கேரள மாநிலம் மூணாறு அடுத்துள்ள மாட்டுப்பட்டி பகுதியில் ஏராளமான காட்டு யானைகள் உள்ளன. சில யானைகள் கூட்டமாகவும்,சில யானைகள் தனியாகவும் இந்த பகுதியில் உலா வருகின்றன.

மாட்டுப்பட்டி பகுதி சுற்றுலா தலமாக விளங்கி வருவதால் இங்கு தினந்தோறும் ஏராளமான சுற்றுலா பயணிகள் வருவார்கள்.

நேற்று மாலையில் மாட்டுப்பட்டி பகுதியில் ஒரு யானை நின்று கொண்டிருந்தது. இதைப் பார்த்ததும் உற்சாகம் அடைந்த சுற்றுலா பயணிகள் கூச்சல் போட்டுள்ளனர். சிலர் யானை மீது கற்களை எடுத்து எறிந்துள்ளனர். இதனால் யானைக்கு கோபம் ஏற்பட்டுள்ளது.

உடனே சுற்றுலா பயணிகளை நோக்கி யானை ஓடிவரத் தொடங்கியது. இதைப் பார்த்ததும் அவர்கள் அலறி அடித்துக் கொண்டு ஓட்டம் பிடித்தனர். இதுகுறித்து வனத்துறை அதிகாரிகளுக்கு தகவல் கொடுக்கப்பட்டது.

அதன்பேரில் அவர்கள் ஒரு ஜீப்பில் வந்து சுற்றுலா பயணிகளை பாதுகாப்பான இடங்களுக்கு அனுப்பி வைத்துக் கொண்டிருந்தனர்.

அப்போது காட்டு யானை வனத்துறையினரின் ஜீப்பை அடித்து சேதப்படுத்தியது. இதில் ஜீப்பின் முன்பகுதி பலத்த சேதம் அடைந்தது. அப்போது ஜீப்பில் வனத்துறையினர் யாரும் இல்லை.

இதைப் பார்த்ததும் வனத்துறை அதிகாரிகளும் ஓட்டம் பிடிக்கத் தொடங்கினார்கள். மேலும் கோபம் தனியாத காட்டுயானை மாட்டுப்பட்டி அணைப்பகுதியில் உள்ள படகு சவாரி செய்யும் இடத்துக்கு வந்தது.

இதைப்பார்த்ததும் அந்த பகுதிக்குள் யாரும் சென்று விடாமல் போலீசார் பாதுகாப்பு அரணாக நின்று கொண்டனர். படகு குழாமில் இருந்த அனைவரையும் பாதுகாப்பான இடத்துக்கு போலீசார் அழைத்து சென்றனர்.

பின்னர் படகு சவாரியையும் நிறுத்தி விட்டனர். அதேபகுதியில் காட்டு யானை தொடர்ந்து அட்டகாசம் செய்ததால் அந்த பகுதியில் போக்குவரத்து நிறுத்தப்பட்டது. இதனால் அந்த பகுதியில் பல மணிநேரம் போக்குவரத்து பாதிக்கப்பட்டது.

காட்டு யானை கோபத்தில் இருந்ததால் அதை காட்டுக்குள் விரட்ட முடியாமல் அதிகாரிகள் திணறினார்கள். இதனால் மாட்டுப்பட்டி அணைப்பகுதியில் பெரும் பரபரப்பு ஏற்பட்டது.

தமிழகத்தின் சேலத்தில் பாடசாலை மாணவி தற்கொலை செய்து கொண்ட வழக்கில், மாணவியின் தாயும் அவரது கள்ளக்காதலனும் கைது செய்யப்பட்டுள்ளனர்.

சேலம் மாவட்டம் ஆத்தூர் அருகே உள்ள பாப்பநாயக்கன் பட்டியை சேர்ந்தவர் ரவிச்சந்திரன். இன்ஸ்பெக்டரான இவர் கடந்த சில ஆண்டுகளுக்கு முன்பு இறந்து விட்டார்.

இவரது மனைவி மலர்கொடி (45). இவர்களுக்கு கமலேஷ் என்ற மகனும், திவ்யஸ்ரீ (16) என்ற மகளும் உள்ளனர்.

கமலேஷ் சென்னையில் தங்கி என்ஜினீயரிங் படித்து வருகிறார். திவ்யஸ்ரீ பேர்லேண்ட்ஸ் பகுதியில் உள்ள ஒரு தனியார் பாடசாலையில் படித்து வந்தார். இதற்காக மலர்கொடி அந்த பகுதியில் வீடு வாடகைக்கு எடுத்து மகளுடன் வசித்தார்.

இவர்கள் காலாண்டு தேர்வு விடுமுறைக்காக சொந்த ஊரான பாப்ப நாயக்கன் பட்டிக்கு சென்றனர். அங்கு கடந்த 3-ம் திகதி மாணவி திவ்யஸ்ரீ வீட்டில் சேலையில் தூக்குப்போட்டு பிணமாக தொங்கினார்.

இதுப்பற்றி அவரது தாய் மலர்கொடியிடம் பொலிசார் விசாரணை நடத்திய போது, சரியாக சமைக்க சொன்னதால் அவள் தற்கொலை செய்து கொண்டாள் என்று கூறினார். மேலும் மாணவியின் தாத்தா ரங்கசாமி என்பவர் திவ்யஸ்ரீ சாவில் சந்தேகம் உள்ளது என்று புகார் செய்தார்.

மேலும் மாணவியின் தாய் மலர்கொடியும் இதே போல் ஒரு புகார் கொடுத்தார்.

இந்த நிலையில் மாணவி திவ்யஸ்ரீயின் பிரேத பரிசோதனை அறிக்கை கிடைத்தது. அதில் மாணவியின் முதுகு, மற்றும் வயிற்று பகுதியில் காயம் இருந்தது தெரியவந்தது.

இதன் பேரில் பொலிசார் விசாரணை மேற்கொண்டனர் அப்போது மாணவியின் தாய் மலர்கொடிக்கும், ராசிபுரம் பகுதியை சேர்ந்த கதிர்வேல் (35) என்ற சாரதிக்கும் கள்ளத்தொடர்பு இருப்பது தெரியவந்தது.

இதையடுத்து பொலிசார் அவர்களை பிடித்து விசாரித்தனர். அப்போது மாணவி திவ்யஸ்ரீ இவர்களின் தொடர்பை கண்டித்ததாகவும், இதனால் ஆத்திரம் அடைந்த அவர்கள் மாணவியை தாக்கியதும் தெரியவந்தது.

எனவே இதில் மனம் உடைந்த மாணவி தூக்குப்போட்டு தற்கொலை செய்து கொண்டுள்ளார். இதையடுத்து பொலிசார் தற்கொலைக்கு தூண்டியதாக மலர்கொடி அவரது கள்ளக்காதலன் கதிர்வேல் ஆகியோரை கைது செய்தனர்.

மேலும் மாணவி தூக்குப்போட்டு கொண்ட சேலையை எரித்த துரைசாமி (64) என்பவரையும் பொலிசார் கைது செய்தனர்.

தனது மகள் சாவு குறித்து விசாரணை நடத்த வேண்டும் என்று புகார் கொடுத்த தாயே இந்த வழக்கில் கள்ளக்காதலனுடன் கைது செய்யப்பட்டு இருப்பது அந்த பகுதியில் பரபரப்பை ஏற்படுத்தியுள்ளது.