புலமைப் பரிசில் பரீட்சை..

இலங்கையில் நேற்றுமுன்தினம் நடைபெற்ற தரம் 5 புலமைப்பரிசில் பரீட்சையில் வடக்கு மாகாணத்தைச் சேர்ந்த 18 ஆயிரத்து 387 மாணவர்கள் விண்ணப்பித்திருந்த போதிலும் 488 மாணவர்கள் பரீட்சைக்குத் தோற்றவில்லை எனக் கண்டறியப்பட்டுள்ளது.

இதன் பிரகாரம் யாழ்ப்பாணம் மாவட்டத்தில் 4 ஆயிரத்து 897 மாணவர்கள் விண்ணப்பித்திருந்த நிலையில் 4 ஆயிரத்து 818 மாணவர்கள் பரீட்சைக்குத் தோற்றியுள்ளனர்.

இதேபோன்று வவுனியா மாவட்டத்தில் 3 ஆயிரத்து 46 மாணவர்கள் விண்ணப்பித்திருந்த நிலையில் 3 ஆயிரத்து 14 மாணவர்கள் பரீட்சைக்குத் தோற்றியுள்ளனர்.

கிளிநொச்சி மாவட்டத்தில் 2 ஆயிரத்து 570 மாணவர்கள் விண்ணப்பித்திருந்த நிலையில் 2 ஆயிரத்து 531 மாணவர்கள் பரீட்சைக்குத் தோற்றியுள்ளனர்.

முல்லைத்தீவு மாவட்டத்தில் 2 ஆயிரத்து 439 மாணவர்கள் விண்ணப்பித்திருந்த நிலையில் 2 ஆயிரத்து 325 மாணவர்கள் பரீட்சைக்குத் தோற்றியுள்ளனர். மன்னார் மாவட்டத்தில் 2 ஆயிரத்து 107 மாணவர்கள் விண்ணப்பித்திருந்த நிலையில் ஆயிரத்து 961 மாணவர்கள் மட்டுமே பரீட்சைக்குத் தோற்றியுள்ளனர்.

இவற்றின் அடிப்படையில் மன்னார் மாவட்டத்தில் 146 மாணவர்களும், முல்லைத்தீவு மாவட்டத்தில் 114 மாணவர்களும், யாழ்ப்பாணம் மாவட்டத்தில் 157 மாணவர்களும், கிளிநொச்சி மாவட்டத்தில் 39 மாணவர்களும், வவுனியா மாவட்டத்தில் 32 மாணவர்களும் பரீட்சைக்குத் தோற்றவில்லை எனக் கண்டறியப்பட்டுள்ளது.

பற்றி எரியும் வயல்கள்..

வவுனியாவில் அறுவடை செய்யப்பட்ட வயல்கள் தற்போது எரியூட்டப்பட்டு வருகின்றமையால் அதனை சூழவுள்ள பகுதிகள் பெரும் புகை மூட்டமாகக் காணப்படுகின்றன.

புதிய பேரூந்து நிலையத்திற்கு அருகே ஏ9 வீதியில் அமைந்துள்ள விவசாயத்திணைக்களத்தின் அரசாங்க விதை உற்பத்தி பண்ணைக்கு சொந்தமான வயல்கள் கடந்த சில நாள்களாக எரியூட்டப்பட்டு வருகின்றன.

வயல்கள் எரியூட்டப்படுவதால் பேருந்து நிலையப் பகுதி , ஏ-9 வீதி என்பன புகைமூட்டமாகக் காட்சியளிக்கின்றன. அதனால் மக்கள் அசௌகரியங்களை எதிர்கொண்டுள்ளனர்.

தற்போது வெப்பமான காலநிலை வவுனியாவில் நிலவி வருகின்ற நிலையில் இவ்வாறு வயல்கள் எரியூட்டப்படுதால் மக்கள் பெரும் சிரமங்களுக்கு முகம் கொடுக்க வேண்டிய நிலைமை ஏற்பட்டுள்ளது.

மக்கள் சிரமம்..

வவுனியாவில் சாரதி அனுமதிப் பத்திரத்திற்கான மருத்துவ சான்றிதழ் பெறுவதற்கு வைத்தியர் உரிய நேரத்திற்கு வராமையால் நீண்ட நேரம் காத்திருக்க வேண்டியுள்ளதாக பொதுமக்கள் குற்றம் சாட்டியுள்ளனர்.

வவுனியா மாவட்ட செயலகத்தில் உள்ள சாரதி அனுமதிப்பத்திரத்திற்கான மருத்துவ சான்றிதழ் பெறுவதற்கு இன்றைய தினம் காலை 8.30 மணிக்கு வருமாறு அறிவுறுத்தப்பட்டிருந்தது.

இதன்படி 8.30 மணியில் இருந்து 30 இற்கும் மேற்பட்டோர் மருத்துவ சான்றிதழைப் பெறுவதற்கு அங்கு சென்ற போதும் மதியம் 11.30 வரை மருத்துவ சான்றிதழை பெறுவதற்கான பரிசோதனைகளை மேற்கொள்ள வைத்தியர் அங்கு சமூகமளிக்கவில்லை.

இதனால் கொவிட் – 19 அச்சுறுதலுக்கு மத்தியிலும் மருத்துவ சான்றிதழ் பெறச் சென்றோர் கூட்டமாக அங்கு நீண்ட நேரம் கூடி நின்றதை அவதானிக்க முடிந்தது.

அத்துடன், 10.30 இற்கு பின்னர் செல்வோருக்கு மருத்துவ சான்றிதழ் பெற முடியாது எனவும் மறுநாள் வருமாறும் அங்கு கடமையில் இருக்கும் உத்தியோகத்தர்கள் திருப்பி அனுப்புவதாகவும் தெரிவிக்கப்படுகிறது.

மருத்துவ சான்றிதழை பெறுவதற்காக உணவருந்தாது உணவுக் கட்டுப்பாடுகளுடன் இருந்து காலை சென்றும் மதியம் வரை வைத்தியர் வராமையால் பலருக்கும் உடல் சோர்வு மற்றும் உடல் நலக் குறைவு ஏற்படுவதாகவும் தெரிவித்துள்ளனர்.

முச்சக்கரவண்டிகள்..

வவுனியா நகரசபை தமக்கு அநீதி இழைத்துள்ளதாக தெரிவித்து 30க்கு மேற்பட்ட முச்சக்கரவண்டிகள் வவுனியா நகரசபை முன்பாக ஒன்று கூடியதினால் அவ்விடத்தில் சற்று பதற்றமான சூழ்நிலை காணப்பட்டது.

வவுனியா நகரசபைக்கு முன்பாக இன்று (13.10.2020) மதியம் 1.30 மணியளவில் இடம்பெற்ற இச் சம்பவம் தொடர்பில் மேலும் தெரியவருகையில்,

வவுனியா நகரின் அபிவிருத்தியினை கருத்தில் கொண்டும் ஏனைய சில மாவட்டங்களில் நடைமுறையில் உள்ள வாடகைக்கார் பயன்பாட்டினையடுத்து வவுனியா நகரசபைக்குட்பட்ட பகுதியில் வாடகைக்கார் செலுத்துவதற்கு நபர் ஒருவருக்கு வவுனியா நகரசபையினரினால் அனுமதி வழங்கப்பட்டிருந்தது.

இந் நிலையில் வாடகைக்காருக்கான அனுமதியினை இரத்து செய்யக்கோரி வவுனியா முச்சக்கரவண்டி உரிமையாளர் சங்கத்தினர் வவுனியா நகரசபைக்கு முன்பாக 30க்கு மேற்பட்ட்ட முச்சக்கரவண்டிகளில் ஒன்று கூடியதினால் அவ்விடத்தில் சற்று பதற்றமான நிலை காணப்பட்டிருந்தது.

அதன் பின்னர் வவுனியா நகரசபை தவிசாளர் காரியாலயத்தில் முச்சக்கரவண்டி உரிமையாளர் சங்கத்தினருக்கும் வவுனியா நகரசபை தவிசாளர் இ.கௌதமன் மற்றும் நகரசபை செயலாளர் ஆர்.தயாபரன் ஆகியோருக்கு இடையில் கலந்துரையாடல் இடம்பெற்றது.

வாடகைக்காருக்காக வழங்கப்பட்ட அனுமதிப்பத்திரத்தினை தற்காலிகமாக நிறுத்துவதாகவும் எதிர்வரும் நகரசபை கூட்டத்தில் இவ்விடயம் தொடர்பில் இறுதித்தீர்மானம் எடுப்பதாக வவுனியா நகரசபை தவிசாளர் இ.கௌதமன் மற்றும் நகரசபை செயலாளர் ஆர்.தயாபரன் தெரிவித்தமையினையடுத்து அவர்கள் அவ்விடத்தினை விட்டு கலைந்து சென்றனர்.

உழுந்திற்கான உத்தரவாத விலை குறைவடைந்தால் கமநல அபிவிருத்தித் திணைக்களம் அதனை உத்தரவாத விலைக்கு கொள்வனவு செய்யும் என்று வவுனியா கமநல அபிவிருத்தி திணைக்களத்தின் உதவி ஆணையாளர் இ.விஜயகுமார் தெரிவித்தார்.

இது தொடர்பில் மேலும் கருத்து தெரிவித்த அவர், இலங்கையில் அதிகளவான உழுந்து உற்பத்தியில் ஈடுபடுவது வவுனியா மாவட்டமே.

தற்போது ஒரு கிலோ உழுந்தின் விலை 800 ரூபாய்க்கு மேல் உள்ளமை நாம் அறிந்ததே. எனினும் அறுவடையின் போதும் உத்தரவாத விலையேனும் விவசாயிகளிற்கு கிடைப்பதில்லை.

கடந்த காலத்தில் ஆகக்கூடுதலாக ஒரு கிலோ 140 ரூபாவிற்கே விற்க முடிந்தது. இம்முறை 2020/2021 பெரும்போகத்தின் போது அரசின் உத்தரவாத விலையான கிலோ ஒன்றிற்கு 220/= ரூபாயினை விட குறையுமாயின்,

வவுனியா கமநல அபிவிருத்தி திணைக்களம் அதனை உத்தரவாத விலைக்கு கொள்வனவு செய்யும் எனவே பயமின்றி இம்முறை உழுந்து உற்பத்தியினை மேற்கொள்ளுங்கள்.

கமத்தொழில் மற்றும் கமநல காப்புறுதி சபையிடம் இருந்து உழுந்து செய்கைக்கான காப்புறுதியை செய்து கொள்ள முடியும்.

இது தொடர்பான தகவல்களுக்கு உதவி பணிப்பாளர்-கதிர்காமநாதன்- 0779779038 அவர்களது குறித்த இலக்கத்திற்கு அழைப்பினை ஏற்படுத்துவதன் மூலம் அறிந்துகொள்ள முடியும்.

ஒரு ஏக்கருக்கு 50,000/= வரையான காப்புறுதி தொகைக்காக 2,250/= இனை கட்டண தொகையாக செலுத்தி கட்டாயமாக பயிர் காப்புறுதியினை மேற்கொள்ளுங்கள்.

விதை உழுந்தினை வவுனியா மாவட்ட விவசாய திணைக்களத்தின் விதைகள் மற்றும் நடுகை பொருட்கள் பிரிவில் பெற்றுக்கொள்ளலாம். என்றார்.

வவுனியா நகர் பகுதியில் யாசகர்கள் பலர் சுகாதார நடைமுறைகளைப் பின்பற்றாது பாதுகாப்பற்ற முறையில் நடமாடுவதால் கொவிட் -19 தொற்று ஏற்படும் என்ற அ ச்சத்தில் வர்த்தகர்கள் உள்ளனர்.

வவுனியா நகரையண்டிய பகுதிகளில் வெளி மாவட்டங்களில் இருந்து வருகை தந்த யாசகர்கள், வர்த்தகர்கள் மற்றும் நகரப்பகுதிக்கு செல்வோரிடம் யாசகம் கேட்கின்றனர்.

அத்துடன் வவுனியா நகரம் மற்றும் வைரவபுளியங்குளம் ஆகிய பகுதிகளில் உள்ள வர்த்தக நிலையங்களின் முன்னால் இரவு வேளைகளில் உறங்குகின்றனர்.

சுகாதார நடைமுறைகளைப் பின்பற்றாது பாதுகாப்பற்ற முறையில் யாசகர்கள் நடமாடுவதாலும், வர்த்தக நிலையங்களின் முன்னால் உறங்குவதாலும் கொவிட் – 19 தொற்று ஏற்பட்டுவிடும் என அச்ச நிலை ஏற்பட்டுள்ளதாக பாதிக்கப்பட்ட வர்த்தகர்கள் தெரிவித்துள்ளனர்.

இது தொடர்பில் சுகாதார பரிசோதகர்கள் மற்றும் வவுனியா பொலிசார் ஆகியோருக்கு தெரியப்படுத்தியும் ஆக்க பூர்வமான நடவடிக்கைகள் எடுக்கப்படவில்லை எனவும்,

யாசகர்கள் கடைகளின் முன்னால் தங்குவதால், தாம் தினமும் கடைகளின் முன்னால் கிருமி நீக்கம் செய்ய வேண்டியுள்ளதாகவும் வர்த்தகர்கள் தெரிவித்துள்ளனர்.

தனியார் கல்வி நிறுவனங்கள்..

நாடு முழுவதும் கொவிட்-19 தாக்கம் மீண்டும் அதிகரித்து வரும் நிலையில் தனியார் கல்வி நிலையங்களையும் மூடுமாறு அரசாங்கம் அறிவித்துள்ளது.

இந்நிலையில் இவ் அறிவித்தலை மீறி வவுனியாவில் இயங்கிய தனியார் கல்வி நிறுவனங்கள் மீது பொலிஸார் அதிரடி நடவடிக்கையினை மேற்கொண்டனர்.

வவுனியா பிரதி பொலிஸ் மா அதிபர் காரியாலயத்தின் உத்தரவிற்கமைய இன்று (12.10.2020) மாலை வவுனியா வைரவபுளியங்குளம் பகுதியில் உள்ள தனியார் கல்வி நிலையங்களை பார்வையிட்ட பொலிசார் அரச அதிபரின் உத்தரவை மீறி இயங்கிய மூன்று கல்வி நிலையங்களை மூடுமாறு பணித்ததுடன் அனுமதி பெறாது திறக்கப்பட்டமை குறித்து எ ச்சரிக்கையும் விடுத்திருந்தனர்.

இதன்போது தனியார் கல்வி நிலைய உரிமையாளர் ஒருவர் பொலிசாரிடம் தெரிவிக்கும் போது, நாம் இதுவரை பூட்டியிருந்தோம். இன்று தான் திறந்தோம்.

பரீட்சைக்கு செல்லும் மாணவர்கள் சந்தேகம் கேட்க வந்ததால் திறந்தோம். அத்துடன் நான் சுகாதார திணைக்கள உத்தியோகத்தர் எனக்கு நிலமை தெரியும். இங்கு பிரச்சனை இல்லை என்பதால் திறந்தோம். ஊரடங்கு போட்டால் நாம் உதவி செய்வோம் என தெரிவித்தார்.

விபத்தில்…

வவுனியா கோவில்குஞ்சுக்குளத்தை பூர்வீகமாக கொண்டு லண்டனில் வசித்து வரும் சிறுவன் ஒருவன் விபத்தில் உ யிரிழந்துள்ளான். குறித்த சிறுவன் ஐக்கிய இராச்சியத்தின் கேய்ஸ் (Hayes) பகுதியில் தனது பெற்றோருடன் வசித்து வந்துள்ளான்.

இந்நிலையில் நேற்று (11) இரவு 7 மணியளவில் தனது தாயுடன் நகர்ப்பகுதிக்கு சென்ற சிறுவன் பாதசாரி கடவையை கடக்க முற்பட்ட போது வேகமாக வந்த கார் மோதியுள்ளது.

இதனால் படுகாயமடைந்த சிறுவன் வைத்தியசாலையில் அனுமதிக்கப்பட்ட நிலையில் மரணமடைந்துள்ளான்.

குறித்த சம்பவத்தில் வவுனியா பாலமோட்டை கோவில்குஞ்சுக்குளம் பகுதியை பூர்வீகமாக கொண்ட சசிகரன் அகர்வின் வயது 4 என்ற சிறுவனே மரணமடைந்துள்ளமை குறிப்பிடத்தக்கது.