்த அமைப்புக்கள் கோரியுள்ளன.

அந்தவகையில் ஆக்குறைந்த கட்டணத்தை 25 ரூபாவாக உயர்த்தவேண்டும் என்று தனியார் பேருந்து உரிமையாளர்களின் சங்க தலைவர் கெமுனு விஜயரத்ன கோரிக்கை விடுத்துள்ளார்.

அதேநேரம் ஏனைய கட்டணங்களை எரிபொருள் விலை அதிகரிப்புக்கு ஏற்ப 20 வீதத்தினால் அதிகரிக்கவேண்டும் என்று அகில இலங்கை தனியார் பேருந்து சங்கத்தின் பொதுச்செயலாளர் அஞ்சன பிரியஞ்சித் கோரிக்கை விடுத்துள்ளார்.

முச்சக்கரவண்டி கட்டணம்..

முச்சக்கரவண்டிகளுக்காக பயணிகளிடமிருந்து அறவிடப்படும் பயணக் கட்டணத்தை 30 ரூபாவினால் அதிகரிக்க தீர்மானிக்கப்பட்டுள்ளதாக தேசிய ஒன்றிணைந்த முச்சக்கரவண்டி சாரதிகள் மற்றும் தொழில்துறை சங்கம் தெரிவிக்கின்றது.

இலங்கையில் நேற்றிரவு முதல் அமுலுக்குவரும் வகையில் எரிபொருள் விலை அதிகரிக்கப்பட்ட நிலையிலேயே, முச்சக்கரவண்டி கட்டணங்களை அதிகரிக்க தீர்மானிக்கப்பட்டுள்ளது.

இதன்படி, முதலாவது கிலோமீற்றருக்காக அறவிடப்படும் கட்டணத்தை 30 ரூபாவினால் அதிகரிக்க தீர்மானிக்கப்பட்டுள்ளது. 50 ரூபாவாக காணப்பட்ட முதலாவது கிலோமீற்றருக்கான கட்டணம், 80 ரூபா வரை அதிகரிக்கப்பட்டுள்ளது.

எனினும், இரண்டாவது கிலோமீற்றர் முதல் அறவிடப்படும் 45 ரூபா கட்டணத்தை அதிகரிக்கவில்லை என அந்த சங்கத்தின் செயலாளர் ரொஹண பெரேரா தெரிவிக்கின்றார்.

இதேவேளை, பேருந்துக்கட்டணங்களை அதிகரிக்குமாறு தனியார் பேருந்து உரிமையாளர் சங்கம் மற்றும் அகில இலங்கை தனியார் பேருந்து நிறுவன சம்மேளனங்கள் ஆகியன கோரிக்கை விடுத்துள்ளமை குறிப்பிடத்தக்கது.

பேக்கரி உற்பத்தி..

பேக்கரி உற்பத்தி பொருட்களுக்கு இனிவரும் காலங்களில் கட்டுப்பாட்டு விலை கிடையாது என பேக்கரி உரிமையாளர்கள் சங்கம் தெரிவித்துள்ளது.

இன்று (21) நள்ளிரவு முதல் பாண் உள்ளிட்ட அனைத்து விதமான பேக்கரி உற்பத்தி பொருட்களுக்கும் கட்டுப்பாட்டு விலையின்றி விற்பனை செய்யப்படும் என அந்த சங்கம் தெரிவித்துள்ளது.

விநியோகம் மற்றும் தமது தேவைக்கேற்ப விலைகளை நிர்ணயிக்க உரிமையாளர்களுக்கு முடியும் என பேக்கரி உரிமையாளர்கள் சங்கம் தெரிவிக்கின்றது.

பரபரப்பு வீடியோ..

யாழ்ப்பாணம் – மந்திகை பகுதியில் பட்டமொன்றின் கயிற்றில் சிக்கிய இளைஞன், ஆகாயத்தை நோக்கி பறந்த சம்பவம் அடங்கிய காணொளி ஒன்று தற்போது சமூக வலைத்தளங்களில் பகிரப்பட்டு வருகின்றது.

ஆகாயத்தின் உயரத்திற்கே பறந்த இளைஞன், நீண்ட நேரத்திற்கு பின்னர் கீழ் நோக்கி வந்துள்ளார். அதையடுத்து, கயிற்றை கைவிட்ட இளைஞன், கீழே வீழ்ந்துள்ளார்.

இவ்வாறு ஆகாயத்தை நோக்கி பறந்த சம்பவம் தொடர்பான காணொளி தற்போது சமூக வலைத்தளங்களில் அதிகளவிளானோரால் பகிரப்பட்டு வருகின்றது.

எரிபொருள் விலை..

நள்ளிரவு முதல் பெற்றோல் விலை அதிகரிக்கப்பட்டுள்ளதாக பெற்றோலிய கூட்டுத்தாபனம் அறிவித்துள்ளது. அதற்கமைய, ஒரு லீற்றல் ஒக்டைன் 92 வகையைச் சேர்ந்த பெற்றோலின் விலை 157 ரூபாவிலிருந்து 177 ரூபாவாக அதிகரித்துள்ளது.

(20 ரூபாவால்) ஒரு லீற்றர் ஒக்டைன் 95 வகையைச் சேர்ந்த பெற்றோலின் விலை 184 ரூபாவிலிருந்து 207 ரூபாவாக அதிகரித்துள்ளது. (23 ரூபாவால்) ஒடோ டீசல் ஒரு லீற்றரின் விலை 111 ரூபாவிலிருந்து 121 ரூபாவாக (10 ரூபாவால்) அதிகரித்துள்ளதுடன்,

சுப்பர் டீசல் ஒரு லீற்றரின் விலை 144 ரூபாவிலிருந்து 159 ரூபாவாக (15 ரூபாவால்) அதிகரித்துள்ளது. இதேவேளை மண்ணெண்ணெய் ஒரு லீற்றரின் விலை 77 ரூபாவிலிருந்து 87 ரூபாவாக (10 ரூபாவால்) அதிகரிக்கப்பட்டுள்ளது.

முல்லைத்தீவில்..

முல்லைத்தீவு உடையார்கட்டு வடக்கு மூங்கிலாறு கிராமத்தில் கொலை செய்யப்பட்ட சிறுமிக்கு நீதிகோரி முல்லைத்தீவு மூங்கிலாறு கிராம மக்களால் கண்டன ஆர்ப்பாட்டம் ஒன்று மூங்கிலாறு கிராமத்தில் இன்றைய தினம் (20.12.2021) முன்னெடுக்கப்பட்டிருந்தது.

கடந்த 15 ஆம் திகதி காணாமல் போயுள்ளார் என புதுக்குடியிருப்பு பொலிஸ் நிலையத்தில் சிறுமியின் தாயாரால் முறைப்பாடு பதிவு செய்யபட்டமைக்கு அமைவாக நான்கு நாட்கள் தேடுதலின் பின்னர் கைவிடப்பட்ட காணி ஒன்றில் சிறுமி சடலமாக மீட்கப்பட்டிருந்தார்.

இந்த நிலையில் பாதிக்கப்பட்ட சிறுமிக்கு நீதி கோரியும் சிறுவர், மற்றும் பெண்களுக்கு எதிரான வன்முறைகளை கட்டுப்படுத்த கோரியும் கொலைசெய்ய பட்ட சிறுமியின் கிராமமான மூங்கிலாறு கிராமத்தின் பெண்கள் ,சிறுவர்கள் , இளைஞர்கள் அரசியல் செயற்பாட்டாளர்கள் ஒன்றிணைந்து கண்டன ஆர்ப்பாட்டத்தை முன்னெடுத்திருந்தனர்.

கறுப்பு கொடிகள் மற்றும் கறுப்பு பட்டிகளை அணிந்து மூங்கிலாறு சந்தியிலிருந்து பேரணியாக உடையார்கட்டு மகா வித்தியாலயம் வரை பேரணியாக சென்று தமது கண்டனத்தை வெளிப்படுத்தியுள்ளனர்.

தணிகாசலம் தர்ஷிகா..

கொழும்பு பல்கலைக்கழகத்தின் எம்.பி.பி.எஸ். இறுதிப் பரீட்சையில் முதல் தரத்தில் தேர்ச்சி பெற்ற அக்கரைப்பற்றைச் சேர்ந்த தணிகாசலம் தர்ஷிகா என்ற மாணவி 13 தங்கப் பதக்கங்களைப் பெற்றுப் பெரும் சாதனை படைத்துள்ளார்.

கொழும்பு பல்கலைக்கழக மருத்துவபீடத்தின் பட்டமளிப்பு விழாவின் போது வழங்கப்படும் 37 தங்கப்பதக்கங்களில் சிறந்த மருத்துவ பீட மாணவ விருது உட்பட 13 தங்கப்பதக்கங்களை இவர் தனதாக்கிக் கொண்டுள்ளார். அத்தோடு குறித்த பட்டப்படிப்பு ஆண்டுக்குரிய முதல் நிலையாளராகவும் தெரிவு செய்யப்பட்டுள்ளார்.

அக்கரைப்பற்று, ஆலையடிவேம்பு பிரதேச செயலகத்துக்குட்பட்ட அக்கரைப்பற்று 7/3 ஜச் சேர்ந்த ஓய்வுநிலை அதிபர் தணிகாசலம் மற்றும் குமுதா ஆகியோரின் சிரேஷ்ட புதல்வியான தர்ஷிகா இந்தப் பெரும் சாதனையைப் புரிந்து பெற்றோருக்கும் சொந்த மண்ணுக்கும் பெருமை தேடிக்கொடுத்துள்ளார்.

பெண்ணுக்கு நேர்ந்த கொடுமை..

கண்டியில் பேருந்துக்காக காத்திருந்த இளம் யுவதி ஒருவர் துஷ்பிரயோகத்திற்கு உட்படுத்தப்பட்டமை பெரும் அதிர்ச்சியை ஏற்படுத்தியுள்ளது.

போகம்பரை தொலைதூர பேருந்து நிலையத்தில் நின்ற 23 வயதுடைய யுவதியை சாரதி மற்றும் நடத்துனர் பாலியல் துஷ்பிரயோகம் செய்துள்ளனர்.

குறித்த யுவதி செல்லும் இடத்திற்கு பேருந்து செல்வதாக கூறி, கடத்தி செல்லப்பட்டுள்ளார். கொழும்பு – கண்டி தனியார் பேருந்திற்குள் ஏற்றி கண்டி நீதிமன்ற வளாகத்திற்கு அழைத்து சென்று அவரை துஷ்பிரயோகம் செய்துள்ளனர். மாவனெல்ல பிரதேசத்தை சேர்ந்த 47 வயதுடைய நபரும் கண்டி பிரதேசத்தை சேர்ந்த 50 வயதுடைய நபருமே கைது செய்யப்பட்டுள்ளனர்.

கடந்த 17ஆம் திகதி இந்த சம்பவம் இடம்பெற்றதாக பாதிக்கப்பட்ட பெண் பொலிஸாரிடம் தெரிவித்துள்ளார். பெற்றோரை இழந்த குறித்த யுவதி வீட்டுப் பணிப்பெண்ணாக வேலை செய்து வந்துள்ளார்.

இறுதியாக பணியாற்றிய வீட்டில் தன்னை கடுமையாக தாக்கியதாக கூறி அவர் அந்த வீட்டில் இருந்து இரகசியமாக வெளியேறியுள்ளார். அங்கிருந்து தப்பியவர் நுவரெலியாவில் உள்ள உறவினர் வீட்டிற்கு செல்லும் போது இந்த சம்பவத்திற்கு முகம் கொடுத்துள்ளார்.

கல்வி அமைச்சரின் விசேட அறிவிப்பு..

தரம் ஒன்று மாணவர்களின் கல்வி நடவடிக்கைகள் சற்று தாமதமாகி 2022 ஏப்ரல் மாதம் முதல் உத்தியோகபூர்வமாக ஆரம்பிக்கப்படும் என கல்வி அமைச்சர் தினேஷ் குணவர்தன அறிவித்துள்ளார். கண்டியில் நேற்று செய்தியாளர்களிடம் பேசிய அமைச்சர் இதை தெரிவித்துள்ளார். இது குறித்து தொடர்ந்தும் கருத்து வெளியிட்டுள்ள அவர்,

பாடசாலைகள் 2021 டிசம்பர் 23 அன்று மூடப்பட்டு, புதிய கல்வியாண்டிற்காக 2022 ஜனவரி 03 அன்று மீண்டும் திறக்கப்படும். கோவிட் தொற்று காலக்கட்டத்தில் விடுபட்ட பாடத்திட்டங்களை முடிக்க வேண்டியிருப்பதால் முதல் தவணை ஏப்ரல் மாதத்துடன் முடிவடையும்.

மேலும், தரம் 5 புலமைப்பரிசில் பரீட்சை ஜனவரி 3ம் வாரத்திலும், க.பொ.த உயர்தரப் பரீட்சை பெப்ரவரியிலும், க.பொ.த சாதாரண தரப் பரீட்சை மே மாதம் முதல் ஜூன் மாதம் வரையும் நடைபெறவுள்ளது.

இதேவேளை, தரம் ஒன்றிற்கான மாணவர் சேர்க்கை சற்று தாமதித்து ஏப்ரலில் இருந்து உத்தியோகப்பூர்வமாக ஆரம்பிக்கப்படும். இது தொடர்பான சுற்று நிருபங்கள் வெளியிடப்பட்டு தற்போது வழமையான நடைமுறைகள் பின்பற்றப்பட்டு வருவதாகவும், பெற்றோர்கள் அதனை பயன்படுத்தி அனுமதிகளை பெற்றுக்கொள்ள முடியும் எனவும் தெரிவித்தார்.

விடுபட்ட பாடத்திட்டங்களை உள்ளடக்கும் வகையில் ஏனைய தரங்களின் கல்வி நடவடிக்கைகளுக்காக வகுப்பறைகள் ஒதுக்கப்பட்டுள்ள நிலையில், தரம் ஒன்றின் மாணவர்களுக்கான கல்வி நடவடிக்கைகளை ஏப்ரல் மாதம் ஆரம்பிக்க தீர்மானம் எடுக்கப்பட்டுள்ளது என்றார்.