பிரித்தானியாவின் போல்சில் வீதியில் அமைந்துள்ள சிங்களவர் ஒருவரின் உணவகம் மீது தாக்குதல் நடத்தப்பட்டுள்ளது. “யாழ் கபே” என்ற பெயரில் இந்த உணவகம் நடத்தப்பட்டு வந்தது.

ஸ்ரீசாந்த பெர்ணான்டோ என்ற இலங்கையை சேர்ந்த சிங்களவர் ஒருவர் ஒரு வருடத்துக்கு முன்னர் இந்த உணவகத்தை ஆரம்பித்துள்ளார்.

எனினும் தாம் ஒரு சிங்களவர் என்ற அடிப்படையில் தமிழ் உணவுகளை தயாரிப்பதை சிலர் விரும்பவில்லை. ஏற்கனவே நேரடியாக வந்து தம்மை சிலர் அச்சுறுத்தியதாகவும் பெர்ணான்டோ குறிப்பிட்டுள்ளார்.

இந்தநிலையில் உணவத்தில் சில வாடிக்கையாளர்கள் இருந்தபோது அங்கு வந்த சுமார் 20 பேர் வரை ஜன்னல்களை உடைத்துள்ளனர்.

இதன் காரணமாக தமக்கு சுமார் 2000 பவுண்ட்ஸ் அளவில் நட்டம் ஏற்பட்டுள்ளதாக பெர்ணான்டோ குறிப்பிட்டுள்ளார். சம்பவம் தொடர்பில் பொலிஸார் விசாரணைகளை ஆரம்பித்துள்ளனர்.

இந்த ஆண்டின் முதல் பத்து மாதங்களில் 300 வெளிநாட்டுப் பிரஜைகள் கறுப்புப் பட்டியலிடப்பட்டு நாடு கடத்தப்பட்டுள்ளனர்.

சுற்றுலா வீசா மூலம் நாட்டுக்குள் பிரவேசித்தவர்களே இவ்வாறு நாடு கடத்தப்பட்டுள்ளதாக குடிவரவு குடியகல்வுத் திணைக்களம் அறிவித்துள்ளது.

இந்திய மற்றும் பாகிஸ்தானியர்களே இவ்வாறு நாடு கடத்தப்பட்டுள்ளனர். வீசா சட்டங்களை மீறி இலங்கையில் தொழில்களில் ஈடுபட்ட பலர் இவ்வாறு நாடு கடத்தப்பட்டுள்ளனர்.

குடிவரவு குடியகல்வுத் திணைக்கள புலனாய்வுப் பிரிவினர் நடத்திய தேடுதல்களின் மூலம் குறித்த நபர்கள் கைது செய்யப்பட்டு நாடு கடத்தப்பட்டிருந்தனர்.

கொழும்பு சென்தோமஸ் கல்லூரி நீச்சல் தடாகத்தில் மூழ்கி மட்டக்களப்பு புனித மிக்கேல் கல்லூரி மாணவன் ஒருவர் உயிரிழந்துள்ளார்.

கொழும்பு சென்தோமஸ் கல்லூரிக்கும் மட்டக்களப்பு புனித மிக்கேல் கல்லூரிக்கும் இடையில் நடைபெறவிருந்த க்ரோதர் சலன்ஞ் வெற்றிக் கிண்ணத்துக்கான கூடைப்பந்தாட்டப் போட்டிக்காகச் சென்ற யூஜின் டிலக்சன் (15) மாணவனே இவ்வாறு உயிரிழந்துள்ளார்.

மட்டக்களப்பு புனித மிக்கேல் கல்லூரியில் 10ஆம் வகுப்பில் கல்வி கற்கும் இம் மாணவனின் தந்தை மட்டக்களப்பு சிறைச்சாலையில் பணியாற்றுகிறார்.

சிறப்பாக விளையாட்டுத்திறனைக் காண்பிக்கக் கூடிய இவ் மாணவனின் மரணம் மட்டக்களப்பில் பெரும் கவலையை ஏற்படுத்தியுள்ளது.

மட்டக்களப்பிலிருந்து வெள்ளிக்கிழமை காலை கொழும்புக்குச் சென்ற புனித மிக்கேல் கல்லூரியின் மாணவர்கள் 30 பேர் நீச்சல் தடாகத்தில் நீராடிவிட்டு இரவு உணவுக்காகச் சென்றுள்ளனர்.

அப்போது ஒருவரைக் காணவில்லை என்று தேடிய போது அவர் நீச்சல் தடாகத்தில் 13 அடி ஆழமான பகுதியில் இரவு 9.10 மணியளவில் சடலமாகக் கண்டுபிடிக்கப்பட்டுள்ளார்.

பின்னர் சடலம் மீட்கப்பட்டு களுபோவில வைத்தியசாலைக்குக் கொண்டு செல்லப்பட்டு மரண விசாரணை, பிரேதப் பரிசோதனைகள் மேற்கொள்ளப்பட்டன. சடலம் நேற்றைய தினம் மட்டக்களப்புக்கு கொண்டு செல்லப்பட்டது.

அத்துடன் சிறந்ததொரு கூடைப்பந்தாட்ட வீரனை மட்டக்களப்பு இழந்து நிற்பதாகவும் பயிற்றுவிப்பாளர் சுரேஸ் றொபட் தெரிவித்தார். அதேநேரம் இவ் மாணவனின் மரணம் காரணமாக நடைபெறவிருந்த இந்த கூடைப்பந்தாட்டப் போட்டி நிறுத்தப்பட்டது.

15 வயதுக்குட்பட்டவர்களும், 19 வயதுக்குட்டவர்களுமாக இரண்டு அணிகளுக்கு இப்போட்டி நடைபெறவிருந்தது. 1994களில் ஆரம்பிக்கப்பட்ட இப் போட்டி அதன் பின்னர் 2004 ஆம் ஆண்டு இரண்டு கல்லூரிகளுக்குமிடையில் நடைபெற்றுள்ளது.

அதன் பின்னர் நிறுத்தப்பட்டு இந்தவருடம் இப்போட்டி நடத்துவதற்கான ஏற்பாடுகள் மேற்கொள்ளப்பட்டுள்ளமை குறிப்பிடத்தககதாகும்.

இலங்கையில் இடம்பெற்று வரும் 23 வது பொதுநலவாய அரச தலைவர்களின் உச்சி மாநாடு இன்று பிற்பகல் நிறைவடைகிறது.

பொதுநலவாய அமைப்பிற்கு அடுத்த இரண்டு ஆண்டுகளுக்கு தலைமைப் பொறுப்பை ஜனாதிபதி மஹிந்த ராஜபக்ஷ ஏற்றுக் கொண்டுள்ளார்.

இன்று பிற்பகல் ஜனாதிபதி மஹிந்த ராஜபக்ஷ மற்றும் பொதுநலவாய செயலாளர் கமலேஷ் சர்மா கலந்து கொள்ளும் ஊடகவியலாளர் சந்திப்பொன்று இடம்பெறவுள்ளது.

இதன்போது பொதுநலவாய மாநாட்டில் எடுக்கப்பட்ட தீர்மானங்கள் குறித்து அறிவிக்கப்படவுள்ள அதேவேளை அடுத்த பொதுநலவாய மாநாடு நடைபெறும் நாடு குறித்த அறிவிப்புக்களும் வெளியிடப்படும்.

இம்முறை இடம்பெற்ற பொதுநலவாய நாடுகளின் அரச தலைவர்கள் மாநாட்டில் எடுக்கப்பட்ட தீர்மானங்கள் குறித்த இறுதி அறிக்கையை தயார்படுத்தல் தொடர்பில் அரச தலைவர்கள் கவனம் செலுத்தியுள்ளனர்.

பொதுநலவாய அரச தலைவர்களின் உச்சி மாநாடு நேற்று முன்தினம் காலை 10 மணியளவில் கொழும்பு தாமரைத்தடாக மஹிந்த ராஜபக்ஷ அரங்கில் கோலாகலமாக ஆரம்பமானது.

இந்த மாநாட்டை தமது தாயாரான இரண்டாம் எலிசபெத் மகாராணியின் சார்பில் முதற்தடவையாக இளவரசர் சார்ள்ஸ் ஆரம்பித்து வைத்தார்.

53 நாடுகளைக் கொண்ட இந்தப் பொதுநலவாய அரச தலைவர்கள் உச்சி மாநாட்டில் இம்முறை இந்தியா, கனடா, மொறிஷியஸ் ஆகிய நாடுகளின் பிரதமர்கள் பங்குபற்றமுடியவில்லை என அறிவித்திருந்தனர்.

இந்திய பிரதமர் மன்மோகன் சிங் சார்பில் வெளிவிவகார அமைச்சர் சல்மான் குர்ஷித் கலந்துகொண்டார். கனேடியப் பிரதமர் ஸ்ரீபன் ஹாப்பரின் சார்பில் அந்நாட்டு வெளிவிவகார அமைச்சர் தீபக் ஒபராய் கலந்துகொண்டார்.

மொறிஷியஸ் பிரதமர் ராம் குலம் சார்பில் வெளிவிவகார அமைச்சரும் பிராந்திய ஒருமைப்பாடு மற்றும் சர்வதேச வர்த்தகத்துறை அமைச்சருமான கலாநிதி அர்வின் புளேல் கலந்துகொண்டார்.

கண்டி – தலாதுஓயா, ஹாரகம பிரதேசத்தில் இடம்பெற்ற வாகன விபத்தில் அறுவர் உயிரிழந்துள்ளனர். பஸ் ஒன்றும் வேன் ஒன்றும் மோதுண்டதில் இவ் விபத்து நேர்ந்துள்ளதாக பொலிஸ் ஊகப் பேச்சாளர் அஜித் ரோஹண தெரிவித்தார்.

விபத்தில் காயமடைந்த மேலும் 15 பேர் கண்டி வைத்தியசாலையில் சிகிச்சைகளுக்காக அனுமதிக்கப்பட்டுள்ளனர்.