ரஜினிகாந்த் நடிப்பில் தயாராகி இருக்கும் கோச்சடையான் படம் குறித்து பல்வேறு செய்திகள் வெளிவந்த வண்ணம் இருந்தது. கோச்சடையான் படம் டிராப்பாகி விட்டதாகவும், கே.எஸ்.ரவிக்குமார் இயக்கத்தில் ரஜினி நடிக்க இருக்கிறார் என்றும் செய்திகள் உலவின.

சென்ற வாரத்தில் கூட ஷங்கர் ரஜினியை சந்தித்து படம் குறித்து பேசியதாகவும் செய்திகள் வெளியாகின. இச்செய்திகள் அத்தனையும் பொய்யாக்கி இருக்கிறது கோச்சடையான் படக்குழு.

கோச்சடையான் படம் குறித்து தயாரிப்பாளர்களில் ஒருவரான முரளி மனோகர் கூறியிருப்பது ஜேம்ஸ் கேமரூன் இயக்கிய அவதார், ஸ்பீல்பெர்க் இயக்கிய டின் டின் ஆகிய படவரிசையில் கோச்சடையான் படம் மிக நவீன தொழில்நுட்பத்தில் உருவாகியிருக்கிறது. அவதார், டின் டின் ஆகிய இரண்டு ஹாலிவுட் படங்களும் தலா ரூ.2 ஆயிரம் கோடி செலவில், நான்கு வருடங்களில் தயாரானவை.

கோச்சடையான் படத்தை நாங்கள் ஹாலிவுட் படங்களுக்கு இணையாக 125 கோடி செலவில் இரண்டு வருடங்களில் உருவாக்கியிருக்கிறோம். படத்தில் கிராபிக்ஸ் வேலைகளும் நவீன தொழில்நுட்பங்களும் அதிகமாக இடம்பெற்றிருப்பதால்தான் தாமதம் ஏற்பட்டுள்ளது.

கோச்சடையான் படம் தமிழ் திரை உலகில் மிகப்பெரிய முயற்சி. நிச்சயமாக இந்த படத்தை அனைத்து தரப்பு மக்களும் பார்த்து பாராட்டுவார்கள். இளமையான தோற்றத்தில் ரஜினிகாந்த் செய்திருக்கும் சாகசங்கள் பரபரப்பாக பேசப்படும்.

கோச்சடையான் படத்தை ரஜினிகாந்த் பார்த்துவிட்டு அசந்தார். இயக்குனர் கே.எஸ்.ரவிக்குமார் படமே பார்க்காதவர்கள்கூட இந்த படத்தை இரண்டு முறை பார்ப்பார்கள் என்று கூறினார். இயக்குனர் சவுந்தர்யா மிகத்திறமையாக ஒரு சவாலாக எடுத்துக்கொண்டு இந்த படத்தை இயக்கி இருக்கிறார்.

படப்பிடிப்பு, எடிட்டிங் பணிகள் முடிவடைந்தன. பின்னணி இசைக் கோர்ப்பு பணிகள் நடைபெறுகின்றன. ஸ்பெஷல் எபக்ட்ஸ் வேலைகளும் நடைபெறுகின்றன. செப்டம்பர் மாதத்துக்குள் எல்லா வேலைகளும் முடிவடைந்துவிடும்.

படம் திரைக்கு வரும் தேதி பற்றி ஒக்டோபர் மாதம் முடிவு செய்யப்படும். கோச்சடையான் படம் இந்த ஆண்டில் கண்டிப்பாக திரைக்கு வரும் என்று தெரிவித்து இருக்கிறார்.

கொலிவுட்டில் ஸ்ரீ சத்யசாய் மூவீஸ் சார்பில் ரகுராமன் தயாரிப்பில் விஷ்ணுவர்த்தன் இயக்கும் அஜீத் படத்திற்கு கடந்த ஒரு வருடமாக பெயர் சூட்டப்படாமல் இருந்து வந்தது.
இந்நிலையில் இந்த படத்துக்கு ‘ஆரம்பம்’ என பெயர் சூட்டப்பட்டுள்ளது.

அஜீத் சுய விளம்பரம் செய்யும் வகையில் வரும் தலைப்பையோ, சுய புகழ் பாடும் தலைப்பையோ வைக்ககூடாது என்று தயாரிப்பாளரிடமும் இயக்குனரிடமும் கோரிக்கை வைக்க கதையின் கருவுக்கு ஏற்றவாறு தற்போது ‘ஆரம்பம்’ என்று பெயரிடப்பட்டுள்ளது.

இப்படத்தில் அஜீத்துக்கு ஜோடியாக நயன்தாரா நடித்துள்ளார். மேலும் ஆர்யா, டாப்ஸி ஆகியோரும் நடித்துள்ளனர். யுவன் சங்கர் ராஜா இசையமைத்துள்ளார்.

படம் முடிந்து தற்போது தணிக்கை குழுவுக்கு அனுப்பும் நிலையில் உள்ளது. இப்படத்தின் இறுதிக்கட்ட வேலைகள் முடிவடைந்துள்ள நிலையில் விரைவில் வெளியிட முடிவு செய்துள்ளனர்.

ஏற்கெனவே விஷ்ணுவர்தன்-அஜீத் கூட்டணியில் வெளிவந்த ‘பில்லா’ பெரும் வெற்றியை பெற்றது.

இந்நிலையில் இந்த கூட்டணியில் உருவாகியுள்ள இந்த படத்தை ரசிகர்கள் மிகவும் எதிர்பார்த்து காத்திருக்கின்றனர்.

தனுஷ் – சோனம் கபூர் நடிப்பில் இந்தியில் வெளியான ராஞ்ஜனா 100 கோடியை வசூலித்து சாதனைப் படைத்துள்ளது. பாலிவுட்டில் எந்த புதிய நடிகருக்கும் கிடைக்காத கவுரவமாக இது பார்க்கப்படுகிறது. இந்த வெற்றி தனுஷின் சமீபத்திய வெளியீடான மரியானுக்குக் கிடைத்த மரண அடிக்கு ஒத்தடமாக அமைந்துள்ளது.

தனுஷ் நடித்த முதல் இந்திப் படம் இந்த ராஞ்ஜனா. ஆனந்த் எல்ராய் இயக்கியிருந்தார். சோனம் கபூர் நாயகியாக நடித்தார். ஏஆர் ரஹ்மான் இசையமைத்திருந்தார். கடந்த ஓராண்டாக தயாரிப்பிலிருந்த ராஞ்சனா கடந்த மாதம் பெரும் எதிர்ப்பார்ப்புக்கிடையே வெளியானது. காதல் – அரசியல் கலந்த இந்தப் படத்து நல்ல ஆரம்பம் கிடைத்தது.

படத்தை வட இந்திய மீடியாக்கள் கொண்டாடின என்றால் மிகையல்ல. குறிப்பாக தனுஷ் நடிப்பை பாராட்டின. இந்த ஆண்டும் அவருக்குத்தான் தேசிய விருது என்றெல்லாம் எழுதின. அதற்கு தான் தகுதியானவர்தான் என தனுஷும் படத்தில் நிரூபித்திருந்தார்.

தமிழில் இந்தப் படம் அம்பிகாபதி என்ற பெயரில் டப் செய்யப்பட்டு வெளியானது. எல்லோரையும் ஆச்சர்யப்படுத்தும் விதத்தில் இந்தப் படத்துக்கும் சிறப்பான ஆரம்பம் கிடைத்தது தமிழகத்தில். முதல் மூன்று நாட்களில் 2 கோடி வரை இந்த டப்பிங் படம் வசூலித்தது.

ராஞ்ஜனா படம் உலகம் முழுவதும் வெளியானது. அமெரிக்காவில் ஓரளவு திரையரங்குகள் பிடித்திருந்தனர். படத்தின் வெற்றி கூடுதல் அரங்குகளில் படத்தை வெளியிட வைத்தது. இந்தியாவில் உபி, டெல்லி, பீகார் பகுதிகளில் படம் சூப்பர் ஹிட்.

ஒரு படத்தின் வசூலை நிர்ணயிக்கும் பெரிய ஏரியாக்கள் இவை. மகாராஷ்ட்ரா, மத்திய பிரதேஷிலும் படத்துக்கு நல்ல வரவேற்பு. வட மேற்கு இந்தியாவில் இந்தப் படம் அதிக அரங்குகளில் வெளியாகி வசூலை அள்ளியது. இதன் விளைவு வெளியான மூன்று வாரங்களில் ரூ 100 கோடியை குவித்துள்ளது ராஞ்ஜனா.

படத்தின் இந்த பிரமாண்ட வெற்றியைக் கொண்டாடும் விதமாக இன்று மும்பையில் விழாவுக்கு ஏற்பாடு செய்யப்பட்டுள்ளது. அதில் பங்கேற்கிறார்கள் நடிகர் தனுஷ். அவரைப் பொறுத்தவரை, கடின உழைப்புக்கும் தன்னம்பிக்கைக்கும் கிடைத்த பெரிய வெற்றி இந்த 100 கோடி!

தன்னைத் தேடி வரும் எல்லா கதைகளையும் ஒப்புக் கொள்வதில்லை நயன்தாரா. கதை நன்றாக இருக்க வேண்டும், தனக்கு முக்கியத்துவம் அளிப்பதாக இருக்க வேண்டும், ஹீரோ பெரிய ஆளாக இருக்க வேண்டும் – இந்த மூன்று கொள்கைகளையும் தவறாமல் கடைப்பிடிக்கிறார்.

இருந்தாலும் நயனின் கால்ஷீட் டைரி நிரம்பி வழிந்தபடி தான் இருக்கிறது. ஹீரோ சரியில்லை, கதை சரியில்லை என பல படங்களைத் தவிர்த்து விடுகிறார். இதனால் கடுப்பான தயாரிப்பாளர்களும், இயக்குநர்களும் நயன்தாரா போலவே இருக்கும் நஸ்ரியாவை நோக்கிப் படையெடுக்கின்றனர்.

போதாக்குறைக்கு அடுத்த நயன்தாரா நஸ்ரியா தான் எனவும் போஸ்டர் அடித்து ஒட்டாத குறையாக வெளியில் சொல்லி வருகின்றனர். ஏற்கெனவே நயன்தாரா போலவே இருக்கிறார் என நஸ்ரியா அறிமுகமானபோது வந்த விமர்சனங்களைப் பார்த்து கடுப்பானார் நயன்.

இப்போது ஆர்யா, தனுஷ், கார்த்தி என முன்னணி ஹீரோக்களுடன் ஜோடி சேர்ந்துள்ளதால், எங்கே தனக்கு வரும் வாய்ப்புகளை ஒட்டுமொத்தமாக பறித்து விடுவாரோ என பயத்தில் இருக்கிறாராம் நயன்.