இலங்கையில் இடம்பெறும் பொதுநலவாய மாநாட்டில் கலந்து கொள்ளப் போவதில்லை என தமிழ்த் தேசியக் கூட்டமைப்பு தீர்மானித்துள்ளது.

நேற்று மாலை யாழ். நகரில் இடம்பெற்ற தமிழ் தேசியக் கூட்டமைப்பு தலைவர்களின் கூட்டத்தில் இந்த தீர்மானம் எடுக்கப்பட்டதாக அக் கட்சியின் செயலாளர் மாவை சேனாதிராஜா தெரிவித்தார்.

பொதுநலவாய மாநாட்டை மற்றும் அதில் கலந்து கொள்ளும் நாடுகளை புறக்கணிக்க வில்லை எனவும் இலங்கையில் இடம்பெறும் பொதுநலவாய மாநாட்டையே தமது கட்சி புறக்கணிப்பதாகவும் அவர் குறிப்பிட்டார்.

இலங்கையில் இடம்பெற்ற இனப் படுகொலைக்கு எதிராக சர்வதேச அளவில் குரல் எழுப்பி வரும் நிலையில், தமிழ்த் தேசியக் கூட்டமைப்பு பாதிக்கப்பட்ட மக்களின் பிரதிநிதிகள் என்ற வகையில் இந்த மாநாட்டை புறக்கணிக்க தீர்மானித்துள்ளதாக மாவை சேனாதிராஜா தெரிவித்தார்.

எனினும் மாநாட்டில் கலந்து கொள்ள இலங்கைக்கான விஜயத்தை மேற்கொள்ளும் சர்வதேச தலைவர்களுடன் மாநாட்டிற்கு வெளியாக தமது கட்சி சந்தித்து கலந்துரையாடும் எனவும் அவர் குறிப்பிட்டார்.

இலங்கையில் இடம்பெறும் பொதுநலவாய மாநாட்டில் கலந்துகொள்ளவுள்ள தலைவர்களுக்கு, தமிழ்த் தேசியக் கூட்டமைப்பு இலங்கையின் தற்போதைய நிலைமைகள் மற்றும் மனித உரிமை மீறல்கள் தொடர்பில் கடிதம் ஒன்றை அனுப்பி வைப்பதற்கு தீர்மானித்துள்ளதாக மாவை சேனாதிராஜா தெரிவித்தார்.

புதுவையில் சிறப்பு சட்டமன்றத்தை கூட்டி காமன்வெல்த் மாநாட்டில் இந்தியா பங்கேற்க கூடாது என தீர்மானம் நிறைவேற்ற வேண்டும் என்று அ.தி.மு.க.வினர் சபாநாயகரிடம் மனு அளித்தனர்.

புதுவை மாநில அ.தி.மு.க. செயலாளர் சபாநாயகர் சபாபதிக்கு அனுப்பி உள்ள மனுவில்,

“தமிழ் மக்களின் ஒருமித்த கருத்துக்கும், உணர்வுகளுக்கும் மதிப்பளிக்கும் வகையில் இலங்கையில் நவம்பர் மாதம் நடக்க உள்ள காமன்வெல்த் மாநாட்டை இந்தியா புறக்கணிக்க வேண்டும் என மத்திய அரசை வலியுறுத்தி தமிழக சட்டமன்றத்தில் எங்கள் அம்மா தீர்மானம் நிறைவேற்றி உள்ளார்.

இந்தியாவில் தமிழ் பேசும் மாநிலங்களான தமிழகம், புதுவை ஆகிய 2–ல் தமிழகத்தில் இது தொடர்பான தீர்மானம் நிறைவேற்றப்பட்டுள்ளது.

எனவே தமிழகத்தை பின்பற்றி காமன்வெல்த் மாநாட்டை இந்தியா புறக்கணிக்க வேண்டும் என மத்திய அரசை வலியுறுத்தி தீர்மானம் நிறைவேற்ற புதுவையில் சிறப்பு சட்டமன்றத்தை கூட்ட வேண்டும்” என்று கூறப்பட்டு இருந்தது.

தமிழ் தேசியக் கூட்டமைப்பு தலைவர்களின் கூட்டம் நேற்று மாலை யாழ். நகரில் நடைபெற்றுள்ளது.

தமிழ் தேசியக் கூட்டமைப்பின் பாராளுமன்றக்குழுத் தலைவர் இரா.சம்பந்தன் தலைமையில் இடம்பெற்ற இக்கூட்டத்தில் பாராளுமன்ற உறுப்பினர்களான இரா.சம்பந்தன், மாவை சேனாதிராஜா, சுரேஸ் பிரேமச்சந்திரன், சிவசக்தி ஆனந்தன், எம்.ஏ.சுமந்திரன், எஸ்.சரவணபவன் ஆகியோரும் முன்னாள் பாராளுமன்ற உறுப்பினர்களான தர்மலிங்கம் சித்தார்த்தன், எம்.கே.சிவாஜிங்கம் மற்றும் ஹென்ரி மகேந்திரன், ராகவன் ஆகியோரும் கலந்து கொண்டிருந்தனர்.

இக்கூட்டத்தின்போது தற்போதைய அரசியல் நிலைமைகள் பற்றி; விரிவாக கலந்துரையாடப்பட்டதுடன், பொதுநலவாய நாடுகளின் மகாநாடு சம்பந்தமான விடயங்கள் தொடர்பிலும் மிகவும் ஆழமாக ஆராயப்பட்டுள்ளது.

அத்துடன் தமிழ் தேசியக் கூட்டமைப்பின் உயர்மட்டக் குழுவின் கூட்டத்தினை கொழும்பில் நடத்துவதென்றும் இக்கூட்டத்தின்போது தீர்மானிக்கப்பட்டது.

வட மாகாணத்தின் ஆளுநராக ஒரு இராணுவ அதிகாரி கடமையாற்றுவதை நாம் விரும்பவில்லை என வட மாகாண முதலமைச்சர் சீ.வி. விக்னேஸ்வரன் தெரிவித்தார்.

மக்களின் எதிர்பார்ப்பை புரிந்துகொண்டு செயலாற்றக்கூடிய ஒருவரே வட மாகாண ஆளுநராக வர வேண்டும் என நாங்களும் மக்களும் விரும்புகின்றோம் என அவர் குறிப்பிட்டார்.

இதனை ஜனாதிபதி கவனத்தில் எடுத்து செயற்படுவார் என தான் எதிர்பார்க்கின்றேன் எனவும் அவர் தெரிவித்தார்.

வட மாகாண சபையின் முதலாவது அமர்வு இன்று வெள்ளிக்கிழமை காலை இடம்பெற்றது. இதன்போது உரையாற்றும்போதே அவர் மேற்கண்டவாறு குறிப்பிட்டார்.

அங்கு தொடர்ந்து உரையாற்றிய அவர்,

வட மாகாணத்தில் இராணுவத்தின் பிரசன்னம் இடம்பெற இனிமேல் அனுமதிக்க முடியாது. அத்துடன் இராணுவத்தினர் முகாம்களுக்குள் முடக்கப்பட வேண்டும்.

வடக்கிலிருந்து இராணுவத்தினரை வெளியேற்றுவதற்கு தமிழ்த் தேசிய கூட்டமைப்பு அரசாங்கத்துடன் பேச்சுவார்த்தை நடத்தி அதற்கான தீர்வினை விரைவில் காணவுள்ளது.

போருக்கு பிந்திய வடக்கினை தமிழ்த் தேசியக் கூட்டமைப்பும் அரசாங்கமும் இணைந்து அபிவிருத்திகள் மேற்கொள்ள வேண்டிய தேவையுள்ளது.

சர்வதேச சமூகம் வட பகுதி தமிழ் மக்களுக்கு தொழில் சார்ந்த நடவடிக்கைகளுக்கான உதவிகளை வழங்க வேண்டும்.

வட மாகாண சபையானது மக்களுக்கான தேவைகளை பெற்றுக்கொள்ளக் கூடிய வகையில் சட்ட வரையறைக்குள் தந்திரோபாய அடிப்படையில் முன்னகர்த்தி செல்லவுள்ளது.

13வது திருத்தச் சட்டத்திற்கு அமைவாக தேர்தல் ஆணையாளரை அரசாங்கம் வழிநடத்த வேண்டும்.

13வது திருத்தச் சட்டம் ஓட்டைகள் நிறைந்த பாத்திரம் போல இருக்கின்றதை உணர்ந்திருந்த போதும், நாங்கள் 13வது திருத்தச் சட்டத்தின் அடிப்படையில் தேர்தலில் போட்டியிட்டோம்.

இந்த சட்டத்தில் பல குறைபாடுகள் காணப்பட்டாலும் அதனை ஏற்றுக்கொள்ள வேண்டிய தேவை எமக்கிருக்கின்றது என்றார்.

வட பகுதிக்கான ரயில் பாதையில் போக்குவரத்தில் ஈடுபடுத்துவதற்காக இந்தியாவில் இருந்து 6 ரயில் இயந்திரங்கள் மற்றும் 78 ரயில் பெட்டிகளை இறக்குமதி செய்ய போக்குவரத்து அமைச்சு தீர்மானித்துள்ளது.

இந்தியாவின் கடன் யோசனை திட்டத்தின் கீழ் இதற்காக 100 மில்லியன் அமெரிக்க டொலர்கள் ஒதுக்கப்பட்டுள்ளன.

இறக்குமதி செய்யப்பட உள்ள ரயில் பெட்டிகளில் 12 பெட்டிகள் குளிரூட்டப்பட்ட பெட்டிகள் என அமைச்சு குறிப்பிட்டுள்ளது.

வடக்கு ரயில் பாதையில் கிளிநொச்சி வரையான ரயில் சேவை அண்மையில் ஆரம்பித்து வைக்கப்பட்டது.

அடுத்த வருடம் ஜூன் மாதத்திற்குள் இந்த ரயில் சேவை காங்கேசன்துறை வரை நீடிக்கப்பட உள்ளது.

அதேவேளை எதிர்வரும் டிசம்பர் மாதம் தலைமன்னார் வரை ரயில் சேவைகளை ஆரம்பிக்க இலங்கை ரயில் திணைக்களம் திட்டமிட்டுள்ளது.

படகுகள் மூலம் அவுஸ்திரேலியாவுக்கு சென்று புகலிடம் கோரி 79 இலங்கை பிரஜைகளை அந்நாடு இலங்கைக்கு திருப்பி அனுப்பியுள்ளதாக கொழும்பில் உள்ள அவுஸ்திரேலிய உயர்ஸ்தானிகராலயம் நேற்று வெளியிட்டுள்ள அறிக்கையில் தெரிவித்துள்ளது.

கடந்த 2012 ஆம் ஆண்டு ஓகஸ்ட் மாதம் முதல் இதுவரை சுமார் ஆயிரத்து 400 பேர் அங்கிருந்து திருப்பி அனுப்பி வைக்கப்பட்டுள்ளனர்.

இவர்களில் ஆயிரத்து 100 பேர் தமது சுயவிருப்பத்தின் பேரில் இலங்கை திரும்பியதாக உயர்ஸ்தானிகராலயம் குறிப்பிட்டுள்ளது.

அவுஸ்திரேலியாவுக்கு வருபவர்கள் விசா அனுமதியின்றி வரும் போது அவர்கள் எந்த காரணத்திற்காக அங்கு வந்தனர் என்பது குறித்து மதிப்பீடு செய்யப்படும் என அவுஸ்திரேலிய குடிவரவு மற்றும் குடியுரிமை திணைக்களம் தனது உத்தியோகபூர்வ அறிக்கையில் கூறியுள்ளது.

அவர்களின் கூற்றுக்கள் சர்வதேச கடப்பாடுகளுக்கு அமைவாக இல்லாது போனால் அவர்கள் தமது சொந்த நாடுகளுக்கு திரும்ப வேண்டியது கட்டாயமானது.

இலங்கை உட்பட வெளிநாடுகளை சேர்ந்தவர்கள் செல்லுப்படியான விசா இன்றி படகுகள் மூலம் அவுஸ்திரேலியாவுக்கு வந்தால் அவர்களுக்கு அங்கு நீண்டகாலம் தங்க இடமளிக்கப்பட மாட்டாது என்ற புதிய சட்டத்தை அந்நாடு கடந்த ஜூலை மாதம் 19 ஆம் திகதி வெளியிட்டது.

அவர்கள் உடனடியாக கொழும்புக்கு அனுப்பி வைக்கப்பட மாட்டார்கள் அவர்களின் கோரிக்கைகள் பரிசீலிக்கப்படும் வரை அவர்கள் பப்புவா நியூகினியா அல்லது நாவுறு ஆகிய நாடுகளுக்கு அனுப்பி வைக்கப்படுவார் என பேச்சாளர் ஒருவர் தெரிவித்தார்.

இலங்கையில் மூன்று தசாப்த கால போர் 2009ம் ஆண்டு முடிவுக்கு கொண்டு வரப்பட்ட போதும் இலங்கையில் இருந்து செல்லும் புகலிடக் கோரிக்கையாளர்களின் எண்ணிக்கை அதிகரித்தது. இதனால் கடுமையாக நடவடிக்கைகளை எடுக்க வேண்டிய அழுத்தங்களை அவுஸ்திரேலிய அரசாங்கம் எதிர்நோக்கியது.

அதேவேளை இலங்கையில் இருந்து படகுகள் மூலம் சட்டவிரோதமாக அவுஸ்திரேலியாவுக்கு செல்ல முயற்சித்த சுமார் ஆயிரத்து 500 பேரை இலங்கை கடற்படையினர் கைதுசெய்துள்ளனர்.

சட்டவிரோத குடியேற்றவாசிகளை தடுக்கும் நோக்கிலான கண்காணிப்பு பணிகளில் அவுஸ்திரேலிய அரசாங்கம் இலங்கை கடற்படையுடன் நெருக்கமாக செயற்பட்டு வருகிறது.

அத்துடன் இலங்கை மக்கள் படகுகள் மூலம் அவுஸ்திரேலியா செல்வதை தவிர்ப்பதற்கான விழிப்புணர்வு திட்டங்களையும் அந்த நாடு செயற்படுத்தியுள்ளது.