போக்குவரத்து நடைமுறை..

வவுனியா கண்டி வீதியில் அதிகரித்து வரும் வீதி விபத்துக்களை கட்டுப்படுத்தும் முகமாக வவுனியா போக்குவரத்து பொலிஸாரினால் புதிய நடைமுறை அமுல்படுத்தப்பட்டுள்ளது.

வவுனியா மணிக்கூட்டு கோபுர சந்தியிலிருந்து வன்னி மாவட்ட பிரதி பொலிஸ் மா அதிபர் காரியாலயம் வரையிலான பகுதியில் தினசரி 3க்கு மேற்பட்ட விபத்துக்கள் இடம்பெறுகின்றன.

இதனையடுத்து அதனை கட்டுப்படுத்தும் முகமாக வவுனியா போக்குவரத்து பொலிஸ் நிலைய பொறுப்பதிகாரி காமினி திஸாநாயக்க ஆலோசனைக்கமைய கண்டி வீதியில் புதிய நடைமுறை அமுல்படுத்தப்பட்டுள்ளது.

வவுனியா மணிக்கூட்டு கோபுர சந்தியிலிருந்து வன்னி மாவட்ட பிரதி பொலிஸ் மா அதிபர் காரியாலயம் வரையிலான வீதிப்பகுதியில் வாகனம் முந்திச்செல்ல தடை விதிக்கப்பட்டு சுமார் 1கிலோ மீற்றர் தூரத்திற்கு வீதியில் தொடர் வெள்ளைக்கோடு இடப்பட்டுள்ளது.

அத்துடன் அதிக விபத்துக்கள் இடம்பெறும் இடம் அவதானமாக வாகனத்தினை செலுத்தவும் என்ற வாசகத்தை தாங்கிய விளம்பர பலகையும் வைக்கப்பட்டுள்ளது.

குளத்திலிருந்து..

வவுனியா பொன்னரசங்குளம் ஈச்சங்குளம் குளப்பகுதியில் இருந்து துப்பாக்கி மற்றும் கைக்குண்டுகளை பொலிசார் இன்று (01.11.2020) காலை மீட்டுள்ளனர்.

குறித்த பகுதியில் ஆயுதங்கள் இருப்பதாக தேசிய புலனாய்வுபிரிவிற்கு கிடைத்த தகவலிற்கமைய நீதிமன்ற அனுமதியுடன் அப்பகுதிக்கு சென்ற வவுனியா பொலிசார் மண் அகலப்பயன்படும் இயந்திரம் மூலம் நிலத்தை தோண்டி தேடுதலில் ஈடுபட்டனர்.

இதன்போது மண்ணில் புதையுண்ட நிலையில் காணப்பட்ட ரி56 ரக துப்பாக்கி மற்றும் 6 கைக்குண்டுகள் ,மற்றும் இரண்டு மகசின்களை பொலிசார் மீட்டனர். மீட்கப்பட்ட கைக்குண்டுகள் விசேட அதிரடிபடையினரால் செயலிழக்கச் செய்யப்பட்டமையும் குறிப்பிடத்தக்கது.

வவுனியா வைத்தியசாலையில் இருந்து இரு வைத்தியர் மற்றும் 10 தாதியர்களை பொலனறுவை கொரோனா வைத்தியசாலைக்கு கடமைக்கு வருமாறு சுகாதார அமைச்சினால் அறிவுறுத்தல் வழங்கப்பட்டுள்ளது.

வவுனியா வைத்தியசாலையில் வைத்தியர்கள், தாதியர்கள் பற்றாக்குறையாகவுள்ளனர். இவ்வாறான நிலையில் பொலநறுவையில் உள்ள கொரோனா நோயாளர் வைத்தியசாலைக்கு வவுனியா வைத்தியசாலையில் இருந்து வைத்தியர், தாதியர்களை அவசரமாக அழைக்கப்பட்டுள்ளனர்.

வவுனியா வைத்தியசாலையில் இருந்து இரு வைத்தியர், 10 தாதியர்கள் பொலநறுவையில் உள்ள கொரோனா வைத்தியசாலைக்கு இவ்வாறு அழைக்கப்பட்டுள்ளனர்.

இவர்கள் 14 நாட்கள் அங்கு கடமை புரிந்த பின்பு, 14 நாட்கள் சுய தனிமைப்படுத்தலுக்கு உள்ளாக்கப்படுவர். இவர்கள் மீண்டும் வவுனியா வைத்தியசாலைக்கு வந்த பின்னர் அடுத்த குழு செல்ல வேண்டும் என தெரிவிக்கப்பட்டுள்ளது.

வவுனியா கூமாங்குளம் பகுதியைச் சேர்ந்த இளைஞர் ஒருவர் நேற்று முன்தினம் (30.10.2020) கொரோனா தொற்று சந்தேகத்தில் வவுனியா வைத்தியசாலையில் அனுமதிக்கப்பட்டு பிசீஆர் பரிசோதனை மேற்கொள்ளப்பட்டது.

அதன்முடிவு நேற்று (31.10) இரவு வெளியாகிய நிலையில் பிசீஆர் பரிசோதனையில் கொரோனா தொற்று இல்லை என வெளியாகியுள்ளதாக வவுனியா வைத்தியசாலையின் பணிப்பாளர் தெரிவித்துள்ளார்.

குறித்த நபர் அண்மையில் கொழும்பு சென்று வந்திருந்தமையினால் தனிமைப்படுத்தப்பட்டு பிசீஆர் பரிசோதனை மேற்கொள்ளப்பட்டது குறிப்பிடத்தக்கது

மோட்டார் சைக்கிள்கள்..

கொவிட் -19 தொற்று கட்டுப்பாட்டு நடவடிக்கையை துரிதப்படுத்தும் முகமாக வவுனியா மாவட்ட சுகாதார பரிசோதகர்களுக்கு மோட்டார் சைக்கிள்கள் வழங்கி வைக்கப்பட்டது.

மாவட்ட பிராந்திய சுகாதார சேவைகள் திணைக்களத்தில் நேற்று (30.10.2020) இந்நிகழ்வு இடம்பெற்றது.

கொவிட்-19 நோய் தொற்றை தடுக்கும் வகையில் தமது உயிரைப் பணயம் வைத்து அர்ப்பாணிப்புடன் செயலாற்றும் பொது சுகாதார பரிசோதர்களுக்கு அரசாங்கத்தின் திட்டத்திற்கு அமைவாக மத்திய வங்கியின் நிதி உதவியில் சுகாதார அமைச்சினால் தெரிவு செய்யப்பட்ட பொது சுகாதார பரிசோதகர்களுக்கும் மோட்டார் சைக்கிள்கள் வழங்கி வைக்கப்பட்டு வருகின்றது.

அதனடிப்படையில் வவுனியாவில் தெரிவு செய்யப்பட்ட 12 சுகாதார பரிசோதகர்களுக்கு இவ்வாறு மோட்டார் சைக்கிள்கள் வழங்கி வைக்கப்பட்டது. 3 இலட்சத்து 80 ஆயிரம் ரூபாய் பெறுமதியான அப்பாச்சி ரக மோட்டர் சைக்கிள்களே இவ்வாறு வழங்கி வைக்கப்பட்டன.

வவுனியா பிராந்திய சுகாதார சேவைகள் பணிப்பாளர் எம்.மகேந்திரன், தொற்று நோயியல் வைத்திய நிபுணர் எஸ்.லவன், ஆகியோரினால் இவ் மோட்டார் சைக்கிள்கள் சுகாதார பரிசோதகர்களிடம் கையளிக்கப்பட்டது.

இந்நிகழ்வில் வைத்தியர்கள், பிராந்திய சுகாதார சேவைகள் திணைக்கள உத்தியோகத்தர்கள், பொது சுகாதார பரிசோதகர்கள் எனப் பலரும் கலந்து கொண்டனர்.

கொரோனா சந்தேகத்தில்..

வவுனியா, கூமாங்குளம் பகுதியைச் சேர்ந்த இளைஞர் ஒருவர் கொரோனா தொற்று சந்தேகத்தில் வவுனியா வைத்தியசாலையில் அனுமதிக்கப்பட்டுள்ளார். நேற்றைய தினம் வவுனியா வைத்தியசாலையின் வெளிநோயாளர் பிரிவில் குறித்த இளைஞருக்கு பிசீஆர் பரிசோதனை மேற்கொள்ளப்பட்டது.

இதன்படி குறித்த இளைஞருக்கு மீண்டும் ஒரு தடவை பிசீஆர் பரிசோதனை மேற்கொள்ளுமாறு சுகாதார துறையினர் கேட்டுக் கொண்டதற்கு இணங்க இன்றும் பிசீஆர் பரிசோதனை மேற்கொள்ளப்பட்டது.

அதன்முடிவு வெளியாகிய பின்னரே தொற்று தொடர்பில் கூற முடியும் என வவுனியா வைத்தியசாலைப் பணிப்பாளர் தெரிவித்துள்ளார். இதேவேளை, குறித்த நபர் அண்மையில் கொழும்பு சென்று வந்திருந்தமையும் குறிப்பிடத்தக்கது.

ஆர்ப்பாட்டம்..

காணாமல் ஆக்கப்பட்டோரின் உறவுகளால் சர்வதேச நீதி கோரி வவுனியாவில் கவனயீர்ப்பு போராட்டம் ஒன்று முன்னெடுக்கப்பட்டது.

வவுனியா, பழைய பேரூந்து நிலையம் முன்பாக சுகாதார வழிமுறைகளைப் பின்பற்றி இன்று காலை (30.10) குறித்த ஆர்ப்பாட்டம் காணாமல் ஆக்கப்பட்டோரின் உறவுகளால் முன்னெடுக்கப்பட்டது.

ஆர்ப்பாட்டத்தில் ஈடுபட்டவர்கள் ‘எங்கே எங்கே ஒப்படைக்கப்பட்ட பிள்ளைகள் எங்கே, பாடசாலை சென்ற மாணவர்கள் எங்கே, வெள்ளைவானில் க டத்தப்பட்டவர்களுக்கு பதில் தா, வேண்டும் வேண்டும் சர்வதேச விசாரணை’ என எழுதப்பட்ட சுலோக அட்டைகளை ஏந்தியிருந்ததுடன் கோசங்களையும் எழுப்பியிருந்தனர்.

சுமார் அரை மணிநேரம் போராட்டத்தில் ஈடுபட்ட தாய்மார் பின்னர் அங்கிருந்து சென்றிருந்தனர்.

யாசகர்கள்..

கொவிட்-19 இன் அச்சுறுத்தல் ஏற்பட்டுள்ள நிலையில் வெளி மாவட்டங்களில் இருந்து வவுனியாவிற்கு வருகைதந்து யாசகத்தில் ஈடுபட்டுள்ளோர் தொடர்பில் வர்த்தகர்கள், பொதுமக்களுக்கு சுகாதார பிரிவினர் முக்கிய அறிவித்தல் ஒன்றினை விடுத்துள்ளனர்.

குறிப்பாக வாரத்தில் செவ்வாய், வெள்ளி ஆகிய இரு தினங்களும் யாசகர்கள் வர்த்தக நிலையங்கள், வீடுகளுக்கு சென்று யாசகத்தில் ஈடுபடுகின்றனர். இதன் காரணமாக அவர்களுடாக கொவிட்-19 தொற்று ஏற்படும் அபாயம் ஏற்படும் நிலை ஏற்பட்டுள்ளது.

எனவே யாசகர்களை வர்த்தக நிலையம் , வீட்டு வளாகத்தினுள் உள்வாக்குவதை தவிர்த்து கொள்வதுடன் தேவையேற்படின் முழுமையான பாதுகாப்புடன் சுகாதார நடைமுறைகளை பின்பற்றி அவர்களுடான கலந்துரையாடல் , பணம் வழங்குதல் செயற்பாடுகளை மேற்கொள்ளுமாறு வவுனியா மாவட்ட சுகாதார பிரிவினர் மேலும் கோரியுள்ளனர்.

வெளி மாவட்டத்தில் இருந்து வவுனியாவிற்கு வருகைதந்து யாசகம் செய்பவர்களை அவர்களது சொந்த இடங்களுக்கு அனுப்பி வைப்பதற்குரிய நடைமுறையினை வவுனியா பொலிஸ் நிலைய சிறுவர் பெண்கள் பிரிவு பொலிசார் மற்றும் வவுனியா பிரதேச செயலக சிறுவர் பெண்கள் பிரிவினர் மேற்கொண்டு வருகின்றமையும் குறிப்பிடத்தக்கது.

நெடுங்கேணி..

வவுனியா நெடுங்கேணியில் வீதி அபிவிருத்தி பணிகளில் ஈடுபட்ட 14 ஊழியர்களுக்கு கொரோனா தொற்று உறுதி செய்யப்பட்ட நிலையில் அவர்கள் நடமாடியதாக சந்தேகத்தின் அடிப்படையில் நெடுங்கேணி பகுதியிலுள்ள வர்த்தக நிலையங்கள் மூடப்பட்டுள்ளன.

தனியார் வீதி ஒப்பந்த பணியாளர்கள் 14 பேருக்கு கொரோனா தொற்று உறுதி செய்யப்பட்ட நிலையில் சமூக பரவலை தடுப்பதற்காக சுகாதார திணைக்களத்தினர் கடும் பிரயத்தனத்தினை மேற்கொண்டு வருகின்றனர்.

இந்நிலையில் நெடுங்கேணி, அதனை அண்டியுள்ள பிரதேசங்கள் மற்றும் வீதி அபிவிருத்தி பணி மேற்கொள்ளப்படும் பிரதேசத்தில் உள்ள வர்த்தக நிலையங்கள் அனைத்தினையும் மூடுமாறு சுகாதார பிரிவினர் விடுத்த வேண்டுகோளிக்கினங்க கடந்த 25ம் திகதியிலிருந்து அப்பகுதியிலுள்ள வர்த்தக நிலையங்கள் மூடப்பட்டுள்ளது.

இந்நிலையில் கடந்த 5 நாட்களாக நெடுங்கேணி பிரதேசம் மக்கள் நடமாட்டம் இன்றி காணப்படுவதுடன் வீதி அபிவிருத்திப் பணியினை மேற்கொண்ட 82 நபர்கள் சுய தனிமைப்படுத்தலில் ஈடுபடுத்தப்பட்டுள்ளனர்.