எங்களுடைய நாட்டில் எங்களுடைய பிரதேசத்தில் பெண்களுக்கு இருக்கின்ற அச்சுறுத்தல் பெண்கள் தனியாக ஒரு இடத்திற்குச் சென்று வர முடியாத சூழ் நிலைதான் இன்றைய நாட்களில் இருக்கின்றது. பெண்களுக்குரிய கௌரவம் இல்லை. அவர்களுக்கு தனிமனித சுதந்திரம் இல்லை தற்போது இருக்கின்ற சூழ்நிலையில் அனுபவிக்க முடியாமல் இருக்கின்றது.

இந்த நிலை மாற்றப்படவேண்டும். தமிழீழ விடுதலைப்புலிகள் கடந்த காலத்தில் ஆட்சி செய்தபோது ஒரு தன்னம்பிக்கையுடன், பெண்கள் ஒரு கௌரவமாக எந்தநேரத்திலும் போர்ச்சூழல் இருந்தாலும் ஒரு மன நிம்மதியாக வாழ்ந்த காலம் இருந்தது. இவ்வாறு இன்று (14.03) வவுனியாவில் இடம்பெற்ற சர்வதேச பெண்கள் தினத்தில் கலந்து கொண்டு உரையாற்றும்போது வன்னி மாவட்ட நாடாளுமன்ற உறுப்பினர் சார்ஸ் நிர்மலநாதன் தெரிவித்துள்ளார்.

அவர் மேலும் தெரிவிக்கையில், அன்று எங்களுடைய பெண்களுக்கு இருந்த கௌரவம் தன்னம்பிக்கை, பெண் சுதந்திரம் இன்று இல்லை. 2009ம் ஆண்டிற்குப் பிற்பாடு எங்களுடைய காலச்சாரத்தை எடுத்துப் பாருங்கள், அந்தக்காலத்தில் ஏதாவது ஒது பத்திரிக்கையில் எங்களுடைய பிரதேசத்தில் பாலியல் துஷ்பிரயோகம் தொடர்பான செய்திகள் வருவது மிகவும் அரிதானது.

ஆனால் தற்போது அது வாரத்திற்கு ஒரு முறை பத்திரிகையில் வருகின்ற ஒரு செய்தியாக நாங்கள் பார்க்கின்றோம். எங்களுடைய சமுதாயம் எந்த அளவிற்கு கலாச்சார ரீதியில் பின்னோக்கிப் போகின்றது என்பதை அந்தச் செய்திகள் மூலம் நாங்கள் அறிந்து கொள்ளமுடியும். கணவன்மாரை இழந்த அந்தப் பெண்கள் தங்களுடைய பிள்ளைகளையும் கொண்டு அவர்கள் எப்படி கௌரவமாக பெண் சுதந்திரத்துடன் வாழ முடியும்.

காணாமல் ஆக்கப்பட்ட குடும்பங்கள் மற்றும் பெண் தலைமை தாங்கும் குடும்பங்கள் இந்த இரண்டு குடும்பங்களுக்கும் இந்த அரசாங்கத்தினால் ஒரு சுயமாக தங்களுடைய சுயமுயற்சியில் தங்களுடைய குடும்பத்தை நடாத்தக்கூடிய அளவிற்கு அவர்களுக்குரிய வாழ்வாதார பொருளாதார உதவிகளை இந்த அரசாங்கம் வழங்க வேண்டும் என்று மேலும் தெரிவித்தார்.

பிலியந்தலை – கொழும்பு வீதியில் இடம்பெற்ற வாகன விபத்தில் இறுதி பரீட்சையில் கலந்து கொள்வதற்காக சென்ற பல்கலைக்கழக மாணவர் ஒருவர் பரிதாபமாக உயிரிழந்துள்ளார்.

பொரலஸ்கமுவ மற்றும் வெரஹெர பிரதேசத்திற்கும் இடையே நேற்று மாலை இடம்பெற்ற இந்த வாகன விபத்திலேயே குறித்த மாணவன் உயிரிழந்ததுடன், மேலும் ஒருவர் படுகாயமடைந்துள்ளார்.

சொகுசு மோட்டார் வாகனம் ஒன்றும் உந்துருளியும் மோதியே இந்த விபத்து இடம்பெற்றுள்ளதாக பொலிஸார் தெரிவித்துள்ளனர்.

உயிரிழந்தவர் கொதலாவல பாதுகாப்பு பல்கலைக்கழகத்தில் இணைந்த சுகாதார பீடத்தில் இறுதி ஆண்டில் கல்வி கற்று வந்த மாணவர் எனவும், இறுதி பரீட்சையில் கலந்து கொள்வதற்காக சென்ற போதே இந்த விபத்து இடம்பெற்றுள்ளதாகவும் தெரிவிக்கப்படுகின்றது.

அத்துடன், இந்த விபத்தில் உயிரிழந்த ஹெரகஸ்கட பிரதேசத்தை சேர்ந்த 26 வயதான இளைஞர் என பொலிஸார் தெரிவித்துள்ளனர்.
இதேவேளை, படுகாயமடைந்த சக மாணவன் சிகிச்சைக்காக கொழும்பு தேசிய மருத்துவமனையில் அனுமதிக்கப்பட்டுள்ளார்.

யாழில் கணவனொருவர் மனைவி மீது கோடாரியால் தாக்கியதால் மனைவி படுகாயங்களுக்கு உள்ளாகி யாழ்.போதனா வைத்தியசாலையின் அதி தீவிர சிகிச்சைப் பரிவில் அனுமதிக்கப்பட்டுள்ளார்.

யாழ். கல்வியங்காடு 03 ஆம் கட்டைப் பகுதியைச் சேர்ந்த செந்தூரன் ஜெயவதனி என்பவரே இவ்வாறு கோடாரி வெட்டுக்கு இலக்காகியுள்ளதாக தெரிவிக்கப்படுவதுடன், யாழ். திருநெல்வேலி சந்தியில் உள்ள அழகுபடுத்தல் நிலையத்தில் வைத்து மனைவி மீது கணவனால் தாக்குதல் நடத்தப்பட்டுள்ளது.

இந்த சம்பவம் இன்று செவ்வாய்க்கிழமை காலை இடம்பெற்றுள்ளதுடன் மனைவியின் தகாத உறவுகளை அறிந்த கணவர் இவ்வாறு கொடூரமான முறையில் மனைவியை வெட்டியுள்ளதாக தெரிவிக்கப்படுகிறது.

இதேவேளை கடந்த சில மாதங்களுக்கு முன்னர் பொலிஸ் உத்தியோகத்தர் ஒருவர் குறித்த பெண்னுடன் தொடர்பு வைத்திருந்ததுடன், கதிர்காமம் வரை சென்ற சம்பவம் பொலிஸ் நிலையத்திற்கு தெரியவந்ததை அடுத்து அந்த பொலிஸ் உத்தியோகத்தர் பொலிஸ் திணைக்களத்தினால் இடமாற்றம் செய்யப்பட்டிருந்தார்.

இந்த நிலையில் மனைவியின் இவ்வாறான தொடர்புகளை அறிந்தாலேயே குறித்த கணவர் மனைவியை அழகுபடுத்தல் நிலையத்தில்வைத்து கோடாரியால் தாக்கியுள்ளதாக தெரிவிக்கப்படுகின்றமை குறிப்பிடத்தக்கது.

மேலும் சம்பவம் தொடர்பாக கோப்பாய் பொலிஸார் விசாரணை மேற்கொண்டு வருகின்றார்கள்.

காதலுக்கு வயதெல்லை கிடையாது என்பது உண்மைதான். அந்த வகையில் 32 வயதுடைய ஆண் ஒருவருக்கும் 52 வயதுடைய பெண் ஒருவருக்கும் காதல் மலர்ந்துள்ளது.

ஹோமாகம வைத்தியசாலையில் சிகிச்சைப் பெற்று வந்த போதே இருவரும் ஒருவரை ஒருவர் சந்தித்துள்ளனர். இருவரும் தங்கள் காதலை பகிர்ந்துக் கொண்டிருந்த சில நாட்களிலேயே ஹோட்டலில் சந்திப்பை ஏற்படுத்தியுள்ளனர்.

திருமணம் ஒன்றில் கலந்துகொள்ள வேண்டும், பணம் இருந்தால் தா என குறித்த 32 வயது நபர் கேட்டுள்ளார். காதலில் கண்மூடித்தனமாக இருந்த அந்த 52 வயது பெண், 10 ஆயிரம் ரூபா பணத்தையும் அணிந்திருந்த தங்க ஆபரணத்தையும் (chain) கொடுத்துள்ளார்.

இரண்டு நாட்களில் நான் திரும்பி வருவேன் என குறித்த நபர் அந்த பெண்ணிடம் சத்தியம் செய்துள்ளார். இருப்பினும் அவர் திரும்பி வரவில்லை.

இதனையடுத்து, குறித்த பெண் தன் 19 வயது மகனுடன் சென்று கொட்டாவ பொலிஸ் நிலையத்தில் முறைப்பாடு பதிவு செய்துள்ளார்.

சந்தேகநபர் தொடர்பில் தகவல் தெரிவித்துள்ள போதும், அந்த தகவலை சந்தேகநபரை அடையாளம் காண்பதற்கு போதுமானதாக இல்லை என பொலிஸார் கூறியுள்ளனர்.

பண்டாரநாயக்க சர்வதேச விமான நிலையத்தின் திருத்த வேலைகள் மற்றும் விமான ஓடுபாதைகளைச் சீரமைக்கும் பணிகள் இன்னும் இரு வாரங்களில் பூர்த்தியாகும் எனத் தெரியவருகிறது.

இது பற்றித் தெரிவித்த போக்குவரத்து மற்றும் சிவில் விமான சேவைகள் அமைச்சின் அதிகாரியொருவர், இன்னும் இரண்டு வாரங்களில் விமான நிலையத்தை முழுமையாகத் திறந்துவிட ஏற்பாடுகள் நடைபெறுவதாகவும், எனினும், இதனால் பயணிகளுக்கு எந்தவித நன்மையும் உடனடியாகக் கிடைத்துவிடாது என்றும் அவர் குறிப்பிட்டார்.

விமான நிலையத் திருத்தப் பணிகள் நிறைவுற்றாலும் சர்வதேச விமான சேவைகள் உடனடியாகத் தமது பயணத் திட்டத்தில் மாற்றங்களைச் செய்வதில் சிக்கல்கள் இருப்பதால், சர்வதேச விமானச் சேவைகள் தற்போது நடைமுறையில் இருப்பது போலவே மாலை 6 மணி முதல் காலை 8.30 மணிவரை மட்டுமே நடைபெறும் என்றும் அவர் தெரிவித்தார்.

எவ்வாறெனினும், இந்தியாவுக்கான ஸ்ரீலங்கன் எயார்லைன்ஸ் விமானச் சேவைகளில் குறிப்பிடத்தக்களவு மாற்றங்களை உடனடியாகச் செய்ய வாய்ப்புகள் இருப்பதாகவும் அவர் தெரிவித்தார்.

இதேவேளை, பெரும்பாலான சீனர்கள் மத்தள விமான நிலையத்தையே பயன்படுத்துவதாகவும், இதனால் பண்டாரநாயக்க விமான நிலையம் இயல்பு நிலைக்கு வரும் வரையில் மத்தள விமான நிலையப் பயன்பாட்டை நிறுத்திவிட வேண்டாமென்றும் போக்குவரத்து மற்றும் சுற்றுலாப் பயண நிறுவனங்கள் கோரிக்கை விடுத்துள்ளன.

ஹட்டன், வட்டவல, ரொசெல்ல, மாணிக்கவத்தை பிரதேசத்தை சேர்ந்த 14 வயதான பாடசாலை மாணவியை திருமணம் செய்வதாக கூறி, கடத்திச் சென்று பாலியல் துஷ்பிரயோகத்திற்கு உட்படுத்திய இளைஞனை ஹட்டன் பொலிஸார் கைது செய்துள்ளனர்.

இளைஞனுக்கு உதவிய அவரது நண்பனையும் பொலிஸார் கைது செய்துள்ளனர். ஹட்டன் பிரதேசத்தில் இருந்து மாணவியை சில வெளியிடங்களுக்கு அழைத்துச் சென்று சந்தேக நபர் பாலியல் துஷ்பிரயோகத்திற்கு உள்ளாகியுள்ளதாக விசாரணைகளில் தெரியவந்துள்ளது.

தொலைபேசி தொடர்பு மூலம் சந்தேக நபருக்கும் பாடசாலை மாணவிக்கும் இடையில் காதல் ஏற்பட்டுள்ளது. இந்த நிலையில், கடந்த 23ஆம் திகதி பாடசாலை மாணவி காணாமல் போனதாக அவரது பெற்றோர் ஹட்டன் பொலிஸ் நிலையத்தில் முறைப்பாடு செய்தனர்.

முறைப்பாட்டின் அடிப்படையில் விசாரணைகளை மேற்கொண்ட பொலிஸ் அதிகாரிகள், சந்தேக நபர், பாடசாலை மாணவியை நண்பர் ஒருவரின் வீட்டில் தங்க வைத்து விட்டு, கொட்டகலை பிரதேசத்தில் தலைமறைவாக இருப்பதாக கண்டறிந்துள்ளனர்.

இதனையடுத்து சந்தேக நபரை பொலிஸார் இன்று கைது செய்துள்ளனர். பாடசாலை மாணவி, சந்தேக நபரின் நண்பரும் கடந்த 7ஆம் திகதி கைது செய்யப்பட்டனர்.

மாணவியை நாவலப்பிட்டி சட்டவைத்திய அதிகாரி அனுப்பி பரிசோதித்து அறிக்கையையும் பொலிஸார் பெற்றுக்கொண்டுள்ளனர்.

கைது செய்யப்பட்டுள்ள இரண்டு சந்தேக நபர்களையும் ஹட்டன் நீதவான் நீதிமன்றத்தில் முன்னிலைப்படுத்த உள்ளதாக பொலிஸார் தெரிவித்துள்ளனர்.

ஆணமடுவ பகுதியில் உள்ள 14 வயது சிறுமி ஒருவர் துஸ்பிரயோகத்திற்கு உட்படுத்தப்பட்டுள்ளார்.

பேருந்தில் பயணம் செய்யும் போது சந்தித்த நபர் ஒருவரே இவ்வாறு சிறுமியை 4 முறை பாலியல் வல்லுறவுக்கு உட்படுத்தியுள்ளதாக பொலிஸார் குறிப்பிட்டுள்ளனர்.

இந்த சம்பவம் விடுதி ஒன்றிற்கு அழைத்துச் செல்லப்பட்டு இடம்பெற்றுள்ளதாகவும் தெரிவிக்கப்பட்டுள்ளது.

சிறுமி ஒருவரை விடுதிக்கு அழைத்துச் சென்றமை தொடர்பில் விடுதி உரிமையாளர், கவனத்திற்கொள்ளாமையால் உரிமையாளரையும் சந்தேநபரையும் பொலிஸார் கைது செய்துள்ளனர்.

பாதிக்கப்பட்ட சிறுமி, ஹலவத்த ஆதார வைத்தியசாலையில் அனுமதிக்கப்பட்டுள்ளதுடன், சம்பவம் தொடர்பில் பொலிஸார் மேலதிக விசாரணைகள் முன்னெடுத்து வருகின்றனர்.